Azərbaycan Respublikasının Ekologiya və Təbii Sərvətlər Nazirliyi bir mənbədən satınalma metodu tətbiq etməklə 2026-cı ilin 5 iyun tarixində Bakı şəhərində BMT-nin Ətraf Mühit Proqramı (UNEP) tərəfindən keçiriləcək “Ümumdünya Ətraf Mühit Günü” – WED2026 (World Environment Day) çərçivəsində yüksək səviyyəli beynəlxalq tədbirin təşkili ilə əlaqədar xidmətlər üzrə “LEGACY EVENTS MANAGEMENT” Məhdud Məsuliyyətli Cəmiyyəti ilə 445.480,92 manat dəyərində müqavilə bağlayıb. Məlumat satınalmaların portalında 28.04.2026-cı ildə dərc edilib.

Qeyd edək ki, “Dövlət satınalmaları haqqında” Qanunun 15.1 maddəsində göstərilir ki, məxfi məlumatlarla əlaqəli satınalmalar istisna olmaqla, bütün dövlət satınalmaları yalnız portal vasitəsilə həyata keçirilir.

Eyni zamanda Qanunun 49-cu maddəsində qeyd olunur ki, bir mənbədən satınalma metodu aşağıdakı hallarda tətbiq olunur: satınalma predmeti yalnız hər hansı konkret təchizatçıda olduqda; satınalma predmetinin əvəzedicisi və alternativi olmadıqda; satınalma predmetinə təcili tələbat yarandıqda; təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə; satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.

Qanunun tələblərindən də göründüyü kimi, beynəlxalq tədbirin təşkili işlərinin satın alınması məxfi məlumatla əlaqəli satınalma hesab oluna bilməz. Amma göründüyü kimi Ekologiya və Təbii Sərvətlər Nazirliyinin bir mənbədən satınalma metodu ilə bağladığı müqavilə 2026-cı ilin 5 iyun tarixində Bakı şəhərində keçiriləcək beynəlxalq tədbirin təşkili ilə əlaqədardır. Yəni qurum Qanunun da yol verdiyi kimi satınalma predmetinə təcili tələbat yarandığına görə bir mənbədən satınalma metodu tətbiq edib.

Bu Qanunun digər tələblərinin pozulmaması şərti olmalıdır. Nazirliyin müqavilə bağladığı “LEGACY EVENTS MANAGEMENT” MMC konkret təchizatçı da deyil, sözügedən satınalma predmetinin də kifayət qədər əvəzedicisi və alternativi var.

Amma göründüyü kimi Ekologiya və Təbii Sərvətlər Nazirliyi cəmi bir il əvvəl dövlət qeydiyyatına alınmış və analoji işlərdə heç bir təcrübəsi olmayan bir MMC ilə satınalma müqaviləsi bağlamışdır.

Qeyd edək ki, açıq mənbələrdə “LEGACY EVENTS MANAGEMENT” MMC barəsində heç bir məlumat yoxdur. Bu günə qədər hansısa rəsmi bir beynəlxalq səviyyəli tədbirin təşkilatçısı olsaydı sosial şəbəkələrdə və yaxud mediada bir xəbər yayılmış olardı. Yəni,ən azından analoji işlərdə təcrübəsinin olduğu bəlli olardı. Amma bununla bağlı heç bir məlumat yoxdur. Yalnız, bu rəsmi məlumatdan başqa.

Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “LEGACY EVENTS MANAGEMENT” (VÖEN: 1605717101) Məhdud Məsuliyyətli Cəmiyyətinin Bakı şəhəri Lokal Gəlirlər Baş İdarəsində 07.03.2025-ci il tarixdə dövlət qeydiyyatına alındığı göstərilir. Reyestr məlumatlarında nizamnamə kapitalı 100 manat olan MMC-nin hüquqi ünvanı BAKI ŞƏHƏRİ, NİZAMİ RAYONU, YAVƏR ƏLİYEV, ev.1b, m.1/30, qanuni təmsilçisinin isə İsayev İsmayıl Abdulla oğlu olduğu qeyd edilib. MMC Quliyeva Gülnaz Arif qızı tərəfində təsis edilib.

Dövlət Vergi Xidmətinin məlumatlarından da göründüyü kimi MMC bir il iki ay əvvəl yaradılıb. Ekologiya və Təbii Sərvətlər Nazirliyi bu MMC ilə müqavilə bağlayarkən təchizatçıların uyğunluq göstəriciləri ilə bağlı tələbləri gözardı etdiyi açıq aşkar görsənmədir. Bu MMC-nin rəsmi bir beynəlxalq səviyyəli tədbirin təşkil etmək üçün maddi tüxniki bazası, dil biliklərinə sahib işçi qüvvəsi varmı? Bu suallar qaranlıq qalmaqdadır və ümumiyyətlə “LEGACY EVENTS MANAGEMENT” MMC-nin ETSN-də kimlərəsə bağlı olduğunu istisna etmir.

Qeyd edək ki, Ekologiya və Təbii Sərvətlər naziri Rəşad İsmayılovdur. O, Prezident İlham Əliyevin 10 fevral 2026-cı il tarixli Sərəncamı ilə sözügedən vəzifəyə təyin edilmişdir. Rəşad İsmayılov daha əvvəllər Dövlət Şəhərsalma və Arxitektura Komitəsində Aparat rəhbəri, 2024-2026-cı illərdə ekologiya və təbii sərvətlər nazirinin birinci müavini vəzifələrində işləmişdir.

Göründüyü kimi Rəşad İsmayılov Ekologiya və Təbii Sərvətlər naziri vəzifəsinə qısa müddətir təyin olunmasına baxmayaraq artıq şübhəli şirkətlərlə işbirliyinə başlanılıb. Belə bir mötəbər, beynəlxalq səviyyəli tədbirin təşkili işlərini həvale etdikləri “LEGACY EVENTS MANAGEMENT” MMC-ni isə çox güman ki, özlərindən başqa heç kim tanımır.

Aktualinfo.net

Səhiyyə Nazirliyinin Analitik Ekspertiza Mərkəzi tərəfindən özəl tibb müəssisələrində onlarla yoxlama keçirilməsi və “Medicare Klinikası” MMC-də lisenziyadan kənar fəaliyyətin aşkar olunması rəsmi şəkildə yayımlandı
Hətta verilmiş müddət ərzində nöqsanlar aradan qaldırılmadığı üçün klinikanın lisenziyasının dayandırılması barədə qərar qəbul edildiyi bildirilirdi.Lakin ortaya çıxan sual son dərəcə ciddidir: əgər lisenziya dayandırılıbsa, bu klinika hansı əsasla fəaliyyətini davam etdirir? Bu, artıq təkcə inzibati pozuntu deyil, “Lisenziyalar və icazələr haqqında” qanunun və vətəndaşların sağlamlıq hüququnun açıq şəkildə sual altına düşməsi deməkdir. Əgər klinikanın lisenziyası rəsmi qaydada bərpa olunmayıbsa, fəaliyyət göstərməsi qanunvericilik baxımından ciddi pozuntu sayılır.Mediatvaz.com xəbər verir ki,digər narahatedici məqam isə bəzi həkimlərlə əmək müqavilələrinin bağlanmaması ilə bağlı iddialardır. Bu hal təsdiqini taparsa, bu, həm Əmək Məcəlləsinin, həm də tibbi fəaliyyətin tənzimlənməsi qaydalarının kobud şəkildə pozulması anlamına gəlir.Ən narahatedici məqam isə odur ki, daha əvvəl bu klinikada ölüm faktının baş verdiyi bildirilir. Belə bir hadisədən sonra nəzarətin sərtləşdirilməsi gözlənildiyi halda, əksinə, eyni müəssisə ətrafında yeni suallar yaranır.
Belə ki, 2023-ci ilin aprel ayında 23 yaşlı Arzu Əzimovanın estetik əməliyyatdan sonra həyatını itirməsi ilə bağlı yayılan məlumatlar o zaman cəmiyyətdə ciddi narahatlıq doğurmuşdu. Bildirilirdi ki, o, Medicare Klinikasında rinoplastika əməliyyatı keçirib, əməliyyatdan sonra vəziyyəti ağırlaşaraq komaya düşüb və aparılan tibbi müdaxilələrə baxmayaraq vəfat edib.Tirajlanan məlumatlarda iddia olunurdu ki, əməliyyatı icra edən həkimin estetik cərrahiyyə aparmaq üçün müvafiq sertifikatı olmayıb. Eyni zamanda həmin həkimlə “Medicare” klinikası arasında rəsmi əmək müqaviləsinin mövcud olmadığı da qeyd edilirdi.Diqqətçəkən başqa bir məqam isə bunun tək hadisə olmamasıdır. 21 dekabr 2023-cü il tarixində də 1971-ci il təvəllüdlü Lətafət Məmmədovanın “Medicare” klinikasında əməliyyat zamanı həyatını itirdiyi barədə rəsmi məlumat yayılmışdı. Qısa zaman aralığında eyni müəssisə ətrafında iki ölüm faktının hallanması sualları daha da artırır.İnsan həyatı üzərindən yaranan suallar cavabsız qaldıqca, ictimai etimad daha da sarsılır. Səssizlik isə bu kimi hallarda ən təhlükəli mövqedir.Belə hadisələrdən sonra nəzarətin gücləndirilməsi gözlənildiyi halda, əksinə, iddiaların davam etməsi ictimai narahatlığı artırır.Çünki burada söhbət təkcə qaydalardan yox, insan həyatından gedir – və bu mövzuda səssizlik qəbulolunmazdır.
Davamı var..
Mediatvaz.com

Bərdə Rayon İcra Hakimiyyəti başçısı aparatının Memarlıq və tikinti şöbəsinin sabiq müdiri – baş memar Toğrul Şadlinskiyə hökm oxunub.
Bizimesr.az bildirir ki, 1987-ci il təvəllüdlü Toğrul Şadlinskiyə Azərbaycan Respublikası Cinayət Məcəlləsinin 178.2.2, 178.2.3 və 178.2.4-cü maddələri ilə cinayət işi açılıb.
Məlum olub ki, Toğrul Şadlinski Bərdə Rayon İcra Hakimiyyəti başçısı Vidadi İsayevin əmri ilə aparıcı məsləhətçi vəzifəsindən azad olunaraq, 2023-cü ilə qədər Memarlıq və tikinti şöbəsinin müdiri – baş memar vəzifəsində işlədiyi dövrdə bir sıra qanun pozuntularına yol verib. Belə ki, o, vəzifədə olduğu müddətdə İcra Hakimiyyətinin inzibati binasında yerləşən xidməti otağında R.O. adlı şəxsi Bərdədə DOST Mərkəzinə işə düzəldəcəyini vəd edərək 10 000 manat pul alıb və dələduzluq edib.
Bundan başqa, Toğrul Şadlinski öz qulluq mövqeyindən təkrar istifadə edərək sahibkar Cavid Şükürova məxsus Əliyanlı kəndində yerləşən 0,15 hektar kənd təsərrüfatı təyinatlı torpaq sahəsinin təyinatını dəyişdirərək qeyri-yaşayış sahəsi kimi çıxarış alınmasına köməklik göstərəcəyini bildirib və bu yolla 12 500 manat pul ələ keçirib.
Məhkəmədə ifadə verən Toğrul Şadlinski əməlindən peşman olduğunu bildirib. O, hazırda Şamaxıda fəaliyyət göstərən şirkətlərdən birinin filialında sahə mühəndisi işlədiyini və aylıq 2500 manat əmək haqqı aldığını deyib. Təqsirləndirilən şəxs həmçinin zərərçəkmişlərə dəymiş ziyanı hər ay hissə-hissə ödədiyini qeyd edib və bir daha qanunsuz əməl törətməyəcəyinə söz verib. O, məhkəmədən ona qarşı rəhmli olunmasını xahiş edib.
Məhkəmənin hökmü ilə Toğrul Şadlinskiyə 1 il 6 ay müddətinə dövlət, yerli özünüidarəetmə orqanlarında və kommersiya təşkilatlarında maddi məsul və rəhbər vəzifə tutmaq hüququndan məhrum edilməklə, 2 il 11 ay 26 gün müddətinə azadlığın məhdudlaşdırılması cəzası təyin olunub. Cəza müddətindən onun 2 gün həbsdə saxlanıldığı vaxt çıxılıb.
Hökmə əsasən, təqsirləndirilən şəxsin üzərinə bir sıra məhdudiyyətlər qoyulub: hər gün saat 23:00-dan 06:00-dək yaşayış yerini tərk etməmək, elektron nəzarət vasitəsi daşımaq və onun işlək vəziyyətdə saxlanılmasını təmin etmək, Bərdə rayonunun inzibati ərazisini tərk etməmək, məhkəmənin icazəsi olmadan yaşayış yerini dəyişməmək, iş yerini dəyişdiyi halda nəzarət orqanını əvvəlcədən məlumatlandırmaq, kütləvi tədbirlər təşkil etməmək və belə tədbirlərdə iştirak etməmək.
Qeyd edək ki, iki il əvvəl Toğrul Şadlinskinin yaxın qohumu, Bərdə Məşğulluq Mərkəzinin sabiq direktoru Bilman Şadlinski barəsində də Cinayət Məcəlləsinin 179.2.1, 179.2.3, 179.2.4 və 308.1-ci maddələri ilə cinayət işi açılmış və hökm çıxarılmışdı.
Həmçinin onun qohumlarından Fəxrəddin Şadlinski Bərdə Gigiyena və Epidemiologiya Mərkəzinin direktoru, Fəqət Şadlinski isə YAP Bərdə rayon təşkilatının sədridir. Digər yaxınları da rayonda müxtəlif vəzifələrdə çalışıblar.(Bizimesr.az)

Azərbaycanda dövlət satınalmalarında əsas sifarişçilərdən biri də yerli icra hakimiyyətləridir.

“DİA-AZ olaraq İsmayıllı Rayonunda müxtəlif qurumlar tərəfindən keçirilən tenderləri və qalib olan şirkətləri araşdırdıq.

Məlum olub ki, 2025-ci ildə rayondakı dövlət qurumları ilə şirkətlər arasında 30 satınalma müqaviləsi bağlanıb və ümumi dəyəri 5 milyon 668 min 213 manat olan müqavilələr imzalanıb.
Cari ildə isə tenderlərlə bağlı rayondakı müxtəlif dövlət qurumları ilə şirkətlər arasında ümumi dəyəri 7 milyon 639 min manat olan 3 satınalma müqaviləsi bağlanıb.
Son iki ildə hələlik ən böyük tenderi “İsmayıllı Tikinti-27” ASC şirkəti qazanıb. Şirkət İsmayıllı rayonunun İvanovka kəndində 1 250 hektar ekin sahəsinin suvarma suyu ilə əldə edilməsinin yaxşılaşdırılması işləri üzrə tenderi qazanıb və 7 milyon 750 min manatlıq müqavilə imzalanıb.
Qalib şirkət İsmayıllı rayonundakı dövlət sifarişlərində aktiv iştirak edir. Belə ki, şirkət 2025-ci ildə İsmayıllı Rayon İH-nin üç tenderinin qalibi olub və şirkətlər cəmi dəyəri 249 min manat olan müqavilələr imzalanıb.
Rayonda ikinci böyük tenderi “Fərid Firması” qazanıb. Bakı şəhərində, Yevlax, Göygöl, İsmayıllı və Ağcabədi rayonlarında məcburi köçkünlərin məskunlaşdığı binalarda cari təmir işləri həyata keçirən şirkətlə «Qaçqınkom»Tikilməkdə olan Müəssisələr Müdiriyyəti arasında 1 milyon 282 min manatlıq müqavilə imzalanıb.
İsmayıllıda dövlət sifarişlərində digər aktiv şirkət “Huseynli Partners Architecture and Construction” MMC-dir. Bu şirkət İsmayıllı Rayon İHnin 3 tenderini qazanıb. Bu müqavilələr şirkətə 22 min manat qazandırıb.
Birinci tender İsmayıllı rayonunda yolların əsaslı təmir işlərinin görülməsi üçün layihə-Smeta sənədlərinin satın alınması, ikinci və üçüncü tenderlər isə İsmayıllı rayonunda büdcə vəsaitlərinin abadlıq işlərinin görülməsi üçün layihə-smeta sənədlərinin satın alınması ilə bağlı idi.
Rayonda daha bir iri tenderi isə “ATF” MMC udub. İsmayıllı Rayon İH MMC-ə 2 dəfə İsmayıllı şəhərinin prospekti və küçələrində asfalt örtüklü yolun əsaslı təmiri işlərini həvalə edib, 686 min manatlıq və 390 min manatlıq müqavilələr imzalayıb.
Onu da qeyd edək ki, hazırda İsmayıllı rayonu Nahid Bağırovun idarəçiliyi altındadır və yuxarıda adlarını çəkdiyimiz “tender qalibləri” isə əslində möhtərəm başçının TENDER ORTAQLARI da hesab olunur.

DİA-AZ

AzTv əməkdaşları Abşeron rayon ərazisindən reydə çıxıb. Görüntülərdən belə məlum olub ki, Hökməli bələdiyyəsi sənədsiz torpaq satışı ilə məşğul olur…

Həmin görüntüləri təqdim edirik:

VİDEO LİNKDƏ: https://xalq.online/hokmeli-belediyyesinin-sedri-ramil-orucovun-maklerliyi-ifsa-olundu-torpaq-satir-qanunsuz-tikinti-aparir

Qeyd edək ki, məlum görüntülrdən sonra Hökməli Bələdiyyəsinin sədri Ramil Orucov açıqlama verərək torpaq satan və qanunsuz tikinti aparılması üçün şərait yaradacağını bildirən Bələdiyyə üzvü Mehdi Məmmədov işindən kənarlaşdırılırb.

Bütün bunlar görüntü naminə olunan faktlar kimi qeyd olundu iddia olunur. Belə ki Bələdiyyə sədrinin xəbəri olmadan heç kəs ərazidə torpaq satıb tikinti aparmağa ixtiyarı yoxdur.


Bildirir ki, Daha öncədə Abşeron rayonu, Hökməli bələdiyyəsinin sədri Ramil Orucov 3 min manat məbləğində cərimələnmişdir. onun barəsində İnzibati Xətalar Məcəlləsinin 271-ci (Sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi) maddəsi ilə protokol tərtib edilib.

Bədəliyyə sədrinin cərimələnməsinə səbəb qəsəbə ərazisində məişət tullantılarının yandırılması olub.

Araşdırmamazı davam edir.

Xalq.online

Ağsu rayonunda ünvanlı dövlət sosial yardımı ilə bağlı ciddi iddialar gündəmə gəlib. Rayon sakini Abdullayev Qorxmaz Əliqulu oğlu tərəfindən bir neçə dövlət qurumuna ünvanlanan müraciətlər və həmin müraciətlərin bir surətinin DogruXeber.tv informasiya portalına təqdim olunması məsələni ictimailəşdirib və geniş müzakirəyə çıxarıb.

DogruXeber.tv xəbər verir ki, Vətəndaş öz müraciətində Ağsu Dövlət Sosial Müdafiə Fondunda idarəetmə ilə bağlı ciddi qanun pozuntularının olduğunu iddia edir. Onun sözlərinə görə, rayon üzrə ünvanlı sosial yardım alan şəxslərin bir qismi bu yardımın təyinat meyarlarına uyğun gəlmir. Qorxmaz Abdullayev konkret olaraq qeyd edir ki, siyahılarda adları olan bəzi şəxslər faktiki sosial vəziyyətlərinə görə bu yardımı almaq hüququna malik deyillər, lakin buna baxmayaraq illərlə sosial yardım alıblar.

Müraciətdə diqqət çəkən əsas məqamlardan biri konkret faktın təqdim olunmasıdır. Qorxmaz Abdullayev öz iddiasını əsaslandırmaq üçün Abdullayev Aydın Əliqulu oğlunun həyat yoldaşı – Abdullayeva Günay Şərif qızı ilə bağlı sənədləri təqdim edib. Onun bildirdiyinə görə, bu ailəyə də ünvanlı sosial yardım təyin olunub, lakin sonradan məsələ ilə bağlı etdiyi müraciətlər əsasında aparılan araşdırma nəticəsində müəyyən nöqsanlar üzə çıxıb.

Təqdim olunan rəsmi bildirişə əsasən, Əmək və Əhalinin Sosial Müdafiəsi Nazirliyi tərəfindən aparılan yoxlama nəticəsində Abdullayeva Günay Şərif qızına təyin olunmuş sosial yardım dayandırılıb. Sənəddə qeyd olunur ki, ailənin vəziyyəti sosial yardımın verilməsi şərtlərinə uyğun olmadığı üçün qərar ləğv edilib və 01 yanvar 2026-cı ildən 01 mart 2026-cı ilədək olan dövr üzrə ödənilmiş 922 manat artıq vəsaitin dövlət büdcəsinə qaytarılması tələb olunur. Bu sənəd birbaşa olaraq Qorxmaz Abdullayevin müraciətindən sonra aparılan yoxlamanın nəticəsi kimi təqdim edilir.

Lakin məsələ bununla məhdudlaşmır. Qorxmaz Abdullayevin təqdim etdiyi digər sənəd isə vəziyyətin daha ciddi və ziddiyyətli olduğunu göstərir. Belə ki, onun sözlərinə görə, Ağsu filialının rəhbəri Akif Xəlilov tərəfindən Abdullayev Aydın Əliqulu oğluna 19 avqust 2019-cu il tarixində rəsmi, möhürlü və imzalı yazılı sənəd təqdim olunub. Həmin sənəddə qeyd edilir ki, Aydının sonuncu izahatından sonra ona qarşı nə hüquq-mühafizə orqanları, nə də digər qurumlar tərəfindən problem yaradılmayacaq və ən diqqətçəkən məqam kimi, ona təyin olunmuş ünvanlı sosial yardımın kəsilməyəcəyi bildirilir.

Sənəddə bu ifadələrin “özüm yazdım və imzamla təsdiq edirəm” qeydi ilə rəsmiləşdirilməsi, həmçinin rəsmi möhürlə təsdiqlənməsi onun qeyri-adi xarakter daşıdığını göstərir. Dövlət qurumunun rəhbərinin vətəndaşa bu cür yazılı “zəmanət” verməsi həm hüquqi, həm də inzibati baxımdan ciddi suallar doğurur.

Çünki sosial yardımın təyin olunması və ya dayandırılması fərdi qərar və ya şəxsi təminat əsasında deyil, qanunvericiliyin tələblərinə uyğun olaraq həyata keçirilməlidir. Bu baxımdan, əvvəlcədən verilmiş belə bir yazılı təminatla sonradan qəbul edilən rəsmi qərarın tam ziddiyyət təşkil etməsi idarəetmədə ardıcıllığın və hüquqi əsasların pozulduğunu göstərir.

Ortaya çıxan faktlar onu göstərir ki, əvvəlcə vətəndaşa sosial yardımın davam edəcəyi ilə bağlı rəsmi təminat verilib, lakin illər sonra aparılan yoxlama nəticəsində həmin yardımın qanunsuz olduğu müəyyən edilərək həm dayandırılıb, həm də ödənilmiş vəsait geri tələb olunub. Bu isə sosial müdafiə sistemində qərarvermə mexanizmlərinin ya düzgün işləmədiyini, ya da müəyyən hallarda qeyri-rəsmi təsirlərə açıq olduğunu göstərir.

Qorxmaz Abdullayevin iddiaları bununla da bitmir. O bildirir ki, təqdim etdiyi siyahılarda onlarla bu tip hal mövcuddur və yalnız bir fakt üzrə araşdırma aparılması problemin sistemli xarakter daşıdığını aradan qaldırmır. Onun fikrincə, bu cür hallar geniş yayılıb və bu sahədə ciddi nəzarət mexanizmləri tətbiq olunmur.
Bütün bu faktlar fonunda diqqət çəkən əsas məqam dövlət qurumları daxilində məsuliyyət və hesabatlılıq məsələsidir. Bir tərəfdən vətəndaşa verilən yazılı təminat, digər tərəfdən isə həmin təminatın əksinə olan rəsmi qərar və maliyyə tələbi idarəetmədə ciddi ziddiyyətin mövcudluğunu açıq şəkildə ortaya qoyur.

Nəticə etibarilə, Ağsuda baş verən bu hadisə ünvanlı sosial yardım sistemində yalnız ayrı-ayrı nöqsanların deyil, daha geniş struktur problemlərinin mövcud olduğunu göstərir. Vətəndaş müraciətləri əsasında üzə çıxan faktlar sistemin şəffaflığı, obyektivliyi və qanunvericiliyə uyğun fəaliyyəti ilə bağlı ciddi suallar yaradır və bu sahədə daha dərin, əhatəli araşdırmalara ehtiyac olduğunu göstərir.
P.S. Məsələ ilə bağlı qarşı tərəflə əlaqə saxlanılıb, vətəndaşın iddiaları onların diqqətinə çatdırılıb. Qarşı tərəf isə iddiaların əsassız və şər-böhtan xarakterli olduğunu bildirib, eyni zamanda qeyd edib ki, vətəndaşın ailədaxili məsələlərinin onların fəaliyyətinə heç bir aidiyyəti yoxdur.(DogruXeber.tv)

Abşeron rayonu Xırdalanda növbəti qanunsuz artıram işləri aparılır.

XALQ-a daxil olan məlumata görə, Xırdalan,H.Əliyev pr 209 (Kristal Abşeron 2 ilə üzbəüz) Buxar restoranında lahiyədən kənar artırma işləri aparılır .

Xırdalan sakinlərinin şikayətinə görə yolu bağlayaraq, səkini zəbt edərək ağır texnikalar Buxar restoranında artırma işləri aparır.

Dövlət Şəhərsalma və Arxektura Komitəsindən və Fövqəladə Hallar Nazirliyinin müvafiq qurumundan rəsmi heç bir icazə alınmadan tikinti işlərinə Abşeron rayonunda hansı məmur icazə verdiyi müəmmalıdır.

Abşeron rayon icra Hakimiyyətinə sorğu verilib. Qeyd edək ki, Abşeron rayonunda qanunsuz tikinti ilə bağlı ilk hal deyil.

Məsələ ilə bağlı Buxar restoranı ilə əlaqə saxladıq. Əməkdaşımıza Orxan adlı şəxs bildirib ki, artıram işləri deyil beton tükülür.

Lakin görüntülərdəndə aydın olur ki, Buxar restoranın 3 mürtəbəsi hazırlanır beton tökülərə dəmir konstruksiylar quraşdırılır. Bu da onu deməyə əsas verir ki, qarşıda yay fəsli gəldiyi üçün restoran sahibi yeni terras fəaliyyət göstərməsi üçün hazırlıq işləri görür.

Qeyd edək ki, 2022-ci ildən Abşeron rayon icra Hakimiyyətinin başçısı Abdin Fərəzliyevdir.

Məsələ ilə bağlı aidiyyatı qurumlarında fikirlərini dərc etməyə hazırıq.

Həmin görüntüləri təqdim edirik:(Xalq.online)

VİDEO LİNKDƏ: https://xalq.online/abdin-ferzeliyev-buxar-restoraninda-terras-acilmasina-hansi-sertlerle-icaze-verib

Tehsilmedia.info saytı olaraq, keçən yazımızda ​Salyan rayonu, Çadırlı kənd ümumi orta məktəbinin direktoru Arzu Əliyevanın Sübhan Cəbrayılov adına Salyan Peşə Liseyinə direktor təyin edilməsi haqqında şayiələrin yayılmasını sizlərlə paylaşmışdıq.
Sayt olaraq, sual ünvanladıq ki, İlqar Bayramlı, hansı nəticələrinə əsasən Arzu Əliyevanı rəhbər vəzifəyə keçirmək istəyirsiniz?
Tehsilmedia.info olaraq indi isə Arzu Əliyevanın direktorluq fəaliyyətini sizlər üçün araşdırdıq.
​Salyan rayonu, Çadırlı kənd ümumi orta məktəbinə 13 iyun 2025-ci il tarixində direktor təyin olunan Arzu Əliyevanın fəaliyyəti qısa müddət ərzində həm valideynlərin, həm də yerli ictimaiyyətin ciddi narazılığına səbəb olmuşdur. Ortaya çıxan faktlar və şikayətlər məktəbdə təhsilin keyfiyyətinin kəskin şəkildə aşağı düşdüyünü və idarəetmənin iflic vəziyyətində olduğunu göstərir.
Biz sizlər üçün Arzu Əliyeva dövründə baş verən problemləri sistemləşdirdik:
​1. Tədrisin Keyfiyyəti və İmtahan Nəticələri
​Məktəbdə təhsilin səviyyəsi rəsmi göstəricilərdə də öz mənfi əksini tapır.
​Aşağı Monitoring Nəticələri: 4 və 6-cı siniflərin monitorinq nəticələri olduqca zəifdir.
​Buraxılış İmtahanları: Keçən tədris ilində 9-cu sinif şagirdlərinin buraxılış imtahanlarında göstərdiyi nəticələr məktəbdəki real tədris vəziyyətinin göstəricisidir.
​Repetitor Asılılığı: Siniflərdə yaxşı oxuyan şagirdlərin sayı cəmi 1-2 nəfər təşkil edir ki, bu şagirdlərin də uğurları məktəb tədrisi deyil, kənar repetitor hazırlığı ilə bağlıdır. Hər sinifdə 1-2 yaxşı oxuyan uşağın olması təhsilin keyfiyyətinin olmadığını açıq-aşkar göstərir.
​2. Qiymətləndirmədə Şəffaflığın Olmaması (KSQ və BSQ)
​Məktəbdə summativ qiymətləndirmələrin (KSQ və BSQ) keçirilməsində ciddi qanun pozuntuları müşahidə olunur:
​Şagirdlərin bir-birindən köçürməsinə şərait yaradılır.​
Bəzi hallarda sualların cavabları şagirdlərə öncədən verilir ki, bu da real bilik səviyyəsini gizlətməyə xidmət edir. Qiymətlər şagirdlərin real
potensialını əks etdirmir.
​3. Kadr Siyasəti və İxtisas Uyğunsuzluğu
​Arzu Əliyevanın idarəçiliyi dövründə dərslərin bölüşdürülməsində qeyri-peşəkarlıq hökm sürür:
​Qeyri-ixtisas müəllimləri: Bir çox dərslər, o cümlədən informatika və fizika kimi fənlər bülleten zamanı ixtisası uyğun olmayan müəllimlər tərəfindən tədris olunur. Məsələn, fizika müəlliminin dərsini informatika müəllimi keçir, təsviri incəsənət müəllimi bülletendə olanda fənnini fizika müəllimə verib. Fizika müəllimini Hicran Rzayeva əvəz edib.
Riyaziyyatdan sertifikasiyada yüksək nəticə əldə edən müəllimi qoyub kənara yeni müəllim götürüb və yuxarı sinirləri həmin müəllimə verib. Bəzi müəllimlər isə sertifikasiyadan keçmədikləri halda müvafiq fənləri tədris edirlər.
Dərsdən kənar məşğələlər isə birbaşa dərsdən sonra fasilə verilmədən keçirilir.
Seçkidə iştirak edən bədən tərbiyə müəlliminin əvəzinə isə Azərbaycan dili müəllimini yönəltmişdir.
Nəzərə alın ki, bunları ictimai əsaslarla əmrini verir.
​Dərs Cədvəli: Məktəbdə dərs cədvəlinin tərtibində tələblər pozulur, məşğələlər fasiləsiz və nizamsız şəkildə keçirilir.
​4. İdarəetmədə Maraqsızlıq və "Reklam" Meyilləri
​Direktor Arzu Əliyeva məktəbin daxili problemlərini həll etmək əvəzinə, fərdi piar fəaliyyəti ilə məşğul olmaqda ittiham edilir:
​Məktəbdə işçi və şagird davamiyyətinə nəzarət zəifdir.
​Sağlamlıq imkanları məhdud şagirdlərin evdə təhsilinə bütün ixtisas müəllimləri cəlb edilmir.
​Kiçik kurs sertifikatlarının belə böyük nailiyyət kimi reklam edilməsi, lakin məktəbin ümumi reytinqinin Salyan sektorunda ən aşağı pillələrdə olması idarəetmədəki boşluqların bariz nümunəsidir.
​5. Olimpiada və Nailiyyət Yoxluğu
​Son iki il ərzində məktəbin heç bir şagirdi fənn olimpiadalarında və ya digər bilik yarışmalarında yer tutmamışdır. Bu, məktəbdə istedadlı uşaqlarla işin və ümumi tədris stimullaşdırılmasının sıfır səviyyəsində olduğunu sübut edir.
​Çadırlı kənd ümumi orta məktəbində yaranmış bu acınacaqlı vəziyyət Elm və Təhsil Nazirliyinin, eləcə də Məktəbəqədər və Ümumi Təhsil üzrə Dövlət Agentliyinin (MÜTDA) təcili müdaxiləsini tələb edir. Direktor Arzu Əliyevanın fəaliyyəti məktəbin təhsil keyfiyyətini yüksəltmək deyil, mövcud potensialı da məhv etmək istiqamətindədir.
Tehsilmedia.info

Bu gün Biləsuvar rayonunun bəzi ərazilərində fasilə yaranacaq elektrik enerjisinin verilişində məhdudiyyət yaranacaq

Bu barədə “Azərişıq” ASC məlumat yayıb.

Bildirilib ki, mayın 2-də Biləsuvar Elektrik Şəbəkəsinin (EŞ) ərazisində 110/35/10 kV-luq “Biləsuvar” yarımstansiyasından qidalanan 10 kV-luq 4 və 10 saylı hava xətlərində növbəli şəkildə təmir işləri aparılacaq. Bununla əlaqədar saat 10:00-dan 13:00-dək Mübariz İbrahimov, Mirzə Ələkbər Sabir, Tofiq İsmayılov, Səməd Vurğun küçələri, Bəydili kəndinin bir hissəsində .

Təmir işləri yekunlaşdıqdan sonra həmin ərazilər daha keyfiyyətli elektrik enerjisi ilə təmin olunacaq.

Samux rayonunda keçirilməsi planlaşdırılan 3-cü Ərik Festivalı ərəfəsində yerli təhsil müəssisələrindən daxil olan şikayətlər ciddi narazılığa səbəb olub. Redaksiyamıza daxil olan məlumatlara görə, festival bəhanəsi ilə rayonun bir neçə məktəbində kütləvi şəkildə pul yığılması prosesinə start verilib.

Tehsilmedia.info-un əldə etdiyi məlumata əsasən, qanunsuz vəsait toplanması halları xüsusilə Qarayeri qəsəbə 1 saylı məktəb-liseydə daha qabarıq şəkildə özünü göstərir. Bildirilir ki, müəllimlərdən imkanlarına görə 10, 20 və ya 30 manat civarında vəsait tələb olunur. Pullar məktəb rəhbərliyi tərəfindən daxildə təyin olunmuş xüsusi şəxslər vasitəsilə toplanır. Bu kimi halların təkcə cari tədbirlə məhdudlaşmadığı, digər bayram və tədbirlərdə də analoji yığımın təkrarlandığı iddia edilir.

Sözügedən vəziyyət müəllim heyəti arasında böyük narazılığa yol açıb. Qeyd olunur ki, könüllülük prinsipi adı altında aparılan bu proses, əslində məcburi xarakter daşıyır. Pedaqoqlar hər il təkrarlanan bu "ənənənin" dayandırılmasını və təhsil mühitinin bu cür hallardan təmizlənməsini gözləyirlər. Hazırda bu tapşırığın hansı qurum və ya vəzifəli şəxs tərəfindən verildiyi aydınlaşdırılmağa çalışılır.

Qeyd edək ki, Ərik Festivalı hər il iyun ayında Samux rayonunda ənənəvi olaraq qeyd edilir. Lakin dövlət səviyyəsində maliyyələşməli olan bu növ tədbirlərin yükünün müəllimlərin çiyninə qoyulması ciddi qanun pozuntusu kimi qiymətləndirilir.(Tehsilmedia.info)