Bakının Sabunçu rayonu, Bakıxanov qəsəbəsi, Həsənbəy Ağayev küçəsində yaşıllıqların məhv edilərək ərazidə tikinti işlərinin aparıldığı iddia olunur.

Bizimesr.com bildirir ki, sözügedən ərazidə bir müddətdir tikinti işləri aparılır. Təbii ki, həmişəki kimi, qanunsuz və sənədsiz.

Sakinlərin bildirdiyinə görə, tikintidən əvvəl ərazidə çoxsaylı ağaclar olub. Ağaclar gecə saatlarında və ya gizli şəkildə kəsilərək ərazi hasarlanıb, daha sonra isə tikinti işlərinə başlanılıb.

Ərazi sakinləri hesab edirlər ki, yaşıllıqların məhv edilməsi və tikinti işlərinin aparılması ilə bağlı müvafiq qurumlar tərəfindən araşdırma aparılmalıdır. Onlar məsələ ilə əlaqədar Sabunçu Rayon İcra Hakimiyyətinə müraciət etdiklərini, lakin indiyədək hər hansı rəsmi cavab almadıqlarını bildiriblər: "Adil Vəlyev Sabunçu sakinlərini saya salmır. Nə müraciətləri eşidir, nə də suallara cavab verir. Sadəcə uzun illərdir bu rayonda istədiyini edir".

Məsələni dəqiqləşdirmək məqsədilə redaksiyamız tərəfindən Dövlət Şəhərsalma və Arxitektura Komitəsinə, həmçinin Sabunçu Rayon İcra Hakimiyyətinə rəsmi sorğular ünvanlanıb. Lakin material dərc olunanadək sorğularımıza cavab verilməyib.

Bizimesr.com

VİDEO LİNKDƏ: https://www.bizimesr.com/az/post/adil-veliyev-qanun-qayda-tanimir----agaclari-mehv-edib-tikinti-aparanlara-yasil-isiq---video-22651

Azərbaycan idmançıları döyən bolqar gimnastdan niyə yaxa qurtara bilmir?
Azərbaycan Atletika Federasiyasının prezidenti Cavid Qurbanovun rəhbərliyi ilə qurumun iclası keçirilib və Gənclər və İdman nazirinın sabiq müavini Mariana Vasileva federasiyasının idman işləri üzrə direktoru vəzifəsinə təyin edilib.
Təyinat idman ictimaiyyəti tərəfindən birmənalı qarşılanmayıb. Çünki hələ təyinat ərəfəsində ölkənin idman mətbuatında Mariana Vasiyeva haqqında kəskin yazılar gedib.
Məsələn, futbolinfo.az saytında bir həftə öncə dərc edilən "Ştatdankənar məmur" yazısında deyilir:
"Mariana Vasileva – Azərbaycanın gənclər və idman nazirinin bolqar müavini… Sabiq və bəlkə də hazırkı…
Təyinatı narazılıq doğurdu; işdən çıxarılması biabırçı səbəbdən reallaşdı; hələ də işini davam etdirməsi bir başqa fiaskodur… Postundan azad edilib, amma məmuriyyətinə “ştatdankənar” davam edir. AGİN-in tədbirlərində iştirak edir, nazirliyin idarəetməsində birbaşa rol alır, kimsə onun göstərişlərindən çıxa bilmir.
Vasileva elə nüfuz və hörmət sahibidir ki (!), işdən çıxarılanda nazir Fərid Qayıbov belə buna üzüldüyünü paylaşım edərək göstərmişdi. İstefanın səbəbinə, işdən çıxaranın kimliyinə baxmadan… Deyəsən, küskün nazirin könlünü almaq üçün ona qeyri-rəsmi şəkildə Mariana xanımın işini davam etdirəcəyini dedilər və o, sakitləşdi".
Qeyd edək ki, Mariana Toteva Vasileva Azərbaycan Respublikası Prezidentinin 29 noyabr 2021-ci il tarixli Sərəncamı ilə Azərbaycan Respublikası gənclər və idman nazirinin müavini vəzifəsinə təyin edilmişdi. O, 16 yanvar 2025-ci ildə işdən çıxarıldı.
Onun işdən çıxarılmasının səbəblərinə gəlincə, mətbuatda bu barədə kifayət qədər yazılar dərc olunub. Həmin səbəblərə toxunmazdan öncə qeyd edək ki,1974-cü ildə anadan olan Vasileva gənc yaşlarında vətəni Bolqarıstanda bədii gimnast kimi tanınıb. Bu idman növündə əldə etdiyi uğurlara görə Bolqarıstanda kifayət qədər tanınıb və sevilib. 2007-ci ildə Azərbaycan Gimnastika Federasiyasında məşqçi işləmək təklifi alıb, ailəsi ilə birgə Bakıya köçüb. 2009-cu ildə Azərbaycan yığmasına baş məşqçi təyin edilib.
Futbolinfo.az-ın məlumatına görə, Azərbaycanda yaşayan Vasileva və ailə üzvləri (həyat yoldaşı ilə iki qız övladı) Bolqarıstan vətəndaşlığını qorumaqla, həm də Azərbaycan vətəndaşlığını daşıyır. Baxmayaraq ki, Azərbaycanda ikili vətəndaşlıq qanunla tənzimlənmir!
Bundan başqa, Vasilevanın 1996-ci il doğumlu böyük qızı Siyana gimnastikada ilk addımlarını Bolqarıstanda atsa da, karyerasını 2008-ci ildən Azərbaycanda davam etdirib və 2011-ci ildə milli komandaya dəvət alıb. Sonra hətta baş məşqçi postunu tutub.
Sayt bu məqama toxunaraq yazır: "Bu qədər əzizlənən birinin vəzifədən kənarlaşdırılması qəribə görünə bilər. Amma o qədər ciddi səbəb var idi ki, onu qorumaq mümkün olmadı".
İndisə gələk, həmin ciddi səbəblərə. Məsələ burasındadır ki, 2013-cü ildə Azərbaycanda Əməkdar məşqçi adı alan Vasileva çəki artımına görə atletləri döyüb, onları təhqir edib, özlərini yaxşı hiss etmədikləri halda atletlərin sağlamlığını risk altına qoyaraq onları məşqə məcbur edib. Deyilənlərə görə, həmçinin, nazirlikdə Vasileva ilə digər əməkdaşlar arasında narazılıq yaşanıb. Bundan başqa, Mariana xanım Beynəlxalq Gimnastika Federasiyasının (FIG) himayəsi altında keçirilən hər hansı tədbirdən 8 il müddətinə uzaqlaşdırılıb. Ona ömürlük hər hansı federasiyada baş məşqçi vəzifəsi tutmaq qadağan edilib. Azərbaycan milli komandasının baş məşqçi vəzifəsini icra edən Siyana Vasileva (Mariananın qızı) 18 ay, məşqçi Yevgeniya Vilyayeva isə 12 ay müddətinə uzaqlaşdırılıb.
Mətbuatda yayılan iddialara inansaq, Vasileva atletlərin pul və ya mükafatlarını mənimsəyib, onların ailələri ilə və ya digər şəxsi əlaqələrini məhdudlaşdıraraq mobil telefonlarından istifadə etmələrinə qadağa qoyub. O, həyatının sonuna qədər Beynəlxalq Gimnastika Fonduna bağlı olan hər hansı federasiyanın baş məşqçisi ola bilməyəcək. 2019-cu ildə Beynəlxalq Gimnastika Fondunun Mariana Vasilevaya təqdim etdiyi “Fəxri Məşqçi” diplomu da ondan geri alınıb.
O da iddia olunur ki, bu məsələlər ciddi şəkildə insidentə səbəb olduğu üçün siyasi rəhbərliyin nəzərinə çatdırılıb. Vasilevanın gimnastlara qarşı kobud, qeyri-insani davranışı, özünü müştəbeh aparması haqda məruzə edildikdən sonra onun işdən azad olunması qərarı verilib. Ayrıca Vasilevanın klubların birindən yayılan rəqs görüntüləri də ciddi qalmaqa və müzakirələrə səbəb olmuş və onun vəziəsindən uzaqlaşdırılmasında rol oynamışdı.
Bununla belə, nazirlikdəki vəzifəsindən uzaqlaşdırılmasına rəğmən, Vasilevanın postu hələ də boşdur. Bu səbəbdən onun həmin vəzifəni hələ də qeyri-rəsmi olaraq yerinə yetirdiyinə dair iddialar da var.
Bütün bunlardan sonra, Atletika Federasiyasının prezidenti Cavid Qurbanovun qalmaqallı gimnasta vəzifə verməsi də xeyli suallar doğurur. Çünki bu addımı həm idarəçilik prinsipləri, həm də ictimai rəy baxımından ciddi tənqidlərə dözümsüzdür və həm dövlət maraqları, həm də idman sahəsindəki islahatlarla birbaşa ziddiyyət təşkil edir.
İlk növbədə bu, beynəlxalq rüsvayçılığa və qadağalara məhəl qoymamaqdır. Çünki Mariana Vasileva sıradan bir səbəbdən yox, idmançıları döymək, təhqir etmək və onların sağlamlığını riskə atmaq kimi ağır ittihamlarla vəzifəsindən kənarlaşdırılıb. O zaman görəsən, Beynəlxalq Gimnastika Federasiyasının (FIG) himayəsində olan tədbirlərdən 8 il, istənilən federasiyada baş məşqçilikdən isə ömürlük uzaqlaşdırılan, "Fəxri Məşqçi" diplomu belə geri alınan bir şəxsə Cavid Qurbanovun qucaq açmasının arxasında hansı niyyət və arqumentlər dayanır?
Ən önəmlisi isə, Vasileva özbaşınalığına, idmançılara qarşı qeyri-insani davranışlarına görə məhz ölkə rəhbərliyinin iradəsi ilə işdən qovulub. Cavid Qurbanovun siyasi rəhbərlik tərəfindən idarəçilikdən kənarlaşdırılan, fəaliyyətində ciddi nöqsanlar aşkarlanan birini çox keçmədən Atletika Federasiyasına icraçı direktor təyin etməsi dövlət qərarlarına və siyasi iradəyə qarşı açıq-aşkar hörmətsizlik deyilmi?
Azərbaycanda ikili vətəndaşlığa qanunla yol verilmədiyi halda, həm Bolqarıstan, həm də Azərbaycan vətəndaşlığını daşıyan, üstəlik, ailəvi şəkildə korrupsiyaya və qadağalara bulaşmış bir şəxsə mühüm post etibar etmək Cavid Qurbanovun kadr siyasətinin yarıtmaz olduğunu göstərir. Xüsusilə nəzərə almaq lazımdır ki, ölkədə yüzlərlə gənc, savadlı, idman idarəçiliyini bilən kadr olduğu halda, məhz adı qalmaqallarda hallanan Vasilevaya belə canfəşanlıqla sahib çıxılması heç bir məntiqə sığmır.
Ən nəhayət, yuxarıda qeyd etdiyimiz kimi, Vasilevanın bu təyinata qədər rəsmi vəzifəsi olmadığı halda belə Gənclər və İdman Nazirliyinin idarəçiliyinə müdaxilə etdiyinə dair iddialar var. Cavid Qurbanov ona rəsmi status verməklə bu qanunsuz "kölgə idarəçiliyini" leqallaşdırır və onu məsuliyyətdən qaçıracaq yeni bir sığınacaqla təmin edir. Sabah federasiyada baş verəcək hər hansı bir qanunsuzluğa görə mənəvi və hüquqi məsuliyyət birbaşa Federasiya prezidenti kimi Cavid Qurbanovun üzərinə düşəcək. Hətta ona Vasilyevanı görəvləndirmək tapşırığı nazir Fərid Qayıbovdan gəlsə belə...
Sonda onu da vurğulayaq ki, Cavid Qurbanovun bu addımı Azərbaycan idmanının nüfuzuna vurulan növbəti zərbədir. Müsbət imici olmayan, rəsmi qaydada cəzalandırılmış bir şəxsə vəzifə vermək dövlət və ictimai maraqlardan deyil, yalnız idman sahəsindəki yüksək vəzifəli şəxslərin şəxsi maraq və ambisiyalardan xəbər verir. (Kontekst.az)

Paytaxtın ən böyük dövlət xəstəxanalarından olan Kliniki Tibbi Mərkəzdə xəstələrin daşınması üçün istifadə olunan PVC su borularından hazırlanmış xərəyin videoları yayılıb. Əlbətdə, vəziyyətin özü kifayət qədər biabırçı olduğu halda, onu izah etmək üçün verilən açıqlama daha biabırçı, insanları lağa qoymaqdan başqa bir şey deyil.


Klinik Tibbi Mərkəzin mətbuat katibi Ruzbeh Məmməd bildirib ki, bu, MRT üçün hazırlanıb və "dünya praktikasında istifadə olunan, aşağı büdcəli və səmərəli həllərdən biridir".

Doğrudanmı?

Azərbaycanın səhiyyə sisteminə hər il yüz milyonlarla, hətta milyardlarla manat vəsait ayrılır. Dövlət xəstəxanası beynəlxalq standartlara uyğun sertifikatlı MRT xərəyi ala bilmir, amma xəstəni PVC su borularından yığılmış konstruksiya ilə daşıyır?

Sonra da buna "dünya praktikası" adı verilir?

Əgər bu həqiqətən "dünya praktikasıdır", onda ictimaiyyətə konkret cavab verin:

Hansı ölkədə, hansı xəstəxanada, hansı istehsalçının məhsuludur? Hansı beynəlxalq standarta uyğundur?
Yoxsa "dünya praktikası" ifadəsi sadəcə cəmiyyəti aldatmaq, bəlkə də lağa qoymaq üçün işlədilmiş növbəti ümumi çıxış yoludur? Gedin özünüzü lağa qoyun, kənardan əməllərinizə baxıb özünüzə nə qədər istəyirsiz gülün...

Videoda görünən konstruksiya tibbi avadanlıq deyil, hansısa santexnikin PVC borularından yığdığı Azərbaycan səhiyyəsi üçün böyük biabırçılıqdır. Əgər bu doğrudan da xəstə daşımaq üçün istifadə edilirsə, onda cavab verin...

Bu xərəki kim hazırlayıb?
Hazırlanmasına hansı qurum icazə verib?
Neçəyə başa gəlib?
Texniki sənədləri haradadır?
Sertifikatı varmı?
Yükdaşıma qabiliyyəti necə yoxlanılıb?
Ən əsası, sabah bu konstruksiya sınsa və xəstə xəsarət alsa, məsuliyyəti kim daşıyacaq?

Təəssüf doğuran digər məqam isə bəzi media orqanlarının bu məsələyə yanaşmasıdır. Jurnalistikanın işi dövlət qurumlarının dediklərini olduğu kimi köçürmək deyil. Əgər TƏBİB-dən, KTM-dən reklam alırsızsa, pul qazanırsızsa, bu o demək deyil ki, onlar insanları açıqlamaları ilə lağa qoyacaq, siz də bunu dərc edəcəksiz... "Dünya praktikasıdır" cümləsini araşdırın, görün onlar sizə gülür, yoxsa yox?

Bu ölkədə xəstəxanalar üçün milyonlarla manatlıq avadanlıq alınır. Belə olan halda, paytaxtın ən böyük tibb müəssisələrindən birində xəstələrin PVC su borularından hazırlanmış xərəkdə daşınması qəbulolunan hal sayıla bilmərmi?

Əgər bu, həqiqətən tibbi standartlara uyğun avadanlıqdırsa, bütün sənədlər ictimaiyyətə açıqlansın. Yox, əgər bu, kustar üsulla hazırlanmış konstruksiyadırsa, onda bunu "dünya praktikası" adı ilə müdafiə etmək yox, buna yol verənlər cavab verməlidir.

Xəstəxana eksperiment meydançası deyil. İnsan həyatı isə "ucuz həll" anlayışı ilə ölçülə bilməz. Dövlət büdcəsindən ayrılan vəsaitin fonunda belə mənzərə təkcə təəccüb deyil, ciddi məsuliyyət və hesabat tələb edən bir məsələdir.

Qeyd edək ki, “Kliniki Tibbi Mərkəz” publik hüquqi şəxsin direktoru Könül Ələkbərovdur.

Bizimesr.com

VİDEO LİNKDƏ: https://www.bizimesr.com/az/post/ktm-bizi-nece-laga-qoydu----milyonlar-ayrilan-sehiyye-ve-pvc-su-borusundan-xerek-22646

Hesablama Palatasının sədri Vüqar Gülməmmədovun 2025-ci il üzrə fəaliyyət hesabatı ictimai və ekspert çevrələrində ciddi müzakirələrə səbəb olub.

"Real Azərbaycan" xəbər verir ki, hesabatda ötən il ərzində ümumilikdə 6,7 milyard manat dövlət vəsaitinin auditdən keçirildiyi bildirilir. Sənəddə qeyd olunur ki, aparılan yoxlamalar nəticəsində 584 milyon manat uyğunsuzluq, 626 milyon manat maliyyə təhrifi və 342 milyon manat səmərəsiz xərclər aşkarlanıb.

Bütün bu faktlar dövlət vəsaitlərinin idarə olunmasında planlaşdırma, icra və nəzarət mexanizmlərinin təkmilləşdirilməsinə ehtiyac olduğunu bir daha təsdiqləyir. Hesabatda xüsusilə tikinti sahəsində mövcud problemlərə diqqət çəkilib. Bildirilib ki, görüləcək işlərin dəyərinin hesablanması metodologiyasında boşluqlar qalmaqdadır. Bu isə müqavilə dəyərlərinin düzgün formalaşmamasına gətirib çıxarır.

Həmçinin qeyd olunur ki, layihələrin icrası zamanı işlərin ad və həcmlərində edilən dəyişikliklər ümumi məbləğə təsir göstərir və bu halların artması müşahidə edilir. İstismara hazır olan obyektlərin qəbulunda gecikmələr, eləcə də aktivlərin balans dəyərinin düzgün tanınmaması kimi məqamlar da hesabatda əksini tapıb.

Bu kontekstdə diqqət Qarabağ iqtisadi rayonunda aparılan tikinti-bərpa işlərinə və həmin layihələri icra edən şirkətlərə yönəlir ki, bu işdə Qarabağ İqtisadi Rayonunda Bərpa, Tikinti və İdarəetmə Xidməti publik hüquqi şəxsin icraçı direktoru Leysan Məmmədovun adı xüsusilə qeyd olunmalıdır.

Bu günlərdə mətbuatda Leysan Məmmədovun adı ilə bağlı bəzi iddialar yer aldı. Ümumi dəyəri 25 milyon manatdan çox olan üç böyük dövlət müqaviləsinin “Platin” MMC-yə verilməsi böyük rezonans doğurdu. Rəsmi sənədlərdə şirkətin rəhbəri kimi İsfəndiyar Məmmədov göstərilsə də, iddialara görə real idarəetmənin başqa şəxslərə əlaqələndirildiyi qeyd olunur. Yəni, bu milyonluq layihələrin arxasında duran əsas fiqur qurum rəhbərinin oğlu – Elnur Məmmədov hesab olunur.

Bu isə artıq sadəcə şübhəli tender deyil – açıq şəkildə “ailə podratı” modelinin qurulması deməkdir. Dövlət vəsaitinin eyni çevrədə cəmlənməsi, formal rəhbərlərin arxasında gizlənən real şəxslərin olması isə korrupsiya risklərini daha da artırır.Ortada milyonlarla manatlıq vəsait, eyni adların təkrarlandığı müqavilələr və qapalı şəkildə idarə olunan bir şəbəkə var. Sual isə dəyişmir: bu pullar doğrudanmı dövlət üçün xərclənir, yoxsa müəyyən ailə dairəsinin nəzarətində bölüşdürülür? Bu isə məsələnin təkcə bir müqavilə ilə məhdudlaşmadığını, daha geniş sistemli problemlərin mövcud ola biləcəyini deməyə əsas verir.Əgər dövlət vəsaiti bu cür “seçilmiş” şirkətlər arasında bölüşdürülürsə, bu artıq sadəcə qanun pozuntusu deyil –müvafiq qanunlara meydan oxumaqdır.Aidiyyəti qurumlar susduqca isə suallar daha da artır: bu qərarın arxasında kim dayanır və niyə qanun yalnız kağız üzərində qalır?

Məhz Hesablama Palatasının hesabatı isə bu istiqamətdə mövcud risklərin və boşluqların daha sistemli şəkildə araşdırılmasına ehtiyac olduğunu göstərir. Eyni zamanda Qarabağda həyata keçirilən layihələrə nəzarətin gücləndirilməsi və dövlət vəsaitlərinin istifadəsində şəffaflığın artırılması məsələsi yenidən gündəmə gətirilir.

"Real Azərbaycan"

Naxçıvan Ali Məclisinin keçmiş sədr müavini Anar İbrahimovun bu yaxınlarda etdiyi bir etiraf muxtar respublikadakı idarəetmə rezilliyinin iç üzünü açdı.
Anar İbrahimov bildirir ki, vəzifədə olduğu vaxt Ali Məclisin binasında, ulu öndərin büstü qarşısında yay şortiki və şəp-şəpi ilə gəzən bir nəfəri görüb.
Məsələ burasındadır ki, bu rəzaləti görən Anar müəllim o vaxt da susub, indi də ad çəkməyə qorxur, sadəcə söz xatirinə danışır. İndi sual olunur:
Vaxtında niyə susurdunuz? Xalq arasında yaxşı bir söz var: "Arxadan atılan daş topuğa dəyər". Sözü zamanında, demək və qarşısını almaq lazımdır, iş-işdən keçəndən sonra yox!
Amma rəzalət bununla bitmir. Sakinlərin bildirdiyinə görə, vaxtilə Fuad Nəcəfli və ədliyyənin rəhbər şəxsləri Batabat gölündəki restoranlarda yanlarında bir necə xanımla yeyib-içib, sərxoşluqdan hansı dövlət sənədlərinə qol çəkdiklərini, kimi işə qoyub, kimi qovduqlarını bilməyəcək vəziyyətdə olublar.
Faktiki olaraq, Fuad Nəcəflinin dövründə Naxçıvanı idarə etməli olan şəxslər bir necə xanımın əlində oyuncağa çevriliblər.
Daha da rüsvayçı tərəfi odur ki, Naxçıvan sakinlərinə divan tutan 5 nəfərlik qadın şəbəkəsi olub.
O qadınlardan üçü — Gülxanım Orucova və Tükəzban Quliyeva ve Təhminə Mustafayeva hələ də vəzifədədir!
Sadəcə yerlərini dəyişiblər, necə deyərlər, "keçəl Həsən, ya Həsən keçəl". Gülxanım Orucova Dövlət İmtahan Mərkəzinin (DİM) heç bir müsabiqəsindən keçmədən, Fuad Nəcəfli tərəfindən birbaşa vəzifəyə gətirilib.
Hazırda Gülxanım Orucova icra başçısının müavini kimi fəaliyyət göstərir.Tükəzban Quliyeva isə Naxçıvan Elm və Təhsil nazirliyində sektor müdiridir.
Təhminə Mustafayeva hazırda Naxçıvan şəhər Təhsil şöbəsinin müdiridir.
Təhminə Mustafayeva isə Naxçıvan Şəhər Təhsil Şöbəsinin müdiri vəzifə səlahiyyətlərindən sui istifadə edrək, öz oğlunu Mustafazadə Hüseynağa Zaur oğlunu Naxçıvan Şəhər İdman Məktəbinə müəllim olaraq işə götürüb.
Halbuki, 2024-cü ildə işə götürülərkən Mustafazadə Hüseynağa Zaur oğlu Naxçıvan MR ərazisində olmayıb, sadəcə staj yazılsın deyə anası onun adın yazıb, işə çıxmadığı halda dövlət büdcəsindən maaş alıb.
Sakinlərin bildirdiyinə görə indidə oğlunu başqa işə düzəldib. Eyni zamanda Naxçıvanda məktəb üzü görməyən onlarla şagirdə qanunsuz attestat paylanılıb.
Bu attestatların və saxta təyinatların hansı rüşvətin, hansı xidmətin qarşılığında edildiyi təcili araşdırılmalıdır.
Bu azmış kimi, səhiyyəni tamamilə məhv edən, külli miqdarda dövlət vəsaitini mənimsəyən keçmiş səhiyyə naziri Samiq Sadıxov da heç bir cəza almadan, əlini-qolunu sallayaraq ortalıqda gəzir.
Buradan Səlahiyyətli nümayəndə Ceyhun müəllimə və Naxçıvanın Daxili İşlər Naziri Süleyman müəllimə açıq çağırış edirik:
Apardığınız islahatları alqışlayırıq, amma bu islahat xalqı qane etmir! Özünü Naxçıvanın ağası hesab edən, saxtakarlıqla vəzifə tutan bu xanımlar və onların himayədarları barəsində nə vaxt kəskin tədbir görüləcək?
Bu çirkin əməllər dərindən araşdırılıb qanun qarşısında cavab verilməyənə qədər, Naxçıvan sakinlərinin dövlətə olan sarsılmış inamı heç vaxt bərpa olunmayacaq!
Sima Babayeva
TEREF

Vətəndaş Amil Zeynalov Anarxeber.info.az-a müraciət edərək, uzun illərdir mülkiyyət hüququnun pozulduğunu və bununla bağlı aidiyyəti qurumlardan kömək gözlədiyini bildirib.

Şikayətçinin sözlərinə görə, 1992-ci ildən Ağdərə rayonunun Sırxavənd kənd sakini Əliyev Saleh Vəli oğlu və ailə üzvləri onun Bərdə şəhəri, Bakı küçəsi 52 ünvanında yerləşən dördotaqlı yaşayış evində qanunsuz məskunlaşıblar.
Amil Zeynalov bildirir ki, 1996-cı ildə Bərdə Rayon Məhkəməsinə müraciət edib və məhkəmə həmin şəxslərin evdən çıxarılması barədə qətnamə qəbul edib.

Onun sözlərinə görə, illərlə məhkəmə qərarının icrası istiqamətində cəhdlər göstərilsə də, nəticə əldə olunmayıb.

Şikayətçi iddia edir ki, hətta Saleh Əliyev və bacısı icra məmurlarına göstərdikləri təzyiqlərə görə 5 il müddətinə azadlıqdan məhrum ediliblər. Buna baxmayaraq, evin boşaldılması təmin olunmayıb.

Onun sözlərinə görə, bu illər ərzində Prezidentə, Ədliyyə Nazirliyinə və Məhkəmə Qərarlarının İcrası Baş İdarəsinə yüzlərlə ərizə və teleqram göndərsə də, hər dəfə ona məcburi köçkünlərin öz yurdlarına qayıtmayana qədər çıxarıla bilməyəcəyi bildirilib.

Amil Zeynalov qeyd edir ki, 2025-ci ilin sonlarında yenidən Bərdə Rayon İcra şöbəsinə müraciət edib və məcburi köçkünlərin artıq doğma yurdlarına qayıtmağa başladığını əsas gətirərək məhkəmə qərarının icrasını tələb edib. Onun sözlərinə görə, icra şöbəsinin rəisi Rusif müəllim ona icra sənədinin tapılmadığını deyib.

Şikagətçi nundan sonra yenidən məhkəməyə müraciət edib və qətnamənin icraya yönəldilməsi barədə qərardad alıb.

Saytımıza müraciət edən şikayətçinin sözlərinə görə, bir ay sonra icra şöbəsində ona 2013-cü ilə aid başqa bir məhkəmə qərarı təqdim olunub.

Amil Zeynalovun sözlərinə görə, həmin qərarda göstərilib ki, guya onun "Azəriqazbank" ASC qarşısında 2007-ci ildən qalan 17 min 500 ABŞ dolları məbləğində borcunu Saleh Əliyev onunla şifahi razılıq əsasında ödəyib və buna görə də ev Saleh Əliyevin adına rəsmiləşdirilməlidir.

Şikayətçi isə bunun tamamilə saxta olduğunu iddia edir:

"Mən o bankdan heç vaxt kredit götürməmişəm. Evimi də girov qoymamışam. Evin bütün sənədləri bu gün də özümdədir. Mən 2013-cü ildə həbsdə olmuşam. Amma məhkəmə qərarında yazılıb ki, guya mən Salehlə çayxanada oturub şifahi razılaşmışam.

Biz heç vaxt belə söhbət etməmişik. Mənim 80 min manatlıq evimi hansı məntiqlə 17 min 500 dollarlıq guya banka olan borca görə başqa adamın adına keçirirlər? Əgər belə bir satış olsaydı, heç olmasa etibarnamə olardı. Bunların hamısı saxta sənədlər əsasında edilib".


Amil Zeynalov bildirir ki, bu hadisədən yalnız 2025-ci ilin sonlarında xəbər tutub. Bundan sonra Bərdə Rayon Məhkəməsinə, Bərdə Rayon Prokurorluğuna müraciət edib, həmçinin Baş prokuror Kamran Əliyevin qəbulunda olduğunu və məsələ ilə bağlı cinayət işinin obyektiv araşdırılmasını xahiş etdiyini deyir.

Sonda şikayətçi ölkə başçısına və hüquq-mühafizə orqanlarının rəhbərlərinə müraciət edərək yazır:

"Cənab Prezident, Sizdən və bütün hüquq-mühafizə orqanlarının rəhbərlərindən xahiş edirəm ki, bu cinayət işinin şəffaf araşdırılmasına, cinayəti törətmiş şəxslərin ciddi cəzalandırılmasına və mənim pozulmuş hüquqlarımın bərpasına köməklik göstərəsiniz".

Anarxeber.info.az

Məşhur rejissor Kristofer Nolanın “Odissey” filmi dünya prokatının ilk həftəsonunda 264,1 milyon dollar (təxminən 449 milyon AZN) toplayıb.

Bu barədə “Variety” nəşri məlumat yayıb.

Bildirilib ki, “Universal” kinostudiyasının istehsalı olan bu film K.Nolanın filmləri arasında debütdə ən çox qazanc əldə edən film olub. Bununla o, ilk həftəsonunda 249 milyon dollar (təxminən 423 milyon AZN) toplayan “Qara Cəngavər: Əfsanənin dirçəlişi” (2012) filminin nəticəsini üstələyib.

“Odissey” həmçinin ilin ən böyük kino debütləri arasında üçüncü yeri tutub. Bu göstəricidə o, yalnız “Super Mario Galaxy filmi” (372,5 milyon dollar) və “Oyuncaq hekayəsi 5”dən (312 milyon dollar) geri qalıb.

Artıq 73 ölkədə nümayiş olunan film ABŞ və Kanadada 124,5 milyon dollar, beynəlxalq bazarlarda isə 139,6 milyon dollar qazanıb.

Premyerası iyulun 17-də baş tutan “Odissey”in IMDb balı 8,4/10 bal təşkil edir. Bu bal 121 min qiymətləndirmə əsasında formalaşıb.

Qeyd edək ki, Homerin eyniadlı poeması əsasında ekranlaşdırılmış “Odissey” filmi Troya müharibəsinin başa çatmasından sonra həyat yoldaşı Penelopa və oğlu Telemaxın yanına evə qayıtmağa çalışan İtaka çarı Odisseyin macəralarından bəhs edir. Filmdə baş rolu Mett Deymon ifa edib. Ekran əsərində həmçinin Tom Holland, Enn Hetuey, Robert Pattinson, Zendeya, Şarliz Teron kimi Hollivud ulduzları yer alıb.

Novxanıda yerləşən "AF Hotel-Aquaprk" kompleksi ətrafında baş verən son hadisələr ölkədə qanunun aliliyinə və vətəndaş təhlükəsizliyinə açıq-aşkar meydan oxunduğunu bir daha sübut edir.
Bir müddət öncə oteldə baş vermiş yanğın hadisəsindən sonra Fövqəladə Hallar Nazirliyi (FHN) tərəfindən obyektin otel hissəsinin fəaliyyətinə rəsmi qadağa qoyulub. Qərara əsasən, yalnız akvapark hissəsinin fəaliyyətinə icazə verilir.
Lakin reallıq nədən ibarətdir? "AF Hotel" rəhbərliyi nə dövlət qurumunun rəsmi qərarını sayır, nə də bura pənah gətirən vətəndaşların can təhlükəsizliyini!
Dövlətin qanunlarını bu dərəcədə heçə saymaq, rəsmi qadağalara tüpürmək cürəti haradan qaynaqlanır?
Bu rəhbərlik kimə arxalanır ki, insan həyatını hər an alova bürünə biləcək bir məkanda riskə atmaqdan çəkinmir?
"Bura Bilirsiniz Kimindir?!"
Məsələni yerində araşdırmaq və ictimaiyyətin səsini çatdırmaq üçün media mənsubu olaraq "AF Hotel"ə yaxınlaşdıq. Bizi qarşılayan Afaq adlı xanımın rəftarı və leksikonu əslində oteldə hökm sürən özbaşınalığın vizual göstəricisidir.
Afaq xanım jurnalistləri qanun və etika çərçivəsində deyil, hansısa feodal təfəkkürünə xas təkəbbürlə qarşıladı. Söhbətə hədələyici və özündənrazı bir tonda, "Bura bilirsiniz kimindir?!"
ifadəsi ilə başlayan bu xanım, görünür, təmsil etdiyi rəhbərliyin kölgəsində qanunların cırılıb kənara atıla biləcəyini düşünür. Lakin Afaq xanım və onun arxasında dayanan "görünməz güclər" fundamental bir həqiqəti unudurlar:
Bu ölkədə qanun istənilən rəhbərdən, səhmdardan və himayədardan qat-qat üstündür! Heç bir vəzifə və ya kapital heç kimə qanundan üstün imtiyaz qazandıra bilməz.
Ramiz Mehdiyev Kölgəsi və "5-ci Kalon" Xülyaları
Afaq xanımın bu qudurğan və jurnalistə yuxarıdan aşağı baxan yanaşmasının pərdəarxası çox tezliklə bəlli oldu.
Məlumdur ki, "AF Hotel"in şəriklərindən biri, adı dövlətə qarşı müxtəlif iddialarda, xəyanət ssenarilərində hallanan və ölkədə "5-ci kalon" adlandırılan qruplaşmanın ən öncül siması hesab olunan Ramiz Mehdiyevdir.
Görünür, otel rəhbərliyinin və onların nümayəndələrinin ağlı hələ də Ramiz Mehdiyevin dövlət idarəçiliyində "at oynatdığı", borusunun ötdüyü köhnə dövrlərdə qalıb.
Buradan sual edirik:
Belə çıxır ki, "5-ci kalon"un qalıqları hələ də dövlət qurumlarının qərarlarına qarşı çıxmaq, qanunları tapdalamaq gücündə olduqlarını düşünürlər?
Onlar hələ də bu tipli dövlətçiliyə zidd, özbaşına əməllərindən əl çəkməyiblər?
Əgər belədirsə, bu xülyadan tez oyansalar yaxşıdır. Çünki Azərbaycan dövləti heç bir antimilli qruplaşmanın qanunlardan üstün olmasına icazə verməyəcək qədər güclü və qətiyyətlidir!
Sakinlər Evinə Vertolyotla Getməlidir?
"AF Hotel" rəhbərliyinin özbaşınalığı təkcə otelin daxili təhlükəsizlik qaydalarını pozmaqla bitmir. Onlar Novxanı sakinlərinin də həyatını cəhənnəmə çevirməkdə davam edirlər.
Özlərinə məxsus parkinq sahəsi yaradaraq kənd sakinlərinə gedən gediş-gəliş yolunu demək olar ki, tamamilə zəbt ediblər. Bu addımla sakinlər faktiki olaraq blokadaya alınıb. "
AF Hotel"in rəhbərliyi yəqin elə hesab edir ki, bu kənddə yaşayan insanların fərdi vertolyotu var və onlar evlərinə hava yolu ilə gedib-gəlməlidirlər! Vətəndaşın elementar hərəkət hüququnu əlindən alan, yolları qanunsuz şəkildə bağlayan bu harınlıq hansı haqla və hansı məntiqlə törədilir?
FHN rəsmi olaraq yalnız aquapark hissəsinin işləyə biləcəyini, hotel hissəsinin isə qapadıldığını elan etdiyi halda, qapıdan müştəri qəbul etmək sadəcə qayda pozuntusu deyil, dövlətə qarşı birbaşa sabotajdır. Sabah orada baş verə biləcək hər hansı ikinci bir bədbəxt hadisənin, insan tələfatının məsuliyyətini kim daşıyacaq? Köhnə status-kvonun kölgəsinə sığınan Ramiz Mehdiyev şəbəkəsimi?
Aidiyyəti dövlət qurumlarını, Baş Prokurorluğu və Fövqəladə Hallar Nazirliyini bu qanunsuzluğa təcili şəkildə müdaxilə etməyə çağırırıq. Heç kim qanundan üstün deyil və "AF Hotel"dəki bu dövlətə saymazlıq ən sərt şəkildə cəzalandırılmalıdır! Məsələ redaksiyamızın tam nəzarətindədir və araşdırmalarımız davam edəcək.
Sima Babayeva

VİDEO LİNKƏ: https://teref.net/manset/418991-dovlete-meydan-oxuyan-af-hotel-aquaprk-ve-onun-arxasindaki-kolge-ramiz-mehdiyev-sebekesi-hele-de-is-basindadir-video.html