“Media Masası”nın ikinci verilişi hazırlanır.

Bu dəfə jurnalist Vəfa Həmzəyevanın qonaqları media məkanının iki tanınmış siması - REAL TV-nin baş direktoru Mir Şahin Ağayev və ARB 24 telekanalının icraçı direktoru Radik İsmayılovdur.

Televiziya hələ də əsas informasiya mənbəyidir, yoxsa sosial şəbəkələr artıq onun yerini tutur?

“Media Masası”nın ikinci buraxılışında bu sual ətrafında açıq və gözlənilməz müzakirə aparılıb.

Bu dəfə söhbət təkcə televiziyanın bu günündən yox, onun cəmiyyətə təsir gücündən, sosial media ilə rəqabətindən, xəbərə etibardan, klassik jurnalistikanın dəyişməsindən və süni intellektin media üçün yaratdığı yeni reallıqdan gedir.

“Media Masası”nın ikinci buraxılışı 11 iyul saat 21:00-da REAL TV-də yayımlanacaq.

"Təbriz" MTK ilə bağlı dələduzluq ittihamları üzrə baxılan cinayət işi üzrə məhkəmə araşdırması davam edir.

Qaynarinfo xəbər verir ki, növbəti məhkəmə iclası iyulun 9-da keçiriləcək.

Məhkəmə istintaqı Bakı Ağır Cinayətlər Məhkəməsində hakim Şəlalə Həsənovanın sədrliyi ilə aparılır.

Cinayət işi üzrə "Atlant" Ailəvi İstirahət Mərkəzinin sahibi Tahir Qədəşov şahid, kürəkəni Nofəl Hacıyev isə təqsirləndirilən şəxs qismində iştirak edir. Təqsirləndirilən şəxslər sırasında MTK-nın icraçı direktoru Talış Məhəmmədov da var.

İttihama əsasən, Nofəl Hacıyev 2018–2022-ci illərdə inşası davam edən binada eyni mənzilləri bir neçə şəxsə sataraq 171 vətəndaşdan ümumilikdə 14 milyon manat əldə edib. İstintaqın versiyasına görə, həmin vəsaitin bir hissəsi "Atlant" Ailəvi İstirahət Mərkəzində tikinti və təmir işlərinə yönəldilib. Bu səbəbdən istintaq dövründə kompleksin üzərinə həbs qoyulub.

Əvvəlki məhkəmə iclaslarında zərərçəkmişlər Tahir Qədəşovun da məsuliyyətə cəlb edilməsini tələb etsələr də, məhkəmə bu vəsatəti baxılmamış saxlayıb. Həmçinin "Atlant"ın üzərinə qoyulmuş həbsin götürülməsi ilə bağlı təqdim olunan vəsatət də təmin edilməyib.

Son prosesdə tərəflər arasında "Atlant" İstirahət Mərkəzində şəriklik məsələsi ətrafında mübahisə yaranıb. Nofəl Hacıyev mərkəzin yaradılması və maliyyələşdirilməsində iştirak etdiyini, vətəndaşlardan toplanan vəsaitin bir hissəsinin həmin layihəyə yönəldildiyini iddia edib. Tahir Qədəşov isə bu iddialarla razılaşmayaraq "Atlant"da şəriklik münasibətlərinin olmadığını bildirib.

Azərbaycanda iyulun 8-də havanın bəzi yerlərdə yağıntılı keçəcəyi gözlənilir.

Bu barədə Milli Hidrometeorologiya Xidməti məlumat yayıb.

Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi, lakin gecə və səhər bəzi yerlərdə yağış yağacağı gözlənilir. Arabir güclənən şimal-qərb küləyi əsəcək.

Havanın temperaturu gecə 19-22° isti, gündüz 26-29° isti olacaq. Atmosfer təzyiqi 757 mm civə sütunu, nisbi rütubət isə gecə 70-75 %, gündüz 60-65 % təşkil edəcək.

Azərbaycanın rayonlarında bəzi yerlərdə arabir yağış yağacağı gözlənilir. Ayrı-ayrı yerlərdə qısamüddətli intensiv olacağı, şimşək çaxacağı, dolu düşəcəyi, gecə və səhər bəzi şimal və qərb rayonlarında yağıntıların güclənəcəyi ehtimalı var. Gecə və səhər bəzi dağlıq ərazilərdə duman olacaq. Qərb küləyi bəzi yerlərdə arabir güclənəcək.

Havanın temperaturu gecə 20-24° isti, gündüz 30-34° isti, dağlarda gecə 11-16° isti, gündüz 18-23°, bəzi yerlərdə 25-28° isti olacaq.

Pasiyentin şikayəti əsasında Bakı şəhərinin Nərimanov rayonu ərazisində yerləşən "Vip Milan" Hospitalda aparılan burun əməliyyatı ilə bağlı yenidən araşdırmaya başlanılıb.

Qaynarinfo-nun məlumatına görə, araşdırma Sadiq adlı pasiyentin müraciəti əsasında klinikada qulaq-burun-boğaz (LOR) həkimi və estetik cərrah kimi fəaliyyət göstərən Rəşad Məmmədov barəsində aparılacaq.

Belə ki, ötən il Sadiq "Vip Milan” Hospitalda Rəşad Məmmədov tərəfindən burun əməliyyatı olunub və bunun üçün 3000 manat ödəniş edib. Lakin onun iddiasına görə, əməliyyat uğursuz keçdiyindən səhhətində ciddi fəsadlar yaranıb.

Pasiyent izahatında bildirib ki, burnunda çəpər əyriliyi olduğuna, nəfəs almaqda çətinlik çəkdiyinə və eyni zamanda estetik görünüşünü qismən yaxşılaşdırmaq istədiyinə görə əməliyyat olunmağa qərar verib. O qeyd edib ki, əməliyyatdan sonra vəziyyəti yaxşılaşmaq əvəzinə daha da pisləşib:

"Əməliyyat olunduğum gündən indiyə qədər burnum düzəlmək əvəzinə daha da pisləşib. Burnumun sağ tərəfi batıb, sol tərəfində isə gips açıldıqdan sonra yara izi və keyimə yaranıb. Əvvəlcə bunların əməliyyatdan sonrakı normal hallar olduğunu düşünürdüm. Artıq əməliyyatdan doqquz ay keçib. Buna baxmayaraq, burnumdakı izlər, ağrılar və keyimə məni ciddi narahat edir. Dəfələrlə həkimin qəbulunda olsam da, mənə heç bir problemin olmadığı və hər şeyin qaydasında olduğu bildirilib. Hazırda da burnumdakı ağrılar və keyimə hissi həm sağlamlığıma, həm də psixoloji vəziyyətimə mənfi təsir göstərir".

Məsələ ilə bağlı Nərimanov Rayon Prokurorluğu həkim barəsində cinayət işinin başlanmasının rədd edilməsi barədə qərar qəbul edib.

Məhkəmədə Rəşad Məmmədov bildirib ki, 2025-ci ilin avqust ayından əmək müqaviləsi əsasında "Vip Milan” Hospitalda həkim-otorinolarinqoloq kimi çalışır. Onun sözlərinə görə, pasiyentin burnunda çəpər əyriliyi olduğundan xarici burun və burun çəpərinin korreksiyası əməliyyatı həyata keçirilib.

Həkim əlavə edib ki, əməliyyatdan sonra pasiyent ambulator nəzarətə götürülüb və ona müvafiq rejimə əməl etmək tövsiyə olunub. Rəşad Məmmədovun iddiasına görə, Sadiq bu tövsiyələrə əməl etməyib, burnunu soyuğa məruz qoyub və eynəkdən istifadə etdiyi üçün sonradan həmin problemlər yaranıb.

Prokurorluğun qərarı ilə razılaşmayan pasiyent Bakı Şəhəri Nərimanov Rayon Məhkəməsinə müraciət edib. Məhkəmə şikayəti təmin edərək həkim barəsində cinayət işinin başlanmasının rədd edilməsi haqqında qərarı ləğv edib. İş materialları əlavə araşdırmanın aparılması üçün müvafiq istintaq orqanına qaytarılıb.

Qeyd edək ki, "VİP Milan" Hospitalın təsisçisi və direktoru Xuraman Muradovadır.

Qaynarinfo

“Artıq iki aydır maaş ala bilmirik. Xəstəxanalarda heç nə yoxdur. Dərmanı da, iynəni də xəstələrin özünə aldırırlar. İş vaxtı bitir, amma bizi evə buraxmırlar. İşlədiyimiz əlavə saata görə bizə maaş da vermirlər. Tələb edəndə deyirlər ki, maliyyə Nazirliyi maaş əlavəsinə icazə vermir”.
Redaksiyamıza Naxçıvan xəstəxanalarından birindən göndərilən məktubda belə deyilir.
TEREF yazır ki, bunu məşhur jurnalist Heydər Oğuz yazır. Heydər Oğuz daha sonra yazır:
Qeyd edim ki, Naxçıvan məmurlarının 2 aydır maaş almadıqları barədə iddialar yeni deyil. Bir neçə gün əvvəl “Gündəlik Naxçıvan” da bu barədə məlumat yaymışdı. Naxçıvan tibb işçilərinin bizə göndərdiyi məktub da bu faktı təsdiqləyir.

Naxçıvandakı etibarli mənbələrdən aldığım məlumatlar maaşların verilməməsinin ilginc səbəbinə belə aydınlıq gətirib: “Naxçıvan MR Baş nazirliyi postuna iki namizəd vardı. Bunlardan biri indiki Baş nazir Cabbar Musayev, digəri isə Maliyyə naziri Həsən İsmayılov idi. Naxçıvandakı səlahiyyətli nümayəndə Ceyhun Cəlilov da Həsən İsmayılova lobbiçilik edirdi. Amma mərkəzi hakimiyyət Ceyhun Cəlilovun tender “təcrübəsini” nəzərə alıb onun namizədini yox, Cabbar Musayevi Baş nazir postuna təyin etdi. Görünür, məqsədi iki maraqlı tərəfi bir-birinə qarşı qoymaq, beləcə, onların bir-biri üzərində nəzarətini təmin etmək və tender maxinasiyalarının qarşısını almaq olub. Mümkündür ki, bu təyinatdan narazı alan “dərəbəy qruplaşması” Baş nazirin işini sabotaj etmək üçün məmurların maaşlarını aylarla yubatmağa qərar verib”.
İddialara inansaq, Ceyhun Cəlilovla Cabbar Musayev arasında ciddi anlaşmazlıqlar var. Hətta onların bir-biriylə normal ünsiyyət belə qura bilmədikləri bildirilir. Deyilənlərə görə, səlahiyyətli nümayəndə ilə Baş nazir xidməti iş xaricində bir-birini danışdırmırlar. Bu umu-küsünün çanağı isə Naxçıvan məmurlarının başında çatlayır. Lap məşhur Türk atalar sözündə deyildiyi kimi, "İki fil döyüşəndə əzilən çəmənlər olur".

TEREF

Azərbaycan Respublikasının Prezidenti İlham Əliyevin 2025-ci il iyunun 23-də Goranboy rayonunda “Konstralab Industries” QSC-nin tikinti materialları istehsalı müəssisəsinin açılışında iştirakı regionun sənaye inkişafı baxımından mühüm hadisə kimi qiymətləndirilmişdi. Qazanbulaq qəsəbəsi yaxınlığında fəaliyyət göstərən müəssisənin ölkənin tikinti sektoruna töhfə verəcəyi, yeni iş yerləri yaradacağı və iqtisadi fəallığı artıracağı bildirilirdi.

Lakin bu gün müəssisəyə aparan avtomobil yolunun vəziyyəti həmin layihə ətrafında ciddi suallar yaradır. Redaksiyamıza daxil olan məlumatlara və gundemxeber.com-un əməkdaşının ərazidə apardığı müşahidələrə əsasən, Gəncə–Goranboy magistral yolundan müəssisəyə çəkilmiş asfalt yolun bir hissəsi qısa müddət ərzində yararsız vəziyyətə düşüb. Yol örtüyündə yaranmış iri çatlar, çökmələr və dağılmış hissələr ərazidə diqqəti cəlb edən əsas problemlərdəndir.
Xüsusilə sel sularının keçdiyi çay yatağı üzərində inşa edilmiş körpü və ona bitişik yol hissəsində ciddi dağıntılar müşahidə olunur. Maraqlıdır ki, həmin ərazidə son dövrdə bu miqyaslı dağıntını izah edə biləcək zəlzələ və ya torpaq sürüşməsi kimi fövqəladə təbii hadisələrin baş verməsi barədə məlumat yoxdur. Bu isə yolun tikintisinin keyfiyyəti, layihələndirmə və icra prosesinin texniki standartlara uyğun aparılıb-aparılmaması ilə bağlı suallar doğurur.
İri dövlət vəsaiti hesabına həyata keçirilən infrastruktur layihələrinin uzunömürlü və dayanıqlı olması əsas tələblərdən biridir. Əgər yeni inşa edilmiş yol cəmi bir il sonra yararsız vəziyyətə düşürsə, bu halda istifadə olunan tikinti materiallarının keyfiyyəti, görülən işlərin texniki normalara uyğunluğu və tikintiyə nəzarət mexanizmlərinin necə işlədiyi araşdırılmalıdır.
Məlumata görə, yol və körpünün tikintisi zamanı Goranboy Rayon İcra Hakimiyyətinin başçısı Məhərrəm Quliyev əraziyə baxış keçirərək görülən işləri yüksək qiymətləndirmişdi. Hazırda isə həmin yolun mövcud vəziyyəti fonunda ictimaiyyət təbii olaraq bu qiymətləndirmənin hansı əsaslara söykəndiyi barədə suallar verir. Əgər yolun qısa müddətdə yararsız hala düşməsi tikinti qüsurlarından qaynaqlanırsa, bunun səbəbləri və məsul şəxslər müəyyən edilməlidir.
Yolun vəziyyəti təkcə nəqliyyatın hərəkətinə maneə yaratmır. Bu, həm də dövlət büdcəsindən ayrılan vəsaitin səmərəli xərclənməsi, infrastruktur layihələrinin keyfiyyətinə nəzarət və vəzifəli şəxslərin məsuliyyəti məsələsini gündəmə gətirir. Dövlət başçısının iştirak etdiyi strateji əhəmiyyətli layihəyə aparan yolun belə vəziyyətə düşməsi cəmiyyətin haqlı narahatlığına səbəb olur.
Məsələnin obyektiv araşdırılması üçün aidiyyəti dövlət qurumlarının əraziyə baxış keçirməsi, yolun və körpünün texniki ekspertizasının aparılması, tikinti prosesində normativ tələblərə əməl olunub-olunmadığının müəyyən edilməsi vacibdir. Əgər pozuntular aşkarlanarsa, qanunvericiliyə uyğun tədbirlərin görülməsi, yolun əsaslı şəkildə bərpası və gələcəkdə analoji halların təkrarlanmaması üçün ciddi nəzarət mexanizmlərinin tətbiqi zəruridir.
İctimai maraq doğuran bu məsələ ilə bağlı aidiyyəti qurumların mövqeyini dərc etməyə və onların rəsmi açıqlamalarını işıqlandırmağa hazırıq.

Gundemxeber.com

QHT-lərə Dövlət Dəstəyi Agentliyinin fəaliyyətini illərdir izləyənlər artıq bir həqiqəti yaxşı bilir: bu qurumun ən uğurlu işi islahat haqqında danışmaqdır. Şəffaflıq, açıqlıq, hesabatlılıq, yeni yanaşma, innovativ idarəetmə...

Bəzi tədbirlərdə iştirakçılardan əlavə köynək gətirmələri xahiş olunur. Məqsəd müxtəlif şəkillər çəkərək guya tədbirin bir neçə gün davam etdiyini göstərməkdir.

Bu sözlər o qədər təkrarlanıb ki, artıq onların praktik nəticə verəcəyinə inanmaq getdikcə çətinləşir. Çünki hər il eyni vədlər verilir, hər il eyni problemlər yaşanır və hər il həmin problemlər yeni bəhanələrlə izah edilir.

Əslində, islahatın mahiyyəti çox sadədir. İşlər əvvəlkindən daha yaxşı təşkil olunursa, qərarlar vaxtında qəbul edilirsə, bürokratik əngəllər aradan qaldırılırsa, vətəndaş və QHT-lər rahat işləyə bilirsə, buna islahat deyilir. Əgər proseslər daha da ağırlaşır, qərarlar gecikir, layihələr yarım ilə yaxın gözlədilir, sonra isə bir neçə həftəyə başa çatdırılması tələb olunursa, bunun adına islahat yox, idarəetmə böhranı demək daha doğru olar.

"Yenixeberorg.com"un 14 may tarixli yazısında diqqətə çatdırmışdıq ki, Agentlik martın 12-də qrant müsabiqəsinin nəticələrini elan etsə də, layihələrin icrasına başlanılmır. Səbəb kimi Ədliyyə Nazirliyindən bildirişlərin alınmaması göstərilirdi. Yazımızdan sonra QHT-lərə ardıcıl mesajlar göndərildi. Bildirildi ki, problem qısa müddətdə həll olunacaq, layihələr dərhal başlayacaq.

Doğrudan da başladı. Amma necə?

Aylarla gözlədilən layihələr iyul ayında, yayın ən isti günlərində, tələm-tələsik icraya buraxıldı. Elə bil altı ay ərzində itirilmiş vaxtın əvəzini QHT-lər çıxmalıdır. Sanki gecikməyə səbəb olan qurum yox, layihəni həyata keçirən təşkilatlardır. Bunu biz demirik, "Yenixeberorg"a problemlərini bölüşən QHT-lər söyləyirlər.

İllərdir Agentliyin rəhbər şəxsləri müxtəlif tədbirlərdə eyni fikri səsləndirirlər. Deyirlər ki, müsabiqələr sentyabr ayında elan olunacaq ki, QHT-lərin layihə hazırlamaq üçün kifayət qədər vaxtı olsun. Nəticələr daha tez açıqlanacaq, icraya daha erkən başlanacaq və bütün proses daha səmərəli olacaq.

Bəs nəticə nə oldu?

QHT-lər layihələrini sentyabr-noyabr aylarında təqdim etdilər. Nəticəni almaq üçün aylarla gözlədilər. Layihələrin rəsmiləşdirilməsi yenə uzandı.

Sonda isə layihələrin böyük hissəsi yay aylarında, minimum müddətdə icra edilməyə məcbur edildi.

İslahat bu işin harasındadır?

Ən qəribəsi isə odur ki, bu vəziyyət heç kimi narahat etmir. Əksinə, hər şey normal proses kimi təqdim olunur. Sanki dövlət büdcəsindən maliyyələşən layihələrin yarım il gecikməsi adi hadisədir. Sanki ictimai fayda daşıyan layihələrin bir neçə həftəyə "yekunlaşdırılması" normal idarəetmə modelidir.

Əgər kimsə bu yazılanların şişirdildiyini düşünürsə, sosial şəbəkələrə nəzər salması kifayətdir.

Bir banner.

Bir təlimçi.

Beş-altı iştirakçı.

Kiçik bir otaq.

Bir neçə foto.

Bir neçə status.

Və bunun adına layihə icrası deyilir!

İştirakçıların üz ifadələrinə baxanda belə hiss olunur ki, onların əksəriyyəti tədbirə hansı mövzuda gəldiyini belə bilmir. Elə bil hansısa idarədən "gedin, bir saat oturun, sonra çıxarsınız" tapşırığı verilib.

Sektorda artıq açıq sirrə çevrilmiş başqa bir mənzərə də var. Bəzi tədbirlərdə iştirakçılardan əlavə köynək gətirmələri xahiş olunur. Məqsəd müxtəlif şəkillər çəkərək guya tədbirin bir neçə gün davam etdiyini göstərməkdir. Əgər layihənin "uğuru" köynək dəyişməklə ölçülürsə, burada artıq ciddi problem var.

Əlbəttə, bütün məsuliyyəti QHT-lərin üzərinə yıxmaq olar. Amma bu, ən asan yoldur.

Sual budur: layihələri aylarla gözlədən kimdir? Sənədləşməni uzadan kimdir?

QHT-ləri iyul ayında tələsik tədbirlər keçirməyə məcbur edən kimdir?

Axı heç bir təşkilat layihəsini iki həftəyə sığışdırmaq istəməz. Heç bir QHT öz nüfuzunu formal tədbirlərlə zədələməkdə maraqlı deyil. İnsanları bu vəziyyətə salan idarəetmə modelidirsə, o zaman tənqid də ilk növbədə həmin modelə yönəlməlidir.

Təəssüf ki, son illər Agentliyin fəaliyyətində təhlükəli bir tendensiya formalaşıb. Mahiyyətdən daha çox görüntüyə üstünlük verilir. Tədbirlər keçirilir, təqdimatlar hazırlanır, çıxışlarda islahatdan danışılır, statistik rəqəmlər səsləndirilir. Amma bütün bu pafosun arxasında ən elementar idarəetmə problemləri həll olunmur.

Dövlət vəsaiti ilə maliyyələşən layihələrin əsas məqsədi sosial şəbəkələrdə şəkil paylaşmaq deyil. Məqsəd cəmiyyət üçün real nəticə yaratmaqdır. Tədbirin neçə şəkli çəkildiyi yox, hansı problemi həll etdiyi önəmlidir. Təəssüf ki, mövcud sistem QHT-ləri nəticə istehsal etməyə deyil, hesabat hazırlamağa sövq edir.

Ən acınacaqlısı isə budur ki, bütün bunlar tədricən normaya çevrilir. Sabah yenə eyni gecikmələr olacaq, yenə eyni izahatlar veriləcək, yenə eyni pafoslu çıxışlar səslənəcək, ilin sonunda isə yenə "uğurla icra edilmiş layihələr" barədə hesabat hazırlanacaq.

Amma cəmiyyət bütün bunları görür. QHT sektoru da görür.

Layihələri həyata keçirən insanlar da görür.

Görünməyən yalnız bir şeydir - illərdir vəd edilən islahatların real nəticəsi.

İslahat sözünü hər çıxışda işlətmək asandır. Çətin olan həmin islahatı idarəetmədə göstərməkdir. Təəssüf ki, bu gün ortada gördüyümüz mənzərə göstərir ki, Agentlik hələ də görüntü ilə nəticə arasındakı fərqi tam anlaya bilməyib.

Çünki islahat odur ki, problemlər azalır.

Burada isə problemlər əvvəl yaranır, sonra onlara bəraət qazandırılır.

Bu isə islahat deyil. Bu, sadəcə dövlət vəsaiti hesabına həyata keçirilən tezbazar layihələr sistemidir.(Yenixeberorg.com)

Qarşı tərəfin cavab haqqını tanıyırıq.

Hindistanın Müdafiə Tədqiqatları və İnkişafı Təşkilatının (DRDO) Ermənistan üçün “Pralay” taktiki raket sisteminin 300 kilometrlik ixrac modifikasiyasını hazırladığı bildirilir.


Tərəflər arasında bununla bağlı aparılan ikitərəfli danışıqlar yekun mərhələyə daxil olub.


Hazırda müzakirələrin əsas predmetini müqavilənin maliyyə parametrləri və qiymət mexanizmləri təşkil edir.


Bərk yanacaq mühərriki ilə təchiz olunan “Pralay” raketi adi döyüş başlıqları vasitəsilə rabitə qovşaqları, logistika mərkəzləri, silah-sursat anbarları və ön xəttdə yerləşən hərbi aerodromlar kimi strateji əhəmiyyət daşıyan hədəflərə yüksək dəqiqliklə zərbə endirmək məqsədilə hazırlanıb. Raket 500-1000 kiloqram ağırlığında döyüş başlığı daşıya bilir və 150-500 kilometr məsafədə yerləşən hədəfləri vurmaq imkanına malikdir.


Ənənəvi ballistik raketlərdən fərqli olaraq, “Pralay” daha yastı kvazi-ballistik trayektoriya üzrə hərəkət edir. Bununla yanaşı, uçuşun müxtəlif mərhələlərində istiqamətini dəyişmək qabiliyyəti raketin aşkarlanmasını və qarşısının alınmasını xeyli çətinləşdirir.


Nəticədə, mövcud hava hücumundan müdafiə sistemlərinin reaksiya müddəti azalır və onların ələkeçirmə imkanları əhəmiyyətli dərəcədə məhdudlaşır.


Ermənistanın “Pralay” kimi müasir hücum təyinatlı raket sistemini əldə etməyə maraq göstərməsi Cənubi Qafqazın təhlükəsizlik arxitekturası baxımından ciddi suallar doğurur. Rəsmi İrəvan son illərdə silahlı qüvvələrinin modernləşdirilməsi çərçivəsində Hindistandan “Pinaka” çoxlüləli reaktiv yaylım atəşi sistemləri, “Swathi” artilleriya aşkarlama radarları və “Akash” zenit-raket kompleksləri də daxil olmaqla bir sıra silah sistemləri tədarük edib.


Bu fonda “Pralay” kimi uzaqmənzilli zərbə vasitələrinin alınmasına yönəlmiş addımlar Ermənistanın hərbi planlaşdırmasının hansı istiqamətdə inkişaf etdiyini gündəmə gətirir.


İran və Gürcüstanla hərbi qarşıdurma yaşamayan, Türkiyə ilə münasibətlərin normallaşdırılması prosesini davam etdirən Ermənistanın hücum potensialını genişləndirməsinin hansı təhlükəsizlik ehtiyaclarından irəli gəldiyi, eləcə də bu imkanların regionun hansı aktoruna qarşı nəzərdə tutulduğu ilə bağlı suallar aktuallığını qoruyur.


Hindistanın Ermənistanla hərbi-texniki əməkdaşlığını ardıcıl şəkildə genişləndirməsi də regional təhlükəsizlik mühitinə təsirləri baxımından diqqət çəkən məqamlardandır.


Yeni Dehlinin son illərdə həyata keçirdiyi silah ixracı layihələri təkcə ikitərəfli müdafiə əlaqələrinin dərinləşdirilməsi ilə məhdudlaşmır, eyni zamanda Cənubi Qafqazda mövcud hərbi balansın dəyişməsinə təsir göstərə biləcək yeni imkanlar formalaşdırır.


Bu kontekstdə sözügedən əməkdaşlığın üçüncü dövlətlərin təhlükəsizlik maraqlarına mümkün təsirləri ayrıca qiymətləndirilməlidir.


“Pralay” raket kompleksinin Ermənistana mümkün ixracı Hindistan-Ermənistan müdafiə tərəfdaşlığını keyfiyyətcə yeni mərhələyə yüksəldə biləcək addım kimi qiymətləndirilə bilər. Bununla yanaşı, ixrac məqsədilə hazırlanacaq 300 kilometrlik modifikasiyanın istehsalı və tədarükü prosesində Hindistanın beynəlxalq ixrac nəzarəti mexanizmlərinə, xüsusilə də Raket Texnologiyalarına Nəzarət Rejiminin (MTCR – Missile Technology Control Regime) tələblərinə hansı səviyyədə riayət edəcəyi diqqətlə izlənilməsi vacib olan məsələlərdən biri olaraq qalır.

Son aylarda KATV1 internet provayderinin çoxsaylı abunəçiləri xidmətin keyfiyyəti ilə bağlı ciddi narazılıqlarını ifadə edirlər. Redaksiyamıza daxil olan çoxsaylı müraciətlərdə bildirilir ki, internet xidməti ayın əvvəlində, ortasında və sonunda dəfələrlə saatlarla dayanır, nəticədə həm fərdi istifadəçilər, həm də internet üzərindən fəaliyyət göstərən müəssisələr ciddi çətinliklərlə üzləşirlər.
İddialara görə, uzunmüddətli kəsintilər səbəbindən onlayn iş prosesləri dayanır, xidmət göstərən müəssisələr maddi zərərlə üzləşir, media qurumlarının fəaliyyəti isə iflic vəziyyətinə düşür.
Problemdən zərər çəkən media resursları sırasında SözTV.az, BNTV.az, Tibbmedia.az və Bakunews.tv-nin də olduğu bildirilir. Redaksiyalar qeyd edirlər ki, internet bağlantısının tez-tez kəsilməsi xəbərlərin hazırlanması, video materialların yüklənməsi və canlı yayımların həyata keçirilməsində ciddi maneələr yaradır.
Abunəçilər bildirirlər ki, aylıq 30 manat ödəniş etmələrinə baxmayaraq, bəzi hallarda internet xidməti 10–15 gün ərzində normal işləmir. Onların fikrincə, xidmətin bu səviyyədə göstərilməməsi istehlakçı hüquqlarının pozulması, ödənilmiş xidmətin tam həcmdə təqdim edilməməsi ilə bağlı suallar yaradır.
Narazılıq doğuran digər məqam isə, iddialara görə, KATV1 tərəfindən indiyədək genişmiqyaslı kəsintilərlə bağlı rəsmi üzrxahlığın edilməməsi və ya abunəçilərə hər hansı kompensasiya mexanizminin tətbiq olunmamasıdır.
Qeyd edək ki, KATV1 (AG Telekom MMC) Azərbaycanda fəaliyyət göstərən iri internet provayderlərindən biridir və rəsmi internet səhifəsində yüksəkkeyfiyyətli xidmət göstərdiyini bildirir. Bununla yanaşı, müxtəlif dövrlərdə KATV1 xidmətindən narazılıqlarla bağlı mediada və sosial platformalarda da şikayətlər dərc olunub.
Qarşı tərəfin mövqeyini dərc etməyə hazırıq. KATV1 şirkəti yaranmış vəziyyətlə bağlı açıqlama verəcəyi və ya iddialara münasibət bildirəcəyi təqdirdə, həmin mövqe dəyişdirilmədən və tam şəkildə oxuculara təqdim olunacaq.

BnTv.az

Azərbaycanda sabah 37 dərəcə isti gözlənilir.

Bu barədə Milli Hidrometeorologiya Xidməti məlumat yayıb.

Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin səhər bəzi şəhərətrafı ərazilərdə qısamüddətli az yağış yağacağı ehtimalı var. Mülayim şimal-qərb küləyi gündüz yarımadanın bəzi yerlərində arabir güclənəcək.

Havanın temperaturu gecə 20-23° isti, gündüz 27-30° isti olacaq. Atmosfer təzyiqi 758 mm civə sütunu, nisbi rütubət isə gecə 70-80 %, gündüz 60-65 % təşkil edəcək.

Azərbaycanın rayonlarında havanın bəzi yerlərdə arabir yağış yağacağı gözlənilir. Ayrı-ayrı yerlərdə intensiv olacağı, şimşək çaxacağı, dolu düşəcəyi, bəzi şimal və qərb rayonlarında yağıntıların güclənəcəyi ehtimalı var. Gecə və səhər bəzi dağlıq ərazilərdə duman olacaq. Qərb küləyi bəzi yerlərdə arabir güclənəcək.

Havanın temperaturu gecə 20-25° isti, gündüz 32-37° isti, dağlarda gecə 11-16° isti, gündüz 18-23°, bəzi yerlərdə 25-29° isti olacaq.