“Bakı-Tbilisi-Bakı sərnişin qatarının yenidən fəaliyyətə başlamasını çox yüksək qiymətləndirirəm. Azərbaycan və Gürcüstan arasında siyasi-iqtisadi əlaqələr yüksək səviyyədə olduğuna görə tərəflər belə bir addım atıb”.

Bunu “Yeni Sabah”a açıqlamasında Milli Məclisin sabiq deputatı, iqtisadçı Vahid Əhmədov deyib.

O bildirib ki, Azərbaycan və Gürcüstan arasında dəmiryolu reysinin bərpası hər iki ölkə vətəndaşları üçün sevindirici haldır:
“Regionda çox ciddi problemlərin olmasına baxmayaraq, bu addımın atılması onu göstərir ki, Bakı və Tbilisi arasında olan isti münasibətlər dəmiryolu reysinin yenidən açılması üçün şərait yaradıb. Bu bizim üçün böyük əhəmiyyət kəsb edir. Düzdü, Gürcüstanda da qiymətlər kifayət qədər yüksəlib və müəyyən inflyasiya prosesi orada da gedir. Amma insanlar üçün dəmiryolu reysinin açılması çox böyük əhəmiyyət kəsb edir. Çünki Gürcüstan bizim qonşumuzdur və tarixi qohumluq əlaqələrimiz mövcuddur. . Bakı-Tbilisi-Bakı reysinin açılması Azərbaycanın logistik və iqtisadi inkişafına təkan verən amillərdən biridir. Bu addım həm də digər qonşu dövlətlərə də bir mesajdır ki, əgər sizdə də vəziyyət stabil olarsa, Azərbaycan həmin dövlətlərlə, xüsusən Rusiya və İranla sərhədləri aça bilər. Hesab edirəm ki, qonşu dövlətlərlə nə qədər sıx iqtisadi-siyasi əlaqələr qurularsa, əhalinin sosial vəziyyəti də bir o qədər yaxşı olar”.
İqtisadçı vurğulayıb ki, bilet qiymətləri vətəndaşların cibinə münasib olmalıdır:
“İnsanların həyat şəraitini, gediş-gəlişin sayını nəzərə almaq lazımdır. Qiymətləri yüksək qoymaq olmaz. İnsanların maddi durumunu nəzərə alıb, ona uyğun qiymətlər təyin edilməlidir”.
V.Əhmədovun fikrincə, ölkəmizdə artıq 6 ildir tətbiq edilən karantin rejimi tədricən aradan qaldırılacaq:
“Karantin rejiminin ləğv edilməsinə gəlincə, onsuz da Azərbaycanda karantin rejiminin tətbiqi o qədər də hiss olunmur. İnsanlar sərbəst gəzirlər və ciddi problem yoxdur. Amma qonşu dövlətlərdə yaranan problemlər ciddi şəkildə nəzərə alınmalıdır. Xüsusən, hazırda Ermənistanda parlament seçkilərinin kampaniyası gedir və digər dövlətlərdən bu prosesə ciddi müdaxilələr var. Ona görə də, karantin rejimini saxlamağa müəyyən qədər ehtiyac var. Düşünürəm ki, yavaş-yavaş karantin rejimi də aradan qaldırılacaq”.
Xatırladaq ki, mayın 26-da Bakı-Tbilisi-Bakı marşrutu üzrə gündəlik sərnişin qatarlarının fəaliyyəti bərpa olunacaq.

Qurban bayramı ilə bağlı təhlükəsiz heyvan kəsimi və satışına nəzarət gücləndirilib.

Bu barədə Azərbaycan Qida Təhlükəsizliyi Agentliyi (AQTA) məlumat yayıb.

Qeyd olunub ki, 27-28 mayda qeyd olunacaq Qurban bayramı günlərində qurbanlıq heyvanların kəsimi və satışına artan tələbat nəzərə alınaraq, AQTA Qida Təhlükəsizliyi Agentliyi aidiyyəti dövlət qurumları ilə birgə əhalinin təhlükəsiz ət və ət məhsulları ilə təmin olunması istiqamətində həyata keçirilən tədbirlərin miqyasını genişləndirib.

Qurban bayramı günlərində əvvəlki illərdə olduğu kimi qurbanlıq heyvanların satışı və kəsimi xidmətləri müvafiq dövlət qurumları ilə koordinasiyalı şəkildə əvvəlcədən müəyyən edilmiş ünvanlarda təşkil olunacaq. Satış və kəsim məntəqələrində yalnız baytarlıq nəzarətindən keçmiş heyvanlar vətəndaşlara təqdim ediləcək, heyvanların kəsimi isə baytarlıq-sanitariya tələblərinə cavab verən məntəqələrdə həyata keçiriləcək.

Eyni zamanda vətəndaşların tələbatı nəzərə alınaraq bəzi regionlarda AQTA ilə razılaşdırılmaqla yerli icra hakimiyyəti orqanları tərəfindən səyyar heyvan kəsimi çadırları quraşdırılacaq. Həmin məntəqələrdə qurbanlıq heyvanların satışı və kəsimi baytarlıq nəzarəti altında təşkil ediləcək.

AQTA vətəndaşları və bu sahədə fəaliyyət göstərən şəxsləri qurban kəsimini dini ayinlərlə yanaşı, qüvvədə olan qanunvericiliyin tələblərinə uyğun şəkildə həyata keçirməyə çağırır. Baytarlıq-sanitariya və sanitariya-gigiyena normalarına cavab verməyən yerlərdə, o cümlədən küçə, yol kənarı, məhəllə və digər ictimai ərazilərdə heyvan kəsimi və satışının aparılması, həmçinin baytarlıq şəhadətnaməsi və ya arayışı olmadan iri və xırdabuynuzlu heyvanların daşınması yolverilməzdir.

Bayram günlərində vətəndaşlardan sağlamlığı şübhə doğuran heyvanların satışı və ya antisanitar şəraitdə heyvan kəsimi halları ilə rastlaşdıqları təqdirdə hüquq-mühafizə orqanlarına, yerli icra hakimiyyətlərinə və AQTA-nın "1003 – Çağrı Mərkəzi"nə məlumat vermələri xahiş olunur.

Azərbaycan Respublikasının Kosmik Agentliyi (“Azərkosmos”) İsrailin “K.R.V Medical Group 2014 LTD” şirkəti ilə müqavilə imzalayıb.
Yeniavaz.com xəbər verir ki, “Azərkosmos” müqaviləni tender müsabiqəsi keçirmədən, bir mənbədən satınalma metodu əsasında bağlayıb.
Qeyd edək ki, “Azərkosmos” “K.R.V Medical Group 2014 LTD” şirkətindən İsraildə evlərin uzunmüddətli icarəsi xidmətlərini alacaq və bunun qarşılığında bir il üçün 1 milyon 80 min 258 manat 34 qəpik ödəyəcək.
Məlumat üçün bildirək ki, son 3 ildə “Azərkosmos” “K.R.V Medical Group 2014 LTD” ilə sayca üçüncü müqaviləni imzalayır. Əvvəlki iki müqavilə “Azersky-2” layihəsinin icrası çərçivəsində avtomobil və evlərin uzunmüddətli icarəsi xidmətləri ilə bağlı olub. Həmin müqavilələrin ümumi dəyəri isə 3 milyon 848 min 51 manat 95 qəpik təşkil edib.[left][/left]

7 ay, 7 gün əvvəl Prezident Administrasiyasının keçmiş rəhbəri, uzun illər "boz kardinal" ünvanı hesab olunan Ramiz Mehdiyev istintaqa cəlb olundu. Bundan sonra illərlə onun və ətrafının – xüsusilə kürəkəni, "vurub-yıxan əli" olan keçmiş deputat İlham Əlisəftər oğlu Əliyevin adına bağlı çeşidli qanunsuzluqların araşdırılacağına böyük ümidlər vardı. Ramiz Mehdiyev hazırda evində dustaqdır.

Kürəkəni, ailə üzvləri nəinki kölgəyə çəkilmir, əksinə, milyonluq avtomobil kolleksiyaları ilə Bakı küçələrində əzələ-gövdə nümayiş etdirir, sanki hər kəsə meydan oxumaqla qürrələnirlər. Bu günlərdə sosial şəbəkələrdə yayılan İlham və oğlu Hikmət Əliyevlərin Bakı küçələrində hərəkət edən avtomobillərinin fotoları sadə bir həyat tərzinə ironiyadır, ağlasığmaz bir dəbdəbədən xəbər verir. Maraqlıdır ki, bu avtomobillərin demək olar ki, hamısı vahid bir seriya xəttinə - 040 nömrə nişanlarına bağlanıb.

Siyahı kifayət qədər zəngindir və hər birinin qiyməti yüz minlərlə manatla ölçülür:

Mercedes-Maybach S-Class (90-AA-040) - Dövlət seriyasına yaxınlığı ilə seçilən, status rəmzi olan lüks sedan.

Rolls-Royce Ghost/Phantom (10-YY-040) - Dünyanın ən bahalı lüks avtomobillərindən biri.

Mercedes-Maybach GLS (10-AY-040) - Son model ultra-lüks yolsuzluq avtomobili.

Mercedes-AMG G-Class (Gelandewagen) (10-AB-040 və 10-PP-040) - Qara və mat rənglərdə, xüsusi tyuninq olunmuş bir neçə "G-Class".

Bentley Bentayga (10-PP-040) - Eksklüziv idman-lüks krossoveri.

Təkcə bu qarajın ümumi bazar dəyəri milyonlarla manat təşkil edir. Keçmiş bir deputatın və onun gənc övladının bu dərəcədə nəhəng maliyyə resurslarına sahib olması hansı leqal biznesin nəticəsidir? Bu resurslar uzun illər boyu sahibkarlar və dövlətin büdcəsindən müxtəlif yollarla mənimsənilən vəsaitlərin kiçik bir təzahürü deyil?

Mətbuatda və ictimaiyyətdə ən çox rezonans doğuran məqam isə hüquq-mühafizə orqanlarının bu aşkar dəbdəbə qarşısındakı sükutudur. Ramiz Mehdiyevin adı dövlətə xəyanət dosyesində hallanarkən, onun ailəsinin toxunulmazlığı hansı qanunlarla qorunur?

Karantin dövründə xüsusi rejim qaydalarını nümayişkaranə şəkildə pozaraq toy edən və buna görə qısa müddətli həbs həyatı yaşayan kürəkəni üçün sanki qanunlar elə həmin xırda xətalarla bitir. Təkcə Şabran rayonunda sabibkar Mansur İbrahimova qarşı törədilən cinayət – onun 10 milyonlarla manat dəyərində olan biznesinin 5 min 600 manata rəsmiləşdirilərək əlindən alınması, bu cinayətin bu gün də araşdırılmamış qalması da anlaşılmaz suallar sırasındadır. Mehdiyevin, onun kürəkəninin qeyri-qanuni varlanma faktları ortadadır. Ramiz Mehdiyevin kürəkəninin lüks həyatı və sərvəti hüquqi müstəvidə ciddi şəkildə araşdırılmalıdır.

Sadə bir hesablama aparmaqla xalqın, elə sahibkar Mansur İbrahimovun əlindən alınan biznesinin pulları hara gedir sualına cavab axtarmaqda fayda var. Fotoşəkillərdə görünən cəmi 6 avtomobilin ümumi dəyəri minimum 2.5 milyon - 3 milyon manat (təxminən 1.5 - 1.8 milyon dollar) arasındadır. İndi isə gəlin bu qarajın təkcə yanacaq (benzin) talanına baxaq.

Bir maşının günlük benzin xərci orta hesabla 50 manatdır. Bu halda 6 maşının ümumi günlük benzin xərci 300 manat, aylıq benzin xərci isə 9 min manat, illik təkcə benzin xərci 108 min manatdır. Bunun üzərinə avtomobillərin illik sığorta haqlarını, xaricdən gətirilən xüsusi ehtiyat hissələrini, lüks təkər dəstlərini və ayda bir neçə min manat maaş alan xüsusi mühafizəçi-sürücü heyətini də gəlsək, bu qarajın illik saxlanma xərci yüz minlərlə manat edir. Azərbaycanda minlərlə ailənin aylıq dolanışıq büdcəsi (minimum əməkhaqqı 400 manatdır) bu oliqarx övladlarının cəmi bir neçə günlük benzin puluna bərabərdir. Ramiz Mehdiyevin dövlət idarəçiliyində olduğu onilliklər ərzində formalaşan bu kölgə iqtisadiyyatının və qanunsuz varlanmanın bariz nümunəsi olan "040" kolleksiyası, sadə bir avtomobil sevdası deyil. Bu, xalqa və dövlətin apardığı antikorrupsiya siyasətinə qarşı açıq-aşkar bir çağırışdır.

Musavat.com

Bakının Yasamal rayonu ərazisində yaşayış binaları inşa edən "Lux Residence" şirkəti ilə bağlı redaksiyamıza şikayət məktubu daxil olub.
Qaynarinfo-nun məlumatına görə, Yasamal rayonu, Kazım Kazımzadə küçəsi 31 ünvanında yaşayan İsayev Famil Zahir oğlu yazır ki, "Lux Residence" şirkətinin apardığı inşaat işləri onun evini yararsız hala salıb. Famil İsayevin sözlərinə görə, şirkət bunu məqsədli şəkildə edib.
"Evdən çıxmağımızı istəyirlər. Amma az kompensasiya verirlər. Təsəvvür edin, yaşadığımız evin ümumi sahəsi 51,7 kvadratmetrdir, amma onlar hesab edirlər ki, 32,5 kvadratmetrdir. Təklif etdikləri məbləğ hətta 32,5 kvadratmetr üçün də yetərli deyil", deyə şikayətçi bildirir.
Famil İsayevin sözlərindən məlum olur ki, "Lux Residence" əvvəlcə onlara 91 000 manat kompensasiya təklif edib:
"Təbii ki, biz buna etiraz etdik. Bizi məhkəməyə verdilər. İddiada göstəriblər ki, guya yaşadığımız ev qeyri-qanuni tikilidir. Halbuki bu ev bizim baba mülkümüzdür. Evi 1916-cı ildə atamın babası inşa edib. Babam bu evdə anadan olub. Nənəm bu evə gəlin gəlib. Yəni 110 ildir bu ev bizdədir. Bu müddət ərzində evin qeyri-qanuni tikili olduğu üzə çıxmayıb?".
Şikayətçi yazır ki, Yasamal Rayon Məhkəməsi də iddianın absurdluğunu görüb və məsələni kompensasiya mübahisəsinə çevirib. Famil İsayevin sözlərinə görə, bundan sonra şirkət evin sahəsini ölçmək üçün "Central Consulting" şirkətinə müraciət edib:
"Biz həmin şirkəti evə buraxmadıq. Amma şirkət saxta ekspertiza rəyi hazırlayıb. Rəydə evin sahəsinin 32,5 kvadratmetr olduğu yazılıb. "Central Consulting" şirkətinin saxtakarlığını elə hazırladığı rəy vasitəsilə sübut etmək mümkündür. Təsəvvür edin, rəyə yazıblar ki, ev kərpicdən tikilib. Halbuki ev qaya daşlarından inşa edilib. Bundan başqa, evin qapısının dəmir materialdan olduğu yazılıb, amma qapı taxtadandır. Rəydə qeyd ediblər ki, ev 1 mərtəbəlidir, amma iki mərtəbəlidir. İkinci mərtəbədə əmim yaşayır. Bütün bunları bir kənara qoyaraq sual edirik: "Central Consulting" şirkəti evə baxmadan bu rəyi necə hazırlayıb? Bu açıq-aşkar saxtakarlıq deyilmi?"
Famil İsayevin sözlərinə görə, "Central Consulting" şirkətinin rəyini qəbul etmədiyinə görə məhkəmə tərəfindən evin ekspertizası həyata keçirilib:
"Məhkəmənin hazırladığı rəydə isə açıq-aşkar yazılıb ki, evin ümumi sahəsi (çöldən-çölə) 51,7 kvadratmetrdir. Amma maraqlıdır ki, işə baxan Ayşən Sultanova-Məmmədova heç məhkəmənin rəyini nəzərə almadı və bizə 109 000 manat kompensasiya verilməsi barədə qərar çıxardı. Bir məqamı da qeyd edim ki, məhkəmədə şirkətin nümayəndəsi vətəndaşlara kompensasiya olaraq hər kvadratmetrə görə 4000 manat ödədiklərini deyib. Təsəvvür edin, bu hesabla 109 000 manat heç 32,5 kvadratmetr üçün yetərli deyil. 4000 manatdan hesablayanda 32,5 kvadratmetr üçün 130 000 manat kompensasiya düşür. İndi özünüz baxın ki, nə qədər qanunsuzluq edirlər, haqqımıza girirlər".
Famil İsayev bildirir ki, qərardan apellyasiya şikayəti verəcək. Eyni zamanda məsələ ilə əlaqədar ölkə rəhbərliyinə və digər səlahiyyətli şəxslərə müraciət edəcək.
"Sona qədər qanuni şəkildə mübarizəmi aparacağam. Qardaşım hərbçidir, iki müharibədə iştirak edib. Bu ev təkcə mənə məxsus deyil ki, verilən məbləğlə razılaşım. Biz artıq pul istəmirik, sadəcə haqqımızı tələb edirik", deyə şikayətçi sonda vurğulayır.
"Lux Residence" şirkəti 100 manat nizamnamə kapitalı ilə yaradılıb. Şirkətin qanuni təmsilçisi Cəfərzadə Hüseyn İlşat oğludur. Hüseyn Cəfərzadə haqqında publik mənbələrdə heç bir məlumat yoxdur.
"Lux Residence" şirkəti haqqında isə mediada və sosial şəbəkə platformalarında əsasən tənqidi materiallara rast gəlinir. Məsələn, təxminən bir həftə əvvəl mediada Yasamal rayonu, İ. Qutqaşınlı küçəsi, ev 29-da yaşayan İbrahimova Firuzə Abusət qızının "Lux Residence" şirkətinin özbaşınalıqlarından şikayəti yer alıb.
Cari ilin aprel ayında isə mediada Pəricahan Abdullayeva adlı vətəndaşın "Lux Residence" şirkəti ilə bağlı videomüraciəti yayılıb. Vətəndaş bildirib ki, "Lux Residence" şirkəti onun evini başına uçurub.(Qaynarinfo)

Azərbaycan Avtomobil Yolları Dövlət Agentliyinin (AAYDA) tabeliyindəki "Avtomobil Yollarının Mühafizə Xidməti" Publik Hüquqi Şəxsə yeni direktor təyin edilib.
Qaynarinfo-nun məlumatına görə, AAYDA sədri Vüsal Nəsirlinin müvafiq əmri ilə Xidmətin direktoru vəzifəsinə Zaur İbrahimov gətirilib. Publik Hüquqi Şəxsdə rəis sözü direktorla əvəzlənib.
Xəbəri dəqiqləşdirmək üçün AAYDA-nın mətbuat xidməti ilə əlaqə saxlamaq cəhdlərimiz nəticəsiz qaldı.
Qeyd edək ki, bu ilin fevral ayında Əmək və Əhalinin Sosial Müdafiəsi Nazirliyi (ƏƏSMN) yanında Sosial Xidmətlər Agentliyinin İdarə Heyətinin sədr müavini vəzifəsindən azad olunan Zaur İbrahimov AAYDA İdarə Heyəti sədrinin inzibati idarəetmə məsələləri üzrə məsləhətçisi təyin olunmuşdu.
Xatırladaq ki, Avtomobil Yollarının Mühafizə Xidmətinin rəisi Səftər İsmayılov bir neçə gün əvvəl vəzifəsindən azad olunmuşdu. Məlumata görə, Xidmətdə aparılan yoxlama zamanı ciddi pozuntular aşkarlanıb. Sözügedən qurumun bir sıra vəzifəli şəxsləri barəsində araşdırmalara başlanılıb.


Qaynarinfo

“Azure Residence”də Qalmaqal Böyüməkdə Davam Edir: Məhkəmənin Çıxardığı Ziddiyyətli Qərarlar Sakinlərin Həyatını Təhlükəyə Atır!
Paytaxtın ən bahalı və nüfuzlu yaşayış komplekslərindən biri hesab olunan “Azure Residence”də (Xətai rayonu, 8 Noyabr prospekti) sular durulmur. Kompleksdə artıq təkcə sadə idarəetmə narazılıqlarından deyil, məhkəmə qərarlarının nümayişkaranə şəkildə icra edilməməsi, sakinlərə məxsus mülkiyyətin qanunsuz mənimsənilməsi və məhkəmə tərəfindən çıxarılan ziddiyyətli qərarlar ucbatından yüzlərlə ailənin təhlükəsizliyinin risk altına düşməsindən bəhs edilir.Ali Məhkəmənin Qərarı Var, Amma İcra Olunmur!
Kompleks sakinlərinin verdiyi məlumata görə, Azərbaycan Respublikası Ali Məhkəməsinin qüvvədə olan qərarlarına əsasən binanın idarəçiliyi qanuni şəkildə sakinlərin təsis etdiyi “Xətai-48” Mənzil Mülkiyyətçilərinin Müştərək Cəmiyyətinə (MMMC) verilmişdir. Hətta Xətai rayon İcra Şöbəsinin böyük icra məmurunun rəsmi sənədlərinə görə, binanın mərkəzi qazanxana kompleksi rəsmən icra yolu ilə bələdiyyəyə, oradan isə rəsmi aktla “Xətai-48” MMMC-yə təhvil verilmişdir.
Lakin binanın əvvəlki qanunsuz idarəedicisi “Guvenli-Servis Management” MMC və mülkiyyətçi Babək Babayev məhkəmə qərarlarını heçə sayaraq binanın strateji idarəetmə sahələrini və mərkəzi mühəndis-kommunikasiya sistemlərini əldə saxlamaq üçün qanunsuz müqavimət göstərirlər.
Sakinlərin və hüquqşünasların bildirdiyinə görə, qarşı tərəf məhkəmə sistemini qanunsuz şəkildə manipulyasiya edir. Belə ki, Xətai Rayon Məhkəməsi tərəfindən əvvəlcə “Guvenli-Servis” şirkətinin xeyrinə binanın qazanxana və mühəndis sistemlərinə müdaxiləni təmin edən Müvəqqəti Təminat Tədbiri (MTT) qərardadı çıxarılmışdır. Qanuni idarəedici olan “Xətai-48” MMMC dərhal həmin qanunsuz qərardaddan Bakı Apellyasiya Məhkəməsinə şikayət vermiş və mülki iş materialları yuxarı instansiyaya göndərilmişdir.
Qanunvericiliyin fundamental prinsiplərinə görə, qazanxana kompleksinin hüquqi taleyi yuxarı instansiyanın icraatında olduğu halda, eyni predmet üzrə birinci instansiyada paralel qərar çıxarıla bilməz. Lakin borclu şirkətlə sinxron hərəkət edən mülkiyyətçi Babək Babayev eyni texniki obyekti (qazanxananı) bu səfər fərdi mülkiyyətçi adı altında yenidən eyni məhkəmənin önünə gətirmişdir. Məhkəmə isə predmetin tamamilə eyni olduğunu və ilkin qərarın artıq Apellyasiya icraatında yerləşdiyini bildiyi halda, qərəzli şəkildə dərhal Babək Babayevin də xeyrinə yeni bir paralel Müvəqqəti Təminat Tədbiri (MTT) çıxarmışdır. Bu addım hüquqi anarxiyaya yol açmış və sakinlərin kütləvi etirazına səbəb olmuşdur. Məsələ ilə bağlı artıq Məhkəmə-Hüquq Şurasına da rəsmi şikayətlər ünvanlanıb.
Narazılıq doğuran ən dramatik məsələlərdən biri də kompleksin ümumi istifadədə olan sahələrində aparılan qanunsuz dəyişikliklərdir. Bir vaxtlar “Azure Residence”in əsas rəmzi və üstünlüyü sayılan lazerli hovuz kompleksi və sakinlərin əyləncə zonaları sökülərək fərqli təyinatlara uyğunlaşdırılıb, ofis və qeyri-yaşayış sahəsi kimi satılıb və ya icarəyə verilib.
Daha acınacaqlısı odur ki, məhkəmənin son qərarları ilə strateji əhəmiyyətli qazanxana, generator otağı və lift sistemlərinin açarları heç bir xidmət müqaviləsi olmayan, Fövqəladə Hallar Nazirliyinin (FHN) xüsusi lisenziyasından keçməyən kənar şəxslərin ixtiyarına verilmək istənilir. Sakinlər bildirirlər ki, mərkəzi texniki otaqların açarlarının qeyri-peşəkar şəxslərə paylanması binada hər an kütləvi yanğın, partlayış və lift qəzaları riski yaradır və yüzlərlə insanın həyatını birbaşa təhlükəyə atır.
Kompleksdə illərdir yığılan milyonlarla manat xidmət haqlarının hara xərcləndiyi barədə sakinlərin mülkiyyətçi olaraq hesabat ala bilmədiyi qeyd olunur. Buna baxmayaraq, binada davamlı olaraq istilik, isti-soyuq su və havalandırma sistemlərində ciddi texniki nasazlıqlar yaşanır. Qeyri-yaşayış sahələrinin sahibləri isə binanın vahid qazanxana sistemindən istifadə etsələr də, xərclərə ortaq olmaqdan və “Xətai-48” MMMC ilə rəsmi müqavilə bağlamaqdan imtina edirlər.
Sakinlər və hüquqşünaslar hesab edirlər ki, bu məsələ artıq adi bir kommersiya mübahisəsi deyil, dövlətin adından çıxarılan Ali Məhkəmə qərarlarının icrasının məcburi olması (qanunun aliliyi) və insan həyatının qorunması məsələsidir.
Məsələnin ciddiliyi nəzərə alınaraq, Azərbaycan Respublikasının Ədliyyə naziri Fərid Əhmədova və digər aidiyyəti hüquq-mühafizə orqanlarına, həmçinin Məhkəmə-Hüquq Şurasına rəsmi sorğular və şikayətlər göndərilmişdir.
Mediatvaz.com

Uzun illərdən sonra bərpa edilən Bakı-Tiflis-Bakı sərnişin qatarı üzrə birtərəfli biletin qiyməti açıqlanıb. ADY-nin məlumatına görə, qiymət 81 manatdan başlayacaq.

Bizimesr.com bildirir ki, Bakı-Tbilisi istiqamətində məsafə təxminən 550–580 kilometr təşkil edir. Bu marşrut həm sərnişin daşımaları, həm də regionlararası iqtisadi və turizm əlaqələri baxımından strateji əhəmiyyət daşıyır. ADY tərəfindən açıqlanan son qiymət siyasəti isə sosial şəbəkələrdə və ekspert çevrələrində geniş müzakirələrə səbəb olub.

Açıqlanan məlumatlara əsasən, Bakı-Tbilisi qatarında plaskart biletlərinin qiyməti 81 manat (təxminən 40 avro) səviyyəsindən başlayır. Kupe və SV vaqonlarının qiymətləri isə hələlik tam açıqlanmayıb.

Əvvəlki illərlə müqayisədə ciddi fərq diqqət çəkir. 2019-cu ilə qədər eyni istiqamətdə:

plaskart: 24–26 manat
kupe: 35–40 manat
SV: 57–60 manat kimi qiymətlər mövcud idi.

Lakin qiymət artımı sosial şəbəkələrdə “kəskin bahalaşma” və “Avropa səviyyəsinə yaxınlaşma cəhdi” kimi müxtəlif reaksiyalar doğurub.

Maraqlıdır, Avropa ilə müqayisə necə görünür?

Bakı-Tbilisi marşrutu ilə oxşar məsafəyə malik Avropa daxili və beynəlxalq qatar xətlərində qiymətlər geniş diapazonda dəyişir. Ümumilikdə Avropada qiymətlər aşağıdakı amillərdən asılı olur:

qatarın sürəti (sürət qatarı və ya klassik qatar),
öncədən bron,
xidmət seçimi.

Təxmini müqayisələr göstərir ki, 250–600 km aralığında Avropa qatar biletləri adətən 20–60 avro aralığında dəyişir. Məsələn, qısa və orta məsafəli Avropa marşrutlarında qiymətlər 20–40 avrodan başlayır, beynəlxalq və yüksək komfortlu xəttlərdə 40–60 avroya qədər yüksələ bilir. Bəzi hallarda yüksək sürətli qatar xətlərində qiymətlər daha yüksək olsa da, burada xidmət keyfiyyəti və sürət əhəmiyyətli dərəcədə fərqlənir.

Bakı–Tbilisi qatar xətti klassik gecə qatarı formatında işləyəcək və səfər müddəti təxminən 9–10 saat olacaq.

Avropada isə eyni məsafələr çox vaxt yüksək sürətli qatarlarla (200–300 km/saat) daha qısa müddətdə qət olunur.

Maraqlıdır, Bakı-Tiflis-Bakı qatarının sütəri 200-300 olacaqmı?
Xidmət hansı səviyyədə formalaşdırılacaq?
Bu qiymətə nələr daxil ediləcək?

Bu səbəbdən müqayisə aparılarkən yalnız qiymətlərin deyil, xidmət səviyyəsi və infrastruktur fərqinin də nəzərə alınmalıdır. Mövzu ilə bağlı ictimai müzakirələrdə əsas diqqət qiymət artımının iqtisadi əsaslandırılmasına yönəlir.

Bəzi ekspertlər hesab edir ki, dəmir yolu infrastrukturunun modernləşdirilməsi və xərclərin artması gələcəkdə qiymətlərə təsir edə bilər. Digər tərəfdən, tənqidçi yanaşmalar isə qiymət artımının əhalinin alıcılıq qabiliyyəti ilə uyğunluğunu sual altına qoyur və region ölkələri ilə müqayisədə fərqin getdikcə böyüdüyünü vurğulayır. Əslində uzun illərdən sonra bərpa edilən bu xidmət çoxları üçün əlçatan olmalıdır.

Kürdəmir rayonunun Muradxan kəndində fəaliyyət göstərən yerli fermerlər ciddi haqsızlıqla və məmur özbaşınalığı ilə üzləşdiklərini bildirirlər. Kənd sakinləri əziyyət çəkib əkin əkdikləri halda, dövlət tərəfindən ayrılan torpaq subsidiyalarının əsassız olaraq kəsilməsi təhlükəsi ilə qarşı-qarşıya qalıblar.

​Şikayətçinin sözlərinə görə, Muradxan kəndinin icra nümayəndəsi onlara torpaq subsidiyasının kəsiləcəyi barədə xəbərdarlıq edib. Bundan sonra sənədlərini götürərək Kənd Təsərrüfatı İdarəsinə yollanan fermerlər orada acınacaqlı mənzərə ilə rastlaşıblar. Məlum olub ki, Kənd Təsərrüfatı Nazirliyinin yerli idarəsində çalışan məsul şəxs Elçin Zeynalov əraziyə gəlib heç bir əyani yoxlama aparmayıb. Subsidiyaların dayandırılması üçün tamamilə təsadüfi qaydada insanlar seçilib və fermerlərin haqqı əllərindən alınmağa çalışılıb.

​"Aprelin 29-da biz idarədə olduğumuz müddətdə, Elçin Zeynalov kabinetində otura-otura, heç bir sahəyə gəlib baxmadan sənədləşmə apardı və bizim üçün 'sıfır əkin' yazdı" — deyə zərərçəkmiş fermer bildirir.

​Fermerlərin aidiyyəti qurumlara şikayət edəcəklərini bildirdikdə isə idarədə onlara qəribə bir bəhanə gətirilib. Onun qazi olduğu və bu səbəbdən Elçin Zeynalova heç nə deyə bilmədikləri iddia olunub. Lakin şikayətçilər haqlı olaraq vurğulayırlar ki, kimliyindən asılı olmayaraq heç kimin fermerin əziyyətini yerə vurmağa və qanunsuz addımlar atmağa ixtiyarı yoxdur.

​Məsələ ilə bağlı redaksiyamıza daxil olan ən dəhşətli məqam isə Elçin Zeynalovun öz mövqeyindən sui-istifadə etməsi barədə səslənən iddialardır. Sakinlərin iddialarına görə, Elçin Zeynalov açıq şəkildə yuxarı dairələrdə, yüksək mövqedə çalışan bir məmurun adamı olduğunu qeyd edir. O, bu arxayınlığa söykənərək bildirir ki, dövlətdən subsidiya alan şəxslər ona mütləq şəkildə "pay" (pul) verməlidirlər. Pul verməyən fermerlərin isə subsidiyaları müxtəlif bəhanələrlə kəsilir və ya tamamilə sıfırlanır.

​Ölkə rəhbərliyi tərəfindən yerli istehsalın artırılması və fermerlərə şərait yaradılması, onların incidilməməsi barədə kəsərli tapşırıqlar verildiyi halda, Kürdəmirdəki bu mənzərə ciddi suallar doğurur. Sakinlər sahədə faktiki olaraq taxıl və yonca əkdiklərini, böyük əziyyət çəkdiklərini qeyd edirlər.
​Fermerlər Elçin Zeynalovun bu hərəkətlərinin arxasında həm şəxsi prinsiplərin, həm də açıq rüşvət tələbinin dayandığını vurğulayırlar.

​Muradxan kəndinin zərərçəkmiş sakinləri sahələrinin tam açıq olduğunu, hər an gəlib əyani yoxlama aparıla biləcəyini bəyan edirlər. Onlar bu əsassız qərara və rüşvət iddialarına qarşı sonadək öz hüquqlarını müdafiə edəcəklərini bildirərək, Kənd Təsərrüfatı Nazirliyindən, Korrupsiyaya Qarşı Mübarizə Baş İdarəsindən və yuxarı instansiyalardan təcili tədbir görülməsini, bu haqsızlığın aradan qaldırılmasını xahiş edirlər.

"DİA-AZ"

Aprelin 6-da Bakının Suraxanı rayon İcra Hakimiyyətinin başçısı Adil Əliyev Yeni Günəşlidə yerləşən "Sahil - S İnşaat" MTK sakinlərini qəbul etmişdi. Anaxeber.info.az-ın məlumatına görə, sakinlər icra başçısından yaşadıqları binanın həyətində abadlıq işləri görülməsini, park salınmasını, uşaqların istirahəti və əylənməsi üçün şərait yaradılmasında köməklik göstərilməsini xahiş etmişdilər. 165 ailəni təmsil edən bir qrup sakin icra başçısı Adil Əliyevin qəbuluna yazılıb və həftənin ilk iş günü də onunla görüşmək imkanına nail olublar. Söhbət o sakinlərdən gedir ki, yaşadıqları binanın problemləri Birinci Vitse-Prezident Mehriban xanım Əliyevanın daim diqqətində olub, onun tapşırıqları və dəstəyi əsasında bir sıra problemlər həllini tapıb. Yəni binanın kommunal təchizatının (qaz, su, işıq və s.) təmin olunmasında hörmətli Mehriban xanımın xüsusi əməyi olub. Çünki sözügedən şirkətdən mənzil alan sakinlər dələduzluğun qurbanı olub və indiyə qədər də bu iş üzrə məhkəmə prosesi getməkdədir. Ona görə də dövlətin himayəsi nəticəsində sakinlərin bir çox çətinlikləri keçmişdə qalıb. Ancaq indiyə qədər binanın həyətinin və ətrafının abadlaşdırılması, yaşıllaşdırılması, park salınması, uşaqlar üçün stadion, sürüşkən və başqa oynamaq şəraiti yaradılması mümkün olmayıb. Çünki sakinlərin buna maddi gücü çatmayıb.
Anaxeber.info.az xatırladır ki, əslində, hələ iki il bundan əvvəl sakinlər Suraxanı rayon icra başçısı Adil Əliyevə müraciət edərək abadlaşma üçün köməklik göstərilməsini xahiş etmişdi. O zaman icra başçısı əraziyə gəlib və baxış keçirib, sakinlərə bildirmişdi ki, İH-nə layihə təqdim etsinlər, binanın ətrafını necə görmək istədiklərini göstərsinlər. Həmin vaxt eskiz kimi bir layihə hazırlanıb və Suraxanı İH-nə təqdim olunmuşdu. Ancaq geridə qalan 2 il ərzində rayon rəhbərliyi heç bir addım atmadığına görə, bu il aprelin 6-da sakinlər yenidən icra başçısının qəbuluna getmişdi. Ötən ayın əvvəli baş tutan həmin görüşdə sakinləri dinləyən icra başçısı onlardan 1 ay vaxt istədiyini söyləmişdi. Lakin qəbul otağında olan Suraxanı rayon Mənzil Kommunal Təsərrüfat Birliyinin rəisi Mais Məmmədov özünü icra başçısından və Prezidentdən, dövlətdən üstün bilərək ürəkbulandırıcı müdaxilələr etmişdi. MKTB rəisi sakinlərə demişdi ki, bəli, o vaxt əraziyə baxış keçirilib, vətəndaşlardan layihə istənilib, amma "səhv etmişik". Yəni icra başçısının gözü qarşısında ona aid olmayan işlərə "burun soxan" Mais Məmmədov dövlətin, onun icra orqanı adından "səhv etmişik" deyərək sakinlərə yersiz cavab qaytarmışdı. Artıq 6 apreldə keçirilən qəbuldan 1 aydan çox vaxt keçir. Ancaq icra başçısının bir aydan artıq vaxt ərzində sakinlərin xahişi ilə bağlı hər hansı addım atması olmayıb. Halbuki Adil Əliyev ayrı-ayrı ünvanlarda görüşlər keçirir, müxtəlif məsələlərlə maraqlanır, amma bir binanın sakinlərinin probleminə diqqət ayırmır. Belə çıxır ki, ya MKTB rəisi Mais Məmmədovun "səhv etmişik" sözünü eşidir, ya da Adil Əliyevin ona sözü keçmir, gücü çatmır. Çünki buna başqa cür izah vermək çətindir. Mais Məmmədovun 165 ailənin məsələsinə əngəl olması həmin qəbulda da göz qabağında idi. Ancaq sakinlər MKTB rəisinin yox, icra başçısının qəbuluna gəlmişdi. Axı nə çətin işdir ki, sakinlər üçün park düzəldəsən, uşaqların yayda oynamasına şərait yaradasan, sakinləri sevindirəsən?! Bunun özü də bir savabdır, yaxşılıqdır. Amma belə məlum olur ki, rayona rəhbərlik edən Adil Əliyev olsa da, rayonda ağalıq edən Mais Məmmədovdur. Onun müdaxiləsi sakinlərlə icra başçısının arasına girib. Hərçənd vətəndaşlar Adil Əliyevdən şikayətçi, narazı deyildi, sadəcə, xahişə gəlmişdi. Amma Mehriban xanımın, dövlətin sakinlərə verdiyi dəstəyə baxmayaraq, rayon icra başçısı bu siyasəti davam etdirmir. Halbuki hazıda Bakıda BMT-nin şəhərsalma forumu keçirilir, ekologiya, mənzil, urbanizasiya və digər vacib müzakirələr gedir, amma Adil Əliyev bir binanın həyətini belə düzəltməkdə köməklik göstərmir. Bununla belə, sakinlər hələ də ümidlidir ki, icra başçısı müjdə verəcək...(Anaxeber.info.az)