Azərbaycan Prezidenti İlham Əliyev Amerika Birləşmiş Ştatlarının Prezidenti Donald Trampı təbrik edib.

Məktubda deyilir:

"Hörmətli cənab Prezident,

Əlamətdar tarix – Amerika Birləşmiş Ştatlarının müstəqilliyinin 250-ci ildönümü münasibətilə Sizi və Sizin simanızda dost Amerika xalqını öz adımdan və Azərbaycan xalqı adından səmimi-qəlbdən təbrik etməkdən və ən xoş arzularımı çatdırmaqdan məmnunluq duyuram.

Azadlıq uğrunda mübarizənin, yenilməz iradənin və demokratiyanın rəmzinə çevrilmiş İstiqlaliyyət Bəyannaməsinin iki yüz əlli il əvvəl 4 iyul tarixində imzalanması ilə müstəqilliyini elan etmiş Amerika Birləşmiş Ştatları təkcə yerləşdiyi qitədə deyil, bütövlükdə dünyada yeni nizamın qurulmasına təkan verdi. Ötən dövr ərzində şanlı inkişaf yolu keçmiş Birləşmiş Ştatlar bu gün qlobal arenada hər bir cəhətdən güclü və qüdrətli dövlətdir. Hazırda Sizin əzmlə və qətiyyətlə həyata keçirdiyiniz siyasət sayəsində ölkənizin əldə etdiyi möhtəşəm nailiyyətlərin sayı artır, beynəlxalq aləmdə liderliyi, etibarı və yüksək nüfuzu daha da möhkəmlənir.

Son dövrdə Azərbaycan-Birləşmiş Ştatları münasibətlərinin yüksələn xətlə və uğurla inkişaf etməsi məmnunluq doğurur. Biz iki ölkə arasında təşəkkül tapmış strateji tərəfdaşlıq münasibətlərini yüksək qiymətləndirir, dövlətlərarası əlaqələrimizin güclənməsinə daim verdiyiniz böyük önəmə və dəstəyə görə Sizə minnətdarlığımızı bildiririk. Fevral ayında imzalanan və münasibətlərimizi keyfiyyətcə yeni mərhələyə qaldıran Strateji Tərəfdaşlıq Xartiyasının iqtisadiyyat, enerji, bağlantılar, təhlükəsizlik kimi ənənəvi sahələrlə yanaşı, rəqəmsal transformasiya, süni intellekt və digər mühüm istiqamətlər üzrə tərəfdaşlığın inkişaf etdirilməsinə təkan verəcəyinə əminliyimi ifadə edirəm.

Biz Sizin Cənubi Qafqazda sülh gündəliyinin təşviqi və dayanıqlı inkişafın təmin edilməsi istiqamətində qətiyyətli səylərinizi də son dərəcə yüksək qiymətləndiririk. Keçən ilin avqustun 8-də Ağ Evdə Sizin təşəbbüsünüzlə baş tutmuş tarixi üçtərəfli görüşün nəticələri regionumuzda tamamilə yeni müsbət ab-hava və vəziyyət yaratdı. Artıq Azərbaycan ilə Ermənistan sülh şəraitində yaşayır və ticarət münasibətləri qururlar. Eyni zamanda regionda sabitliyə və rifaha xidmət edən infrastruktur layihələrinin, xüsusilə də Asiya ilə Avropa arasında alternativ, etibarlı və təhlükəsiz bağlantını təmin edəcək "Trampın Beynəlxalq Sülh və Rifah Marşrutu"nun reallaşmasına ölkənizin göstərdiyi davamlı dəstəyini xüsusi qeyd etmək istərdim.

Hörmətli cənab Prezident,

Biz Azərbaycan ilə Birləşmiş Ştatlar arasında böyük potensiala malik qarşılıqlı faydalı əməkdaşlığın inkişaf etdirilməsinə xüsusi əhəmiyyət veririk. Əminəm ki, bu potensialdan və mövcud imkanlardan tam bəhrələnərək birgə səylərimizlə dövlətlərarası münasibətlərimizin möhkəmlənməsinə, strateji tərəfdaşlığımızın daha da dərinləşməsinə nail olacağıq.

Bu şanlı yubiley günündə bir daha Sizə ən səmimi təbriklərimi çatdırır, möhkəm cansağlığı, xoşbəxtlik, ali dövləti fəaliyyətinizdə müvəffəqiyyətlər və yeni-yeni nailiyyətlər, Amerika Birləşmiş Ştatlarının dost xalqına daim əmin-amanlıq, firavanlıq və rifah arzulayıram".

Hacıqabul rayonunda yerləşən "Qədir-Xum" Ailəvi İstirahət Mərkəzi eyni hüquq pozuntusuna görə yenidən cərimələnib.

Qaynarinfo-nun məlumatına görə, Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidməti tərəfindən sözügedən restoranda yaranan maye tullantılarının ətraf mühitə axıdıldığı müəyyən edilib.

Restoranın rəsmi müqavilə əsasında fəaliyyət göstərən icarədarı, 1984-cü il təvəllüdlü R.H. barəsində İnzibati Xətalar Məcəlləsinin 262.2.3-cü maddəsi ilə protokol tərtib olunub və iş məhkəməyə göndərilib. Məhkəmənin qərarı ilə restoranın icarədarı 800 manat məbləğində cərimə edilib.

Qeyd edək ki, Hacıqabul rayonu ərazisində, Bakı–Şirvan avtomobil yolunun sağ tərəfində yerləşən, ümumi sahəsi 2000 kvadratmetr olan ictimai iaşə obyekti Gülnarə İsmayıl qızı Rüstəmova tərəfindən icarəyə verilib. "Qədir-Xum" Ailəvi İstirahət Mərkəzi ötən il də eyni maddə ilə cərimələnmişdi. Həmin vaxt aşkar olunmuş nöqsanların aradan qaldırılması üçün obyektə müddət verilmişdi.

İş adamı Mətanət Həsənova bloger və tiktoker Həmid Allahverdiyevlə bağlı yeni iddialarla çıxış edib. O, sosial şəbəkələrdə müxtəlif ödənişlərə dair olduğunu bildirdiyi çek və qəbzləri paylaşaraq, külli miqdarda maddi ziyana məruz qaldığını iddia edib.

Şikayətçinin sözlərinə görə, 2023-cü ildən başlayaraq Həmid Allahverdiyevin müxtəlif vədlərinə inanaraq ümumilikdə 135 min manat vəsait xərcləyib. İddiasına əsasən, həmin məbləğin böyük hissəsi TikTok platformasında keçirilən oyunlara və digər ödənişlərə sərf olunub. O bildirir ki, oyunlar vasitəsilə avtomobil qazanacağı və həmin avtomobilin ona təqdim ediləcəyi vəd edilsə də, bu baş verməyib.

Həsənova həmçinin iddia edir ki, əlavə olaraq 15 min manat kazino oyunlarında uduzub və bu prosesdən əldə olunan gəlirlərin Həmid Allahverdiyevin xeyrinə olduğu qənaətindədir.

Şikayətçi uzun müddət qarşı tərəfə həm maddi, həm də mənəvi dəstək göstərdiyini, lakin sonradan aldadıldığını düşündüyünü bildirir. Onun sözlərinə görə, verilən şəxsi vədlər də sonradan öz təsdiqini tapmayıb və bütün bunların yalnız maddi maraq məqsədi daşıdığı qənaətinə gəlib.

İş qadını məsələ ilə bağlı Azərbaycan Respublikasının Birinci vitse-prezidenti Mehriban Əliyevaya, Baş prokuror Kamran Əliyevə və daxili işlər naziri Vilayət Eyvazova müraciət etdiyini açıqlayıb. O, müraciətində iddialarının obyektiv araşdırılmasını, təqdim etdiyi çek və digər sübutlara hüquqi qiymət verilməsini xahiş etdiyini bildirib.

Qeyd edək ki, yazıda yer alan məlumatlar Həsənovanın iddialarına əsaslanır. Həmid Allahverdiyev tərəfindən bu iddialarla bağlı hələlik ictimai açıqlama verilməyib. Qarşı tərəfin mövqeyini dərc etməyə hazırıq.Paytaxt.org

17 aprel tarixində elm və təhsil naziri Emin Əmrullayev Qusar şəhərində vətəndaş qəbulu keçirib.

Nazirin bu işgüzar səfəri Qusar təhsil sektorunda olduqca təlatümlü və arzuolunmaz olaylarla da yadda qalıb.

Nazirin və onunla birlikdə Qusara gələn nazirlik əməkdaşlarının yemək, qalma və digər səfər xərclərinin qarşılanması üçün həmin ərəfədə Qusarın bütün şəhər və ətraf kənd məktəblərinin rəhbərlərindən və pedaqoji kollektivindən müxtəlif məbləğlərdə kütləvi pul toplama marafonu həyata keçirilib.

İddia edilir ki, Quba-Xaçmaz Regional Təhsil İdarəsinin Qusar rayonu üzrə sektor müdiri olan Naira Klıçovanın tapşırığı ilə şəhər məktəblərinin hər birindən 500 manat məbləğində vəsait yığılıb. Bu vəsaitin nazirin nahar yeməyi və nazirliyin digər məsul şəxslərinin hotel pulunun ödənilməsi üçün xüsusi tapşırıq kimi vurğulandığı da iddialar arasındadır.

Qısa zaman kəsiyində yerinə yetirilən bu kütləvi marafon bir çox pedaqoq tərəfindən narazılıqla qarşılanıb. Bu vəsaiti verməkdən imtina edən həmin müəllimlər məsələ barədə sosial şəbəkə üzərindən Quba-Xaçmaz Regional Təhsil İdarəsinin müdiri Coşqun Əliyevə məlumat verib.

Bundan sonra Naira Klıçova Coşqun Əliyev tərəfindən şiddətlə qınanaraq yığılan vəsaitlərin dərhal geri qaytarılması tapşırığını alır.

İdarə müdirinin qəzəbindən canını qurtaran sektor müdiri sonda heç bir cəza almasa da, nazir Emin Əmrullayevin səfər xərcləri adı altında toplanan vəsaitlərin hamısı geri qaytarılıb.

Bununla da, sözügedən tapşırığın regional idarə tərəfindən verilmədiyi hər kəsə məlum olub.

​Səsləndirilən iddialarda adı çəkilən Quba-Xaçmaz Regional Təhsil İdarəsinin Qusar rayonu üzrə sektor müdiri olan Naira Klıçovanın mövqeyini almaq üçün tərəfimizdən ona göndərilən yazılı informasiya sorğusuna cavab verilməyib./7times.az

Kino Agentliyi publik hüquqi şəxsi beynəlxalq film festivalları və film marketlərində iştirak, eləcə də beynəlxalq əməkdaşlıq və tərəfdaşlıq əlaqələrinin inkişafı xidmətlərinin satın alınması ilə bağlı yeni müqavilə bağlayıb.
Bizimesr.com bildirir ki, satınalma prosedurunun qalibi “ERRA SUPPLY” MMC olub. Müqavilənin ümumi dəyəri 292.690,2 AZN təşkil edir.
Sənədə görə, layihə çərçivəsində Azərbaycanın kino sənayesinin beynəlxalq festivallarda və film bazarlarında təmsil olunması, ölkənin kino potensialının təqdim edilməsi, həmçinin xarici tərəfdaşlarla əməkdaşlıq imkanlarının genişləndirilməsi nəzərdə tutulur.
Qeyd edək ki, bu tip fəaliyyətlər adətən konkret film istehsalından çox, kino sahəsinin beynəlxalq platformalarda tanıdılması, yeni layihələr üçün tərəfdaşların cəlb edilməsi və sənayenin xarici bazarlara inteqrasiyası məqsədi daşıyır. Amma maraqlıdır ki, Kino Agentliyi hansı filmlə ilm festivalları və film marketlərində iştirak edəcək? Bu barədə heş bir məlumat yoxdur?

​Bizimesr.com

“Azərenerji”nin keçmiş baş direktoru Etibar Pirverdiyevə bağlı olduğu bilinən “Azenco” şirkətinə rəhbərlik etmiş Vüqar Əliyev həbs edilib.
V.Əliyev 3 milyon manatdan çox mənimsəmədə ittiham olunur.
İş üzrə ibtidai araşdırma artıq başa çatıb. V.Əliyevə Cinayət Məcəlləsinin 179.4-cü (mənimsəmə-xüsusilə külli miqdarda törədildikdə) maddəsi ilə yekun ittiham elan olunub. Bu maddənin sanksiyası 10 ildən 14 ilədək azadlıqdan məhrumetmə cəzası nəzərdə tutur.
Yaxın günlərdə məhkəmə başlayacaq.
Qeyd edək ki, Etibar Pirverdiyev “Azərenerji”yə rəhbərlik etdiyi dövrdə “Azenco” Azərbaycanda nəhəng enerji infrastrukturu layihələrinin həyata keçirilməsində, həmçinin dövlət büdcəsindən maliyyələşən digər işlərdə iştirak edib. Şirkət paytaxtda bir neçə yaşayış binasının tikintisini həyata keçirib. E.Pirverdiyev vəzifəsindən uzaqlaşdırıldıqdan sonra “Azenco”ya daxil olan büdcə vəsaitlərinin həcmi əhəmiyyətli dərəcədə azalıb.
2022-2023-cü illərdə “Azenco”nun idarə heyətinin sədri Əliyev Vüqar Tofiqoviç olub.
Bizimesr.com

Abşeron rayonunda qəribə tikililər seriyası davam edir. Maraqlıdır ki, bir daşı daş üstünə qoymağın belə mümkün olmadığı hallarda bu cür tikililərin icazəsini kimlər və hansı şərtlər daxilində verirlər?


Daha bir maraqlı tikili Abşeron rayonu, Masazır qəsəbəsində yerləşən "Qurtuluş 93" Yaşayış Kompleksinin binasında aparılır.


Diqqət çəkən məqam ondan ibarətdir ki, "Qurtuluş 93" Yaşayış Kompleksi layihə əsasında tikilərək sakinlərin istifadəsinə verilib. Mənzillərin satışı zamanı insanlara rahatlıq, geniş həyət, təhlükəsizlik və xoş həyat vəd olunub. Amma görünən odur ki, sonradan bu vədlər "Qurtuluş 93" MTK-nın rəhbəri Məhərrəm Novruzovun və Abşeron Rayon İcra Hakimiyyətinin başçısı Abdin Fərzəliyevin üçün sadəcə söz yığınıdır.


Binanın birinci mərtəbəsində yaşayan sakinlər dəmir konstruksiyalı bu obyektin gələcək təhlükəsizliyi, burada həyata keçiriləcək fəaliyyət, həmin fəaliyyət nəticəsində yarana biləcək hər hansı hadisə, yanğın təhlükəsi və səs-küyün insanların gündəlik həyatına təsiri ilə bağlı indidən narahat olduqlarını bildirirlər.


Amma nə fayda... Görünən odur ki, Məhərrəm Novruzov və Abdin Fərzəliyev üçün belə məsələlər, insanların narahatçılığı maraq doğurmur. Əsas olan onların istəyi, qazanclarıdır.


Bəs bu dəmir konstruksiyalı tikilinin gələcək fəaliyyəti nədən ibarət olacaq? Obyekt hansı qaydalarla, kimin icazəsi ilə və hansı məqsədlə tikilir? Ümumiyyətlə, belə bir tikiliyə niyə ehtiyac var?


Ən vacib suallardan biri isə budur: kimlərsə pul qazanacaq deyə, bir binanın sakinləri ömür boyu narahat və təhlükə riski altında yaşamalıdırmı?(Bizimesr.com)


Mövzu ilə bağlı qarşı tərəfin də mövqeyini dərc etməyə hazırıq.


VİDEO LİNKDƏ: https://www.bizimesr.com/az/post/sakinler-narahatdir-tikinti-davam-edir--qurtulus-93de-demir-konstruksiyali-artirma-kimindir----video-22427

Məlum olduğu kimi Prezident İlham Əliyevin sərəncamı ilə bu ilin fevral ayından Rəşad İsmayılov Azərbaycanda Ekologiya Və Təbii Sərvətlər naziri postuna təyinat alıb. Və gəldiyi gündən təbiətə qənim kəsilənlərlə mübarizəni birazda sərtləşdirdi. Bunu xüsusilə Şimal-qərb bölgəsində hamı hiss edir. Ancaq nədənsə İsmayıllı rayon ərazisində yeni nazirin təyinatından sonra təbiətə qənim kəsilənlər daha da artıb. Belə ki, bir neçə ay əvvəldən

6 saylı RMTM-nin İsmayıllı rayonunundakı Talstan meşəbəyliyi ərazisində yerləşən Dövlət meşə fondunda qanunsuz tikililər mövcud olmağa başlayıb. Talıstan meşəbəyliyi ərazisindəki Dövlət meşə fondu ərazisində bir neçə yaşayış evlərinin tikilməsi müəyyən suallar doğurur.

Bəlkə bu ərazi bələdiyyə ərazisidir? Yerli icra hakimiyyəti qurumlarından aldığımız məlumata görə bu ərazi meşə ərazisidir. Yeni nazirin təyinatından sonra bu sahə rəislərini belə böyük riskə getməyə nə vadar edir? Bu gün hamı, xüsusilə Ekologiya sahəsində çalışanlar bilir ki, Cənab nazir qanunsuz əməllərə görə heç kimi bağışlamır. Bəs onda görəsən bu qədər böyük tikinti aparılan zaman meşəbəylikdən heç kim bunu görməyib? Bəlkə görüblər, görməməzlik etmələrinə bir yağlı səbəb də var? Düşünürük ki, bütün bu kimi suallara Ekologiya Və Təbii sərvətlər nazirliyinin meşə departamenti daha tutarlı cavab verə bilər. Əgər onlardan da səs çıxmasa demək ki, balıq başdan iylənər məsəli tam yerinə düşür. Belı çıxır ki, Meşə departamenti və İsmayıllı meşələrinin sahibi birləşərək cənab naziri aldadıblar.?

Mövzunun aktuallığını nəzərə alaraq diqqətimizdə saxlayacağıq. Və Ekologiya Və Təbii Sərvətlər Nazirliyinin mövqeyini də dərc etməyə hazırıq.

Stimulxeber
İsmayıll

Sumqayıt şəhərində yerləşən “Liman Klinikası” qüsurlu əməliyyata görə pasiyentə təzminat ödəyəcək.

Məhkəmə belə qərar qəbul edib. İş üzrə iddiaçı Nuridə Zülfüqarovadır. Zülfüqarova 2024-cü ildə “Liman Klinikası”nda cərrah Əfqan Ağagülov tərəfindən burun əməliyyatı olunub. Lakin əməliyyatdan sonra onun sol gözündə çəplik yaranıb.

Sonradan rayon prokurorluğunda araşdırma aparılsa da, yekunda cinayət işinin başlanmasından imtina edilib. Lakin məhkəmə-tibb ekspertizası əməliyyatın qüsurlu aparıldığını təsdiq edib.

Fotoda: Əfqan Ağagülov

İddiaçının vəkili Anar Məmişov ekspert rəyini də məhkəməyə təqdim edib. Bundan əlavə, vəkil əməliyyatdan sonra çəkilən xərcləri də sadalayıb. İddiaçı tərəf dəymiş zərərin əvəzi kimi konkret olaraq “Liman Klinikası”ndan və cərrah Əfqan Ağagülovdan 40 min manat maddi, 10 min manat mənəvi təzminat tələb edib.

Cavabdehlər isə təzminat tələbi ilə razılaşmayıb. Əfqan Ağagülovun sözlərinə görə, iddiaçı əməliyyatdan sonra düzgün müalicə olunmayıb, dərmanları qəbul etməyib. Bu səbəbdən də sonradan gözündə qüsur ortaya çıxıb.

Sumqayıt Şəhər Məhkəməsi yekunda iddia ərizəsini qismən təmin edib. Qərara əsasən, “Liman Qrup” MMC iddiaçıya maddi zərərə görə 28 574 manat, mənəvi zərərə görə isə 3 000 manat ödəməlidir. Həkim Əfqan Ağagülova qarşı iddia isə təmin edilməyib. Məhkəmə qeyd edib ki, həkim klinikanın işçisi olduğundan vurulmuş zərərə görə məsuliyyəti işəgötürən daşıyır.

Bu qərar apellyasiya və ali instansiya məhkəmələrində təsdiqlənib.

Qeyd edək ki, sözügedən şikayətlə bağlı “Qafqazinfo”ya zərərçəkənin qızı Ramilə Məmmədova 2 il əvvəl müraciət etmişdi. 54 yaşlı anasının II qrup əlil olduğunu vurğulayan övladı onun 35 ildən çox bağça müəllimi kimi fəaliyyət göstərdiyini qeyd etmişdi. Şikayətçi əməliyyatdan sonra yaranan problemlə bağlı həkimə müraciət etdiklərində onlara “gözləyin, düzələcək” cavabının verildiyini əlavə etmişdi.(Qafqazinfo)

İstanbul (Türkiyə) və digər şəhərlərdə keçirilən əməliyyatlarda 1 ton 45 kiloqram narkotik vasitə və 173 min 9 ədəd narkotik tərkibli həb aşkarlanıb.


Bu barədə "TRT Haber" məlumat yayıb.


Məlumata görə, İstanbul Polis İdarəsinin Narkotik Cinayətlərlə Mübarizə Şöbəsinin əməkdaşları iyunun 15-30-da İstanbul, Tekirdağ, Gümüşhane və Kocaelidə narkotik vasitələrin qanunsuz dövriyyəsi ilə məşğul olan cinayətkar qruplara və küçə satıcılarına qarşı əməliyyatlar keçiriblər.


Əməliyyatlar zamanı 80 şübhəli saxlanılıb. Onlardan 26-sı barəsində həbs qətimkan tədbiri seçilib. Digər 54 nəfərlə bağlı araşdırmalar davam edir.