Ötən gün Prezident İlham Əliyevin sərəncamı ilə Azərbaycan Avtomobil Yolları Dövlət Agentliyinin (AAYDA) sədr müavinləri Əvəz İlyas oğlu Qocayev və Hüsnü Ələkbər oğlu Quliyev vəzifələrindən azad edildilər.

Hər iki şəxs bu vəzifəyə 2017-ci ildə təyin olunmuşdu.

Əvəz Qocayevin vəzifədən uzaqlaşdırılması fonunda onun adı ilə bağlı illərdir müxtəlif media orqanlarında dərc olunan məlumatlar yenidən müzakirə mövzusuna çevrilib. Mətbuatda yayılan iddialarda bildirilir ki, uzun illər dövlət qurumlarında çalışan məmurun ölkə daxilində və xaricdə geniş biznes və əmlak şəbəkəsinə malik olduğu qeyd olunur.

Yayılan məlumatlara əsasən, Əvəz Qocayevə və ailə üzvlərinə aid olduğu iddia edilən əmlak və biznes obyektləri sırasında aşağıdakılar göstərilir:

Binəqədi rayonu, Digah yol kəsişməsində yerləşən “Ocaq” ailəvi restoranı;
Yasamal, Xətai və Səbail rayonlarında fəaliyyət göstərən “Ocaq” restoran, kafe və digər iaşə obyektləri şəbəkəsi;
Tovuz rayonunun Əyyublu kəndində iri ferma təsərrüfatı və artezian quyuları;
Port Baku yaşayış kompleksində 130 kvadratmetr sahəsi olan 3 otaqlı mənzil;
Şəhərin müxtəlif ərazilərində fəaliyyət göstərdiyi bildirilən “NN” gözəllik salonları şəbəkəsi;
Həsən Əliyev küçəsində yerləşən “Real” MTK-da 380 kvadratmetrlik ofis sahəsi;
Binəqədi rayonu, Cəfər Xəndan küçəsində yerləşən 155 kvadratmetrlik mənzil;
Müxtəlif banklarda ailə üzvlərinin adına rəsmiləşdirildiyi iddia olunan milyonlarla manatlıq depozitlər;
Köhnə “Varovski” adlanan ərazidə üçmərtəbəli villa;
Novxanıda üç ayrı villa;
“Star-M” MTK-da ümumi sahəsi 320 kvadratmetr olan iki mənzil;
“Real” MTK-da daha bir mənzil;
Port Baku-da əlavə mənzil;
Binəqədi rayonu ərazisində torpaq sahələri;
Moskva və İstanbulun Levent səmtində mənzillər;
Şüvəlanda villa;
Müxtəlif markalı bahalı avtomobillər;
Tovuz rayonu və Dərnəgül ərazisində tikinti materialları mağazaları;
Müxtəlif şirkətlərdə və tikinti sektorunda tərəfdaşlıqlar.

Bundan əlavə, bəzi materiallarında onun Türkiyə, Sloveniya və Çexiyada şirkətlərinin, eləcə də Çexiyanın Karlovı-Varı şəhərində əmlaklarının olduğu da iddia edilir.

Qeyd edilməlidir ki, sadalanan məlumatlar müxtəlif dövrlərdə mətbuatda yayılan iddialara əsaslanır və onların rəsmi qurumlar tərəfindən təsdiqlənməsi barədə açıq məlumat mövcud deyil. Əvəz Qocayev tərəfindən də bu iddialarla bağlı ictimaiyyətə geniş açıqlama verilməyib.

Bununla belə, uzun illər dövlət qulluğunda çalışmış bir şəxsin adı ətrafında bu qədər geniş əmlak və biznes şəbəkəsinin hallandırılması cəmiyyətdə müxtəlif suallar doğurur. Xüsusilə də dövlət vəsaitlərinin idarə olunması ilə bağlı mühüm vəzifələrdə çalışan şəxslərin gəlir mənbələri, əmlak vəziyyəti və biznes fəaliyyəti məsələləri ictimai maraq doğuran mövzulardan biri hesab olunur.

Xatırladaq ki, bundan əvvəl də AAYDA-nın sabiq sədri, adı müxtəlif biznes strukturları ilə əlaqələndirilən Saleh Məmmədov vəzifəsindən alınmışdı. İndi isə onun uzun illər birlikdə çalışdığı müavinlərdən biri olan Əvəz Qocayevin də vəzifədən uzaqlaşdırılması diqqət çəkən hadisə kimi qiymətləndirilir.

Əvəz Qocayevin adı ətrafında səslənən iddiaların hüquqi və maliyyə baxımından araşdırılıb-araşdırılmayacağı isə hələlik məlum deyil. Bu məsələyə rəsmi qurumların münasibəti maraqla gözlənilir.

Bizimesr.com

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyində (ASAN Xidmət) uzun müddətdir ki, maliyyə problemləri yaranıb. 

Bildirir ki, bəlli olub ki, ASAN Xidmət mərkəzlərində çalışan digər dövlət qurumlarının əməkdaşlarına verilən əlavə ödənişlərin – “rüsum pulu”nun verilməsi prosesi dayandırılıb.

Buna səbəb kimi isə Maliyyə Nazirliyinin nəzərdə tutulan həmin vəsaitləri bloklaması olub.

Əldə etdiyimiz məlumata görə, yaranmış vəziyyətlə bağlı ASAN Xidmət rəhbərliyi ilə Maliyyə Nazirliyi arasında müzakirələr getsə də, ortada real nəticə yoxdur.
ASAN Xidmət rəhbərliyi hesab edir ki, bu vəsait qurumda çalışanlara ödənilməlidir.

Çünki ölkə prezidentinin fərmanına əsasən, 2026-cı ilin mart ayında qəbul olunmuş qərarlarla ASAN mərkəzlərində fəaliyyət göstərən həm ASAN əməkdaşlarının, həm də digər dövlət orqanlarının nümayəndələrinin mükafatlandırılması üçün dövlət büdcəsindən illik 26,6 milyon manat vəsait ayrılıb.

Ancaq Maliyyə Nazirliyi buna maneçilik törədir.

Məsələ ilə bağlı hər iki qurumun mövqeyini işıqlandırmağa hazırıq.

Gununsesi.info

Bir müddət əvvəl İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsi “Caspian İnternational Hospital”a qarşı maliyyə sanksiyası tətbiq edib.

Şirkət vergi, icbari tibbi sığorta və sosial sığorta qanunvericiliyinin pozulmasına görə məsuliyyətə cəlb olunub.

Buna görə də vergi orqanı tərəfindən “Caspian İnternational Hospital”a 22.448.745,97 manat əlavə vergi hesablanıb və 11.289.514,93 manat maliyyə sanksiyasının tətbiq edilib.

Bundan sonra şirkət vergi orqanına qarşı müvəqqəti xarakterli müdafiə tədbiri barədə ərizə ilə məhkəməyə müraciət edib və iş üzrə yekun məhkəmə aktı qüvvəyə minənədək qəbul edilən qərarın icrasının dayandırılması üçün qərardad qəbul edilməsini xahiş edib.

Vergi orqanı isə iddia ərizəsinə etiraz edərək, “Caspian İnternational Hospital”ın mübahisələndirilən qərarın icrasını dayandırmağa nail olmaqla vergi qanunvericiliyi ilə müəyyən edilmiş öhdəliyinin icrasından yayınmaqda ittiham edib.

Ali Məhkəməyə qədər uzanan prosesdə “Caspitan İnternational Hospital” tərəfindən bildirilib ki, mübahisələndirilən qərarın icrası olaraq şirkətin bank hesablarını dondurmaqla bağlı sərəncam qoyulub. Bu səbəbdən məkanın kommunal xidmətlərə olan ödənişlərini rəsmi şəkildə həyata keçirmək mümkün olmur və həmin xidmətlərin verilməsi dayandırılır.

Maraq üçün onu da bildirək ki, birinci instansiya məhkəməsi zamanı təqdim olunan məlumata əsasən xəstəxananın balansında xeyli əmlakın olduğu üzə çıxıb. Bu isə borcun ödənilmədiyi təqdirdə həmin əmlakların gələcəkdə hərrac qaydasında satılması üçün nəzərdə tutulub.

Birinci intansiya və Apellyasiya Məhkəməsi “Caspian İnternational Hospital”ın iddasını təmin etməsə də, şirkət istəyinə Ali Məhkəmədə çatıb.

Məhkəmə kollegiyası iş materiallarını və kassasiya şikayətinin dəlillərini araşdıraraq hesab edib ki, apellyasiya instansiyası məhkəməsi tərəfindən işin hallarının yekun qərar qəbul etməyə imkan verən həcmdə müəyyən edilməsinə baxmayaraq, işə baxılan zaman prosessual hüquq normalarının tələblərinə əməl olunmayıb, mübahisəli hüquq münasibətini tənzimləyən maddi hüquq normalarının tətbiqində səhvə yol verilib. Buna görə də, şikayət təmin olunmalıdır.

Ali Məhkəmə qərarını belə əsaslandırıb ki, təcililik şərti ödənilmirsə, müvəqqəti xarakterli müdafiə tədbirinin tətbiq edilməsinə olan ehtiyac aradan qalxır.

Məhkəmə kollegiyası qeyd edib ki, iddiaçı 400 nəfərdən artıq işçi qüvvəsinə malik tibb müəssisəsi olduğundan hazırkı vəziyyətdə yuxarıda qeyd olunan qərar icra olunacağı təqdirdə bu hal vergi ödəyicisinin sahibkarlıq fəaliyyətinin normal düzəninin pozulmasına, tibbi ləvazimatın alınmasında çətinliklər törədəcəyinə, əmək haqqı və digər məcburi ödənişlərin dayandırılması ilə nəticələnəcəyinə, eləcə də digər şəxslər qarşısında götürdüyü öhdəlikləri yerinə yetirə bilməyəcəyi halda ona maddi ziyan dəyəcəyinə səbəb olacaq.

Qeyd edək ki, rəsmi məlumata görə, hazırda “Caspian İnternational Hospital”ın 29 154 912.6 AZN vergi borcu var.

Şirkətin qanuni təmsilçisi Cəbrayıl Abbasov qeyd olunsa da, səhiyyə müəssisəsinin real sahibinin Şamo Fərzəlibəyov olduğuna dair məlumatlar yayılıb.

Məlumata görə, o, əvvəllər səhiyyə nazirinin müavini olmuş Elsəvər Ağayevin qudasıdır. Şamo Fərzəlibəyov eyni zamanda, “Badam Medical Center” və “Arash Medical Company” tibb şirkətinin rəhbəri olaraq da göstərilir. /Xitab24.az/

Ağdam rayon Quzanlı qəsəbəsinin Heydər Əliyev prospektində yolların əsaslı təmiri üçün tender elan olunub.


"Real Azərbaycan" bildirir ki, tender Ağdam rayon İcra Hakimiyyəti tərəfindən açıqlanıb. Müsabiqənin dəyəri 298 min manatdır.


Qeyd edək ki, Ağdamın icra başçısı Vaqif Həsənovdur. Tenderdə hansı şirkətin qalib gəldiyi hələlik məlum deyil.
Ağdam rayon İcra Hakimiyyəti 2025-ci ilin 9 ayında isə 15 satınalma müqaviləsi imzalayıb.
Qaynarinfo xəbər verir ki, bu müqavilələrin altısı açıq tender, yeddisi kotirovka sorğusu, ikisi isə bir mənbə metodu üzrə bağlanıb.
İcra hakimiyyətinin açıq tender metodu ilə keçirdiyi müsabiqələrin satınalma predmetləri aşağıdakılardır:


* Ağdam rayon ərazisində abadlaşdırma;
* Quzanlı qəsəbəsində daş evlər adlanan ərazidə fərdi yaşayış evlərinin əsaslı təmiri;
* Quzanlı qəsəbəsi ərazisində qeyri-yaşayış binasının əsaslı təmiri;
* Quzanlı qəsəbəsi ərazisində qeyri-yaşayış binasının əsaslı təmiri;
* Quzanlı qəsəbəsi H. Əliyev prospektində yolun əsaslı təmiri;
* Ağdam rayon ərazisində yolların əsaslı təmiri.
*
Göründüyü kimi, ötən il də eyni prospektin yollarının təmiri üçün
Ağdam İH tender keçirib.
Bu satınalma müsabiqələrində “Dream Construction” MMC, “FEB-222 TİXS” MMC və “MR Development” MMC seçilib. Beləliklə, Ağdam Rayon İcra Hakimiyyəti 6 satınalma müsabiqəsi üzrə “Dream Construction” MMC ilə 3, “FEB-222 TİXS” MMC ilə 1, “MR Development” MMC ilə isə 2 müqavilə bağlayıb. Satınalma müqavilələrinin ümumi maliyyə dəyəri 1 384 530,99 manat təşkil edir.


"Real Azərbaycan"

Bakı şəhəri Suraxanı rayonu ərazisində fəaliyyət göstərən 265 nömrəli körpələr evi–uşaq bağçası ilə bağlı redaksiyamıza daxil olan müraciətlərdə bir sıra ciddi iddialar səsləndirilib.

Valideynlərin bildirdiyinə görə, dövlət büdcəsi hesabına maliyyələşən məktəbəqədər təhsil müəssisəsində uzun müddətdir ki, müxtəlif adlar altında valideynlərdən pul yığılır. İddialara əsasən, bağçada təhsil alan hər uşaq üçün aylıq 25 manat məbləğində vəsait tələb olunur.
Müraciət edən valideynlərdən biri bildirir ki, ailəsinin maddi imkanı bu ödənişləri vaxtında etməyə imkan verməsə də, buna görə narazılıqla qarşılaşır:
"Deyirlər ki, pulu ayın əvvəlində verməlisən. Yoldaşım maaşı ayın sonunda alır. İmkanımız olmur. Amma buna görə həm uşağa, həm də valideynə qarşı münasibət dəyişir", – deyə valideyn iddia edir.
Valideynlərin hesablamalarına görə, bağçada təxminən 100-ə yaxın uşaq təhsil alır. Hər uşaqdan 25 manat toplandığı təqdirdə aylıq yığılan vəsaitin 2 min manatdan çox olduğu bildirilir.
Müraciətdə daha bir diqqətçəkən məqam isə bağça müdiri Rəvanə Abdullayevanın ad günü münasibətilə valideynlərdən əlavə pul yığılması ilə bağlıdır.
Redaksiyamıza təqdim olunan yazışmalarda valideynlərdən biri digərinə:
"Sizdə də qrupda müdirin ad gününə pul yığırlar?"
deyə sual verir.
Qarşı tərəf isə:
"Bizim qrupda yığılır",
cavabını verir.
Yazışmanın davamında pul yığımının valideyn komitəsi tərəfindən təşkil edildiyi və hər valideyndən 10 manat toplandığı qeyd olunur.
Valideynlər bildirirlər ki, dövlət bağçasında bu cür yığımların aparılması qanunvericiliyin tələblərinə və dövlət təhsil müəssisələrinin fəaliyyət prinsiplərinə uyğun görünmür.
Bununla yanaşı, müraciətdə uşaqlara təqdim olunan qidaların keyfiyyəti ilə bağlı da narazılıqlar yer alıb. İddialara görə, dövlət tərəfindən ayrılan vəsaitlərə baxmayaraq, uşaqlara verilən yeməklər minimum səviyyədədir və valideynlər bunun səbəbinin araşdırılmasını tələb edirlər.
Müraciətdə qeyd olunan digər məsələ isə 3 yaşlı uşaqların qruplardan çıxarılması ilə bağlıdır. Valideynlər bildirirlər ki, onlara qruplarda yer məhdudiyyəti olduğu bildirilsə də, bu qərarın hansı normativ sənədə əsaslandığı barədə izahat verilmir.
Qeyd edək ki, məqalədə yer alan bütün məlumatlar valideynlərin redaksiyamıza təqdim etdiyi iddia və müraciətlərə əsaslanır. Təqdim olunan yazışmalar həmin iddiaların sübutu kimi redaksiyaya göndərilib.
Bakunews.az olaraq səsləndirilən iddialarla bağlı 265 nömrəli körpələr evi–uşaq bağçasının müdiri Rəvanə Abdullayevanın, eləcə də Məktəbəqədər və Ümumi Təhsil üzrə Dövlət Agentliyinin mövqeyini dərc etməyə hazır olduğumuzu bildiririk. Aidiyyəti qurumların açıqlaması daxil olduğu təqdirdə materialda dərc ediləcək.(BnTv.az)

Azərbaycanın Birinci vitse-prezidenti Mehriban Əliyeva Avropa çempionu olan minifutbol üzrə Azərbaycan millisini təbrik edib.

Bununla bağlı birinci xanımın sosial şəbəkə hesablarında paylaşım edilib.

"Avropa çempionatının qalibi olan Azərbaycan minifutbol yığmasını təbrik edir, milli yığmamızın bütün üzvlərinə möhkəm cansağlığı, güc, enerji və yeni-yeni qələbələr və nailiyyətlər arzulayıram!", - paylaşımda qeyd olunub.

Bakıda yaşadıqları mənzillərdən çıxarılmaları barədə qərar verilən üç ailə son ümid yeri kimi Ali Məhkəməyə müraciət edib.

“Qafqazinfo”nun əldə etdiyi məlumata görə, Bakı Apellyasiya Məhkəməsinin keçmiş milli təhlükəsizlik naziri Eldar Mahmudovun oğlu Anar Mahmudovun iddiası əsasında çıxardığı qərardan artıq kassasiya şikayəti verilib.

Yeddi ildir həmin mübahisəli mənzillərdə yaşayan hazırki sahiblər-Şövkət Əliyeva, Vüqar Mirqasımov və Mətanət Dadaşzadə şikayətlərində yazırlar ki, evlərini qanuni əsaslarla əldə ediblər, bunu təsdiq edən alqı-satqı sənədləri mövcuddur və daşınmaz əmlak üzərində mülkiyyət hüquqları dövlət qeydiyyatına alınıb.

Ailələr hesab edir ki, hakim Məmməd Məmmədovun sədrlik etdiyi Fuad Talşinsiki və Günel Abbasovadan ibarət hakim kollegiyasının son məhkəmə qərarı həm iş üzrə mövcud sübutlarla, həm də əvvəlki məhkəmə aktları ilə ziddiyyət təşkil edir. Onların sözlərinə görə, illərlə yaşadıqları və bütün sənədləri qaydasında olan mənzillərlə bağlı belə qərarın verilməsi onlar üçün gözlənilməz olub.

“Yatsaq, yuxumuza da girməzdi ki, nə vaxtsa bu vəziyyətlə qarşılaşarıq. Yeddi ildir yaşadığımız evdir. İndi Anar Mahmudov çıxıb deyir ki, bu ev mənimdir. Belə şey olar? Axı son qərardan əvvəlki məhkəmələr də bizim xeyrimizə olub. Biz həmin mənzilləri dövlət qurumu Asan Xidmətdə rəsmiləşdirmişik. Bu necə ola bilər… Başqa maraqlı məqam da odur ki, iddiaçı Anar Mahudov uzun illərdir ölkədə deyil. Hətta onun hansısa cinayət əməlinə görə axtarışda olduğu barədə bizdə məlumat var. Özü ölkədə deyil, amma bizi minbir əziyyətlə aldığımız evdən çıxartdırır. Yaxşı, evlər əlimizdən alındı, onda biz neyləyəcəyik? Azyaşlı uşaqlarla çöldə qalacağıq. Amma yenə də ümidimizi itirmirik. Ali Məhkəmənin ədalətinə inanırıq.

Kassasiya şikayətində diqqət çəkilən məqamlardan biri də qarşı tərəfin təqdim etdiyi sənədlərlə bağlıdır. Məsələn, Anar Mahmudovun istinad etdiyi müqavilələrdə mənzillərin hansı məbləğə alındığı barədə heç bir maliyyə arayışı yoxdur. Amma bizdə hamısı var. Bu vəziyyət də sözügedən əmlakın əldə edilməsinə dair ciddi suallar yaradır. Ən ağlabatan variant da Mahmudovların həmin dövrdə əllərində olan şəraitdən istifadə etməklə mənzilləri əvəzsiz qaydada almalarıdır”, - sakinlər deyir.

Sakinlərin diqqət çəkdiyi daha bir mühüm məqam var. Onların sözlərinə görə, iddia olunan mənzillərin parametrləri ilə bağlı əvvəllər aparılmış araşdırmalar və ekspert rəyləri həmin yaşayış binasında tələb olunan ölçülərdə mənzilin mövcud olmadığını üzə çıxarıb. O cümlədən, Fövqəladə Hallar Nazirliyinin (FHN) rəyində də Mahmudovun istədiyi 453 kvadratmetrlik sahənin həmin binada mövcud olmadığı bildirilib. Bu səbəbdən onlar son qərarın qəbuluna kənar təsirlərin olmasından şübhə edirlər.

Hazırda azyaşlı uşaqların da olduğu üç ailə onların gələcək həyatlarına birbaşa təsir edəcək Ali Məhkəmənin qərarını gözləyir. Sakinlərin yüksək instansiyadan əsas istəklərindən biri isə işə açıq məhkəmə iclasında baxılması, hakimlərin tərəfləri üzbəüz dinlənilməsidir.

Qeyd edək ki, söhbət gedən mənzillər sakinlər tərəfindən 2021-ci ildə “Dolçasaray” şirkətindən alınıb. Mənzillər təmirsiz vəziyyətdə əldə olunub, sonradan şəxsi vəsait hesabına yaşayış üçün yararlı hala gətirilib. Hazırda alqı-satqı sənədləri və mülkiyyət hüququnu təsdiqləyən çıxarışları da var. Hətta mənzilləri satan “Dolçasaray” şirkəti də uzun illərdir Anar Mahmudovun tələbini əsassız sayır. Şirkətin mövqeyinə görə, Mahmudov tərəfinin istinad etdiyi müqavilələr üzrə heç vaxt ödəniş həyata keçirilməyib, buna görə də həmin müqavilələr sonradan ləğv olunub. Şirkət rəhbərliyi müxtəlif məhkəmə instansiyalarında da bu mövqeni müdafiə edib.

Əlavə olaraq mübahisə predmeti olan mənzillərlə bağlı bundan əvvəl qəbul edilən bir sıra məhkəmə qərarları da sakinlərin xeyrinə olub. Belə ki, həm birinci instansiya, həm də apellyasiya mərhələsinin özünün daha əvvəlki qərarında göstərilib ki, binanın həmin mərtəbəsində Anar Mahmudovun iddia etdiyi mənzillər mövcud deyil və hazırda bu mənzillərin hər birində yaşayan ailələr var.

Bütün bu əsasla səbəblərə görə ailələr Bakı Apellyasiya Məhkəməsinin son qərarını gözlənilməz sayır, inanırlar ki, əvvəlki araşdırmaların nəticələri ilə ziddiyyət təşkil edən bu qərara Ali Məhkəmə obyektiv hüquqi qiymət verəcək.

Prosesin gedişatını diqqətdə saxlayacağıq.

Qafqazinfo

"Azərbaycan Avtomobil Yolları Dövlət Agentliyinin sabiq rəhbəri (AAYDA) Saleh Məmmədovun dönəmində yol inrasrukturu və büdcə sərfiyyatı ilə bağlı ciddi problemlərin meydana çıxdığı, adıçəkilən şəxsin məhz bu problemlər səbəbi ilə öz vəzifəsindən uzaqlaşdırıldığı məlumdur."
TEREF yazır ki, bunu müəllif poçtumuza göndərdiyi məqalədə yazır. Müəllif daha sonra yazır:
"Rellıq bundan ibarətdir ki, Saleh Məmmədovla bağlı mövcud durumun bunca faciəvi xarakter daşımasında onun etibar edib vəzifəyə qoyduğu müavinləri ciddi rol oynayıb. Sözügedən qurumun büdcəsinin müxtəlif layihələr adı altında mənimsənilməsində, dövlət və ictimai maraqların deyil, fərdi və qrup maraqlarının təmin olunmasında nəhəng müavin ordusu yaxından iştirak edib.
Redaksiyamıza daxil olan məlumata görə, müavin heyəti bəzi hallarda şəxsi maraqlar naminə Saleh Məmmədovu yanlış məlumatlarla istiqamətləndirib, onun səhv qərarlar qəbul etməsinə məqsədli şəkildə təsir göstərib. Nəticədə, İdarə Heyətinin sabiq sədri bəzi hallarda müavinlərinin təsiri altında yanlış qərarlar qəbul etməli olub.
Onu da qeyd edək ki, bu gün media və sosial mediada Saleh Məmmədovla bağlı sasız-hesabsız ittihamlar səsləndirilsə də, AAYDA-nın keçmiş rəhbərinin məmur ordusu, müavinləri haqqında heç bir tənqidi fikir yer almır. Bu faktın özü sübut edir ki, Saleh Məmmədovun müavinləri hər zaman olduğu kimi bu gün də sudan quru çıxmağı bacarır. Ancaq ümid edirik ki, nə vaxtsa Baş Prokurorluq və DTX Saleh Məmmədovun komndasına da “nəzər salacaq”, onların da məsuliyyətinin müəyyən olunmasına nail olacaq."
TEREF

Ölkəmizdə əhalinin sağlamlığının qorunması sahəsində dövlət siyasətinin tənzimlənməsini həyata keçirən mərkəzi icra hakimiyyəti orqanının — Səhiyyə Nazirliyinin qanunsuz tibb fəaliyyətinə qarşı mübarizə apardığını danmaq olmaz. Bu mübarizənin effektiv aparılması üçün qanunvericilik, aidiyyatı dövlət qurumları arasında koordinasiyalı fəaliyyətlərin gücləndirilməsi, səhiyyə qurumları ilə pasiyentlərin arasında inamın formalaşdırılması, nəzarət və ictimai iştirakçılıq amillərinin əsas olaraq götürüldüyü də göz qabağındadır. Keçirilən bu istiqamətli tədbirlərdə Səhiyyə Nazirliyinin rəsmilərinin, həmçinin nüfuzlu hökumət və qeyri-hökumət təşkilatlarının nümayəndələrinin fəal iştirak etməsi də deyilənlərin sübutudur.

Qanunsuz tibb fəaliyyətinin qarşısının alınmasını hərtərəfli şəkildə özündə əks etdirən ölkənin səhiyyə siyasəti bu istiqamətdə aparılan və heç vaxt gündəmdən düşməyən ictimai və media müzakirələrini də əsas şərt kimi irəli sürür, bu sahədəki mövcud problemlərin aradan qaldırılması üçün birgə səylərin göstərilməsini əsas olaraq önə çəkir. Çünki bu amillər mübarizənin effektivliyinin artırılmasında, dövlət qurumları ilə özəl sektorlar arasında sıx dialoqun formalaşdırılmasında, özəl klinikaların reputasiyasının və ictimai məsuliyyətin artırılmasında, ələlxüsus ictimaiyyət etimadının möhkəmləndirilməsində başlıca rol oynayır.

Bu səbəbdəndir ki, Səhiyyə Nazirliyi özəl tibb müəssisələrində qanunsuz tibb fəaliyyətinə qarşı mübarizənin gücləndirilməsi üçün, hüquqi çərçivəyə aid məsuliyyət mövzusunun ictimai və media müzakirəsi səviyyəsinə qaldırılmasında həmişə maraqlı olub. Həm özəl tibb müəssisələrinin, həkimlərin və pasiyentlərin öz hüquq və vəzifələrini bilmələri, mövcud qanunvericilyin tələblərinə mütləq qaydada riayət etmələri üçün, həm də qanunsuz tibb fəaliyyətinin pasiyentlərin sağlamlığına ciddi təhlükələr yaratdığına görə…

…Bir müddətdir Arazpress.com da yuxarıda qeyd olunan mövzu ilə bağlı yazılar dərc edir. Həmin yazılarda xüsusi olaraq vurğulanıb ki, əslən Quba rayonunun Digah kəndindən olan Rusiya vətəndaşı Alibek Kurbanovun nəzarətindəki cinayətkar şəbəkənin ən fəal üzvü Sevda Alibekovna Kurbanova (Ağazadə) “Referans Medical Group” daxilində fəaliyyət göstərən “Leyla Medical Center”də qanunsuz tibb fəaliyyəti ilə məşğuldur və o, burada həkim libasına bürünmüş qorxulu kabus təsiri bağışlayır. Yaxşı ki, bununla nə demək istədiyimizə Səhiyyə Nazirliyinin Analitik Ekspertiza Mərkəzi də aydınlıq gətirdi. Rəsmi adı “Dünya Estetik Azərbaycan” olan həmin özəl tibb şirkətində müəyyən etdiyimiz təhlükənin mahiyyətinə uyğun ciddi yoxlama tədbiri keçirdi. Apardığı yoxlama nəticəsində klinikanın fəaliyyətində biz yazdığımızdan da betər nöqsan və qüsurlar aşkar etdi. Tibb xidmətlərinin təşkili zamanı burada tibbi tələblərin ciddi şəkildə pozulmasına dair faktlar aşkarladı.

Yoxlama nəticəsində təsdiq olundu ki, stomatoloji klinikada lisenziyada nəzərdə tutulmayan qanunsuz xidmətlər göstərilir. Yəni, tibbi normalara görə irinli yara və göbələk infeksiyaları ilə məşğul olan podoloq kabinetinin cərrahi steril zona tələb edən stomatologiya kabinetləri ilə qonşuluğu, konkret desək, eyni mərtəbədə yerləşməsi, üstəlik, belə xəstələrin belə bir yerdə qəbulu xarakteri yolverilməzdir. Beləcə, klinikanın stomatologiya şöbəsində koordinator vəzifəsinə təyin edilən əsas günahkar Sevda Alibekovnanın sertifikatsız özəl praktik tibbi fəaliyyətlə məşğul olmasıyla bağlı aşkar etdiyimiz ciddi faktlar rəsmən təsdiqini tapdı.

Həkim adı altında fəaliyyət göstərən Sevda Alibekovnanın günahı ucbatından, şirkət barədə İnzibati Xətalar Məcəlləsinin 215.4-cü maddəsinə əsasən protokol tərtib edilərək, baxılması üçün məhkəməyə göndərildi, Məhkəmə qərarına əsasən, klinika 6000 manat məbləğində cərimələndi. Sevda Kurbanova barəsində isə İnzibati Xətalar Məcəlləsinin 215.1-ci maddəsi üzrə protokol tərtib edildi. Bu maddədə ali və ya orta ixtisas tibb təhsili, habelə qanunda nəzərdə tutulmuş sertifikasiya şəhadətnaməsi olmayan şəxslərin praktik tibb fəaliyyəti göstərməsindən bəhs edilir. 2 saylı Bakı Baza Tibb Kollecinin məzunu olmuş Sevda Kurbanova kimi.

Onu da qeyd edək ki, bu yoxlamaya qədər diplomu, habelə sertifikasiya şəhadətnaməsi olmayan bu şəxsin pasiyentlərə tibbi xidmət göstərməsi və əməliyyatlar icra etməsi barədə məlumatlar media vasitəsi ilə dəfələrlə ictimailəşdirilib. Lakin fəaliyyəti dövründə inzibati xəta ilə bağlı heç bir məsuliyyətə cəlb olunmadığı üçün, səsləndirilən bu fikirləri saya salmayıb. İndi də elədir. Baxmayaraq ki, tibb sahəsi üzrə qanunvericiliyin tələblərinə uyğun olmadan fəaliyyət göstərdiyi rəsmən təsdiqlənib. (Arazpress.com-un linki bu olan yazısı da deyilənləri özündə əks etdirir:
https://arazpress.com/?p=16571– red.).

Bir daha qeyd edirik ki, aşkarlanan qanunsuz əməllərinə baxmayaraq, kosmetik adı “Leyla Medical” olan “Dünya Estetik Azərbaycan”ın rəhbər şəxsləri Sevda Alibekovnanın xətrinə dəymək istəmirlər. Sanki onları 6000 manat cərimə də narahat etmir. Onda belə çıxır ki, doğrudan da, adını çəkdiyimiz cinayətkar şəbəkənin başçısı — atası Alibek Kurbanov kimi, onun özünün də hər yerdə qorxub-çəkinmədən dedikləri düzdür — arxalarında dağ kimi dayananlar var və heç kəs onlarla bacarmaz.

Bir daha deyək ki, vaxtilə Rusiyanın ayrı-ayrı yerlərində və Azərbaycanda törətdiyi qatı cinayət əməllərinə görə cinayət məsuliyyətinə cəlb edilən, hətta zorlamaya görə ittiham olunaraq, real həbs həyatı yaşayan, buna görə hər iki ölkənin tanınmış televiziya proqramlarında, məşhur “Pust qovoryat” verilişində tamaşaçılar qarşısında rüsvayçı şəkildə ifşa olunan Alibek Kurbanov kimi, qızı Sevdanın da atasından betər qanunsuz əməllər sahibi olduğunu mətbuatda dərc edilən Səhiyyə Nazirliyinin Analitik Ekspertiza Mərkəzinin rəsmi məlumatı bir daha təsdiq etdi. İctimaiyyətdə tam əminlik yarandı ki, atası və Sevda Alibekovnanın özü barəsində yazdıqlarımız həqiqətdən uzaq deyil. Quba və Bakı arasında yaradılan bu qorxulu şəbəkənin əməllərində görünməyən tərəflər də sırf qanunsuzluqdan xəbər verir. Çünki Digahdakı Alibek Kurbanovun və onun Bakıda fəaliyyət göstərən qızı Sevda Kurbanovanın ətrafında baş verənlər artıq adi dələduzluq çərçivəsindən də çıxaraq, qorxu dolu təhlükə müstəvisinə keçib.

Alibek Kurbanovun nəzarətindəki cinayətkar şəbəkənin müxtəlif qanunsuz əməlləri barəsində Arazpress.com-un dərc etdiyi ayrı-ayrı yazılarda şəbəkənin ən fəal üzvü Sevda Alibekovnanın adı saxta dərman istehsalı təhlükəsində də hallandırılır. Yəni, əldə etdiyimiz məlumata görə, indi də Alibek Kurbanov qızı ilə bərabər paytaxtın tibb sektoruna və nüfuzlu brendlərinə qarşı reket hücumuna başlayıb. Saxta ümidli dərman vasitəsi — “Bi-balzam” barəsində ötən yazımızda xüsusi olaraq qeydlər vermişik. “Gizli laboratoriya” istehsalının görünməyən tərəflərini də az da olsa ictimaiyyətin diqqətinə çatdırmağa nail olmuşuq. Demişik ki, saxta dərmanlar tərkibi uyğunsuz təhlükəli maddələrdən hazırlanır və insan həyatı üçün ciddi təhlükələr yaradır. Bu qlobal problem əsasən onlayn platformalar və ya nəzarətsiz təchizat zəncirləri vasitəsilə yayılır.

Ümumiyyətlə, atasının cinayət yolunu “layiqincə” davam etdirən, adını çəkdiyimiz klinikada qeydiyyatçı kimi rəsmiləşdirilən bu şəxsin, farmakologiyadan bixəbər olsa da, “tibb mütəxəssisi obrazı” arxasında gizlənərək, “Leyla Medical Center”də 2000 manata (?!) kirayəyə götürdüyü obyektdə özünü tanınmış bir podoloq — ayaq mütəxəssisi kimi pasiyentlərə sırıması, burada internet üzərindən götürdüyü tərkibdə mənşəyi məlum olmayan saxta dərman istehsalı ilə məşğul olması birbaşa törədilən cinayət, daha dəqiq desək, pasiyentlərin, xüsusən də, uşaqların sağlamlığını riskə atan təhlükəli sanitar-epidemioloji terrordur. “Bi-balzam” adlı saxta dərman preparatının qanunsuz istehsalına və alverinə girişməsi isə, həm vergi cinayəti, həm də insanların zəhərlənməsinə yol aça biləcək ciddi bir təhlükədir. Çünki belə dərman preparatları bizim kor-koranə etibar etdiyimiz, canımızı tapşırdığımız elementlərdir. Bu və buna bənzər digər elementlər lisenziyasız, nəzarətsiz və qanunsuz şəkildə hazırlandıqda dəhşət doğuran nələrin baş verdiyi həmişə göz qabağında olub.

Onu da demək istəyirik ki, təhlükəli bu cinayətkar şəbəkə başçısının və onun qızının adları kiminlə və hansı qurumla bir yerdə çəkilib, o zaman onların ətrafında qalmaqal yaranıb. Bir vaxtlar Kurbanovların fəaliyyəti Bakının tanınmış klinikalarından birinin — “32 Beauty”-nin (“Billur Dent” MMC) adını gündəmə gətirib. Yəni, bu MMC də bu şəbəkəni idarə edən fırıldaq ustasının hədəfinə tuş gəlib. “Bu stomatoloji klinika bizə və ən yaxın qohumlarıma məxsusdur” — deyən Alibek Kurbanov özünə toxunulmazlıq imici yaratmaq üçün əlindən gələni edib, Rusiyadakı qorxulu təşkilatların ən fəal üzvü olduğunu dilə gətirməkdən belə çəkinməyib. Beləcə, adını çəkdiyimiz klinikanın gəlirlərini belə ələ keçirib.

Hələ bu nədir ki?! Bir vaxtlar Alibek Kurbanovun ölkəmizdə qanunla qadağan olunmuş terror və separatizm meyilli “Sadval” təşkilatının üzvü və təbliğatçısı olması barədə yayılan xəbərlər bu məsələnin ən qorxulu tərəfi kimi yaddaşlarda qalıb. Özü isə, “Sadval”-ın başında duranların onun ən yaxını olduqlarını deməklə, yəni, bu iddia hesabına qanunsuz hərəkətlərinə etiraz edənlərə hox gəlib. Əgər fırıldaqçının bu iddiaları sadə bir yalan deyilsə, ortada dövlət təhlükəsizliyinə qarşı qorxulu bir ssenari mövcud olub.

Belə çıxır ki, “32 Beauty” klinikasının rəsmi təsisçi və rəhbər şəxsləri, özləri də bilmədən, antiazərbaycan qüvvələrin və separatçı “Sadval” qruplaşmasının gizli maliyyələşdirilməsində alətə çevrilib. Klinikadan əldə olunan leqal qazancın bir hissəsi qeyri-qanuni yollarla dövlət əleyhinə yönəlmiş fəaliyyətlərə ötürülüb. Rəhbər şəxslərin avamlığı hər cür cinayətin törədilməsinə imkan verib.

Alibek Kurbanov Digah kəndində və rayon ərazisində vətəndaşların etibarını qazanmaq və onlardan külli miqdarda pul, borc qoparmaq üçün unikal fırıldaq metodu seçib. O, addımbaşı Bakıdakı məşhur “32 Beauty” (Billur Dent) stomatoloji klinikanın və digər böyük bir tibb mərkəzinin onlara və yaxın qohumlarına məxsus olduğunu iddia edir. Bu yalanın arxasında isə istək və məqsəd dayanır: Həm insanlarda özünün böyük biznesmen olması təəssüratını yaradaraq, pullarını ələ keçirmək, həm də sabit fəaliyyət göstərən “32 Beauty” kimi tanınmış brendlərin adının arxasında gizlənərək, öz çirkin pullarını leqallaşdırmaq.

Doğrudan da, saxta həkim rüsvayçılığı və rəsmi cərimə ilə üzləşən şəbəkənin Bakı qolu daha təhlükəli bir ssenari ilə işləyir. Mediada nikah fırıldaqçısı kimi də ad çıxaran Sevda Alibekovna Kurbanovanın (Məmmədyarova, Süleymanova) paytaxtın elit tibb müəssisələrindən olan “Leyla Medical Center” ə sızmağı bacarmaqla, orada vətəndaşlara qarşı aparılan tibbi fırıldaqçılığı və qanunsuz qiymət şişirdilməsini də bacarıb. Bu faktlar artıq dövlət orqanlarının da diqqətini çəkib. Çünki cinayətkar şəbəkə başçısının bir vaxtlar terror təşkilatı “Sadval”ın üzvü olduğu danılmaz fakt kimi ictimaiyyətin diqqətindədir. Bu ailə podratının ən qorxulu tərəfi isə, törətdikləri cinayətləri ört-basdır etmək üçün seçdikləri hədə-qorxu metodudur. Alibek Kurbanov məhkəmə icraçılarını, şikayətçi vətəndaşları və dövlət məmurlarını susdurmaq üçün, özünü nüfuz sahibi tanınmışların, “Sadval” rəhbərlərinin yaxını kimi “gözə soxur”. “32 Beauty”-nin ona məxsus olduğunu deyir. “Bizə toxunanı məhv edərik” — deyərək, açıq şəkildə dövlətə və cəmiyyətə meydan oxuyur. Yəni, ortada mütəşəkkil cinayətkar dəstənin olduğu bir daha təsdiqlənir.

Kənddə üzə çıxan bu var-dövləti Alibek Kurbanov həmkəndlilərinə: “Bakıdakı “32 Beauty” klinikamın gəlirləridir” — deyərək, külli miqdarda pulunun real cinayətkar mənşəyini gizlədir, ətrafında qorxu mühiti yaradır. Aldatdığı insanlar qorxudan polisə şikayət edə və pullarını geri tələb edə bilmirlər. Bir sözlə, Alibek Kurbanov kənddə insanları soymaq, qorxutmaq və dövlət cəzasından yayınmaq üçün bu iyrəncliklərdən bir silah kimi istifadə edir.

Bu yerdə mövzuya aid “32 Beauty” rəhbəri ilə və nüfuz sahibi tanınmışlara sual yaranır: “Sadval” nümayəndəsi ilə əlaqələri necə yaranıb və onunla qohumuluqları necə ola bilər?! Bu klinikanın və onların adları Alibek Kurbanov üçün realdır, yoxsa uydurma?(Arazpress.com)

Elə bu suallar ətrafında araşdırmamızı davam etdiririk. Bizi izləyin.

Məhi ELSEVƏR

Xaçmaz Mənzil-Kommunal Təsərrüfat Birliyinin son dövrlərdə xidməti ərazilərin təmizliyi istiqamətində fəaliyyəti qənaətbəxş təsir bağışlasa da, birliyin daxilində bəzi xoşagəlməz halların baş verdiyi bildirilir.

“7Times.az”a məlumat verən etibarlı mənbənin sözlərinə görə, MKTB-yə bu ilin yanvar ayında müdir təyin edilən Mikayıl Müslümov bir neçə nəfərin adını rəhbərlik etdiyi idarədə işçi kimi sənədləşdirərək onların aylıq əməkhaqqı kartlarını özündə saxlayıb. Adları sənədləşdirilən şəxslərin Nəzərov Rasim və Bahadurov Eşqin olduğu bildirilir. Hər iki şəxsin idarəyə gəlib-getmədiyi, yalnız adlarına əmək stajı hesablanması qarşılığında bu vəziyyətlə məqsədli şəkildə razılaşdırıldığı iddia olunur.

Qeyd edək ki, hazırda sözügedən işçilərin hər birinin aylıq əməkhaqqısı 372 manat təşkil edir. Mənbənin verdiyi məlumata görə, bu iki şəxsdən başqa, eyni qaydada adı işdə, əməkhaqqı kartı isə rəhbər şəxslərdə olan Vadim adlı bir nəfər də olub. Həmin şəxsin bir müddət əvvəl vəfat etdiyi bildirilir.

Digər bir iddia isə Xaçmaz MKTB-nin yeni direktorunun özünə məxsus yük avtomobilini əlavə qazanc mənbəyinə çevirməsi ilə bağlıdır. Belə ki, Mikayıl Müslümov həmin idarəyə müdir təyin olunduqdan sonra şəxsi mülkiyyətində olan yük avtomobilini MKTB-nin balansına icarəyə verib.

İddialara görə, həmin avtomobil hazırda işlək vəziyyətdə olmasa da, mütəmadi olaraq onun yanacaq və digər istismar xərcləri rəsmiləşdirilir.

Qeyd olunan faktlarla bağlı münasibət öyrənmək üçün Xaçmaz MKTB-nin müdiri Mikayılla Müslümovla əlaqə saxladıq.

O, “7Times.az”a verdiyi şifahi açıqlamada səsləndirilən iddiaların həqiqəti əks etdirmədiyini bildirib