Azərbaycanda keçirilən, dövlət qurumları tərəfindən elan edilən tender layihələrinin də ölkənin daha bir həlli mümkünsüz ciddi probleminə çevrildiyi heç kəsə sirr deyil. Yatırımlar sahəsində ciddi pozuntular, əsaslı vəsait qoyuluşunda qeyri-şəffaflıq, dövlət satınalmalarında şok yaradan korrupsiya, büdcə qanunvericiliyinin pozulması… kimi neqativ amillər ədalətli keçirilməyən əksər tenderlərin boğazından asılmış zəncir kimidir — dartsan da açılan deyil. Dövlət qurumlarının saysız-hesabsız tender fırıldağı birbaşa iqtisadi inkişafa, rəqabət mühitinə və büdcə vəsaitlərinin təyinatı üzrə xərclənməsinə çox ciddi ziyan vurur — Goranboy rayonundakı kimi. Bu bölgədə tenderlərin elan olunmasından, onların nəticələrinin açıqlanmasınadək pozuntular kifayət qədər olur.

Bunun acı nəticəsidir ki, rayonun mərhum rəhbəri Nizaməddin Quliyevdən sonra, indiki icra başçısı Məhərrəm Quliyev bölgədə heç bir abadlıq və quruculuq işləri aparmayıb. Yerli sakinlərin dediyi kimi, Goranboy gündən-günə dağılır, infrastruktur getdikcə çökür.

Məhərrəm Quliyevin rəhbərlik etdiyi Goranboy Rayon İcra Hakimiyyəti və tabeliyində fəaliyyət göstərən qurumların son dövrlərdə bağladığı satınalma müqavilələri ilə bağlı Arazpress.com xəbər portalının əməkdaşlarının apardıqları araşdırmalar da diqqətçəkən rəqəmləri üzə çıxarıb. Konkret desək, dövlət satınalmaları üzrə məlumatların təhlili göstərir ki, təkcə Goranboy şəhər inzibati ərazisi üzrə həyata keçirilən bir-neçə tenderin ümumi məbləği təxminən 961 min manata yaxın olub. Tenderlərin əsas hissəsi isə şəhərdə abadlıq işləri, yolların əsaslı təmiri və yaşayış binalarının yenidən qurulması adı altında rəsmiləşdirilib.

Araşdırma zamanı məlum olub ki, iri məbləğli satınalmaların böyük hissəsi eyni şirkətin — “Star Təmir Construction” MMC-nin üzərinə düşür. Şirkətin qısa müddət ərzində ard-arda bir-neçə iri tenderin qalibi olması isə, ortada müəyyən suallar doğurur. Tender sənədlərinə əsasən, Goranboy Rayon İcra Hakimiyyəti başçısının Goranboy şəhər inzibati ərazi dairəsi üzrə nümayəndəliyi tərəfindən ilk iri satınalma “Goranboy şəhərində abadlıq işləri” adı altında keçirilib. Bu müqavilə üzrə qalib yenə də “Star Təmir Construction” MMC olub və şirkətə 294 min 792 manat 16 qəpik vəsait ayırılıb.

Bundan başqa, həmin şirkətlə S. Vurğun küçəsi, 15 və 17 ünvanlarında yerləşən çoxmənzilli yaşayış binalarının əsaslı təmiri ilə bağlı daha bir müqavilə bağlanıb. Bu tender üzrə dövlət büdcəsindən 155 min 780 manat 95 qəpik ödəmə nəzərdə tutulub.

Ən iri satınalmalardan biri isə şəhər yollarının əsaslı təmiri ilə bağlı olub. Rəsmi məlumatlara görə, “Goranboy şəhərində yolların əsaslı təmiri” işləri üçün keçirilən tenderin qalibi yenə “Star Təmir Construction” MMC seçilib və müqavilənin ümumi dəyəri 485 min 332 manat 97 qəpik təşkil edib.

Beləliklə, təkcə bir şirkətə verilən üç əsas tenderin ümumi məbləği 935 min manatdan artıq edir. Bu isə Goranboy şəhəri üzrə ayrılmış vəsaitlərin demək olar ki, əsas hissəsinin eyni podratçıya yönləndirildiyini göstərir.

Araşdırmalar zamanı diqqət çəkən digər məqamlardan biri də layihə-smeta sənədlərinin hazırlanması üçün ayrıca satınalmaların keçirilməsidir. Belə ki, “Huseynli Partners Architecture and Construction” MMC ilə abadlıq işləri üzrə layihə-smeta sənədlərinin hazırlanması məqsədilə 6 min 489 manatlıq müqavilə bağlanıb. Digər satınalma isə, “Kon-Lay Project” MMC ilə həyata keçirilib. Müqaviləyə əsasən, yaşayış binasının əsaslı təmiri üçün layihə-smeta sənədlərinin hazırlanmasına görə şirkətə 6 min 950 manat ödənilməsi nəzərdə tutulub. Müqavilənin başlanma tarixinin 29 may 2025-ci il olduğu göstərilir.

Bununla yanaşı, çoxmərtəbəli yaşayış binalarında lift təsərrüfatına texniki qulluq və cari təmir işləri də ayrıca tender predmeti olub. Bu istiqamətdə keçirilən satınalmanın qalibi “Real-3” müəssisəsi olub və şirkətlə 9 min 882 manat 50 qəpik məbləğində müqavilə bağlanıb.

Araşdırma zamanı əldə olunan məlumatlar göstərir ki, Goranboy Rayon İcra Hakimiyyətində son dövrlər əsas prioritet istiqamətlərdən biri məhz abadlıq və tikinti layihələri olub. Rəsmi məlumatlarda rayon rəhbərliyinin şəhərdə infrastruktur və yaşayış şəraitinin yaxşılaşdırılması istiqamətində işlər gördüyü qeyd edilir.

Lakin diqqət çəkən əsas məqamlardan biri tenderlərin eyni şirkətin ətrafında cəmləşməsidir. Açıq mənbələrdə yayılan məlumatlara görə, “Star Təmir Construction” MMC 2021-ci ildə qeydiyyatdan keçib və nizamnamə kapitalı cəmi 20 manat təşkil edir. Şirkətin qanuni təmsilçisinin Zaur Maarif oğlu Əsgərov olduğu göstərilir. Açıq resurslarda şirkətin geniş fəaliyyəti və ya iri tikinti layihələri üzrə təcrübəsi barədə geniş məlumatların olmaması da suallar doğuran məqamlardan hesab olunur.

Mütəxəssislər hesab edir ki, dövlət vəsaiti hesabına həyata keçirilən iri satınalmalar zamanı şəffaflıq, rəqabətlilik və ictimai hesabatlılıq xüsusi önəm daşımalıdır. Çünki milyonlarla manatlıq layihələrin eyni şirkətlərə yönləndirilməsi gələcəkdə həm maliyyə səmərəliliyi, həm də işlərin keyfiyyəti ilə bağlı ciddi müzakirələrə səbəb ola bilər. Yuxarıda qeyd etdiyimiz kimi. Buna görə, Arazpress.com bu mövzuda araşdırmalarını davam etdirir. Tezliklə daha maraqlı yazımızı dərc etməyi planlaşdırırıq. Bizi izləyin.

Məhi ELSEVƏR /Arazpress.com/

Bakıda Ümumdünya Şəhərsalma Forumunun 13-cü Sessiyasının (WUF13) açılış mərasimi keçirilir.

Azərbaycan Respublikasının Prezidenti İlham Əliyev tədbirdə iştirak edir.

İmişlinin korrupsiya cinayətləri ilə bağlı məhkum edilmiş keçmiş icra başçısı Vilyam Hacıyevin cinayət işi üzrə müsadirə edilmiş avtomobillərinin qiyməti xeyli ucuzlaşıb.

“Qafqazinfo”nun əldə etdiyi məlumata görə, “Range Rover” və “BMW 740İ” markalı avtomobillər üç dəfə satışa çıxarılsa da, onlara alıcı tapılmayıb.

İcra məmuru əmlakı 25 faiz endirimlə dördüncü dəfə hərraca çıxaracaq.

Əvvəl 56 min manata təklif edilən “Range Rover”in qiyməti 14 min ucuzlaşaraq 42 minə, 23 minə təklif edilən “BMW” isə 5750 manat aşağı - 17250 manata düşüb.

V.Hacıyevin cinayəti ilə bağlı müsadirə edilmiş avtomobillərdən yalnız biri - “Bentley Continental GT”ya alıcı tapılıb. 65 min manata təklif edilən “Bentley” üçüncü hərracda 6 min 500 endirimlə - 58 min 500 manata satılıb.

Qeyd edək ki, “Range Rover”i (həmin vaxt qiyməti 100 min manatdan çox idi-red) Vilyam Hacıyevin oğlu Məhəmməd Hacıyev, “BMW”ni həyat yoldaşı Cülyetta İbrahimova sürürdü.(Qafqazinfo)

Azərbaycanda illərdir eyni mənzərə təkrarlanır. Hansısa rayonun icra başçısı həbs olunur, hansısa komitə sədri vəzifədən çıxarılır, korrupsiya əməliyyatları keçirilir, dövlət başçısı məmurlara sərt xəbərdarlıq edir. Amma bütün bunlara baxmayaraq, bəzi sahələrdə eyni adlar illərlə toxunulmaz qalır.

Ekologiya sahəsində isə bu adların başında ən çox hallanan şəxslərdən biri Vüqar Kərimovdur. Yəni Ekologiya və Təbii Sərvətlər Nazirliyinin “boz kardinal”ı.

Nazir müavininin adı artıq təkcə idarəçiliklə deyil, illərdir meşələrin talanı, şübhəli təyinatlar, qohumbazlıq, himayədarlıq və gizlədilən qalmaqallarla yanaşı çəkilir. Ən ağır tərəfi isə budur ki, bütün bu ittihamların fonunda nə ciddi araşdırma aparılır, nə də doğru-düzgün cəzalanma var.

Vüqar Kərimovun adı niyə hər qalmaqalda keçir?

Bu gün ekologiya sahəsində hansı qalmaqalı açırsan, hansı regional idarəyə baxırsan, hansı şikayəti oxuyursan, ortada bir ad dayanır – Vüqar Kərimov.

Masallıda meşələr yox olur – adı keçir.
Lənkəranda qanunsuz qırıntılarla bağlı ittihamlar yayılır – adı keçir.
Şəkidə məcburi köçkünlər təzyiqdən şikayət edir – adı keçir.
“Azəryaşlandşaft” ASC-də xaos hökm sürür – yenə adı keçir.

Bu qədər təsadüf ola bilərmi?

Yoxsa ekologiya sistemində illərlə qurulan görünməz şəbəkənin mərkəzində məhz Vüqar Kərimov dayanır?

İddialara görə, regional meşə təsərrüfatlarında əsas təyinatların böyük hissəsi məhz onun razılığı ilə həyata keçirilir. Meşəçilikdən anlayışı olmayan şəxslərin rəhbər postlara gətirilməsi, yaxın çevrələrin strateji vəzifələrə yerləşdirilməsi, cərimələrin gizlədilməsi, qırıntı aktlarının ört-basdır edilməsi ilə bağlı səslənən ittihamlar artıq sosial şəbəkə söhbəti yox, ciddi ictimai narahatlığa çevrilib.

“Azəryaşlandşaft” – dövlət qurumu, yoxsa dost çevrəsi?

“Azəryaşlandşaft” ASC ətrafında baş verənlər isə ayrıca skandaldır. Quruma rəhbərlik edən Cavid Abdullayev ilə bağlı yayılan narazılıqlar aylardır səngimir.

İddialara görə, dövlətin milyonlarla manat ayırdığı yaşıllaşdırma layihələri formal idarə olunur, ərazilərə nəzarət yoxdur, baxımsızlıq hökm sürür. Amma ən ciddi məsələ Cavid Abdullayevin bu posta hansı meyarla gətirilməsidir.

Nazirlik daxilində dolaşan iddialara görə, bu təyinat peşəkarlığa görə yox, şəxsi yaxınlığa görə həyata keçirilib. Həm də “boz kardinal”a. Yəni dövlət qurumu peşəkar kadr siyasəti ilə yox, “öz adamını yerləşdirmə” prinsipi ilə idarə olunur.

Əgər bu iddialar yalandırsa, onda niyə nəticə yoxdur?

Niyə Heydər Əliyev Fondunun vitse-prezidenti Leyla Əliyevanın xüsusi təşəbbüsü ilə qurulan zeytun bağlarında inəklər gəzir?media-img-20260517-wa0001 Niyə dövlətin nümunə layihəsi kimi təqdim olunan ərazilər baxımsız vəziyyətə düşüb?

Niyə milyonlarla manatın nəticəsi ortada görünmür?

Cənub meşələri necə “əriyib” yoxa çıxdı?

Masallı, Cəlilabad və Yardımlı istiqamətində səslənən ittihamlar isə artıq ekoloji fəlakət səviyyəsindədir.

Göytəpə meşəbəyliyində sənədlərdə mövcud görünən 76 hektar meşə sahəsinin faktiki yoxa çıxması barədə iddialar sadəcə səhlənkarlıq deyil. Bu, dövlət sərvətinin məhv edilməsi iddiasıdır.

76 hektar meşə yox olur və heç kim cavab vermir.

Bu qədər böyük ərazi havaya sovrula bilməz. Deməli, ya kimsə susur, ya da kimsə qorunur.

İddialara görə, illərlə bölgədəki qanunsuzluqlar barədə yazılan aktlar gizlədilib, bəzi əməkdaşlar həqiqəti yazdıqları üçün cəzalandırılıb, qanunsuz qırıntılarla bağlı sənədlər ört-basdır edilib. Ən ağır ittihamlardan biri də budur ki, Vüqar Kərimov qanunsuzluqları sənədləşdirən şəxslərə irad bildirib və “niyə hər şeyi olduğu kimi yazmısan?” deyə narazılıq edir. Əgər bu, doğrudursa, bu artıq vəzifə məsuliyyətsizliyi yox, dövlətə qarşı sabotajdır.

Nazir müavini ətrafında “toxunulmazlıq” görüntüsü

Ekologiya sistemində artıq açıq danışılan başqa bir məsələ də var: “Boz kardinal” Vüqar Kərimovun ətrafında formalaşmış “toxunulmazlıq” görüntüsü.

İddialara görə, onun yaxın çevrəsinə aid şəxslər müxtəlif regional idarələrdə vəzifələrə yerləşdirilib. Təhsili olmayan adamların yüksək postlara gətirilməsi, vaxtilə qanunsuzluqlara görə işdən uzaqlaşdırılmış şəxslərin yenidən sistemə qaytarılması barədə səslənən məlumatlar cəmiyyətdə ciddi narazılıq yaradır. Ən təhlükəlisi isə budur ki, meşələrə cavabdeh şəxslərin adları artıq “meşə mafiyası” ifadəsi ilə yanaşı hallanır. Bu ölkədə ağac əkən insan qəhrəman sayılmalıdır.

Amma indi vəziyyət o yerə çatıb ki, ağacı qorumağa cavabdeh şəxslərin özləri ağacların məhvi ilə bağlı ittiham olunur.

Vüqar Kərimov susduqca suallar böyüyür

Bu gün cəmiyyətin cavab gözlədiyi çox sadə suallar var:

76 hektar meşə haradadır?
Niyə qanunsuz qırıntılarla bağlı iddialar araşdırılmır?
Niyə dövlət meşə fondu torpaqları örüşə və əkin sahəsinə çevrilir?
Niyə illərdir eyni şəxslərin adı qalmaqallarda keçir?
Niyə təhsilsiz və səriştəsiz adamlar mühüm vəzifələrə gətirilir?

Və ən əsası:
Niyə bütün bu iddiaların mərkəzində həmişə Vüqar Kərimovun adı dayanır?

Əgər bu qədər ittiham əsassızdırsa, o zaman nazir müavini açıq danışmalı, ictimaiyyət qarşısına çıxmalı, fakt-fakt cavab verməlidir.

Susqunluq artıq müdafiə deyil.
Susqunluq şübhələri daha da böyüdür.

Bu gün Azərbaycanın ekologiyasını ən böyük təhlükə təkcə iqlim dəyişikliyi deyil. Ən böyük təhlükə kreslosunu dövlətin özündən üstün görən məmur təfəkkürüdür. Elə ulu öndər Heydər Əliyev də o məşhur çıxışı zamanı məhz bu məmur təfəkkürünü nəzərdə tuturdu. “Ağac kəsənlər mənim qollarımı kəsir” deyəndə…

Mənbə: Yenicag.az

"Keçmiş 'Azərsu" ASC-nin rəhbəri Qorxmaz Hüseynov qaynı Namiq Cəbrayılovun vasitəsilə Özbəkistanda özünə biznes qurub. Qorxmaz Hüseynovun vəzifəsindən uzaqlaşdırılmasından 2 il sonra, yəni 2023-cü il avqustun 3-də Namiq Cəbrayılov Daşkənddə 60 faiz pay hüququ ilə "ROSWELL CAPITAL" Məhdud Məsuliyyətli Cəmiyyəti ("ROSWELL CAPITAL" mas`uliyati cheklangan jamiyati xorijiy korxona) təsis edib."
TEREF yazır ki, bunu müstəqil araşdırmaçı jurnalist Cavanşir Həsənli yazır. Cavanşir Həsənli daha sonra yazır:
"4 382 307 700,00 özmək somu nizamnamə kapitalı ilə təsis edilən şirkət Daşkənddə bina tikintisi ilə məşğul olub.
Həmin ilin oktyabrında Qorxmaz Hüseynovun qaynı Azərbaycanda rəhbəri olduğu "HİDRO İNŞAAT SERVİS" MMC şirkətinin təsisçiliyi ilə Daşkənddə daha bir şirkət təsis edib. 22 190 960 500,00 som nizamnamə kapitalı ilə qeydiyatdan keçmiş "URDC" xarici şirkət statusu ilə ("URDC" MCHJ xorijiy korxona) yaşayış binalarının tikintisinə başlayıb."
TEREF

Redaksiyamıza təqdim edilən videogörüntü əməkdaşlarımız tərəfindən qeydə alınıb. Kadrlarda küləkli və ya yağışlı hava şəraitində dövlət bayrağının dirək üzərində yararsız vəziyyətdə saxlanıldığı görünür.

Qeyd edək ki, dövlət bayrağı ilə bağlı etik yanaşmada və ümumi qaydalarda əlverişsiz hava şəraitində bayrağın dirəkdən endirilməsi, onun cırılaraq və ya yararsız vəziyyətə düşərək dalğalanmasından daha doğru və hörmətli davranış hesab olunur. Bu baxımdan görüntülərin sosial şəbəkələrdə narahatlıq doğuracağı istisna edilmir.

Hazırda SOCAR-a məxsus yanacaqdoldurma məntəqəsində qeydə alınan bu hal həm media nümayəndələrində, həm də bir çox vətəndaşlarda məyusluq yaradıb. Vətəndaşlar hesab edir ki, dövlət rəmzlərinə münasibətdə daha həssas və operativ yanaşma nümayiş etdirilməlidir.

Ümid edilir ki, məsələ ilə bağlı aidiyyəti qurum tərəfindən araşdırma aparılacaq və gələcəkdə bu kimi halların təkrarlanmaması üçün lazımi tədbirlər görüləcək. (BnTv.az)

BNTV.az-a daxil olan məlumata görə, ötən həftə – 07.05.2026-cı il tarixində Siyəzən şəhər 6 nömrəli məktəb-liseyin direktoru Nərmin Cəfərova aidiyyəti agentlik rəhbərinin əmri ilə ərizəsi alınaraq vəzifəsindən azad edilib.

İddialara əsasən, may ayının əvvəlində Quba-Xaçmaz Regional Təhsil İdarəsi tərəfindən həmin məktəb-liseydə yoxlamalar aparılıb və nəticədə direktorun fəaliyyətində ciddi nöqsanların aşkar olunduğu bildirilir.

Mənbənin sözlərinə görə, bundan əvvəl də idarə rəhbərliyinin əmri ilə Nərmin Cəfərova barəsində yol verdiyi nöqsanlara görə bir neçə dəfə intizam tədbirləri, o cümlədən töhmət və şiddətli töhmət tətbiq olunub.

Redaksiyamıza müraciət edən vətəndaşların bildirdiyinə görə, həmin məktəbdə çalışan şəxslərdən biri aprel ayında nazir müavininin Quba şəhərində keçirdiyi vətəndaş qəbulunda iştirak edərək direktorun fəaliyyəti ilə bağlı Elm və Təhsil Nazirliyinin rəsmilərinə müəyyən faktlar təqdim edib.

Müraciətlərdə həmçinin qeyd olunur ki, keçmiş direktorun Quba-Xaçmaz Regional Təhsil İdarəsində çalışan Aynurə Dadaşova və Fikrət Heybətov tərəfindən himayədarlıq etdiyi haqqında iddiaları mövcuddur.

Belə ki, vətəndaşın verdiyi məlumata görə, 2024–2025-ci tədris ili dövründə Fikrət Heybətov Siyəzən rayonu üzrə təhsil sektorunun müdiri olduğu zaman Siyəzən şəhər 6 nömrəli məktəb-liseyin məktəbəhazırlıq qruplarının təşkili zamanı başqa ərazilərdə yaşayan uşaqların adlarının saxta yollarla məktəbə yazıldığı, onların məktəbə davamiyyət göstərmədən adlarının siyahıda saxlanıldığı iddia olunur.

İddialara görə, nəticədə real şagird sayı 30-dan az olduğu halda məktəbəhazırlıq qrupu qanunsuz olaraq iki qrupa bölünüb və bu səbəbdən dövlət vəsaitinin qanunsuz xərclənməsinə şərait yaranıb. Bildirilir ki, sinif komplektləşməsi təsdiq olunduqdan qısa müddət sonra həmin şagirdlərin adları məktəbin şagird siyahısından çıxarılıb.

Eyni zamanda bildirilir ki, regional idarədə vaxtilə müdir müavini vəzifəsində çalışmış, hazırda isə paytaxt məktəblərindən birində direktor işləyən Pərvin Ağasiyevin Nərmin Cəfərova ilə həmkəndli olduğu qeyd edilir. Müraciətdə onun sözügedən vəzifəyə təyinat prosesində müəyyən rolunun ola biləcəyi ilə bağlı ehtimallar da yer alıb.

Bundan başqa, redaksiyamıza müraciət edən vətəndaşın iddiasına görə, keçmiş direktor tərəfindən Fikrət Heybətova “Casio” markalı saat hədiyyə edildiyi barədə məlumatlar mövcuddur. Lakin bu iddiaların doğruluğu ilə bağlı hər hansı rəsmi təsdiq təqdim olunmayıb.

Qeyd olunan məsələlərlə bağlı qarşı tərəfin mövqeyini dərc etməyə hazırıq. Mövzu ilə bağlı aidiyyəti qurumların münasibətini öyrənməyə çalışırıq.

BNTV.az

İranın ali dini lideri Ayətullah Əli Xameneinin müşaviri Məhəmməd Möhbər BƏƏ və Küveytlə bağlı sərt açıqlama verib.

O, sosial şəbəkə hesabında paylaşdığı açıqlamada bu ölkələrin ABŞ Mərkəzi Komandanlığına (CENTCOM) dəstək verdiyini iddia edib.

Möhbər bildirib ki, İran uzun illər BƏƏ və Küveytə dost və qardaş münasibəti göstərib: “Onlar isə əvvəlcədən öz suverenliklərini sataraq hətta torpaqlarını və evlərini Fələstin və İranın düşmənlərinin ixtiyarına veriblər”.

Xameneinin müşaviri qeyd edib ki, İranın son qarşıdurma zamanı CENTCOM-un bölgədəki bazalarına reaksiyası tammiqyaslı olmayıb.

“İslam Respublikasının son total müharibə zamanı CENTCOM-un icarəyə götürülmüş forpostlarına cavabı tammiqyaslı olmadı. Lakin bu təmkin, şübhəsiz ki, əbədi olmayacaq”, - deyə o vurğulayıb.

Rusiya Prezidentinin mətbuat katibi Dmitri Peskov institutda təhsil aldığı dövrdə türk dilini necə öyrənməyə başladığı barədə danışıb.

O, bu barədə Rusiyanın "Birinci kanal"a müsahibəsində danışıb.

Onun sözlərinə görə, bölgü sınaqlarından uğurla keçmək tələbələrə öyrənmək istədikləri dilləri özlərinin seçməsinə imkan verirdi:

"Hətta ikinci dəfə mən dili özüm seçmək hüququ əldə etmək üçün lazımi miqdarda bal toplamadım. Mən ərəb dilini öyrənmək istəyirdim. Aşağı nəticələrə görə mənə cəza olaraq məcburi şəkildə türk dilini verdilər. Amma cəmi bir neçə il türk dili və bütövlükdə türkologiya ilə məşğul olduqdan sonra mən əslində başa düşdüm ki, bu çox yaxşı olub".

Qeyd edək ki, Dmitri Peskov 1989-cu ildə Moskva Dövlət Universitetinin nəzdindəki Asiya və Afrika Ölkələri İnstitutunu bitirib və dərhal SSRİ Xarici İşlər Nazirliyində işə götürülüb.

Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi bu ilin yanvar-aprel aylarında 139,3 min şəxsi aktiv məşğulluq tədbirləri ilə əhatə edib.

Onlardan 52 min şəxs münasib işlərlə təmin olunub, 254 şəxs kiçik ailə təsərrüfatlarını yaratmaları üçün özünüməşğulluq proqramına cəlb edilib.

5,6 min nəfər şəxs üçün peşə hazırlığı kursları təşkil olunub, 81,5 min şəxsə isə peşəyönümü xidmətlər göstərilib.