Bir neçə ildir Azərbaycanda müəllimlərin işə qəbulu imtahanlarında, eləcə də Peşə Təhsili müəssisələrində müəllim və usta qəbulu imtahanlarında sualların hazırlanmasında ciddi səhvlərin olması böyük narazı təhsil işçisi ordusu yaradıb. Təəssüflər olsun ki, bu məsələ ilə bağlı nə sualları hazırlamağa məsul olan Təhsil İnstitutundan, nə Elm və Təhsil Nazirliyindən, nə də digər aidiyyəti qurumlardan heç bir məntiqli cavab verilmir.
Bu illər ərzində böyük bir müəllim ordusu məhz bu səbəbdən ciddi narazılıq ifadə edir və bu addımlar müəllim ordusunun ölkəmizə, dövlətimizin idarəetmə sisteminə qarşı ciddi aqressiya yaratmasına səbəb olub.
Qəribə hal budur ki, bu şəxslər - Təhsil İnstitutunun rəhbəri Elnur Əliyev və elm və təhsil naziri Emin Əmrullayev qətiyyən narahat görünmür və fəaliyyətləri ilə bağlı hər hansı narahatlıq nümayiş etdirmirlər. Onlar bu davranışı özlərinin doğru yolda hesab etdiklərini göstərən amillər kimi qiymətləndirirlər.
Təbii ki, biri elm və təhsil naziri, digəri isə Təhsil İnstitutunun rəhbəri olaraq, əllərində böyük trol ordusu, böyük maddi imkanlar və iri layihələrdən gələn milyonlarla vəsait olduğu halda onlar üçün heç bir problem yoxdur.
Amma burada maraqlı bir məqam var...
Kimdir bu adamlar? Bu dövlətə, vətənə və xalqa münasibətləri necədir?
Karyeralarına diqqət yetirdikdə görünür ki, Elnur Əliyevin fəaliyyəti uzun illər Prezidentin ictimai-siyasi məsələlər üzrə şöbəsinin sabiq rəhbəri, sonradan vəzifəsindən azad edilən və barəsində müxtəlif yeyinti və digər iddialar səsləndirilən Əli Həsənovun sahibi olduğu "Kaspi" Təhsil Mərkəzindən başlayır. Elnur Əliyev "Kaspi" Təhsil Şirkətinin direktoru olub. Eyni dövrdə Emin Əmrullayev də Elnur Əliyevin rəhbərliyi altında çalışıb və Əli Həsənovun rəhbərlik etdiyi şirkətdə fəaliyyət göstəriblər.
Maraqlıdır, "Kaspi" Təhsil Şirkəti əslində kimin idi və ya kimin dəstəyi ilə fəaliyyət göstərirdi?
Təbii ki, o dövrdə Ramiz Mehdiyevin icazəsi və nəzarəti olmadan belə bir mərkəzin fəaliyyət göstərməsi mümkün deyildi.
İndi isə zaman ardıcıllığına nəzər salaq.
2019-cu ilin oktyabr ayında Prezident İlham Əliyev Ramiz Mehdiyevlə bağlı sərəncam imzaladı və Ramiz Mehdiyev Azərbaycan Respublikası Prezidentinin Administrasiyasının rəhbəri vəzifəsindən azad edildi.
Düz bir ay sonra, 29 noyabr 2019-cu il tarixində Prezident İlham Əliyev Azərbaycan Respublikası Prezidentinin ictimai-siyasi məsələlər üzrə köməkçisi – şöbə müdiri Əli Həsənovu da vəzifəsindən azad etdi.
Emin Əmrullayev barədə qısa arayış:
2010–2012-ci illərdə "2007–2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" və "Fulbright" proqramının birgə dəstəyi ilə Kolumbiya Universitetində ictimai (inzibati) idarəetmə ixtisası üzrə magistr təhsili alıb.
Hər kəs yaxşı bilir ki, həmin dövrdə xarici ölkələrdə təhsil məsələsi birmənalı şəkildə Ramiz Mehdiyevin nəzarətində idi və onun razılığı olmadan dövlət hesabına xaricdə təhsil almaq mümkün deyildi. Məhz həmin dövrdə Emin Əmrullayev də xaricdə təhsil almağa göndərilib.
Daha bir uyğunluq:
Emin Əmrullayev 2009–2010-cu illərdə "Kaspi Education" MMC-də Beynəlxalq əlaqələr şöbəsinin müdiri vəzifəsində çalışıb. "Kaspi Education" MMC də Əli Həsənovun rəhbərlik etdiyi şirkətidir. Bu isə o deməkdir ki, yəqin ki, Emin Əmrullayev Əli Həsənovun dəstəyi və Elnur Əliyevin təqdimatı ilə xaricdə təhsil almağa göndərilib.
2020-ci ildə Emin Əmrullayev təhsil naziri təyin olundu. Daha sonra nazirliyin adı dəyişdirilərək Elm və Təhsil Nazirliyi oldu. 2020-ci ildə Elnur Əliyev hələ də "Kaspi" Təhsil Şirkətinin direktoru idi.
Elnur Qəzənfər oğlu Əliyev 2021-ci ildən Emin Əmrullayevin yanında görünməyə başladı və sadiq dostlar ölkə təhsilinə ciddi nəzarəti ələ almağa qərar verdilər.
Elnur Əliyev əvvəl Nazirliyin Ümumi və məktəbəqədər təhsilin təşkili və idarə olunması şöbəsinin müdiri, 2023-cü ilin dekabr ayında isə elm və təhsil naziri Emin Əmrullayevin əmri ilə nazirin müşaviri təyin edildi və eyni zamanda Azərbaycan Respublikasının Təhsil İnstitutunun direktoru səlahiyyətlərini icra etməyə başladı.
Maraqlı irəliləyiş və təyinatlarda tələsməmə prinsipi işləməyə başladı. Diqqəti bu zaman maraqlı bir istiqamətə yönəltmək lazımdır. Araşdırma aparılsa, görünər ki, müəllimlərin imtahan sualları ilə bağlı narazılığı məhz 2023-cü ildən başlayıb. İmtahan sualları Təhsil İnstitutunda hazırlanır. Bu institutun rəhbərliyinə Elnur Əliyev gəldikdən sonra məhz bu narazılıqların başlaması suallar doğurmaya bilməz.
Müəllimlərin işə qəbulu imtahanı 2019-cu ildən keçirilir. Bu illər ərzində ümumi narazılıqlar əsasən vaxt, sistemdəki kiçik problemlər və digər texniki məsələlərlə bağlı idi. Lakin məhz 2023-cü ildən, Elnur Əliyevin Təhsil İnstitutuna gəlişindən sonra suallarda ciddi problemlərin yarandığı və narazılıqların artdığı göz önündədir.
Artıq üç ildir ki, eyni hallar davam edir, vəziyyət daha da gərginləşir və böyük müəllim ordusunun narazılığı artır. Bu hal müəllim ordusunun dövlətə münasibətini pisləşdirir, onları dövlətdən narazı salır və xoşagəlməz vəziyyət yaradır.
Bunların hamısı təsadüfdürmü?
Bir neçə arqument göstərməklə bu suala cavab vermək olar.
Elnur Əliyevin təhsildə böyük bir monopoliya yaratmaqla məşğul olduğu illərdir deyilir. Bunu bir sıra təhsil ekspertləri və narazı şəxslər açıq şəkildə bildirirlər.
Məlumata görə, Elnur Əliyev sürətlə təhsil sektorundakı bütün agentlikləri nəzarətə götürür. Nazirlikdə dörd agentlik var.
Əvvəl Təhsildə Keyfiyyət Təminatı Agentliyi, daha sonra Elm və Ali Təhsil üzrə Dövlət Agentliyi, ardınca Məktəbəqədər və Ümumi Təhsil üzrə Dövlət Agentliyi, daha sonra isə Peşə Təhsili üzrə Dövlət Agentliyi istiqamətində dəyişikliklər baş verdi.
Emin Əmrullayev öz dostu Elnur Nəsibovu da kənarda saxlamaq məcburiyyətində qaldı. Çünki Elnur Əliyevin daha güclü dəstəyə malik olduğu və proseslərə daha ciddi təsir göstərdiyi irəli sürülür.
Nə baş verdi?
Ötən il peşə təhsili müəssisələrində keçirilən imtahanlarda sualların hazırlanması ilə bağlı ciddi narazılıqlar yarandı. Hətta Peşə Təhsili üzrə Dövlət Agentliyinin rəhbəri Ceyhun Kərəmovun rəhbərlik etdiyi agentlik "Sualları Təhsil İnstitutu hazırlayır" məzmunlu açıqlama verməyə məcbur oldu. İddialara görə, bu vəziyyət Elnur Əliyevin xoşuna gəlmədi və bir neçə gün sonra Elnur Nəsibovla Ceyhun Kərəmov vəzifədən uzaqlaşdırıldı.
Qısa müddət sonra, 2024-cü ildə Təhsilin iqtisadiyyatı şöbəsinə rəhbər gətirdiyi İlqar Bayramlı əvvəl Təhsilin İnkişafı Fondunun İdarə Heyətinin sədri vəzifəsini icra etməyə başladı, daha sonra isə Peşə Təhsili üzrə Dövlət Agentliyinə rəhbər təyin edildi. Beləliklə, Elnur Əliyev həm Təhsilin İnkişafı Fondunu, həm də Peşə Təhsili üzrə Dövlət Agentliyini nəzarətə götürdü. Hər iki şəxs – Elnur Nəsibov və Ceyhun Kərəmov – Elnur Əliyev üçün kiçik maneə idi.
Bəs indi nə baş verir?
Bu il keçirilən imtahanlarda yenidən sualların düzgün hazırlanmaması, ciddi səhvlərin olması və böyük müəllim ordusunun narazılığı açıq aşkar ortadadır.
Elə isə indi hədəf kimdir?
Təbii ki, Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov. Bu gün narazı müəllimlər şikayət üçün hara üz tuturlar - Eşqi Bağırovun rəhbərlik etdiyi quruma.
Narazı müəllimlər kimdən şikayətçidirlər - təbii ki, Eşqi Bağırovdan.
Eyni ssenari təkrarlanır.
Ötən gün biologiya müəllimləri suallardan narazı qalaraq Təhsil İnstitutuna üz tutdular və sualların Elnur Əliyevin rəhbərlik etdiyi qurum tərəfindən hazırlandığını bildirdilər. Məktəbəqədər və Ümumi Təhsil üzrə Dövlət Agentliyində onlara "Bizlik bir məsələ yoxdur, gedin Təhsil İnstitutuna müraciət edin" deyildi.
Deməli, Ceyhun Kərəmov üçün oynanılan ssenari indi də Eşqi Bağırov üçün təkrarlanır.
Eşqi Bağırov Elnur Əliyevin qarşısında duruş gətirə biləcəkmi?
Bu, böyük sualdır.
Yəqin ki, gətirə bilməyəcək və Elnur Əliyev bu agentliyi də öz nəzarətinə alacaq.
Beləliklə, görünən odur ki, vaxtilə "Kaspi" Təhsil Mərkəzində fəaliyyət göstərmiş, Əli Həsənovun komandasında yer almış şəxslər bu gün də ölkə təhsilində ciddi narazılıqların əsas fiqurları kimi göstərilir.
Bu isə hələ də cavabsız qalan böyük suallar yaradır. Ölkənin təhsilini niyə məhz bu adamlar idarə etməlidir və bu qədər narazılıqlar dövlətimiz üçün nə dərəcədə faydalıdır?
Ədil Hüseynli
TEREF

Bu gün Azərbaycan milli mətbuatının yaranması günüdür.

151 il öncə - 1875-ci il iyulun 22-də dövrünün maarifçilik hərəkatının görkəmli nümayəndələrindən olan Həsən bəy Zərdabinin "Əkinçi" qəzetini nəşrə başlaması ilə Azərbaycan milli mətbuatının əsası qoyulub.

"Əkinçi" Azərbaycan dilində əsl milli demokratik və xalq mətbuatının ilk təməl daşını qoyub. Cəmi 56 nömrəsi çıxan qəzet xalqın aynası olub, Azərbaycan jurnalistikasının bayraqdarına çevrilib.

Sonrakı illərdə görkəmli ziyalılar tərəfindən nəşr edilən "Ziya", "Kəşkül", "Şərqi-rus", "İrşad", "Molla Nəsrəddin" kimi qəzet və jurnallar "Əkinçi"nin ənənələrini davam etdirib. Bu mətbuat orqanlarının əsas hədəfi cəhalətə, haqsızlığa qarşı mübarizə, maarifləndirmə idi. Zəngin və şərəfli yolla addımlayan Azərbaycan mətbuatı bir neçə mərhələdən keçib. Azərbaycan Xalq Cümhuriyyəti (AXC) dövründə azad mətbuatın, eləcə də hadisələrə yeni baxışın təməli qoyulub.

Növbəti mərhələ isə AXC-nin bolşeviklər tərəfindən işğalından sonrakı dövrü əhatə edir. 151 yaşlı mətbuatın 70 ili bu kommunist dikaturası dövrü ilə bağlıdır. Həmin dövrdə Azərbaycan mətbuatı mövcud problemləri daha çox sətiraltı mənada yazırdı. Çünki mətbuat SSRİ-nin yürütdüyü siyasətin, ideologiyanın ruporu idi. Həmin dövrdə fərqli düşünmək, yazmaq qadağan idi.

1990-cı illərin II yarısından başlayaraq Azərbaycan mətbuatı yeni inkişaf mərhələsinə qədəm qoyub. Bu mərhələ həm də Azərbaycan dövlətçiliyi, demokratik dövlət quruculuğu dövrüdür. Bu yeni inkişaf dövrünün təməlini qoyan Ulu Öndər Heydər Əliyev hər zaman mətbuatın cəmiyyətə təsir gücünü yüksək qiymətləndirib, mətbuat və söz azadlığı, kütləvi informasiya vasitələrinin maddi-texniki bazasının möhkəmləndirilməsi istiqamətində ardıcıl tədbirlər həyata keçirib. Müstəqillik dövründə Azərbaycan mətbuatı ilə bağlı ilk fərmanı da Heydər Əliyev imzalayıb.

Ümumilikdə, Ulu Öndər mətbuatın problemlərinin həlli ilə bağlı 10-dan çox sərəncam və fərman imzalayıb. 1999-cu ildə "Kütləvi İnformasiya Vasitələri haqqında" beynəlxalq tələblərə cavab verən qanun qəbul edilib. Heydər Əliyevin 1998-ci il 6 avqust tarixli sərəncamı ilə Azərbaycanda senzura ləğv olunub.

Ölkədə söz və mətbuat azadlığına, KİV-lərə ən yüksək səviyyədə diqqət və qayğı var. Prezident İlham Əliyev azad medianı inkişaf etdirmək, mətbuatın maddi-texniki bazasını möhkəmləndirmək, jurnalistlərin sosial-iqtisadi vəziyyətini yaxşılaşdırmaq məqsədilə mühüm sərəncamlar imzalayıb.

2020-ci ilin sentyabrın 27-də başladılan 44 günlük Vətən müharibəsində Azərbaycan döyüş meydanında olduğu kimi, informasiya savaşında da qələbə qazanıb. Mütəmadi olaraq ölkəyə qarşı qara kampaniya aparan dairələr bu müddət ərzində də öz çirkin əməllərindən əl çəkməyiblər. Amma buna baxmayaraq, informasiya müharibəsində də üstünlük öz tarixi torpaqlarını işğaldan azad edən, haqq və ədalət uğrunda mübarizə aparan Azərbaycan tərəfində olub.

Bununla belə Azərbaycan mətbuatının iki nümayəndəsi erməni terrorunun qurbanı olub. Vətən müharibəsi başa çatdıqdan sonra işğaldan azad olunmuş ərazilərdə çəkiliş aparan jurnalistlərin olduğu nəqliyyat vasitəsi 2021-ci il iyunun 4-də Kəlbəcər rayonunun Susuzluq kəndi ərazisində tank əleyhinə minaya düşüb. Nəticədə AZƏRTAC-ın müxbiri Məhərrəm İbrahimov, AzTV-nin operatoru Sirac Abışov və Kəlbəcər Rayon İcra Hakimiyyəti başçısının Susuzluq kənd inzibati dairəsi üzrə nümayəndəsinin müavini Arif Əliyev həlak olub, dörd nəfər isə yaralanıb.

Bütün həmkarlarımızı bayram münasibətilə təbrik edirik!!!

Yaxınları bir neçə gün əvvəl vəfat edən Gəncə Dövlət Universitetinin baş müəllimi Kəmalə İsayevanın ölümündə həkim səhlənkarlığı olduğunu iddia edir.
Bu şikayətlə “Qafqazinfo”ya mərhumun həyat yoldaşı Aydın İsayev müraciət edib.

O bildirib ki, yoldaşını kəskin baş ağrısı və bədəninin uyuşması şikayətləri ilə Gəncədə yerləşən “Ozon Tibb Mərkəzi”nə aparıb: “İyulun 1-dən şiddətli baş ağrıları başladı, eyni zamanda əlində keyimə və hərəkət məhdudiyyəti yarandı. Yoldaşımı sözügedən xəstəxanada MRT müayinəsinə götürdülər. Bunun cavabına əsasən beyində iki törəmə olduğu deyildi”.

Ailə daha sonra MRT nəticəsini Gəncə Mərkəzi Klinik Xəstəxanasına apararaq neyrocərrah Ramis Hüseynova müraciət edib: “O, 10 günlük sistem müalicəsi yazdı. Müalicənin ikinci günündən yoldaşımın vəziyyəti pisləşdi. Xəstəxanada əvvəlcə KT (kompüter tomoqrafiyası) müayinəsi təyin olundu. Həmin gün həkim tərəfindən beşgünlük-ümumilikdə 10 sistemdən ibarət müalicə yazıldı. Müalicənin ikinci gününə kimi qidalanması və vəziyyəti normal olub. Ancaq həkimin yazdığı sistemlər vurulduqca durumu ağırlaşdı, əli və ayağı tamamilə tutuldu.

Bundan sonra isə Bakıda Milli Onkologiya Mərkəzinə yönləndirildik. Burada Emin həkim bildirdi ki, “Gəncədə çəkilmiş MRT nəticələri şübhə doğurur”. Buna görə yenidən MRT çəkilməsi tələb olundu”.

Şikayətçi qeyd edib ki, təkrar MRT müayinəsindən sonra beyində törəmə yox, qansızma olduğu deyilib: “Həkimlər vəziyyətin kritik olduğunu dedilər. Müsbət irəliləyiş olarsa, müdaxilə edilə bilərdi. Amma yoldaşımın vəziyyəti pisləşdiyi üçün Türkiyədən neyrocərrah dəvət etdim. Türkiyəli həkim xəstənin göz reflekslərinin olmadığını, buna görə də əməliyyatın mümkün olmadığını dedi. Sonradan müdaxilə edilsə belə, vəfat etdi”.

Mərhumun həyat yoldaşı bütün bunlarla yanaşı, xəstənin digər tibb müəssisəsinə göndərilməsi üçün verilən göndərişin gecikdirildiyini deyir: “Bu da müalicənin vaxtında başlanmasına mane oldu. Gedən pullara pis olmuram, onu zamanla yenidən qazanaram. Bəs, mənim canımı niyə aldılar? Gül kimi ailəmizi dağıtdılar, ailə tabloma xətt çəkdilər... Evə gedə bilmirik, ev üstümüzə gəlir. Diaqnoz düzgün qoyulsa və vaxtında lazımi tədbirlər görülsəydi, bəlkə də həyat yoldaşımı xilas etmək mümkün olardı”.

Məsələ ilə bağlı “Ozon Tibb Mərkəzi”nə də sorğu ünvanladıq. Mərkəzdən saytımıza cavab olaraq bildirildi ki, tibb müəssisəsi həkimin verdiyi rəyə görə hüquqi məsuliyyət daşımır: “Kəmalə İsayevanın MRT müayinəsi həkim-radioloq Heydər Əlisəfazadə tərəfindən qiymətləndirilib. Heydər Əlisəfazadə Azərbaycan Tibb Universitetinin məzunudur, Səhiyyə Nazirliyinin sertifikasiyasından keçib və tərtib etdiyi MRT rəylərinə görə şəxsən özü məsuliyyət daşıyır. Radioloq MRT görüntülərini qiymətləndirərkən rəyində beyində bədxassəli törəməyə bənzər görüntü olduğunu qeyd edib. Xəstənin ölüm səbəbi həmin törəmədir”.

İttihamlarda adı keçən həkim Ramis Hüseynovla bağlı Gəncə Mərkəzi Klinik Xəstəxanası ilə əlaqə saxladıq. Lakin xəstəxanadan bildirdilər ki, bununla bağlı cavab vermək istəmirlər.(Qafqazinfo)

Canlı bağlantıdan sonra çəkiliş davam etdirilən zaman klinikanın rəhbəri media əməkdaşlarına yaxınlaşaraq çəkilişə mane olub.

Görüntülərdə həmin şəxsin kameraya zərbə vurduğu, avadanlığın bir hissəsini sındırdığı və operatora xəsarət yetirdiyi əks olunub.

Baku TV əməkdaşları baş verən hadisə ilə bağlı aidiyyəti qurumlara müraciət ediblər.

Baku TV

Turkdunyasiinfo xəbər verir ki, 20.07.2026 cı il tarixdə "Turkdunyasiinfo".az informasiya portalının təsisçisi Gəncə şəhərində "BakuBus"a məxsus, dövlət qeydiyyat nişanı 77-JZ-473 olan 9 nömrəli marşrut avtobusunda təhlükə vəziyyətlə üzləşib. Əlbəttə ki, qeyd etdiyimiz hal sərnişin təhlükəsizliyi və sürücülərin etik davranışı ilə bağlı ciddi narahatlıq yaradıb.

Belə ki, avtobus sürücüsü hərəkət zamanı qəfil və kəskin tormuzlanma edərək sərnişinlərin həyat və sağlamlığını təhlükə altına qoyub.

Hadisə zamanı avtobusda olan sayt rəhbəri ömürlükəlilliyi olan sərnişin bildirib ki, onun yanında 5 yaşlı azyaşlı uşaq da olub və qəfil tormuzlanma nəticəsində hər ikisi üçün təhlükəli vəziyyət yaranıb.
Sayt rəhbəri sürücüyə nəzakətlə müraciət edərək sağlamlıq vəziyyətini və yanında azyaşlı uşaq olduğunu xatırladıb, nəqliyyat vasitəsini daha ehtiyatla idarə etməsini xahiş edib. Lakin sürücü bu irada adekvat reaksiya vermək əvəzinə, digər sərnişinlərin gözü qarşısında kobud və aqressiv davranaraq, "Avtobusda problem var, nə deyirsən" məzmununda ifadələr işlədib.

Sayt rəhbəri bildirir ki, sürücünün davranışı onu mənəvi cəhətdən sarsıdıb və ictimai yerdə alçaldıb. O, baş verənlərdən sonra ilk dayanacaqda avtobusdan düşmək məcburiyyətində qalıb.

Hadisə ilə bağlı "BakuBus" rəhbərliyindən və aidiyyəti qurumlardan məsələnin obyektiv araşdırılması, avtobusun videoqeydiyyat görüntülərinə baxılması, sürücünün hərəkətlərinə hüquqi qiymət verilməsi və qanunvericiliyə uyğun tədbirlərin görülməsi tələb olunur.

Qeyd edək ki, ictimai nəqliyyatda sərnişinlərin, xüsusilə əlilliyi olan şəxslərin, yaşlıların və azyaşlı uşaqların təhlükəsizliyi və onlara hörmətlə yanaşılması daşıyıcı şirkətlərin əsas öhdəliklərindən biridir. Baş vermiş hadisənin bütün təfərrüatları araşdırılmalı və belə halların təkrarlanmaması üçün zəruri tədbirlər görülməlidir.(Turkdunyasiinfo.az)
Qarşı tərəfin mövqeyini dərc etməyə hazırıq.

"Vital Hospital"da ölü doğulan uşağın zirzəmiyə atıldığı iddia edilib.

Bu barədə zərərçəkən sosial media hesablarında paylaşım edib. Paylaşımlarda zərərçəkən şəxs iddia edib ki, heç bir müalicəsinə, müayinəsinə baxmayaraq, körpəsi ölü doğulub və onun meyiti morqa qoyulmayıb, zirzəmiyə atılıb.

Məsələ ilə bağlı qarşı tərəfin mövqeyini öyrənmək məqsədilə klinikanın veb-saytına yerləşdirilən əlaqə nömrəsinə edilən zənglər cavabsız qalıb. Zəngə cavab verən əməkdaş - "bir saat sonra zəng edin", söyləsə də, geri dönüş edildikdə zənglərə cavab verməyib.

Səhiyyə Nazirliyindən isə bildirilib ki, "Vital Hospital"la bağlı yayılan məlumat Analitik Ekspertiza Mərkəzinin diqqətindədir. Nazirlikdən qeyd edilib ki, məsələ ilə bağlı araşdırmaya başlanılıb və hüquq-mühafizə orqanları məlumatlandırılıb: "Araşdırmanın nəticələrinə əsasən ictimaiyyətə əlavə məlumat veriləcək".(Oxu.az)

VİDEO LİNKDƏ: https://baku.tv/dunyaa/vital-hospitalda-qalmaqal-olu-dogulan-usagin-soyuducu-adi-ile-zirzemiye-qoyuldugu-iddia-edilib

Bakının Sabunçu rayonu, Bakıxanov qəsəbəsi, Həsənbəy Ağayev küçəsində yaşıllıqların məhv edilərək ərazidə tikinti işlərinin aparıldığı iddia olunur.

Bizimesr.com bildirir ki, sözügedən ərazidə bir müddətdir tikinti işləri aparılır. Təbii ki, həmişəki kimi, qanunsuz və sənədsiz.

Sakinlərin bildirdiyinə görə, tikintidən əvvəl ərazidə çoxsaylı ağaclar olub. Ağaclar gecə saatlarında və ya gizli şəkildə kəsilərək ərazi hasarlanıb, daha sonra isə tikinti işlərinə başlanılıb.

Ərazi sakinləri hesab edirlər ki, yaşıllıqların məhv edilməsi və tikinti işlərinin aparılması ilə bağlı müvafiq qurumlar tərəfindən araşdırma aparılmalıdır. Onlar məsələ ilə əlaqədar Sabunçu Rayon İcra Hakimiyyətinə müraciət etdiklərini, lakin indiyədək hər hansı rəsmi cavab almadıqlarını bildiriblər: "Adil Vəlyev Sabunçu sakinlərini saya salmır. Nə müraciətləri eşidir, nə də suallara cavab verir. Sadəcə uzun illərdir bu rayonda istədiyini edir".

Məsələni dəqiqləşdirmək məqsədilə redaksiyamız tərəfindən Dövlət Şəhərsalma və Arxitektura Komitəsinə, həmçinin Sabunçu Rayon İcra Hakimiyyətinə rəsmi sorğular ünvanlanıb. Lakin material dərc olunanadək sorğularımıza cavab verilməyib.

Bizimesr.com

VİDEO LİNKDƏ: https://www.bizimesr.com/az/post/adil-veliyev-qanun-qayda-tanimir----agaclari-mehv-edib-tikinti-aparanlara-yasil-isiq---video-22651

Azərbaycan Prezident İlham Əliyevin almaniyalı həmkarı Frank-Valter Ştaynmayerlə hazırda təkbətək görüşü davam edir.

Təkbətək görüşdən sonra prezidentlərin nümayəndə heyətlərinin iştirakı ilə geniş tərkibdə görüşü olacaq.

Almaniya kansleri Fridrix Merts ilə görüşdə isə "Azərbaycan Respublikası ilə Almaniya Federativ Respublikası arasında İkitərəfli Tərəfdaşlıq üçün Strateji Gündəlik haqqında Birgə Bəyannamə" imzalanması nəzərdə tutulur.

Azərbaycan idmançıları döyən bolqar gimnastdan niyə yaxa qurtara bilmir?
Azərbaycan Atletika Federasiyasının prezidenti Cavid Qurbanovun rəhbərliyi ilə qurumun iclası keçirilib və Gənclər və İdman nazirinın sabiq müavini Mariana Vasileva federasiyasının idman işləri üzrə direktoru vəzifəsinə təyin edilib.
Təyinat idman ictimaiyyəti tərəfindən birmənalı qarşılanmayıb. Çünki hələ təyinat ərəfəsində ölkənin idman mətbuatında Mariana Vasiyeva haqqında kəskin yazılar gedib.
Məsələn, futbolinfo.az saytında bir həftə öncə dərc edilən "Ştatdankənar məmur" yazısında deyilir:
"Mariana Vasileva – Azərbaycanın gənclər və idman nazirinin bolqar müavini… Sabiq və bəlkə də hazırkı…
Təyinatı narazılıq doğurdu; işdən çıxarılması biabırçı səbəbdən reallaşdı; hələ də işini davam etdirməsi bir başqa fiaskodur… Postundan azad edilib, amma məmuriyyətinə “ştatdankənar” davam edir. AGİN-in tədbirlərində iştirak edir, nazirliyin idarəetməsində birbaşa rol alır, kimsə onun göstərişlərindən çıxa bilmir.
Vasileva elə nüfuz və hörmət sahibidir ki (!), işdən çıxarılanda nazir Fərid Qayıbov belə buna üzüldüyünü paylaşım edərək göstərmişdi. İstefanın səbəbinə, işdən çıxaranın kimliyinə baxmadan… Deyəsən, küskün nazirin könlünü almaq üçün ona qeyri-rəsmi şəkildə Mariana xanımın işini davam etdirəcəyini dedilər və o, sakitləşdi".
Qeyd edək ki, Mariana Toteva Vasileva Azərbaycan Respublikası Prezidentinin 29 noyabr 2021-ci il tarixli Sərəncamı ilə Azərbaycan Respublikası gənclər və idman nazirinin müavini vəzifəsinə təyin edilmişdi. O, 16 yanvar 2025-ci ildə işdən çıxarıldı.
Onun işdən çıxarılmasının səbəblərinə gəlincə, mətbuatda bu barədə kifayət qədər yazılar dərc olunub. Həmin səbəblərə toxunmazdan öncə qeyd edək ki,1974-cü ildə anadan olan Vasileva gənc yaşlarında vətəni Bolqarıstanda bədii gimnast kimi tanınıb. Bu idman növündə əldə etdiyi uğurlara görə Bolqarıstanda kifayət qədər tanınıb və sevilib. 2007-ci ildə Azərbaycan Gimnastika Federasiyasında məşqçi işləmək təklifi alıb, ailəsi ilə birgə Bakıya köçüb. 2009-cu ildə Azərbaycan yığmasına baş məşqçi təyin edilib.
Futbolinfo.az-ın məlumatına görə, Azərbaycanda yaşayan Vasileva və ailə üzvləri (həyat yoldaşı ilə iki qız övladı) Bolqarıstan vətəndaşlığını qorumaqla, həm də Azərbaycan vətəndaşlığını daşıyır. Baxmayaraq ki, Azərbaycanda ikili vətəndaşlıq qanunla tənzimlənmir!
Bundan başqa, Vasilevanın 1996-ci il doğumlu böyük qızı Siyana gimnastikada ilk addımlarını Bolqarıstanda atsa da, karyerasını 2008-ci ildən Azərbaycanda davam etdirib və 2011-ci ildə milli komandaya dəvət alıb. Sonra hətta baş məşqçi postunu tutub.
Sayt bu məqama toxunaraq yazır: "Bu qədər əzizlənən birinin vəzifədən kənarlaşdırılması qəribə görünə bilər. Amma o qədər ciddi səbəb var idi ki, onu qorumaq mümkün olmadı".
İndisə gələk, həmin ciddi səbəblərə. Məsələ burasındadır ki, 2013-cü ildə Azərbaycanda Əməkdar məşqçi adı alan Vasileva çəki artımına görə atletləri döyüb, onları təhqir edib, özlərini yaxşı hiss etmədikləri halda atletlərin sağlamlığını risk altına qoyaraq onları məşqə məcbur edib. Deyilənlərə görə, həmçinin, nazirlikdə Vasileva ilə digər əməkdaşlar arasında narazılıq yaşanıb. Bundan başqa, Mariana xanım Beynəlxalq Gimnastika Federasiyasının (FIG) himayəsi altında keçirilən hər hansı tədbirdən 8 il müddətinə uzaqlaşdırılıb. Ona ömürlük hər hansı federasiyada baş məşqçi vəzifəsi tutmaq qadağan edilib. Azərbaycan milli komandasının baş məşqçi vəzifəsini icra edən Siyana Vasileva (Mariananın qızı) 18 ay, məşqçi Yevgeniya Vilyayeva isə 12 ay müddətinə uzaqlaşdırılıb.
Mətbuatda yayılan iddialara inansaq, Vasileva atletlərin pul və ya mükafatlarını mənimsəyib, onların ailələri ilə və ya digər şəxsi əlaqələrini məhdudlaşdıraraq mobil telefonlarından istifadə etmələrinə qadağa qoyub. O, həyatının sonuna qədər Beynəlxalq Gimnastika Fonduna bağlı olan hər hansı federasiyanın baş məşqçisi ola bilməyəcək. 2019-cu ildə Beynəlxalq Gimnastika Fondunun Mariana Vasilevaya təqdim etdiyi “Fəxri Məşqçi” diplomu da ondan geri alınıb.
O da iddia olunur ki, bu məsələlər ciddi şəkildə insidentə səbəb olduğu üçün siyasi rəhbərliyin nəzərinə çatdırılıb. Vasilevanın gimnastlara qarşı kobud, qeyri-insani davranışı, özünü müştəbeh aparması haqda məruzə edildikdən sonra onun işdən azad olunması qərarı verilib. Ayrıca Vasilevanın klubların birindən yayılan rəqs görüntüləri də ciddi qalmaqa və müzakirələrə səbəb olmuş və onun vəziəsindən uzaqlaşdırılmasında rol oynamışdı.
Bununla belə, nazirlikdəki vəzifəsindən uzaqlaşdırılmasına rəğmən, Vasilevanın postu hələ də boşdur. Bu səbəbdən onun həmin vəzifəni hələ də qeyri-rəsmi olaraq yerinə yetirdiyinə dair iddialar da var.
Bütün bunlardan sonra, Atletika Federasiyasının prezidenti Cavid Qurbanovun qalmaqallı gimnasta vəzifə verməsi də xeyli suallar doğurur. Çünki bu addımı həm idarəçilik prinsipləri, həm də ictimai rəy baxımından ciddi tənqidlərə dözümsüzdür və həm dövlət maraqları, həm də idman sahəsindəki islahatlarla birbaşa ziddiyyət təşkil edir.
İlk növbədə bu, beynəlxalq rüsvayçılığa və qadağalara məhəl qoymamaqdır. Çünki Mariana Vasileva sıradan bir səbəbdən yox, idmançıları döymək, təhqir etmək və onların sağlamlığını riskə atmaq kimi ağır ittihamlarla vəzifəsindən kənarlaşdırılıb. O zaman görəsən, Beynəlxalq Gimnastika Federasiyasının (FIG) himayəsində olan tədbirlərdən 8 il, istənilən federasiyada baş məşqçilikdən isə ömürlük uzaqlaşdırılan, "Fəxri Məşqçi" diplomu belə geri alınan bir şəxsə Cavid Qurbanovun qucaq açmasının arxasında hansı niyyət və arqumentlər dayanır?
Ən önəmlisi isə, Vasileva özbaşınalığına, idmançılara qarşı qeyri-insani davranışlarına görə məhz ölkə rəhbərliyinin iradəsi ilə işdən qovulub. Cavid Qurbanovun siyasi rəhbərlik tərəfindən idarəçilikdən kənarlaşdırılan, fəaliyyətində ciddi nöqsanlar aşkarlanan birini çox keçmədən Atletika Federasiyasına icraçı direktor təyin etməsi dövlət qərarlarına və siyasi iradəyə qarşı açıq-aşkar hörmətsizlik deyilmi?
Azərbaycanda ikili vətəndaşlığa qanunla yol verilmədiyi halda, həm Bolqarıstan, həm də Azərbaycan vətəndaşlığını daşıyan, üstəlik, ailəvi şəkildə korrupsiyaya və qadağalara bulaşmış bir şəxsə mühüm post etibar etmək Cavid Qurbanovun kadr siyasətinin yarıtmaz olduğunu göstərir. Xüsusilə nəzərə almaq lazımdır ki, ölkədə yüzlərlə gənc, savadlı, idman idarəçiliyini bilən kadr olduğu halda, məhz adı qalmaqallarda hallanan Vasilevaya belə canfəşanlıqla sahib çıxılması heç bir məntiqə sığmır.
Ən nəhayət, yuxarıda qeyd etdiyimiz kimi, Vasilevanın bu təyinata qədər rəsmi vəzifəsi olmadığı halda belə Gənclər və İdman Nazirliyinin idarəçiliyinə müdaxilə etdiyinə dair iddialar var. Cavid Qurbanov ona rəsmi status verməklə bu qanunsuz "kölgə idarəçiliyini" leqallaşdırır və onu məsuliyyətdən qaçıracaq yeni bir sığınacaqla təmin edir. Sabah federasiyada baş verəcək hər hansı bir qanunsuzluğa görə mənəvi və hüquqi məsuliyyət birbaşa Federasiya prezidenti kimi Cavid Qurbanovun üzərinə düşəcək. Hətta ona Vasilyevanı görəvləndirmək tapşırığı nazir Fərid Qayıbovdan gəlsə belə...
Sonda onu da vurğulayaq ki, Cavid Qurbanovun bu addımı Azərbaycan idmanının nüfuzuna vurulan növbəti zərbədir. Müsbət imici olmayan, rəsmi qaydada cəzalandırılmış bir şəxsə vəzifə vermək dövlət və ictimai maraqlardan deyil, yalnız idman sahəsindəki yüksək vəzifəli şəxslərin şəxsi maraq və ambisiyalardan xəbər verir. (Kontekst.az)

Paytaxtın ən böyük dövlət xəstəxanalarından olan Kliniki Tibbi Mərkəzdə xəstələrin daşınması üçün istifadə olunan PVC su borularından hazırlanmış xərəyin videoları yayılıb. Əlbətdə, vəziyyətin özü kifayət qədər biabırçı olduğu halda, onu izah etmək üçün verilən açıqlama daha biabırçı, insanları lağa qoymaqdan başqa bir şey deyil.


Klinik Tibbi Mərkəzin mətbuat katibi Ruzbeh Məmməd bildirib ki, bu, MRT üçün hazırlanıb və "dünya praktikasında istifadə olunan, aşağı büdcəli və səmərəli həllərdən biridir".

Doğrudanmı?

Azərbaycanın səhiyyə sisteminə hər il yüz milyonlarla, hətta milyardlarla manat vəsait ayrılır. Dövlət xəstəxanası beynəlxalq standartlara uyğun sertifikatlı MRT xərəyi ala bilmir, amma xəstəni PVC su borularından yığılmış konstruksiya ilə daşıyır?

Sonra da buna "dünya praktikası" adı verilir?

Əgər bu həqiqətən "dünya praktikasıdır", onda ictimaiyyətə konkret cavab verin:

Hansı ölkədə, hansı xəstəxanada, hansı istehsalçının məhsuludur? Hansı beynəlxalq standarta uyğundur?
Yoxsa "dünya praktikası" ifadəsi sadəcə cəmiyyəti aldatmaq, bəlkə də lağa qoymaq üçün işlədilmiş növbəti ümumi çıxış yoludur? Gedin özünüzü lağa qoyun, kənardan əməllərinizə baxıb özünüzə nə qədər istəyirsiz gülün...

Videoda görünən konstruksiya tibbi avadanlıq deyil, hansısa santexnikin PVC borularından yığdığı Azərbaycan səhiyyəsi üçün böyük biabırçılıqdır. Əgər bu doğrudan da xəstə daşımaq üçün istifadə edilirsə, onda cavab verin...

Bu xərəki kim hazırlayıb?
Hazırlanmasına hansı qurum icazə verib?
Neçəyə başa gəlib?
Texniki sənədləri haradadır?
Sertifikatı varmı?
Yükdaşıma qabiliyyəti necə yoxlanılıb?
Ən əsası, sabah bu konstruksiya sınsa və xəstə xəsarət alsa, məsuliyyəti kim daşıyacaq?

Təəssüf doğuran digər məqam isə bəzi media orqanlarının bu məsələyə yanaşmasıdır. Jurnalistikanın işi dövlət qurumlarının dediklərini olduğu kimi köçürmək deyil. Əgər TƏBİB-dən, KTM-dən reklam alırsızsa, pul qazanırsızsa, bu o demək deyil ki, onlar insanları açıqlamaları ilə lağa qoyacaq, siz də bunu dərc edəcəksiz... "Dünya praktikasıdır" cümləsini araşdırın, görün onlar sizə gülür, yoxsa yox?

Bu ölkədə xəstəxanalar üçün milyonlarla manatlıq avadanlıq alınır. Belə olan halda, paytaxtın ən böyük tibb müəssisələrindən birində xəstələrin PVC su borularından hazırlanmış xərəkdə daşınması qəbulolunan hal sayıla bilmərmi?

Əgər bu, həqiqətən tibbi standartlara uyğun avadanlıqdırsa, bütün sənədlər ictimaiyyətə açıqlansın. Yox, əgər bu, kustar üsulla hazırlanmış konstruksiyadırsa, onda bunu "dünya praktikası" adı ilə müdafiə etmək yox, buna yol verənlər cavab verməlidir.

Xəstəxana eksperiment meydançası deyil. İnsan həyatı isə "ucuz həll" anlayışı ilə ölçülə bilməz. Dövlət büdcəsindən ayrılan vəsaitin fonunda belə mənzərə təkcə təəccüb deyil, ciddi məsuliyyət və hesabat tələb edən bir məsələdir.

Qeyd edək ki, “Kliniki Tibbi Mərkəz” publik hüquqi şəxsin direktoru Könül Ələkbərovdur.

Bizimesr.com

VİDEO LİNKDƏ: https://www.bizimesr.com/az/post/ktm-bizi-nece-laga-qoydu----milyonlar-ayrilan-sehiyye-ve-pvc-su-borusundan-xerek-22646