Azərbaycanda iyulun 26-da 41 dərəcə isti gözlənilir.

Bu barədə Milli Hidrometeorologiya Xidməti məlumat yayıb.

Bakıda və Abşeron yarımadasında hava şəraitinin günəşli keçəcəyi gözlənilir. Cənub-şərq küləyi əsəcək.

Havanın temperaturu gecə 23-26° isti, gündüz 35-39°, bəzi yerlərdə 40°-yə yaxın isti olacaq. Atmosfer təzyiqi 752 mm civə sütunu təşkil edəcək.Nisbi rütubət gecə 70-75 %, gündüz 40-50 % olacaq.

Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi dağlıq ərazilərdə qısamüddətli az yağış yağacağı, şimşək çaxacağı, dolu düşəcəyi ehtimalı var. Dağlıq ərazilərdə arabir duman olacaq. Mülayim şərq küləyi bəzi yerlərdə arabir güclənəcək.

Havanın temperaturu gecə 22-27° isti, gündüz 35-39°, bəzi yerlərdə 40-41°-dək isti, dağlarda gecə 15-20° isti, gündüz 25-30° isti olacaq.

Özünü “Biləcəri Təmir Quraşdırma” QTSC-nin rəhbəri kimi təqdim edən Nazim Tahirovun qanunsuz və hətta bəzi hallarda cinayət xarakterli əməlləri ilə bağlı artıq bir neçə konkret faktı həm oxucuların, həm də aidiyyatı qurumların diqqətinə çatdırmışıq. Aydın olur ki, əldə etdiyi saxta məhkəmə qərarları ilə ölkənin hüquq sisteminin ədalətini ciddi şəkildə şübhəyə alan və ən dəhşətlisi isə rəsmən ƏLƏ SALAN Nazim Tahirov məhz müxtəlif dövlət qurumlarında olan himayədarları hesabına hələ də meydan sulayır.
Məhz himayə olunmasının nəticəsidir ki, bir sahibkarın ölüm həddinə çatdırılmasında və daha neçə sahibkarın da şər-şəbədə, saxta məhkəmə qərarları yolu ilə müflis duruma salınmasında müstəsna payı olan Nazim Tahirov hələ də iş başındadır... Hələ də neçə-neçə dövlət məmurunun boynuna ip keçirərək onları öz cinayət ortağına çevirir. Və ən acınacaqlısı da odur ki, bununla bağlı yerli KİV-də dəfələrlə həyəcan təbili çalınsa da aidiyyatı qurumlar gərəkən reaksiyanı yubadırlar...
Nəticə isə göz qabağındadır. Növbəti qurbanlardan biri olan Alim Lətifov adlı sahibkar həm özünün və həm də ailə üzvlərinin məhz Nazim Tahirov tərəfindən ölümlə təhdid olunduğunu deyərək hüquq-mühafizə orqanlarına müraciət edib, kömək istəyib.
Bəli, bir daha vurğulayırıq ki, hər yerdə məhkəmə qərarlarına təsir imkanları ilə öyünən Nazim Tahirov hətta Konstitusiya Məhkəməsinin qatarlarını belə dəyişdirə biləcəyini nəinki gizlətmir, hətta yazıqlar olsun ki, sübuta da yetirib. Onun keçmiş fəaliyyətində bu kimi hallara artıq rast gəlmişik.
Bir daha vurğulayaq ki, bütün bu işlərdə ona ortaqlıq edən məmurlar da yetərincədir ki, nəhayət onlar da Nazim Tahirovla birgə qanun, xüsusən də Azərbaycan dövləti qarşısında cavab verəcəklər. Məsələn, onlardan biri Ədliyyə Nazirliyinin məhkəmə qərarlarının keçmiş baş icraçısı Nurəddin Mustafayev idi ki, artıq vəzifədə deyil, amma köhnə əlaqələri hesabına bu gün də Nazim Tahirovun qanunsuz əməllərinə ortaqlıq edir. Məsələn, digər bir səlahiyyət sahibi də var ki, onunla bağlı da hüquq mühafizə orqanlarının araşdırma aparması vacibdir. Söhbət Auditorlar Palatası sədrinin müavini Fəxrəddin İsmayılovdan gedir. Bu o Fəxrəddin İsmayılovdur ki, təkcə Nazim Tahirova saxta məhkəmə qərarlarının alınmasında köməklik etmir.. eyni zamanda məhz onun SAXTA AUDİT RƏYLƏRİ hesabına Nazim Tahirov neçə-neçə dövlət qurumlarının ayrı-ayrı tenderlərində qalib elan olunub.

Nəticədə Nazim Tahirov və onun quldur şərikləri varlanıb, dövlətimiz isə milyonlar itirib. Hər halda hüquq-mühafizə orqanları bütün bu məqamlara xüsusi diqqət yetirməlidir.
Diqqət yetirin, yaşı 80-ni haqlayan Fəxrəddin İsmayılov kimiləri əslində, hansısa gənc və ədalətli bir kadrın yerini məşğul etməkdədir. Və bunun da ziyanını həm, dövlətimiz, həm vətəndaşlar, həm də bütünlüklə cəmiyyət çəkir. Nazim Tahirov və onun maxinasiya şəbəkəsi isə faydalanan tərəf olur.
Bəli, məhz bu cür ORTAQLARI hesabına Nazim Tahirov meydanda at oynadır... Nə zamana qədər? Hər halda bu qoçuluq uzun çəkməyəcək... Görünəni və anlaşılanı budur...
Araşdırmalarımız davam edir..
Dia.az

Regional Su Meliorasiya Xidmətində qohumbazlıq iddiaları ilə bağlı yeni məlumatlar ortaya çıxıb.
Denmedia.az-ın yaxın mənbədən əldə etdiyi məlumata görə, Regional Su Meliorasiya Xidmətinin rəisi Zakir Quliyevin yaxın qohumu olduğu iddia edilən Əzimov Zaur Nürəddin oğlu Ucar Rayon Su Meliorasiya Sistemlərinin İstismarı İdarəsində rəis müavini vəzifəsində çalışır.
İddialara əsasən, sözügedən təyinat maraqların toqquşması və qohumbazlıq məsələləri ilə bağlı suallar doğurur.
Qeyd edək ki, "Korrupsiyaya qarşı mübarizə haqqında" Azərbaycan Respublikasının Qanununda dövlət orqanlarında maraqların toqquşmasının qarşısının alınması və qohumluq münasibətlərinin xidməti fəaliyyətə təsir etməməsi ilə bağlı müddəalar nəzərdə tutulur. Bu baxımdan, iddiaların hüquqi qiymətləndirilməsi aidiyyəti qurumların səlahiyyətinə daxildir.
Xatırladaq ki, mediada ADSEA "qudalar agentliyi" kimi tanınır. Belə ki, ADSEA sədri Zaur Mikayılov bir qudası Fuad Quliyevi Aparat rəhbəri, digər qudası Əsəd Şirinovu müşavir təyin edib. Bu, Azərbaycanda və dünyada analoqu olmayan sistem idarəçiliyidir. Faktiki üç quda dövlətin strateji agentliyini ailə podratı kimi idarə edir. ADSEA-da bütün nöqsanlar, qohumbazlığın şəbəkə halını alması da elə buradan qaynaqlanır.
Bu məsələlər ictimai müzakirələrə səbəb olsa da, onların rəsmi qaydada təsdiqlənməsi və ya təkzib olunması ilə bağlı açıqlama verilməyib.(Denmedia.az)

Bakının Nəsimi rayonu, Səməd Vurğun küçəsində yerləşən "Bolmart" marketlər şəbəkəsinə məxsus filialda baş verən son olay yerli istehlak bazarında qida təhlükəsizliyinin hansı acınacaqlı durumda olduğunu bir daha üzə çıxarıb. Tanınmış "QoçƏt" brendinə məxsus kolbasa məhsulunu alaraq evə aparmaq istəyən vətəndaş məhsulun paketini açan kimi yayılan dözülməz və kəskin üfunət qoxusundan şübhələnərək dərhal geri qayıdıb.

Marketin kassadakı satıcıları da məhsulun iylənmiş, köhnə və kiflənmiş olduğunu öz gözləri ilə görüb dərhal təsdiq etməyə məcbur qalıblar və alıcının haqlı etirazından sonra pulu geri qaytarıblar. Lakin məsələnin ən dəhşətli tərəfi odur ki, qablaşdırmanın üzərindəki istehsal və istifadə tarixi hələ iyulun 17-ni göstərməsinə, yəni məhsulun hələ bir aylıq yararlılıq müddətinin qalmasına baxmayaraq, içindən zəhər saçan çürümüş kütlənin çıxması xüsusilə isti yay günlərində əhalinin sağlamlığına birbaşa təhlükə yaradır. İstehsal tarixi hələ qüvvədə ola-ola ət məhsulunun bu cür bərbad və xarab vəziyyətdə olması sadəcə fərdi məsuliyyətsizlik deyil, bütövlükdə ölkənin qida təhlükəsizliyi sisteminə və istehlakçı hüquqlarına vurulan ağır zərbədir.

Məsələ ilə bağlı NOCOMMENT.az-a danışan sərbəst ekspert Samir Fərəcov qeyd edib ki, üzərində hələ yararlılıq müddətinin bitdiyini göstərən tarix olduğu halda ət və kolbasa məhsullarının kəskin üfunət iyi verməsi və xarab olması ya saxta markalanmanın, ya da anbar və daşınma zamanı soyuq zəncir qaydalarının kobud şəkildə pozulmasının açıq sübutudur: "İsti yay günlərində ət məhsulları mikroorqanizmlərin inkişafı üçün ən əlverişli mühitdir və düzgün saxlanılmadıqda bir neçə saata ölümcül zəhərlənmə mənbəyinə çevrilir. Əgər 'QoçƏt' kimi tanınmış brendin məhsulu hələ vaxtı bitmədən bu cür çürüyürsə, deməli, ya məhsulun istehsal tarixi saxtalaşdırılaraq yenidən paketlənib, ya da ticarət obyektləri onu saxlama rejiminə zərrə qədər riayət etmədən piştaxtaya düzüblər. Belə halların cəzasız qalması sabah məktəblərin, bağçaların və sadə vətəndaşların stoluna gələn bu cür qidalar vasitəsilə kütləvi zəhərlənmə dalğalarına səbəb ola bilər".

Onun sözlərinə görə, AQTA və digər nəzarət qurumları bu cür hallara qarşı yalnız şikayət əsasında deyil, qabaqlayıcı sərt reydlərlə cavab verməlidir: "Marketlərin soyuducu sistemlərinin işləkliyini yoxlamadan, məhsulların logistika zəncirini izləmədən istehlakçını bu cür təhlükə ilə baş-başa qoymaq yolverilməzdir. 'QoçƏt' rəhbərliyi də öz növbəsində həmin partiyanın bazar necə çıxığını dərhal araşdırmalı, ictimaiyyətə açıqlama verməlidir, çünki bir brendin adı qazanılana illər gedir, lakin belə bir biabırçılıq isə həmin etimadı bir anda yerlə-yeksan edir. Vətəndaşlarımıza isə tövsiyə edirik ki, xüsusilə yay mövsümündə aldıqları ət və kolbasa məhsullarının yalnız tarixinə deyil, qoxusuna, rənginə və qablaşdırmasının bütövlüyünə həssaslıqla diqqət etsinlər, çünki heç bir şikayət insan sağlamlığından və həyatından qiymətli ola bilməz".

NOCOMMENT.az

Masallı rayonunun Qəriblər kəndində dövlət meşə fonduna aid olan 2 hektarlıq ərazinin “Nağıllar Aləmi” istirahət mərkəzi tərəfindən qanunsuz zəbt edilməsinin şok təfərrüatları üzə çıxıb. Ekologiya və Təbii Sərvətlər Nazirliyi ilə icarə müqaviləsinin müddəti çoxdan bitsə də, obyekt sahibinin ərazidə qanunsuz olaraq yeni otel, villa və metal konstruksiyalı söhbətgahlar inşa etdiyi məlum olub. Məsələ ilə bağlı Meşələrin İnkişafı Xidmətinin rəsmisi Ramik Əşrəfovun söküntü barədə verdiyi rəsmi vədlər isə kağız üzərində qalıb. Üstəlik, obyektdə qanuni POS-terminal quraşdırılmayaraq müştərilərdən qanunsuz şəkildə "kartdan-karta" ödəniş tələb olunduğu və milyonlarla manatlıq gəlirin vergidən gizlədildiyi iddia edilir. Rentabelsiz obyektləri dərhal məhkəməyə verən nazirliyin bu milyonluq şəbəkəyə göz yumması və Masallı Rayon İcra Hakimiyyətinin laqeydliyi böyük korrupsiya şübhələri yaradır

nyus.az

Balakən Rayon Mərkəzi Xəstəxanasında nələr baş verir? Sakinlər tibb müəssisəsində həm rəhbərliyin, həm də həkimlərin özbaşınalığından ayağa qalxdı. Ağır xəstələri qəbul etməyən, dövlətin pulsuz dərmanlarını isə gizli şəkildə satışa çıxaran şəxslər kimlərdir? İş saatında boş qalan kabinetlər və tapılmayan baş həkim... Ətraflı 1xeber.media-nın hazırladığı süjetdə!


1xeber.media

44 günlük Vətən müharibəsi zamanı Gəncə şəhərinə atılmış "İsgəndər" raketləri nəticəsində evləri dağılan, əmlaklarına ziyan dəyən və müxtəlif formada zərər çəkən bir qrup vətəndaş bildirir ki, dövlət başçısı İlham Əliyevin tapşırığına əsasən dəymiş ziyanın dövlət tərəfindən ödənilməsi nəzərdə tutulsa da, kompensasiya prosesi hələ də tam şəkildə başa çatdırılmayıb. Zərərçəkənlərin sözlərinə görə, məsələnin icrası Şəhərsalma və Arxitektura Komitəsinə həvalə edilib. Lakin onlar uzun müddətdir müraciətlərinə baxılmadığını, Komitə rəhbərliyi tərəfindən qəbul edilmədiklərini və dəymiş ziyanın tam həcmdə ödənilmədiyini bildirirlər. Bundan əlavə, bəzi vətəndaşlar Komitənin ayrı-ayrı əməkdaşları ilə bağlı ciddi iddialar irəli sürürlər. Onların sözlərinə görə, kompensasiya məbləğinin yalnız bir hissəsi ödənilib, qalan hissənin isə "vergi" və "ƏDV" adı ilə tutulduğu bildirilib. Vətəndaşlar qeyd edirlər ki, məsələ ilə bağlı vergi orqanına sorğu göndəriblər. Onların bildirdiyinə görə, aldıqları cavabda kompensasiya ödənişlərinin şəxslərin gəliri hesab edilmədiyi və buna görə də həmin vəsaitdən vergi və ya ƏDV tutulmasının qanunvericilikdə nəzərdə tutulmadığı qeyd olunub. Bununla yanaşı, zərərçəkənlər daha ciddi iddialar da səsləndirirlər. Onların sözlərinə görə, bəzi sənədlərdə onların adından saxta imzaların atıldığı iddia olunur. Həmçinin, vətəndaşlar bildirirlər ki, onlara müxtəlif təzyiqlər göstərilib, böhtan xarakterli ittihamlar səsləndirilib və məsələ barədə danışmamaları, etirazlarını dayandırmaları üçün hədələr edilib. İddialara görə, onlara kompensasiya məsələsinin artıq bağlandığı və bundan sonra hər hansı ödəniş edilməyəcəyi bildirilib. Zərərçəkmiş vətəndaşlar hesab edirlər ki, bu iddiaların hüquq-mühafizə və digər aidiyyəti dövlət qurumları tərəfindən obyektiv araşdırılmasına ehtiyac var. Onlar kompensasiya prosesinin tam şəffaf şəkildə yoxlanılmasını, qanun pozuntusu aşkarlanacağı təqdirdə məsul şəxslər barəsində qanunvericiliyə uyğun tədbirlərin görülməsini istəyirlər. Sonda Gəncə sakinləri Prezident İlham Əliyevə müraciət edərək bildirirlər: "Biz 44 günlük Vətən müharibəsində raket terrorunun qurbanları olmuş sadə vətəndaşlarıq. İllərdir haqqımız olan kompensasiyanın tam ödənilməsini gözləyirik. Səsimizin eşidilməsini, iddialarımızın obyektiv araşdırılmasını və hüquqlarımızın bərpa olunmasını xahiş edirik. Bu gün bizim yeganə ümid yerimiz cənab Prezident İlham Əliyevdir. İnanırıq ki, müraciətimiz diqqətdə saxlanılacaq və məsələnin qanun çərçivəsində ədalətli həlli təmin olunacaq."

Bakunews.tv

Baku TV-nin çəkiliş qrupunun başından keçənlər sadəcə bir media mənsubuna hücum deyil, gözümüzün önündə baş verən tam bir harınlıq və özbaşınalıq nümunəsidir.
Açığını deyək, insanları sağaltmaq, onlar diqqət və qayğı göstərmək adı altında fəaliyyət göstərən "Bioloji Təbabət" Klinikasının rəhbəri küçənin ortasında, kameraların qarşısında zorakılıq edir.
Bir klinika rəhbərinin səviyyəsinə, tərbiyəsinə və dünyagörüşünə baxın: vətəndaş şikayəti əsasında çəkiliş edən jurnalistin üstünə cumur, kameraya zərbə endirib avadanlığı sındırır, operatora xəsarət yetirir. Bu nə özbaşınalıqdır? Bu cür adamlar özlərini kim hesab edirlər?
Mənim üçün ən dəhşətlisi də odur ki, bu hərəkəti edən şəxs bir tibb müəssisəsinin başındadır. İnsana, onun sağlamlığına və hüquqlarına hörmət etməyən, öz hirsini gənc bir operatorun üzərində çıxan, əli ilə, qolu ilə məsələ həll etməyə çalışan bir insan necə klinika idarə edə bilər?
Hələ çöldə, kameranın önündə bu qədər qudurğanlıq edən bir rəhbərlik, görün o klinikanın dördivarı arasında xəstələrə, vətəndaşlara necə davranır!
Adam insanın üzünə baxa-baxa düşünür: görəsən, bu "Bioloji Təbabət" Klinikasının arxasında kimlər durur? Kimlərə, hansı kölgəli fiqurlara arxayındırlar ki, sadəcə vətəndaşın şikayətini işıqlandırmağa gələn media mənsubuna qarşı bu dərəcədə rahat zorakılıq edə bilirlər?
Bəllidir ki, arxasında güclı bir dayaq görməyən heç bir müəssisə rəhbəri gündüzün günortası kameraya zərbə endirməyə, operatoru şikəst etməyə cəsarət etməz. El arasında desək, bunların "krışa"sı kimsə, elə əsas onlar məsuliyyətə cəlb olunmalıdır! Çünki bu harınlığın, bu cəzasızlıq arxayınlığının kökü məhz həmin o arxada duran həvəskarlara, patronlara söykənir.
Məsələ araşdırılanda ilk növbədə bu özbaşınalığa yaşıl işıq yandıran, onları arxayınlaşdıran "himayədarlar" müəyyənləşdirilməli və icraçılardan daha ağır şəkildə cəzalandırılmalıdırlar!
Bu ölkədə jurnalist öz işini görür. Onun işi cəmiyyətə həqiqəti göstərmək, vətəndaşın səsini çatdırmaqdır. Əgər sənin gizlədəcək bir şeyin yoxdursa, niyə kameradan belə qorxursan?
Niyə dərhal vəhşiləşib avadanlıq sındırırsan?
Çünki arxayınlıq var, çünki elə bilirlər ki, arxalarındakı adamlara, pullarına arxalanıb hər kəsi susduracaqlar.
Bura sizin öz şəxsi aləminiz deyil. Mediaya, söz azadlığına və ən əsası insan əməyinə, sağlamlığına edilən bu basqı cəzasız qala bilməz. Bu hadisəyə göz yumulsa, sabah başqa bir həkim, başqa bir müdir çıxıb küçədə hamını döyəcək.
O klinikanın rəhbərliyi və onların arxasında dayananlar törətdikləri bu əmələ, vurduqları ziyana görə qanun qarşısında ən ağır şəkildə cavab verməlidirlər.
Hüquq-mühafizə orqanları bu özbaşınalığın kökünü kəsmək üçün məsələni ən incə detalınadək araşdırmalıdır. Baku TV-nin zərərçəkən əməkdaşlarına da bir daha keçmiş olsun deyirəm, belə harınlıqların qarşısında heç vaxt geri çəkilmək olmaz!
Sima Babayeva
TEREF

Fövqəladə Hallar Nazirliyi (FHN) istirahət və sərinləmək məqsədilə su hövzələrinə üz tutan vətəndaşlara müraciət edərək müvafiq təhlükəsizlik qaydalarına əməl etməyin vacibliyini xatırladıb.

FHN-in müraciətində bəzi vətəndaşlar tərəfindən müvafiq təhlükəsizlik qaydalarına əməl olunmamasının acı nəticələndiyi təəssüflə bildirilib.

"Yadda saxlamaq lazımdır ki, çimərlik kimi nəzərdə tutulmamış ərazilərdə, o cümlədən kanal, çay, arx və digər su hövzələrində çimmək, habelə çimmə zonasının işarələnmiş sərhədlərindən kənara üzmək, xilasetmə texnikasından başqa digər qayıq və kiçik gəmilərlə çimərliyə daxil olmaq qadağandır. Çimərlikdə uşaqlar nəzarətsiz qalmamalı, xəbərdaredici nişan və lövhələrin göstərişlərinə, xilasedicilərin çağırış və tələblərinə sözsüz əməl edilməlidir. Qızmar günəş altında fasiləsiz dayanmaq və hava qaraldıqdan sonra suya daxil olmaq təhlükəlidir", - müraciətdə qeyd olunub.

Bu günlərdə Kliniki Tibbi Mərkəzdə (KTM) PVC-plastik borulardan tibbi xərək hazırlandığını əks etdirən videogörüntülərin yayılması müəssisə ətrafında müzakirələrə səbəb olmuşdu.
Bizimesr.com bildirir ki, həmin hadisədən sonra Mərkəzin fəaliyyəti ilə bağlı daha bir diqqətçəkən məqam ortaya çıxıb.

Məlum olduğu kimi, hər bir dövlət qurumunun rəsmi internet saytının mütəmadi yenilənməsi, vətəndaşların müraciətlərinin asanlaşdırılması, eləcə də rəhbərlik və fəaliyyət barədə aktual məlumatların ictimaiyyətə təqdim edilməsi vacib məsələlərdən biridir. Kliniki Tibbi Mərkəzin (KTM) də rəsmi internet səhifəsi (https://ktmhospital.az/) fəaliyyət göstərir. Lakin saytın yenilənməsi və idarə olunmasına lazımi diqqətin göstərilmədiyi müşahidə olunur.

Belə ki, saytın "Rəhbərlik" bölməsində hələ də direktor vəzifəsində Könül Ələkbərov göstərilir. Halbuki, Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Anar Bayramovun əmri ilə 1 may 2026-cı il tarixində Musa Abbasov Kliniki Tibbi Mərkəzin direktoru təyin edilib.
Təyinatdan təxminən üç aya yaxın vaxt keçməsinə baxmayaraq, bu dəyişiklik hələ də Mərkəzin rəsmi internet səhifəsində əksini tapmayıb. Bu isə rəsmi məlumatların operativ şəkildə yenilənmədiyini göstərir və saytın idarə olunması ilə bağlı ciddi suallar yaradır. Üstəlik hansısa məlumatların dəqiqləşdirilməsini çətinləşdirir.

Diqqət çəkən digər məqam isə rəsmi saytın "Xəbərlər" bölməsinin sonuncu dəfə aprel ayında yenilənməsidir. Halbuki, həmin tarixdən sonra müəssisədə rəhbər dəyişikliyi baş verib və ictimai maraq doğuran bir sıra hadisələr yaşanıb. Buna baxmayaraq, rəsmi resursda bu barədə hər hansı məlumat yerləşdirilməyib. Yəni, rəsmi sayt demək olar ki, işlək və etibarlı mənbə funksiyasını itirib.
Qeyd edək ki, dövlət tibb müəssisələrinin rəsmi internet səhifələri vətəndaşların məlumat əldə etməsi baxımından mühüm informasiya mənbəyi hesab olunur. Bu səbəbdən də həmin resurslarda yerləşdirilən məlumatların aktual saxlanılması xüsusi əhəmiyyət daşıyır.
Xatırladaq ki, Kliniki Tibbi Mərkəzin mətbuat katibi Ruzbeh Məmməddir.
Bizimesr.com