“Azərbaycan Televiziya və Radio Verilişləri” QSC (AzTV) “Və ya” verilişi üçün göstəriləcək xidmətlərə görə Nəcəfov Qəşəm Mirzə oğluna (Qəşəm Nəcəfzadə) 2 min 700 manat ödəniş edəcək.

Yeniavaz.com xəbər verir ki, AzTV bu məqsədlə Qəşəm Nəcəfov (VÖEN – 1601806762) ilə satınalma müqavilələri imzalayıb.

Qeyd edək ki, AzTV bu ödənişi bu ilin aprel-oktyabr aylarında göstəriləcək xidmətlər üçün edəcək.
Onu da bildirək ki, şair Qəşəm Nəcəfzadə həm də Azərbaycan Respublikası Audiovizual Şurasının üzvüdür.

Azərbaycanda daha bir şirkət – “Kon-Lay Project” MMC (VÖEN – 1301807111) etibarsız təchizatçıların reyestrinə daxil edilib.

“Kon-Lay Project” MMC sənədləri saxtalaşdırdığı üçün bir il müddətində – 12.05.2026-cı ildən 12.05.2027-ci il tarixinədək satınalmalarda iştirak edə bilməyəcək.

Məlumat üçün bildirək ki, nizamnamə kapitalı 20 manat olan MMC 2008-ci ildə qeydiyyata alınıb. Hüquqi ünvanı Yasamal rayonu, Həsənbəy Zərdabi prospekti, ev 78, m. 20-də yerləşən MMC-nin qanuni təmsilçisi Həsənov Anar Əzimxan oğludur.
Onu da bildirək ki, “Kon-Lay Project” MMC əsasən yerli icra hakimiyyətlərinin keçirdiyi tender müsabiqələrində qalib olub.
Şirkət təkcə son bir il ərzində 370 min manat dəyərində 19 tender müsabiqəsini udub.(Yeniavaz.com)

Ümumdünya Şəhərsalma Forumunun On Üçüncü sessiyasının (WUF13) nəqliyyat təminatı çərçivəsində təşkil edilən müvəqqəti xüsusi hərəkət zolaqları tədbir yekunlaşdıqdan sonra öz qüvvəsini itirəcək.

Mayın 23-dən sözügedən zolaqlarda avtobus zolağını bildirən 5.9 yol nişanları yığışdırılacaq. Yol nişanları çıxarılmış zolaqlar qüvvədən düşmüş hesab olunacaq və sürücülər bu zolaqlara daxil ola biləcəklər.

Nəqliyyatı Əlaqələndirmə Şurasının müvafiq qərarına əsasən, Mehdi Abbasov küçəsində təşkil edilən xüsusi hərəkət zolağı qüvvədə saxlanılacaq. Bununla da bu ərazidən keçən ictimai nəqliyyatın maneəsiz və fasiləsiz hərəkəti təmin ediləcək.

Sürücülərdən diqqətli olmaq və yol nişanları olan zolaqlarda qanunun tələbinə riayət etmək xahiş olunur.

Naxçıvanda gigiyenanı qorumağa cavabdeh qurumun özü antisanitar vəziyyətdə qalıb.

Bir həftədən artıqdır qurumun binasına verilən su kəsildiyindən 120-yə yaxın əməkdaş gigiyenik problemlə üzləşib.

Söhbət yerli İctimai Səhiyyə Xidmətindən gedir.

Əməkdaşlar “Gündəlik Naxçıvan”a bildirirlər ki, su olmadığı üçün binada sanitar qovşaqlardan istifadə etmək mümkün deyil və tualet qoxusu dözülməz vəziyyət yaradıb:

“Çox qəribə vəziyyət yaranıb. Əslində, biz özümüz başqa idarələrdə bu cür hallara qarşı mübarizə aparmalıyıq. Amma artıq bir həftədən çoxdur öz iş yerimizdə su olmadığından, gigyenik təhlükə yaranıb.
Sanitar qovşaqlar işləmədiyi üçün binanı pis qoxu bürüyüb. Bundan əlavə nə içməyə, nə qaynatmağa, nə də əl yumağa su tapılır.
Bir az da belə davam etsə, özümüz epidemiya mənbəyinə çevriləcəyik.
Rəhbərlik deyir ki, su idarəsinə məlumat verilib, düzələcək. Amma problem hələ də həll olunmayıb.”
İctimai Səhiyyə Xidməti 2023-cü ildə Naxçıvan Muxtar Respublikası Gigiyena və Epidemiologiya Mərkəzi və onun rayon şöbələrinin əsasında yaradılıb. Qurumun əsas məqsədi yoluxucu xəstəliklərin qarşısının alınması, profilaktik tədbirlərin həyata keçirilməsi, sosial gigiyena və pasiyent təhlükəsizliyi ilə bağlı standartların təmin edilməsidir.
Xidmət həmçinin insanların sağlamlığının qorunması, həyat keyfiyyətinin yüksəldilməsi və tibb müəssisələrində gigiyenik qaydalara nəzarət sahəsində fəaliyyət göstərməlidir.(Gündəlik Naxçıvan)

Bu gün saat 15:00-da Ümumdünya Şəhərsalma Forumunun 13-cü Sessiyasının (WUF13) bağlanış mərasimi keçiriləcək.

Bununla əlaqədar olaraq, tədbir iştirakçılarının Nəqliyyat Mübadilə Mərkəzlərindən WUF13 tədbir məkanına daşınması saat 13:00-dək təmin ediləcək.

Tədbir məkanını ziyarət edəcək və ya bağlanış mərasimində iştirak edəcək şəxslərdən qeyd edilənləri nəzərə almaları xahiş olunur.

Baş Dövlət Yol Polisi İdarəsi (BDYP) həftəsonu yollardakı vəziyyətlə bağlı xəbərdarlıq edib.

Bununla bağlı BDYP məlumat yayıb.

“Müşahidələr göstərir ki, bir qayda olaraq həftəsonu paytaxt və bölgələr arasında hərəkət intensivliyi yüksəlir. Hər iki istiqamət üzrə səfərlərin sayının artması nəticəsində, xüsusilə avtomagistrallarda nəqliyyat sıxlığı yaranır ki, bu da qəza riskinə təsirsiz ötüşmür”, - məlumatda qeyd olunub.

Daxili İşlər Nazirliyinin Baş Dövlət Yol Polisi İdarəsi bildirir ki, hərəkətin təhlükəsizliyinin təmin edilməsi məqsədilə respublika ərazisində nəzarət-profilaktik tədbirlər daha da gücləndirilib: “Bununla yanaşı qeyd olunmalıdır ki, bəzi hallarda sürücülər tərəfindən qaydalara əməl olunmaması, texniki nasazlıq, tələskənlik və diqqətsizlik nəticəsində ağır yol-nəqliyyat hadisələri qaçılmaz olur. Belə halların qarşısını almaq üçün Baş Dövlət Yol Polisi İdarəsi bir daha sürücülərə müraciət edir.

Səfərə çıxmazdan əvvəl avtomobilin texniki sazlığını yoxlayın, nasaz nəqliyyat vasitəsi ilə yola çıxmayın, sürət həddinə və ötmə-manevretmə qaydalarına ciddi riayət edin. Hazırda mövsüm üçün xarakterik olan yağmurlu hava şəraitini, yoldakı real vəziyyəti nəzərə alın. Uzaq məsafələrə səfərləri fasilələrlə qət edin, yorğun, yuxusuz halda sükan arxasına əyləşməyin.

Unutmayın! Yolda intizam və məsuliyyət hər bir sürücünün təhlükəsizliyinin əsas təminatıdır”.

Azərbaycanda femida ədalətsizlik tərəfə bəzən elə əyilir ki, onun qamətini dikəltmək heç cür mümkün olmur. Çünki məhkəmə və hakim onu şikəst edir və bərpası sağalmaz xəstəliyə çevrilir. Son illərin məhkəmə prosesləri içərisində belə absurd hökmlərdən birini də Bakı Ağır Cinayətlər Məhkəməsinin hakimi Elnur Nuriyev verdi. Anaxeber.info.az-a verilən məlumata görə, 4 il davam edən məhkəmə istintaqından sonra nəhayət ki, "Sahil-S İnşaat" MTK rəhbəri Taley Alaverdiyevə və şəriki Pənah Kərimova hüququn üzünü tüpürərək hökm oxundu. Hakim Elnur Nuriyevin sədrliyi ilə keçirilən məhkəmə prosesində dələduzluqda təqsirləndirilən Taley Alaverdiyev 5 il azadlıqdan məhrum olundu, şəriki Pənah Kərimova isə 1 il şərti cəza verildi. 165 ailəni aldadan, bir mənzili bir neçə nəfərə sataraq dələduzluq etdiyi sübuta yetirilmiş hər iki şəxsə Cinayət Məcəlləsinin tam ziddinə gedilərək yüngül cəza verildi. Hələ bu da ayrı məsələdir ki, belə bir hökmü oxumaq üçün 4 il məhkəmə proseslərini davam etdirməyə ehtiyac yox idi. Lakin illərlə zərər çəkənləri məhkəmələrdə süründürüb sonda MTK rəhbəri 5 il həbs cəzası alır, şərikinə isə 1 il şərti cəza verilir. Hakim Elnur Nuriyev dələduzluğa yol vermiş, 165 ailənin həyatını illərdir cəhənnəmə çevirmiş bu şəxslərə niyə belə yüngül hökm oxumasını heç bir səbəblə izah etməyib. Yəni sözügedən dələduzların nə səhhətində problem var, nə himayəsində azyaşlı. O halda, hansı dələduzluq faktına görə indiyə qədər belə yumşaq hökm oxunub? Əksinə, bu maddə ilə təqsirləndirilən şəxslər ən azı 9-12 il müddətinə azadlıqdan məhrum edilib. Hakim Elnur Nuriyev isə bir "tarixi" və "nümunəvi" qərar verdi, hakimlər arasında "rekorda" imza atdı. Halbuki Baş Prokurorluq yanında Korrupsiya ilə Mübarizə Baş İdarəsinin apardığı istintaqla hər iki şəxsin maddi sübutlar, zərər çəkənlərin ifadələri ilə dələduzluq əməlləri sübuta yetirilib. Amma prokurorluğun apardığı obyektiv istintaqın qarşılığında Bakı Ağır Cinayətlər Məhkəməsinin hakimi Elnur Nuriyev qeyri-obyektiv, ədalətsiz hökm çıxardı.

İndisə gələk, işin detallarına. Necə oldu ki, hakim Nuriyev Taley Alaverdiyevi və Pənah Kərimovu sözün əsl mənasında böyük dələduzluq işindən xilas etdi, 165 ailəni isə yenə də hüquqi problemlərlə üz-üzə qoydu...
Əvvəlcə, Pənah Kərimovdan başlayaq. Məhz bu şəxs MTK rəhbəri ilə şərik olandan sonra bir mənzilin bir neçə adama satılmasına başlanıb. Ona qədər belə saxtakarlıq halları yox idi və Pənah Kərimov Taley Alaverdiyevi bu "yola" çəkə bilib. İstintaqın sübuta yetirdiyi bu dələduzluq faktına baxmayaraq, hakim Elnur Nuriyev Pənah Kərimovu "təcili tibbi müdaxilə" adı ilə ev dustaqlığına buraxıb. Zərər çəkmiş sakinlərə məlum olub ki, Pənah Kərimovun səhhətində problem yoxdur və hər hansı əməliyyat olunmayıb. Bu, saxtakarlığın bir forması. Ancaq hakim Nuriyev hansısa səbəbdən və ya maraqdan irəli gələrək Pənah Kərimova bu şəraiti yaradıb. Hərçənd ölkədə marketdən ərzaq oğurlayana heç məhkəmə bu qədər yumşaq davranmır. 165 ailəniyə ev problemi yaradan, indiyə qədər dəymiş zərəri ödəməyən Pənah Kərimov bəhanə ilə ev dustaqlığına buraxılıb. Bu da azmış kimi, onun azadlıqda daha bir cinayət işi üzə çıxıb. Hakimin azad etdiyi bu şəxs "səhhətində problem" adı ilə "Sea Breeze"də tikinti işinə girişib. Bu yaxınlarda məlum olub ki, Pənah Kərimov orada da dələduzluq edib və artıq barəsində cinayət işi açılıb. Bəs hakim Elnur Nuriyev buna necə izah verəcək? Cinayətkarı azad etməyin özü belə məsuliyyət deməkdir və həmin şəxsin növbəti cinayəti törətməsinə şərait yaratmaqdır. Amma bu əməllərin sahibi olan Pənah Kərimova cəmi 1 il şərti cəza verir. Yəni hüquqa, Cinayət Məcəlləsinə, Azərbaycan konstitusiyasına böyük hörmətsizlik.

O ki qaldı MTK rəhbəri Taley Alaverdiyevə, bir daha xüsusi vurğulamaq yerinə düşər ki, hakim Elnur Nuriyev bu dələduza ən yüngül hökmü oxumaqla öz peşəsinə qarşı gedib, 165 ailəyə kələk gələn birinin tərəfini saxlayıb. Çünki heç bir halda zərəri ödəməyən şəxsin cəzasını belə yüngülləşdirmək olmaz. Hazırda 165 ailəyə dəymiş zərərin bir qismi ödənilib ki, bu da vaxilə tikinti prosesində iştirak etmiş şəxslərin hesabına ərsəyə gəlib. Ancaq Taley Alaverdiyev və Pənah Kərimov dəymiş ziyanın bir qəpiyini də ödəməyiblər. Bu adamların ucbatından sakinlərə zərər dəyib, amma nə Alaverdiyev, Kərimov tərəfindən kompensasiya olunub. Hakim Elnur Nuriyev dəymiş zərəri ödəyəmənlərin birinə cəmi 5 il həbs verib, digərinə 1 il şərti cəza kəsib. İndi siz deyin, hakim haqlıdır, yoxsa vətəndaşlar...

Anaxeber.info.az
Azər Talıbov

Məlumatlara əsasən, sözügedən RF İnşaat MMC şirkətinin Rauf Quluyev tərəfindən idarə olunduğu, şirkətin isə Leysan Məmmədov tərəfindən himayə edildiyi iddia olunur.


Leysan Məmmədov öz oğlu Elnur Məmmədov vasitəsilə şirkətə şərik qoşularaq müxtəlif iri həcmli layihələrin icrasında maraqlı tərəf kimi çıxış edib.


İddialara görə, Ağdam şəhərində yerləşən Mərkəzi Park layihəsi üzrə təxminən 7,8 milyon manat dəyərində tikinti işləri ilə bağlı tender prosesi üç dəfə ləğv edilmiş, daha sonra isə birbaşa müqavilə üsulu ilə RF İnşaat MMC ilə razılaşma əldə olunmuşdur. Qeyd olunur ki, satınalmalar qanunvericiliyində tenderin bir neçə dəfə nəticəsiz qalması müəyyən hallarda birbaşa satınalmaya əsas yarada bilər. Bu səbəbdən tenderlərin qəsdən nəticəsiz saxlanılması ehtimalı irəli sürülür.


Bundan əlavə, Qərvənd və Pirəhmədli kəndləri üzrə yol tikintisi layihələrində qalib olmuş podratçı şirkətlərə təzyiq göstərildiyi, nəticədə ümumi dəyəri təxminən 55 milyon manat olan işlərin subpodrat qaydasında RF İnşaat MMC-yə verildiyi bildirilir.


Digər iddialara əsasən, Xocavənd rayonu ərazisində təxminən 10 milyon manat dəyərində təmir-bərpa işləri də birbaşa müqavilə mexanizmi ilə həmin şirkətə həvalə olunub.


Məlumatlarda qeyd edilir ki, bu layihələrlə paralel olaraq Leysan Məmmədov, oğlu Elnur Məmmədov və Rauf Quluyev üçün ER OIL adlı yanacaq doldurma məntəqəsinin yaradılmasına şərait formalaşdırılıb. İddialara görə, şirkətin adı Elnur və Rauf adlarının baş hərflərindən formalaşdırılıb.


Yuxarıda sadalanan hallar – tenderlərin ləğvi, birbaşa müqavilələr, təzyiqlə bağlanan subpodrat razılaşmaları və ortaq kommersiya obyektinin yaradılması – RF İnşaat MMC şirkətinə xüsusi himayədarlıq göstərildiyi barədə şübhələri artırır.


Eyni zamanda, şirkətə köçürülən vəsaitlərin sonradan nağdlaşdırılması məqsədilə müxtəlif kommersiya qurumlarından istifadə edildiyi də iddia olunur. Bu kontekstdə Amirşin MMC, Kənanşin MMC və MNR Construction and Equipment MMC kimi şirkətlərin adı hallandırılır.


Qeyd olunan iddiaların hüquqi qiymət alması üçün satınalma sənədlərinin, bank köçürmələrinin, subpodrat müqavilələrinin və benefisiar sahiblik məlumatlarının aidiyyəti dövlət qurumları tərəfindən araşdırılması zəruridir.


Leysan Məmmədovun çirkli oyunları ilə İdman Nazirliyi dövründən ərkəsöyün Elnur Məmmədov belə pulların tüstüsündən keflənərək Sea Breeze-də öz davaları ilə məşhurlaşıb. Bu dırnaqarası qoçaq oğlan nədənsə 44 günlük müharibədə yorğan altında yatırdı.


Məsələ ilə bağlı Leysan Məmmədovun özünə sorğu ünvanlasaq da cavab verməkdən boyun qaçırıb.


32gun.az

Bir müddət əvvəl Səhiyyə Nazirliyinin Analitik Ekspertiza Mərkəzi (AEM) Nərimanov rayonu, Əliyar Əliyev küçəsi 41 ünvanında yerləşən, “NNS Klinika” MMC-yə məxsus özəl tibb müəssisəsində apardığı plandankənar yoxlama zamanı bir sıra ciddi nöqsanlar aşkarlayıb.

Bununla əlaqədar olaraq, müəssisənin fəaliyyətinin dayandırılması məqsədilə hüquq-mühafizə orqanları qarşısında vəsatət qaldırıldı. Həmçinin məsələ ilə bağlı Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinə də rəsmi müraciət ünvanlandı.

Bu məlumatı oxuyan hər kəs ilk baxışda dövlət qurumunun vətəndaşların sağlamlığının keşiyində dayandığını düşünə və belə prinsipial mövqeyi alqışlaya bilər. Lakin məsələni daha dərindən araşdırdıqda məlum olur ki, AEM-in bu prinsipiallığı bütün özəl tibb müəssisələrinə münasibətdə eyni şəkildə tətbiq edilmir. Buna misal olaraq “Laser Beauty Clinic”in “28 May” filialını göstərmək olar. Uzun illərdir həmin klinikada müvafiq tibbi ixtisas təhsili olmayan Nigar Rüfət adlı şəxs kosmetoloq kimi fəaliyyət göstərir və pasiyentlərə müxtəlif kosmetoloji prosedurlar tətbiq edir.

Qeyd edək ki, hələ bu ilin yanvar ayında Analitik Ekspertiza Mərkəzi Qaynarinfo-nun sorğusuna cavab olaraq Nigar Rüfətin Tibbi Kadrların Vahid Məlumat Reyestrində olmadığını təsdiqləmişdi (https://qaynarinfo.az/az/sehiyye-nazirliyi-qanunsuz-fealiyyet-goesterenlere-qarsi-niye-susur-3):

“Səhiyyə Nazirliyinin Tibbi Kadrların Vahid Məlumat Reyestrində Nigar Rüfətin adı yoxdur. Vətəndaş estetik (plastik) əməliyyat etdirməzdən əvvəl seçdiyi həkimin bu sahə üzrə praktik tibb fəaliyyətinə icazəsinin olub-olmadığını Səhiyyə Nazirliyi tərəfindən təsdiqlənmiş rəsmi siyahı vasitəsilə yoxlaya bilər”.

Bundan təxminən bir ay sonra – fevralın 20-də isə Analitik Ekspertiza Mərkəzi bu filialda apardığı yoxlama zamanı Nigar Rüfətin müvafiq ixtisas təhsili olmadan kosmetoloq kimi çalışdığını bir daha rəsmi şəkildə açıqlayıb (https://qaynarinfo.az/az/laser-beauty-clinic-de-qefil-yoxlama-nigar-rufet-hekim-kosmetoloq-isleye-bilmezmis).

Buna baxmayaraq, daha əvvəl də qanunsuz fəaliyyəti ilə bağlı adı hallanan bu şəxs fəaliyyətini heç bir maneə olmadan davam etdirir. Nigar Rüfət “Bynikol” adlı “Instagram” hesabında sözügedən ünvanda həyata keçirdiyi kosmetoloji prosedurlardan görüntülər paylaşır, müxtəlif endirim kampaniyaları elan edir və müştəri qəbul etdiyini açıq şəkildə nümayiş etdirir.

“Kosmetoloq”un sosial şəbəkə səhifəsində paylaşdığı əlaqə nömrəsi ilə də əlaqə saxladıq. Həmin nömrəyə cavab verən Nigar Rüfətin köməkçisi hazırda onun “Laser Beauty Clinic”in “28 May” filialında fəaliyyət göstərdiyini təsdiqlədi və kampaniya ilə bağlı ətraflı məlumat verdi.

Bu vəziyyət haqlı olaraq bir sıra suallar doğurur: Analitik Ekspertiza Mərkəzi nəyi gözləyir? Qanunsuz fəaliyyət göstərən bir şəxsin pasiyentlərdən birinə ciddi zərər vurmasınımı? Niyə digər klinikalarla bağlı hüquq-mühafizə orqanlarına müraciət edən dövlət qurumu bu halda eyni prinsipial mövqe nümayiş etdirmir?

İstər-istəməz belə bir ehtimal yaranır ki, bəlkə də Nigar Rüfəti Səhiyyə Nazirliyində himayə edən müəyyən şəxslər var.

Qurumun az qala dövlət sirri kimi qoruduğu bu yoxlamanın nəticəsini isə məhkəmə instansiyası açıqlayıb. Xitab24.az-ın əldə etdiyi məlumata görə, “LBC” MMC-yə məxsus filialda yoxlama zamanı şəhadətnaməsi olmadan kosmetoloji iş üzrə praktik fəaliyyət aşkarlanıb. Səhiyyə Nazirliyi Analitik Ekspertiza Mərkəzi tərəfindən protokol tərtib edilərək baxılması üçün məhkəməyə göndərilib.

Məhkəmənin qərarına əsasən, İnzibati Xətalar Məcəlləsinin 215.4-cü maddənin tələblərini pozan Rəna Soltanovanın şirkəti 6000 manat cərimələnib.

Qeyd edək ki, 2025-ci ildə Səhiyyə Nazirliyinin apardığı yoxlamalar nəticəsində “Laser Beauty Clinic”in Bakı şəhəri, Yasamal rayonu, İsmayılbəy Qutqaşınlı küçəsində yerləşən filialında da nöqsanlar aşkar edilmişdi. Bu səbəbdən bu filialın lisenziyasının dayandırılması və ya ləğvi ilə bağlı İqtisadiyyat Nazirliyinə müraciət olunmuşdu.

İqtisadiyyat Nazirliyi Səhiyyə Nazirliyinin lisenziya şərtlərinin pozulması hallarının aradan qaldırılmasına dair göstərişlərini yerinə yetirmədiyi üçün “Laser Beauty Clinic”in Yasamal filial üzrə lisenziya əlavəsinin keçərliliyini müddətli dayandırmışdı.

Göründüyü kimi adı çəkilən klinikanın adı illərdir eyni mövzuda hallarda hallanır, amma hələ də fəaliyyətini davam etdirir. Elə isə sual yaranır, aidiyyatı qurumlar nəyi gözləyir, niyə yekun, həlledici addımlar atılmır?

Görəsən “Laser Beauty Clinic”ə belə isti və yumşaq münasibətin arxasında hansı maraqlar dayanır?

Bizimesr.com

Mediaya Kəlbəcərdə işləyib pulunu ala bilməyən bir qrup usta aldandıqlarını iddia edir. Bu barədə audio müraciətdə bildirilir. Verilən məlumata görə, onları qrup halında Kəlbəcərə Ceyhun Kərimovun apardığını qeyd olunur.

Şikayətçi, yəni həmin qrupun rəhbəri 44 günlük Vətən Müharibəsinin qəhrəmanı Oruc Nurəli oğlu Hacıyev bildirilir ki, Ceyhun Kərimov Kəlbəcər rayonunda yerləşən “İstisu-Müalicə istirahət (mehmanxanasında) kompleksi sahəsində qaynaqçı usta kimi işləyib. Ərazini yaxşı tanıdığı üçün yaxşı pul qazanmaq eşqinə düşüb.

Bu mənada Ceyhun Kərimov adlarını çəkəcəyimiz ustaların Kəlbəcər rayonunda yerləşən “İstisu-Müalicə istirahət (mehmanxanasında) kompleksi sahəsində işlə təmin olunacaqları barədə yağlı vədlər verib, özü ilə sözügedən ünvana aparır…

Əvvəlcə onların işləyəcəyi “A-Kond 1” QSC-ti barədə qısa məlumat verək.

İnternet üzərindən aparılan araşdırmaya görə şirkət böyük layihələrin icraçısı kimi nəhən işlərin görülməsində təmsil olunub. Direktoru Orxan Bağırov olan bu şirkətin hətta xeyriyyəçi şirkət olduğu barədə də məlumatlar yazılıb…

İndi gələk mətləbə. Ceyhun Kərimov özü ilə gətirdiyi işçiləri fiziki şəxs Xəyal Ələsgərovla tanış edir…

Qeyd edək ki, “A-Kond 1” QSC-ti fiziki şəxs Xəyal Ələsgərovla 27 fevral 2026-cı ildə iş öhdəliyi barədə müqavilə bağlanıb.

İndi isə gəlin görək fiziki şəxs Xəyal Ələsgərov kimdir.

MN-nin “N” saylı hərbi hissəsində nə az, nə də çox düz 10 il Gizir vəzifəsində Poliqon rəisi kimi xidmət edib. Özünün verdiyi məlumata görə ailə vəziyyətinə görə ordudan iki ildir tərxis olunub. Bir ildən artıqdır müxtəlif yerlərdə malyar kimi işə başlayıb. Orta təhsillidir. Tikinti mühəndisliyinə aid nə təhsili, nə də iş təcrübəsi var…

Xatırladaq ki, Prezident Ali Baş Komandanın Qarabağa Qayıdış Dövlət Proqramı çərçivəsində regionda böyük tikinti layihələri həyata keçirilir.

Belə bir nəhəng layihənin icrasına isə sabiq gizirin rəhbərlik eləməsi gülünc doğurur. Adamın kollec təhsili, hətta iş təcrübəsi belə belə yoxdur. Sual yaranır. Belə bir naşı adamın bu boyda nəhəng layihənin icrasına rəhbərlik eləməsi görün hansı fəsadların əmələ gəlməsinə şərait yaratmış olur. Bu işdə kimlər maraqlıdır?

Budurmu ölkə rəhbərinin quruculuq siyasətinə dəstək?

Görünən mənzərə isə tam əksini göstərir.

Bu boyda məsuliyyət tələb edən, nəhəng və memarlıq baxımından Prezidentin də həmişə ifadə etdiyi Kəlbəcər rayonunda yerləşən “İstisu-Müalicə istirahət (mehmanxanasında) kompleksi sahəsində tikinti və digər işlərin görülməsi niyə belə bir təcrübəsiz və mühəndislik təhsili olmayan adama həvalə edilib?

Üstəlik onuunla şirkətin baş direktoru arasında rəsmi müqavilə də bağlanıb. Adam da mütəxəssis qismində elan verərək iş təcrübəsini yoxlamadan adamları işə cəlb edib. Və müqavilənin şərtlərindən irəli gələn öhdəliklərin icrasına başlanılıb. Amma…

Ammasının əmmasına isə şikayətlərlə tanış olandan sonra öyrənməyə nail olacaqsınız.

İcraçı ustaları 12 aprel 2026-cı il tarixində işə cəlb edir. 20 nəfərə yaxın adam işə başlayır. Aralarında bağlanan şifahi müqaviləyə əsasən bir ay iş günü ərzində iki dəfə avans şəkilində ödəmələr olacağına söz verilib. Hətta əmək müqaviləsi belə bağlanmayıb. 15-20 gün işlətdikdən sonra, işçilərə verilən vədə görə pul verə bilmirlər. Söz-söhbət və şikayətlər elə həmin gündən başlayır. Xəyal Ələsgərov fikirləşir ki, şikayət olarsa əsas zərbə elə onun üzünə dəyəcək. Bu mənada 25.04.2026-cı il tarixində işçilərlə müqaviləni rəsmiləşdirir. 15 gün sınaq, bir aylıq rəsmi müqavilə şərtləri ilə cibi boş evlərinə qayıdan və şikayət üçün qapı döyməkdən yorulmayan ustalar hələ də onlara məxsus pullarını ala bilmirlər.

Bu da aşağıda adları yazılan icİşçilər:

1. Oruc Nurəli oğlu Hacıyev

2. Nahid Tapdıq oğlu Xəlilov

3. Qnyaz Yusif oğlu Quliyev

4. Rüfət Vidadi oğlu Mustafayev

5. Samir Alxan oğlu Vəlixanov

Əmək müqaviləsinin 31.05.2026 tarixinədək 1 ay 7 gün müddətinə bağlanmışdır.

Qısa olaraq onu da qeyd edək ki, Oruc Nurəli oğlu Hacıyev 44 Günlük Vətən Müharibəsinini qəhrəmanlarındandır. Torpaqların işğaldan azad olunmasında iştirak edib, amma indi biriləri həmin torpaqlarda döyüşüb qəhrəman kimi tarixə düşən

Veteranı aldadıb pulunu vermirlər.

Şikayətçilər bu işdə tez-tez layihə rəhbəri olaraq “A-KOND-1” QSC-nin təmsilçisi Asif İsmayılovun adını çəkirlər. Bu barədə “A-KOND-1” QSC-nin əlaqə nömrəsinə dəfələrlə zəng eləməyimizə baxmayaraq nə Orxan Bağırovla, nə də Asif İsmayılovla əlaqə yarada bilmədik.

Müraciət edənlər pullarını tələb edirlər. “A-Kond 1” QSC-nin yerləşdiyi ünvana dəfələrlə getsələr də müsbət nəticə əldə edə bilməyiblər. Əslində alacaqları pulun bir hissəsi əlbəl ödənilib. Qalanını isə vermirlər. Biz isə redaksiya oilaraq yazını tədbir görülməsi üçün Dövlət Vergi Xidmətinə, Əmək Müfəttişliyi Xidmətinə və Ali Baş Komandan cənab İlham Əliyevə ünvanlayırıq.

Azia.az