Cəlilabad Dövlət Peşə Təhsil Mərkəzi "Proqress İnşaat En" şirkəti ilə satınalma müqaviləsi imzalayıb.

Müqavilədə Mərkəzin 1-ci korpus binasının əsaslı təmiri işlərinin satın alınması nəzərdə tutulur. Müqavilənin maliyyə dəyəri 72 449,17 manatdır.

Satınalma proseduru birmənbə metodunun tətbiqi ilə həyata keçirilib. Bu isə deməkdir ki, satınalma müsabiqəsi keçirilməyib.

İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, "Proqress İnşaat En" MMC 29 noyabr 2021-ci il tarixində Bakı şəhəri Lokal Gəlirlər Baş İdarəsində dövlət qeydiyyatına alınıb. Şirkətin nizamnamə kapitalı 1000 manatdır. Hüquqi ünvanı Bakı şəhəri, Yasamal rayonu, Həsən Məcidov küçəsi, ev 14-də yerləşir. MMC-nin qanuni təmsilçisi Abuzərov Kamran Zülfəli oğludur.

Şirkət haqqında açıq mənbələrdə demək olar ki, əlavə heç bir məlumat mövcud deyil. "Proqress İnşaat En" MMC-nin nə rəsmi internet səhifəsi, nə də ictimaiyyət üçün əlçatan əlaqə vasitələrinə rast gəlinir.

"Proqress İnşaat En" MMC dövlət satınalmalarında tez-tez qalib gələn şirkətlərdən biri kimi tanınır. Dövlət satınalmalarının vahid internet portalı üzərindən apardığımız araşdırmaya əsasən, şirkət ötən il 8 tenderin qalibi olub. Həmin tenderlər üzrə bağlanmış satınalma müqavilələrinin ümumi maliyyə dəyəri 6 613 104,65 manat təşkil edib.

Qaynarinfo

ADPU-nun dosenti İlham Əhmədovun məqaləsini dəyərli oxucuların müzakirəsinə buraxır:
Azərbaycan xalqının zəngin folklorunda bəzən bütöv bir sosial həqiqəti ifadə edən metaforalar görünür. Onlardan biri də bu ifadədir: “Siz nə çalırsınız çalın, mən heyvagülü oynayacağam.” Bu ifadənin mənası budur ki, kim nə deyirsə desin, mən yenə də öz bildiyimi edəcəyəm. Əslində bu, təkcə fərdi xarakterin xüsusiyyəti deyil, bu bəzən bütöv idarəetmə modeli olur...
Bu gün Azərbaycan təhsil sisteminə diqqətlə baxdıqda müəyyən sahələrdə məhz belə idarəçilik fəlsəfəsinin formalaşdığını görürürk. Bu məqalədə həmin yanaşmanı şərti olaraq “Təhsildə heyvagülü siyasəti” adlandırırıq. Bu anlayış təhsildəki idarəetmə davranışının analitik modelidir.
“Heyvagülü siyasəti” nədir?..
Bu təhsil siyasətinin əsas xüsusiyyətləri belədir:
• ekspert rəyinin nəzərə alınmaması;
• elmi araşdırmaların qərarverməyə təsir etməməsi;
• tənqidlərin sistemli şəkildə görməzlikdən gəlinməsi;
• statistik göstəricilərin formal və saxta xarakter daşıması;
• beynəlxalq təcrübənin əməldə yox, yalnız təqdimatlarda xatırlanması;
• problemlərin səbəblərinin deyil, nəticələrinin müzakirə olunması…
Başqa sözlə, qərar əvvəl qəbul edilir, sonra isə həmin qərarı əsaslandıracaq arqumentlər axtarılır. Halbuki müasir dövlət idarəçiliyində proses bunun tam əksidir. Əvvəl məlumat toplanır, sonra təhlil aparılır, daha sonra qərar qəbul edilir.
Təhsil menecmentində ən təhlükəli amil: səbəbsiz yerə özünəinamın həddindən artıq olması…
Müasir idarəetmə nəzəriyyəsində “Dunning-Kruger effekti” adlanan maraqlı psixoloji hadisə mövcuddur. Bu effekt göstərir ki, ən az bilən insanlar çox vaxt özlərini ən çox bilən hesab edirlər. Ən peşəkar insanlar isə daim öyrənməyə çalışırlar. Təhsil idarəçiliyində də bəzən oxşar vəziyyət müşahidə edilir.
İdarəçilərdən bəziləri hesab edirlər ki, onların qərarları müzakirə olunmamalıdır. Təklif vermək tənqid kimi qəbul edilir. Alternativ fikir isə sanki şəxsi hücum hesab olunur. Belə olduqda idarəetmə inkişaf etmir. Sadəcə təkrarlanır…
Reallıqda xeyli məqalələr yazılır, təkliflər verilir, amma “söz sahibi” öz payini götürmür…
Son on ildə Azərbaycan təhsili haqqında yüzlərlə analitik məqalə dərc olunmuşdur. Universitet professorları, təhsil ekspertləri, müəllimlər, işəgötürənlər, jurnalistlər, beynəlxalq təşkilatlar eyni problemləri dəfələrlə göstərmişlər. Məsələn, kurikulum problemləri, müəllim hazırlığındakı boşluqlar, qiymətləndirmə mexanizmlərinin zəifliyi, universitetlərin əmək bazarından uzaqlaşması, elmi fəaliyyətin formal xarakter daşıması, beynəlxalq akkreditasiyanın zəif inkişafı, rəqəmsallaşmanın konsepsiyasız həyata keçirilməsi. Lakin illər keçir, problemlər isə demək olar ki, dəyişmir. Bu, artıq təsadüf deyil. Bu, idarəetmə modelidir. Ölkə prezidenti deyir ki, ictimai nəzarəti gücləndirin, bizə təkliflər verin, amma məmurlar başqa cür düşünür və işləyirlər...
Məktəb məzunları niyə proqramın yalnız az bir hissəsini mənimsəyirlər?..
Müxtəlif qiymətləndirmələr göstərir ki, məktəbdə öyrədilən proqramın əhəmiyyətli hissəsi şagird tərəfindən tam mənimsənilmir. DİM-in hesabatı göstərir ki, məzunlar proqramı 40 % həcmində mənimsəyirlər. Bu hal yalnız şagirdin və ya müəllimin fərdi səyləri ilə izah oluna bilməz. Problem daha dərin sistem amilləri ilə bağlıdır…
Əgər məzun yalnız proqramın təxminən 40 faizini effektiv şəkildə mənimsəyirsə, bu, ilk növbədə proqramın həcminin real imkanlara uyğunluğu, öyrənmə metodikasının müasir idrak xüsusiyyətlərinə uyğunluğu, qiymətləndirmə sistemi öyrənməni təşviq edirmi, yoxsa yalnız nəticəni ölçür, müəllimlərin peşəkar inkişafı davamlı şəkildə dəstəklənirmi, məktəblərdə məlumatın əzbərlənməsi, yoxsa bacarıqların formalaşdırılması prioritetdir və s. kimi suallar yaradır. Əgər bu suallar illərlə cavabsız qalırsa, problem fərdlərdə deyil, sistemdədir...
Universitet diplomunun dəyərini kim müəyyən edir?..
Ali təhsilin keyfiyyəti diplomun kağız üzərində mövcudluğu ilə deyil, onun məzununa qazandırdığı kompetensiyalarla ölçülür. Müasir qlobal əmək bazarında universitet diplomunun nüfuzu dörd əsas amildən asılıdır: tədrisin keyfiyyəti, elmi tədqiqat potensialı, beynəlxalq əməkdaşlıq, məzunların rəqabət qabiliyyəti…
Əgər universitet məzunu əmək bazarında üstünlük qazanmırsa, işəgötürənlər həmin diplomu yüksək dəyər kimi qəbul etmirlərsə və beynəlxalq akademik mühitdə universitetin elmi nüfuzu zəifdirsə, formal diplom iqtisadi və sosial kapitala çevrilə bilmir. Bu vəziyyət yalnız ayrı-ayrı ali məktəblərin deyil, bütövlükdə ali təhsil siyasətinin nəticəsidir...
İdarəetmədə ən böyük təhlükə — geribildirimdən qorxmaq…
İnnovativ təhsil sistemlərinin hamısında bir ümumi xüsusiyyət vardır. Onlar tənqidi sevirlər. Çünki tənqid pulsuz konsaltinqdir. Ən uğurlu universitetlər hər il minlərlə rəy toplayırlar. Müəllimdən, tələbədən, məzundan, işəgötürəndən, valideyndən… Onlar bu rəyləri təhlükə hesab etmirlər. Bunu inkişaf resursu hesab edirlər. Əgər təhsil sistemi tənqidi qəbul etmirsə, o zaman səhvlər gizlədilir. Səhvlər gizlədildikdə isə inkişaf dayanır…
Təhsil idarəçiliyi XXI əsrdə necə olmalıdır?..
Rəqəmsal əsrdə təhsil idarəçiliyi inzibati göstərişlərə deyil, biliklərin kollektiv istehsalına əsaslanmalıdır. Müasir menecer yalnız qərar qəbul edən şəxs deyil, həm də öyrənən liderdir. O, ekspert rəylərini toplayır, məlumatları təhlil edir, fərqli baxışları müqayisə edir və qərarlarını sübutlara əsaslandırır. Belə yanaşma “öyrənən təşkilat” modelinin əsasını təşkil edir. Burada rəhbər hər şeyi bildiyini iddia etmir, əksinə, daha yaxşı qərarlar qəbul etmək üçün müxtəlif bilik mənbələrindən istifadə edir. Təhsil kimi mürəkkəb sistemdə bu xüsusiyyət zərurətdir…
Təhsildə “heyvagülü siyasəti”nin uzunmüddətli nəticələri…
Əgər qərarvermə prosesi qapalı qalarsa və elmi əsaslandırılmış təkliflər sistemli şəkildə nəzərə alınmazsa, bir neçə strateji risk formalaşır:
• insan kapitalının keyfiyyətinin zəifləməsi;
• innovasiya potensialının aşağı düşməsi;
• universitetlərin beynəlxalq rəqabət qabiliyyətinin azalması;
• işəgötürənlərlə ali təhsil arasında uyğunsuzluğun dərinləşməsi;
• gənclərin xaricdə təhsilə və əmək bazarına yönəlməsinin artması;
• dövlətin təhsilə yatırdığı investisiyaların səmərəliliyinin azalması…
Bu nəticələr yalnız təhsil sektorunu deyil, bütövlükdə insan kapitalı, iqtisadi inkişafı və milli rəqabət qabiliyyətini də zəiflədir.
“Heyvagülü siyasəti”ndən “Öyrənən təhsil idarəçiliyi” modelinə keçid…
Azərbaycan təhsilinin qarşısında duran əsas vəzifə yeni layihələr elan etməkdən daha çox, qərarvermə fəlsəfəsini dəyişməkdir. Bunun üçün aşağıdakı istiqamətlər prioritet olmalıdır:
1.Təhsil siyasətində sübuta əsaslanan qərarvermə mexanizmlərinin tətbiqi.
2.Müstəqil ekspert və akademik icmanın qərarların hazırlanmasına sistemli şəkildə cəlb olunması.
3.Təkliflərin və ictimai müzakirələrin nəticələrinin rəsmi şəkildə qiymətləndirilməsi.
4.Təhsil göstəricilərinin müntəzəm monitorinqi və açıq məlumat bazalarının yaradılması.
5.Pilot layihələrin nəticələri əsasında siyasətin korrektə edilməsi.
6.Uğursuz qərarların səbəblərinin etiraf edilməsi və institusional öyrənmə mexanizmlərinin formalaşdırılması.
Bu yanaşma idarəetməni şəxsi iradədən institusional rasionalizmə doğru yönəldir…
Azərbaycanın xalq hikmətində “Siz nə çalırsınız çalın, mən heyvagülü oynayacağam” ifadəsi inadkarlığın və dəyişməz davranışın obrazlı təsviridir. Lakin dövlət idarəçiliyində, xüsusilə, təhsil kimi gələcəyi müəyyən edən sahədə belə yanaşma inkişaf strategiyası ola bilməz. Təhsil sistemi yalnız büdcə və ya normativ sənədlərlə deyil, öyrənmə qabiliyyəti ilə güclənir. İdarəetmə də eyni prinsiplə işləyir: dinləməyən sistem öyrənmir, öyrənməyən sistem isə inkişaf etmir…
Azərbaycan təhsilinin gələcəyi “Heyvagülü siyasəti”ndən imtina edib dialoq, elmi sübutlar, peşəkar ekspertiza və institusional öyrənmə mədəniyyətinə keçidindən asılıdır. Əsl innovasiya yeni terminlər yaratmaqda deyil, idarəetmənin özünü öyrənən və öz səhvlərindən nəticə çıxaran sistemə çevirməkdədir. Məhz belə olduqda təhsil yalnız diplom verən institut deyil, ölkənin intellektual, iqtisadi və mədəni inkişafını təmin edən strateji gücə çevrilə bilər…”

Moderator.az

Xəbər verdiyimiz kimi, bu gün tiktoker İlduzə Hacıyevaya (Arzum) hökm oxunub. O, ölümlə nəticələnən yol qəzası törətməkdə və hadisə yerindən qaçmaqda təqsirli bilinərək 5 il 2 ay azadlıqdan məhrum edilib.

“Qafqazinfo”nun məlumatına görə, hökmdən sonra Arzumun atası Elmar Hacıyev məhkəmə binası önündə aqressiv fikirlər səsləndirib. O, hətta qəzada həlak olan və xəsarət alan şəxslərin yaxınlarını təhqir etməkdən belə çəkinməyib.

Tiktokerin atasının zərərçəkmiş tərəfə qarğış dolu sözləri sosial şəbəkələrdə qınaq doğurub. Bu məqamda onun daha əvvəl də sosial şəbəkə üzərindən zərərçəkmiş şəxslərin ünvanına nalayiq fikirlər səsləndirdiyi xatırladılıb. Bundan əlavə, Arzumun digər yaxınları da qəzada ölən şəxs haqda “narkoman idi”, “həbs edilmişdi” kimi sözlər işlədiblər.

Bu məsələlər isə hazırkı məhkəməyə aid olmadığı üçün gələcəkdə böhtan kimi qiymətləndirilə bilər.

Məlumat üçün deyək ki, ictimai yerdə kimisə təhqir etmək və ya böhtan atmaq cinayət hesab olunur. Cinayət Məcəlləsinin 147 (böhtan) və 148-ci (təhqir) maddəsi ilə təqsirli bilinən şəxs 1 ilə kimi həbs edilə bilər.

Həmin videonu təqdim edirik:

Elm və Təhsil Nazirliyinin nəzdində Təhsil Sisteminin İnformasiyalaşdırılması İdarəsinin keçirdiyi tender müsabiqəsinin qalibi “Texno Lyuks M” MMC (VÖEN – 2905154871) olub.

Yeniavaz.com xəbər verir ki, İdarə təhsil müəssisələrinin internet şəbəkəsi ilə (rəqəmsal texnologiyalarla) təmin edilməsi xidmətləri üçün “Texno Lyuks M” MMC-yə 1 milyon 790 min 255 manat 99 qəpik ödəyəcək.
Məlumat üçün bildirək ki, nizamnamə kapitalı 50 manat olan “Texno Lyuks M” MMC-nin hüquqi ünvanı Bakı şəhəri, Nəsimi rayonu, 20 Yanvar küçəsi, ev 24, mənzil 12 ünvanında yerləşir. MMC-nin qanuni təmsilçisi Əliyev Emin Arif oğludur.

2018-ci ildən fəaliyyət göstərən “Texno Lyuks M” MMC indiyədək yalnız Elm və Təhsil Nazirliyinin nəzdində Təhsil Sisteminin İnformasiyalaşdırılması İdarəsinin keçirdiyi tender müsabiqələrində qalib olub. “Texno Lyuks M” MMC 2022–2026-cı illərdə Təhsil Sisteminin İnformasiyalaşdırılması İdarəsinin keçirdiyi 44,4 milyon manat dəyərində 9 tender müsabiqəsində qalib olub.

Onu da qeyd edək ki, dövlət qeydiyyatına alınan zaman “Texno Lyuks M” MMC-nin hüquqi ünvanı Sumqayıt şəhəri, məhəllə 51, ev 37-də yerləşib. MMC-nin qanuni təmsilçisi isə Babaşov Mirağa Babakişi oğlu olub.

Gəncə şəhərində bir qrup müəllim kollecin direktorunun onları əmək müqaviləsində dəyişikliklərə razılıq verməyə məcbur etdiyini iddia edir.


Xezerxeber.az-ın məlumatına görə, söhbət Gəncə Dövlət Universitetinin nəzdində Regional Kollecindən gedir.


Müəllimlərin sözlərinə görə, direktorun bu tələbi onları narazı salıb.


Müəllimlər iddia edirlər ki, kollecin hazırkı direktoru vəzifəyə təyin olunduqdan sonra onlar dəfələrlə oxşar problemlərlə üzləşiblər.


Bəs iddialar nə dərəcədə doğrudur? Kollecin direktoru Xoşqədəm Xudiyeva iş rejimi ilə bağlı müəyyən dəyişikliklərin nəzərdə tutulduğunu bildirsə də, əməkdaşların səsləndirdiyi fikirlərin həqiqətə uyğun olmadığını bildirib:


Kollecin direktoru həmçinin deyib ki, nəzərdə tutulan dəyişikliklərlə bağlı əməkdaşlara qanunvericiliyə uyğun şəkildə əvvəlcədən yazılı bildirişlər təqdim olunub.(Xezerxeber.az)

İctimai İaşə və Xidmət üzrə Bakı Dövlət Peşə Təhsil Mərkəzinin direktoru Fatma Çandırova təqaüdə göndərilib.

Bizimesr.com bildirir ki, Mərkəz direktorunu Peşə Təhsili üzrə Dövlət Agentliyinin direktoru İlqar Bayramlı şəxsən yola salıb. Bununla da İctimai İaşə və Xidmət üzrə Bakı Dövlət Peşə Təhsil Mərkəzinin direktoru uğrunda yeni mübarizə başlayıb.

Məlumata görə, Fatma Çandırova İctimai İaşə və Xidmət üzrə Bakı Dövlət Peşə Təhsil Mərkəzinə yeni direktor kimi müavini olmuş, bütün işlərdən xəbərdar olan ən sax adamı Emin adlı şəxsi direktor təyin etdirməyə çalışır. Çünki bu Mərkəzə başqa şəxsin təyin edilməsi Fatma Çandırova üçün yaxşı nəticələr verməyə bilər.

Mərkəzdə direktor müavini çalışan Emin adlı şəxsin Peşə Təhsili üzrə Dövlət Agentliyinin İnsan Resursları və Hüquq Sektoru müdiri Murad Məmmədovun ən yaxın adamlarından biri sayılır.

Qeyd edək ki, İctimai İaşə və Xidmət üzrə Bakı Dövlət Peşə Təhsil Mərkəzinin sabiq direktoru Fatma Çandırovanın Mərkəzdə çalılşan işçilərlə rəftarı o qədər xoş olmayıb, onun fəaliyyəti ilə bağlı çoxsaylı neqativlərin olduğu iddia olunur.

Bizimesr.com

Bakıda daha iki yol sahəsində təmir işləri icra edilir.

Bu barədə Azərbaycan Aztomobil Yolları Dövlət Agentliyindən (AAYDA) məlumat verilib.

Bildirilib ki, bununla əlaqədar olaraq nəqliyyatın hərəkətinə məhdudiyyətlər tətbiq olunur.

Belə ki, bu gün saat 10:00-dan iyulun 4-ü, saat 07:00-dək Xan Şuşinski küçəsi (Rəşid Behbudov küçəsindən Vaqif küçəsinədək) yol tam bağlanır.

Bu gün saat 10:00-dan sabah saat 22:00-dək Hüseyn Cavid prospekti (Əbdürrəhim bəy Haqverdiyev küçəsindən Lev Landau küçəsinədək) hərəkət qismən məhdudlaşdırılır. Sabah saat 22:00-dan iyulun 6-sı, saat 07:00-dək isə bu yol tam bağlanacaq.

Sürücülərdən qeyd olunan tarixlərdə alternativ marşrutlardan istifadə etmələri xahiş olunur.

Fövqəladə Hallar Nazirliyi (FHN) avtonəqliyyat vasitələri sürücülərinə müraciət edib.

Müraciətdə deyilir:

“FHN tərəfindən aparılan kütləvi maarifləndirmə işlərinə baxmayaraq, təəssüflə qeyd edilməlidir ki, bəzi vətəndaşlar tərəfindən avtomobillərin təyin olunmamış yerlərdə, nizamsız park edilməsi səbəbindən baş verən müxtəlif fövqəladə hallar, o cümlədən yanğınlar zamanı xüsusi təyinatlı texnikaların hadisə yerinə yaxınlaşması və çevik döyüş vəziyyətinə gətirilərək operativ müdaxilə imkanları məhdudlaşır.

Ötən gecə paytaxtın Sabunçu rayonu, Bakıxanov qəsəbəsində yaşayış kompleksinin ərazisində məişət tullantıları üçün ayrılmış yerdə baş vermiş yanğın hadisəsi də bunu bir daha nümayiş etdirir.

Qeyd olunanlarla bağlı nazirlik sürücülərə bir daha müraciət edərək bildirir ki, yanğın və digər fövqəladə hallar zamanı yanğınsöndürmə və xilasetmə avtomobillərinin, digər iriqabaritli xüsusi təyinatlı texnikaların hadisə yerinə maneəsiz yaxınlaşması, çevik şəkildə döyüş vəziyyətinə gətirilməsi və əməliyyatların effektli keçirilməsi, habelə su hovuzları və hidrantlardan rahat istifadə üçün avtomobillər yalnız təyin olunmuş yerlərdə, bir-biri ilə ara məsafəsi gözləməklə, digər avtomobillərin sərbəst keçid imkanı təmin olunmaqla park edilməlidir”.

Səhiyyə sistemindəki problemlər, vətəndaşlara qarşı laqeydlik və korrupsiya halları hər kəsə məlumdur. Lakin bu dəfə Nizami Tibb Mərkəzindən gələn görüntülər və iddialar artıq bütün hüquqi və mənəvi sərhədlərin aşıldığını göstərir. İnternet məkanında yayılan videofaktlar mərkəzin şöbə müdiri Samir Məmmədovun öz vəzifə səlahiyyətlərini aşaraq, rəhbərlik etdiyi qurumu az qala şəxsi "cəza düşərgəsinə" çevirdiyini ortaya qoyur.
Sosial şəbəkələrdə paylaşılan və şikayətçi Bəhruz Nəsirov tərəfindən çəkilən videoda açıq-aşkar görünür ki, Nizami Tibb Mərkəzində qanun yox, idarəçilərin yumruqları danışır. Zərərçəkmiş Bəhruz Nəsirov mərkəzin həyətində, iş vaxtı şöbə müdiri Samir Məmmədov tərəfindən vəhşicəsinə döyüldüyünü, burnunun zədələndiyini və köynəyinin qan içində olduğunu nümayiş etdirir.Tibb müəssisəsi insanların sağlamlıq tapdığı yer olmalıdır, yoxsa rəhbərliyin işçiləri qanına qəltan etdiyi bir məkan? Bu hadisə sadəcə bir nizam-intizam pozuntusu deyil, birbaşa cinayət məsuliyyəti yaradan əməldir.Videonun digər hissələrində mərkəz daxilindəki gərginlik və otaqlarda baş verən qarşıdurmalar əks olunub. Şöbə müdirinin işçiləri təhqir etdiyi, onlara psixoloji təzyiq göstərərək qanunsuz şəkildə işdənçıxma ərizəsi yazdırmağa məcbur etdiyi aydın eşidilir.
Azərbaycan Respublikasının Əmək Qanunvericiliyinə görə, heç bir işçi məcburi şəkildə, təzyiq altında ərizə yazmağa vadar edilə bilməz. Nizami Tibb Mərkəzində isə qanunlar tapdalanır, işçilərin hüquqları heçə sayılır.Videoda səslənən digər bir dəhşətli fakt isə tibb bacılarının və digər işçilərin qeyri-insani şərtlərlə işlədilməsidir. Tibb bacısının fəryadı qanunun necə ayaqlar altına atıldığının sübutudur:
"Bir işçiyə 8 saatın pulunu verib, 18 saat işlətmək qanuna ziddir!"
TƏBİB rəhbərliyi və aidiyyatı qurumlar hara baxır? İnsanların 18 saat ərzində, demək olar ki, qul kimi istismar edilməsi hansı məntiqə sığır? Bu qədər iş rejimi ilə işləyən tibb işçisi xəstəyə necə keyfiyyətli xidmət göstərə bilər? Bu, həm işçinin hüququnun tapdalanması, həm də xəstələrin həyatının təhlükəyə atılmasıdır.Nizami Tibb Mərkəzində baş verən bu biabırçılıq, döymə, söymə, məcburi ərizə yazdırma və qanunsuz iş saatları faktları barədə artıq hüquq-mühafizə orqanlarına şikayətlər edildiyi bildirilir.Mediatvaz.com olaraq məsələni diqqətdə saxlayırıq və aidiyyatı dövlət qurumlarından – TƏBİB-dən və hüquq-mühafizə orqanlarından bu özbaşınalığa son qoyulacağına, şöbə müdiri Samir Məmmədov və digər məsul şəxslərin əməllərinə hüquqi qiymət veriləcəyinə ümid edirik.
Hər kəsin cavab haqqını tanıyırıq.
Mediatvaz.com

Universitetlə bağlı aidiyyəti dövlət orqanlarına dəfələrlə şikayətlər göndərilməsinə baxmayaraq, indiyədək heç bir ciddi tədbir görülməyib. Bu vəziyyət isə həmin şəxslərin özlərini daha da cəzasız hiss etmələrinə səbəb olur.

Gəncə Dövlət Universitetində imtahanlar test üsulu ilə təşkil edilir. Testlərin düzgün cavabları əvvəlcədən rektorluğun göstərişi ilə tələbələrə təqdim olunur. Nəticədə tələbələrin əksəriyyəti yüksək qiymət alır.

Bu iddialar Gəncə Dövlət Universiteti ilə bağlı Azərbaycan Respublikasının Prezidenti cənab İLHAM ƏLİYEVƏ və Azərbaycan Respublikasının Elm və Təhsil Naziri EMİN ƏMRULLAYEVƏ ünvanlanmış və bir surəti də "Yenixeberorg.com"a daxil olmuş müraciətdə yer alır...Aktuallığını nəzərə alıb, müəyyən düzəlişlərlə müraciəti dərc edirik:

Hörmətli cənab Prezident! Hörmətli Emin müəllim!

Gəncə Dövlət Universitetində artıq ikinci dəfə akkreditasiya aparılmasına baxmayaraq, bu günədək yekun nəticə ilə bağlı heç bir rəsmi məlumat verilməyib. Halbuki akkreditasiya zamanı Elm və Təhsil Nazirliyi tərəfindən universitetə təqdim olunmuş bütün iradlar yerində qalır və onların heç biri aradan qaldırılmayıb.

Universitetin professor-müəllim heyəti öz üzərinə düşən vəzifələri vicdanla və tam şəkildə yerinə yetirir. Lakin əsas problem universitetin idarəetmə sistemindədir. Universitetin rektoru, prorektorları, müşaviri, baş mühasibi və digər rəhbər vəzifələrdə çalışan şəxslərin əksəriyyəti artıq 75 yaşını keçmiş şəxslərdir. Rektorun digər müşaviri İlqar Kubışev isə Elm və Təhsil Nazirinin əmri ilə töhmət alaraq işdən azad edilərək, burada həmin vəzifəyə təyin edilən şəxsdir.

Universitetdə ən ciddi problemlərdən biri də rəhbərliyin qapalı idarəetmə üsuludur. Rektor Yusif Yusibov heç kimi qəbul etmir. Azərbaycan Respublikasının Prezidentinin qəbuluna düşmək mümkün olduğu halda, Gəncə Dövlət Universitetinin rektorunun qəbuluna düşmək demək olar ki, mümkünsüzdür.

İxtisası və elmi dərəcəsi tutduğu vəzifəyə uyğun gəlmədiyi halda, Pedaqoji fakültəyə Zaur Hüseynzadə, İqtisadiyyat fakültəsinə isə Məsim Abadov hələ də rəhbərlik edir. Məsim Abadov biologiya elmləri namizədidir və iqtisadiyyat sahəsi üzrə müvafiq ixtisasa malik deyil. Zaur Hüseynzadənin isə elmi dərəcəsi yoxdur, özü idmançıdır və idman sahəsində də ciddi nailiyyətləri mövcud deyil.

Akkreditasiya Komissiyası tərəfindən bu şəxslərin tutduqları vəzifələrə uyğun olmamaları barədə irad bildirilməsinə baxmayaraq, rektor Yusif Yusibov onları vəzifədə saxlamaqda davam edir. Ona görə ki, hər iki şəxs bu vəzifələrə təyin olunmaq üçün 30–40 min "tərləyiblər"..

İkinci akkreditasiya zamanı Zaur Hüseynzadə özünü onkoloji xəstə kimi təqdim edərək məzuniyyətə çıxdı və Akkreditasiya Komissiyasının çağırışına gəlmədi. Lakin komissiya universitetdən ayrıldıqdan dərhal sonra Zaur Hüseynzadə yenidən işə başladı.

Hazırda Korrupsiyaya qarşı Mübarizə Baş İdarəsinin əməkdaşları universitetin nəzdində fəaliyyət göstərən Regional Kollecdə yoxlamalar aparırlar. Yoxlamalar zamanı məlum olub ki, Zaur Hüseynzadənin dekanı olduğu Pedaqoji fakültənin əyani şöbə üzrə III kurs tələbəsi həmin kollecdə müəllim kimi fəaliyyət göstərir. Bu fakt aşkar olunsa da, indiyədək heç bir tədbir görülməyib. Halbuki belə faktların sayı kifayət qədər çoxdur.

Gəncə Dövlət Universitetində idman ixtisasları üzrə maddi-texniki baza və müasir idman avadanlıqları demək olar ki, yoxdur. Buna baxmayaraq, hər il idman ixtisaslarına qəbul planı artırılır. Maddi-texniki baza mövcud olmadığı halda, keyfiyyətli mütəxəssis hazırlığının necə həyata keçirildiyi ciddi suallar doğurur.

Universitetlə bağlı aidiyyəti dövlət orqanlarına dəfələrlə şikayətlər göndərilməsinə baxmayaraq, indiyədək heç bir ciddi tədbir görülməyib. Bu vəziyyət isə həmin şəxslərin özlərini daha da cəzasız hiss etmələrinə səbəb olur.

Rektor Yusif Yusibov Kimya kafedrasının əməkdaşı olduğu üçün Kimya fakültəsinin əməkdaşlarına xüsusi imtiyazlar yaradılıb. Müxtəlif adlar altında həmin fakültənin əksər əməkdaşlarına digər fakültələrin əməkdaşlarından fərqli olaraq daha yüksək əməkhaqqı və əlavə ödənişlər verilir. Universitetdə professor-müəllim heyətinin əməkhaqqı artırılmır.

Uzun müddətdir ki, universitetdə tədris işləri üzrə prorektor vəzifəsi vakantdır. Buna baxmayaraq, rektor özünə ən yaxın şəxslərdən biri olan, tədris sahəsində kifayət qədər təcrübəsi olmayan İsfəndiyar Alverdiyevi daxili əmrlə prorektor kimi fəaliyyət göstərməyə cəlb edib. Halbuki prorektor vəzifəsinə təyinat Elm və Təhsil Nazirliyi tərəfindən həyata keçirilməlidir.

İsfəndiyar Alverdiyevin özü də bilir ki, onun prorektor kimi rəsmi təyinat əmri yoxdur. Buna görə də o, hələ də dekan kimi fəaliyyət göstərir və universitetdə prorektor vəzifəsinə təyin olunmaq üçün verdiyini geri ala bilmir.

Universitetdə nüfuzlu beynəlxalq elmi jurnallarda məqalələri dərc olunan, elmi nailiyyətlər qazanan müəllimlərə stimullaşdırıcı əməkhaqqı verilməli olduğu halda, bu vəsaitlər rektorun yaxın hesab etdiyi şəxslər arasında bölüşdürülür.

Azərbaycanın ali məktəblərinin demək olar ki, hamısında semestr imtahanları yazılı formada keçirilir. Lakin Gəncə Dövlət Universitetində imtahanlar test üsulu ilə təşkil edilir. Testlərin düzgün cavabları əvvəlcədən rektorluğun göstərişi ilə tələbələrə təqdim olunur. Nəticədə tələbələrin əksəriyyəti yüksək qiymət alır. Məsələn, Riyaziyyat müəllimliyi ixtisasında təhsil alan 25 tələbədən 23-ü "A", 2-si isə "B" qiyməti alır. Halbuki həmin tələbələr yazılı imtahan versələr, onların təxminən 40–50 faizi kəsilər. Bu sistem nəticəsində cəmiyyət üçün kifayət qədər hazırlıqlı olmayan kadrlar yetişdirilir.

Universitetdə dosent, baş müəllim və professor vəzifələrinin də tutulması şəffaf qaydada aparılmır. Rektor Yusif Yusibov Elmi katib vasitəsilə bu vəzifələri qeyri-rəsmi şəkildə müəyyən məbləğ qarşılığında təklif edir. Baş müəllim vəzifəsi üçün təxminən 1500, dosent və professor vəzifələri üçün isə 3000–5000 "təşəkkür" tələb olunur. Bunu sübut etmək məqsədilə son illərdə həmin vəzifələrə seçilmiş şəxslər arasında anonim sorğu keçirilməsi kifayət edər. Belə sorğu zamanı həmin şəxslər Elmi katibə nə qədər vəsait ödədiklərini etiraf edəcəklər.

Cənab Prezident!

Universitetin özündə bu vəzifələri layiqincə icra edə biləcək kifayət qədər savadlı, bacarıqlı və nüfuzlu kadrlar mövcuddur. Belə olan halda, uzun illərdir eyni şəxslərin rəhbər vəzifələrdə qalmasının səbəbi nədir? Bu şəxslərin vəzifədən dəyişdirilməsinin vaxtı çatmayıbmı?

Ən narahatedici məqamlardan biri isə odur ki, Azərbaycan Respublikası Prezidentinin Administrasiyasına, Elm və Təhsil Nazirliyinə, Gəncə Şəhər İcra Hakimiyyətinə, hüquq-mühafizə orqanlarına dəfələrlə müraciətlər edilməsinə baxmayaraq, bu şəxslərlə bağlı indiyədək heç bir ciddi tədbir görülməyib.

Gəncə Dövlət Universitetində hal-hazırda kafedraların əksəriyyətində dərs saatlarının çatışmazlığı fonunda, tədrisin keyfiyyəti və kadr siyasəti ilə bağlı dözülməz bir mənzərə yaranıb. Rektorun 07.07.2025-ci il tarixində imzaladığı 5/438 saylı əmr guya universitetdəki kadr problemini həll etməli və ixtisar prosesini şəffaflaşdırmalı idi. Lakin reallıq tamamilə fərqlidir. Əmrin kobud şəkildə pozulması və rektorun məsuliyyətsizliyi baş alıb gedir.

Əmrin 1-ci bəndində yaş həddi və elmi-pedaqoji fəaliyyət meyarlarına əsasən ixtisar aparılması açıq-aydın göstərilib. Lakin rektor öz imzasına və rəsmi sənədə hörmətsizlik edərək, bu əmri yalnız "kölgə" kimi istifadə edir. Rektor bu əmri icra etmək əvəzinə, həmin şəxslərdən şəxsi maraqlar müqabilində ... alaraq onları işdə saxlamağa davam edir. Beləliklə, rektor özünün verdiyi rəsmi əmri birbaşa pozur və korrupsiya mexanizmlərinə şərait yaradır.

Universitetdə tədris prosesinin əsas subyekti olan tələbənin hüquqları ayaqlar altına atılıb. Sağlamlıq vəziyyəti auditoriyada dərs deməyə imkan verməyən, dərsə pampers taxıb gələn, hətta özünə qulluq qabiliyyətini itirmiş şəxslərin "müəllim" adı ilə universitetdə saxlanılması təhsilin faciəsidir. Belə şəxslər tələbəyə nə verə bilər? Bu mənzərə nəinki tədrisin keyfiyyətini sıfıra endirir, həm də universitetin akademik nüfuzuna vurulan ən böyük zərbədir.

​ Rektorun bu "qanunsuz işdə saxlama" siyasəti nəticəsində universitetə gəlmək istəyən gənc, potensiallı kadrlar kənarda qalır, yarımştat vəziyyətdə çalışaraq özlərini realizə edə bilmirlər. Bu, universitetin gələcəyinin məhv edilməsi və intellektual inkişafın qarşısının alınması deməkdir.

​ Sual olunur: Əgər bu əmr (5/438 saylı) sadəcə görüntü xatirinə verilibsə, rektor niyə öz imzasına hörmət etmir? Rektorun öz imzaladığı sənədin icrasına nəzarət etməməsi, yaxud onu bilərəkdən icra etməməsi rəhbərlik etdiyi qurumun qanunvericilik çərçivəsindən kənara çıxdığını göstərir. Universitet rektoru öz şəxsi maraqlarını təhsilin və qanunun aliliyindən üstün tutur.

​ Bu vəziyyət artıq dözülməzdir və təcili surətdə aidiyyəti qurumlar tərəfindən araşdırılmalıdır!

Rektor Yusif Yusibov isə müxtəlif məclislərdə açıq şəkildə bildirir ki, qardaşı Cavanşir Yusifov artıq vəzifədə olmasa da, Mikayıl Cabbarov, Ceyhun Bayramov və Samir Şərifov kimi yüksək vəzifəli şəxslərlə yaxın münasibətləri var və buna görə də Elm və Təhsil naziri daxil, ona heç kimin təsir edə bilməyəcəyini söyləyir. Hətta şikayət edənlərə "şikayət edə-edə öləcəksiniz, mənə heç kim heç nə edə bilməz" deyir.(Yenixeberorg.com)

Hörmətli cənab Prezident!

Yuxarıda qeyd olunan bütün iddiaların obyektiv, hərtərəfli və şəffaf şəkildə araşdırılmasını və qanunvericiliyə uyğun tədbirlərin görülməsini Sizdən xahiş edirik.

Redaksiyadan: Yazıda adları hallanan tərəflərin cavab haqqını tanıyırıq.