Əgər dövlət büdcəsindən ayrılmış vəsait hesabına icra edilən layihənin nəticəsi ortada deyilsə və ya gözlənilən səviyyədə deyilsə, bu zaman həmin layihənin hesabatının qəbul edilməsi hansı prinsiplərə söykənib?

Son zamanlar redaksiyamıza bir neçə QHT nümayəndəsi müraciət edərək “Göyərçin” Təhsilin İnkişafına Dəstək İctimai Birliyinin sədri Gülarə Vəlixanlının onlarla bağlanılmış müqavilələr üzrə öhdəliklərini yerinə yetirmədiyini bildirirlər. Müraciət müəlliflərinin sözlərinə görə, məsələ ilə bağlı dəfələrlə müraciətlər edilməsinə, sosial şəbəkələrdə problemlərin işıqlandırılmasına baxmayaraq, nə maliyyə sənədləri təqdim olunur, nə də ödənilmiş vəsaitlər geri qaytarılır.

Şikayətçilərin iddiasına görə, müxtəlif xidmətlərin göstərilməsi və maliyyə sənədlərinin hazırlanması adı ilə QHT-lərə sərfəli təkliflər verilib, nəticədə onlardan xeyli məbləğdə vəsait toplanıb. Lakin sonradan bildirilib ki, bank hesabındakı vəsait vergi borclarına görə avtomatik silindiyindən həmin pulların geri qaytarılması hazırda mümkün deyil.

Bu, ilk baxışdan iki tərəf arasında yaranmış mülki mübahisə kimi görünə bilər. Lakin məsələ bununla bitmir.

Məlumata görə, bu QHT-lər hüquq-mühafizə orqanlarına müraciətin nəticəsiz qalacağı qənaətindədir… Onlar iddia edirlər ki, Gülarə Vəlixanlının arxasında QHT-lərə Dövlət Dəstəyi Agentliyinin rəhbərliyi dayanır. Bu səbəbdən hüquqi addım atacaqları halda gələcəkdə Agentlikdən qrant ala bilməyəcəklərindən ehtiyat edirlər.

Məhz bu iddialardan sonra sözügedən təşkilatın dövlət hesabına maliyyələşdirilən layihələrini araşdırmağa qərar verdik.

Araşdırma zamanı məlum oldu ki, 2023-cü ildə “Göyərçin” Təhsilin İnkişafına Dəstək İctimai Birliyinin həyata keçirdiyi “Təhsilin əlçatanlığını təmin edən “Rahat Təhsil” (Easy Education) mobil tətbiqi və saytının təkmilləşdirilməsi” layihəsi QHT-lərə Dövlət Dəstəyi Agentliyi tərəfindən maliyyələşdirilib və bu məqsədlə təşkilata 8000 manat dövlət vəsaiti ayrılıb.

QHT-lərə Dövlət Dəstəyi Agentliyi ilə Gülnarə Vəlixanlını nə birləşdirir? -

Layihənin faktiki nəticəsini öyrənmək üçün təqdim edilən internet saytı və mobil tətbiq nəzərdən keçirdik. Oxucuları da həmin platformaya baxmağa dəvət edirik: https://easyedu.az/

İlk baxışdan yaranan təəssürat ondan ibarətdir ki, layihə tam işlək və funksional təhsil platforması deyil. Sayt və tətbiq daha çox ilkin maket və ya yarımçıq məhsul görüntüsü yaradır. Əgər doğrudan da vəziyyət belədirsə, ortaya çox ciddi suallar çıxır.

QHT-lərə Dövlət Dəstəyi Agentliyi bu layihənin yekun hesabatını hansı meyarlar əsasında qəbul edib? Layihənin icrası yerində monitorinq olunubmu? Hazırlanan məhsulun funksionallığı və ictimai faydası necə qiymətləndirilib?

Yoxsa təqdim olunan sənədlər formal qaydada qəbul edilərək layihə uğurlu hesab olunub?

İndi bizi daha ciddi sual düşündürür. Əgər dövlət büdcəsindən ayrılmış vəsait hesabına icra edilən layihənin nəticəsi ortada deyilsə və ya gözlənilən səviyyədə deyilsə, bu zaman həmin layihənin hesabatının qəbul edilməsi hansı prinsiplərə söykənib?

Ən maraqlı məqam isə bundan sonra başlayır.

QHT-lərə Dövlət Dəstəyi Agentliyi ilə Gülnarə Vəlixanlını nə birləşdirir? -

Normal məntiqə görə, əvvəlki layihənin nəticələri qiymətləndirilməli, onun uğurlu və ya uğursuz olması növbəti maliyyələşdirmə qərarlarına təsir göstərməli idi. Lakin görünən odur ki, belə olmayıb.

Belə ki, QHT-lərə Dövlət Dəstəyi Agentliyi 2026-cı ildə də “Göyərçin” Təhsilin İnkişafına Dəstək İctimai Birliyinin “Gələcəyin mühəndisləri” adlı layihəsini qalib elan edib və yenidən 8000 manat dövlət vəsaiti ayırıb.

Belə olan halda istər-istəməz sual yaranır: əvvəlki layihənin real nəticələri Agentlik üçün ümumiyyətlə əhəmiyyət daşıyırmı? Yoxsa QHT nümayəndələrinin dediyi kimi, QHT-lərə Dövlət Dəstəyi Agentliyinin rəhbərliyi onlara “like” qoyan və yalnız onlarla foto çəkdirənlərə qrant ayırır?

Əgər layihələrin icra keyfiyyəti, ictimai faydası və davamlılığı qiymətləndirilmirsə, onda qrant müsabiqələrinin əsas məqsədi nədir?

Müraciət edən şəxslər iddia edirlər ki, Gülarə Vəlixanlının QHT-lərə Dövlət Dəstəyi Agentliyi rəhbərliyi ilə yaxın münasibətləri var və bu münasibətlər onun ardıcıl şəkildə qrant qazanmasına şərait yaradır. Bununla da belə şübhələrin yaranmasının özü Agentliyin fəaliyyətində daha yüksək şəffaflıq və hesabatlılıq tələb edir.

Dövlət vəsaiti şəxsi münasibətlərə görə deyil, real nəticələrə görə ayrılmalıdır.

Əgər hər-hansı təşkilat bir layihəni lazımi səviyyədə başa çatdırmayıbsa, onun növbəti layihəsinin hansı əsaslarla maliyyələşdirildiyi ictimaiyyətə aydın izah edilməlidir.

Şəffaflıq yalnız tədbirlərdə çəkilən şəkillərlə, sosial şəbəkələrdə paylaşılan fotolarla və təqdimatlarla ölçülmür. Şəffaflıq dövlət büdcəsindən ayrılan vəsaitin son nəticəsinin cəmiyyət üçün görünməsi deməkdir.
QHT-lərə Dövlət Dəstəyi Agentliyi ilə Gülnarə Vəlixanlını nə birləşdirir? -
Bu gün vətəndaş cəmiyyətində belə bir fikir formalaşır ki, bəzən layihənin keyfiyyətindən çox, müəyyən çevrələrə yaxın olmaq daha vacib hesab edilir. Əgər bu təsəvvür yanlışdırsa, QHT-lərə Dövlət Dəstəyi Agentliyi bunu konkret faktlar və açıq hesabatlarla təkzib etməlidir.

QHT-lərə Dövlət Dəstəyi Agentliyinin rəhbərliyi bu məsələlərə münasibət bildirməli, həm adıçəkilən layihələrin qəbul edilməsinin hüquqi və maliyyə əsaslarını, həm də monitorinq mexanizmlərini ictimaiyyətə açıqlamalıdır. Eyni zamanda, redaksiyamıza daxil olmuş müqavilə öhdəliklərinin yerinə yetirilməməsi ilə bağlı şikayətlərin araşdırılması üçün aidiyyəti dövlət qurumlarının da məsələyə hüquqi qiymət verməsi ictimai maraq baxımından əhəmiyyətlidir.(Yenixeberorg.com)[sub][/sub]

Xaçmazda 17–25 iyun tarixlərində keçirilən müəllimlərin sertifikatlaşdırılması prosesi yekunlaşar-yekunlaşmaz, bölgənin bütün rayonlarında bu prosesin şəffaflığına şübhə doğuracaq söz-söhbət və şayiələr yayılmağa başladı. İmtahanlarda ciddi qanun pozuntularının və korrupsiya hallarının baş verdiyinə dair dildən-dilə dolaşan bu səs-səda, az qala, yüksək bal toplayan pedaqoqların uğur sorağını kölgədə qoydu. Rüşvət müqabilində imtahandan kəsilən bəzi namizədlərin nəticələrinin saxtalaşdırılaraq “uğurlu” kimi rəsmiləşdirilməsi, hətta rüşvətin məbləğinə görə qiymətləndirmə balının təyin edilməsi kimi çox ciddi və narahatlıq doğuran məqamlar iddia olunur.
​Əlbəttə ki, bu saxtakarlığı tam şəkildə müəyyən etmək və səsləndirilən iddiaları ifşa etmək üçün imtahanın keçirildiyi otaqların videoqeydlərinin dəqiqliklə izlənilməsi əsas şərtlərdəndir. Bu kadrların hər kəs üçün əlçatan olmadığı məlumdur. Videoarxivə baxmaq imkanımız olmasa da, baş verən bir sıra prosesləri araşdırarkən bu iddiaların əsassız olmadığı qənaətinə gəlmək mümkündür. Əldə etdiyimiz məlumata görə, bu istiqamətdə artıq cəzalandırılan və hətta işdən azad edilən şəxslər var.
​İddialara görə, Xaçmaz şəhər 4 saylı tam orta məktəbində çalışan bir pedaqoq sertifikasiya imtahanında uğurlu nəticə əldə etmək üçün vasitəçilərə üz tutub. Bu vasitəçiliyi edən ilk şəxs Quba rayonunun Zizik kənd orta məktəbinin laborantı Ayna Həmidova olub. O, müəyyən rüşvət qarşılığında imtahandan keçmək vədi verərək həmin pedaqoqdan öncədən razılaşdırılmış vəsaiti alıb və elə həmin məktəbin yeni təyin edilmiş direktoru Vəfa Paşayevaya ötürüb. Vəfa Paşayevanın isə həmin vəsaiti Quba-Xaçmaz Regional Təhsil İdarəsinin Quba rayonu üzrə sektorunun sürücüsü Sahil Qocayevə verdiyi iddia edilir.
​Qanun pozuntusu və korrupsiya zəncirinin iştirakçı tərəflərin iradəsindən asılı olan hissəsi “nöqsansız” başa çatsa da, zəncirin digər halqasında işlər planlaşdırıldığı kimi getməyib və həmin müəllim imtahandan kəsilib. Faktla əlaqədar olaraq aldadılan tərəf Quba-Xaçmaz Regional Təhsil İdarəsinə müraciət edib. Qısa müddət ərzində idarə müdirinin əmri ilə həmin vəsaiti məktəb direktorundan alan sürücü Sahil Qocayev işdən azad edilib. Pulu müəllimdən alan laborant Ayna Həmidovanın və direktor Vəfa Paşayevanın hansı formada cəzalandırılması barədə isə hələlik heç bir dəqiq məlumat yoxdur.
​Məsələ ilə bağlı bu korrupsiya piramidasında adı hallanan məktəb direktoru Vəfa Paşayeva ilə əlaqə saxlayıb münasibətini öyrənməyə çalışdıq. O, faktı nə inkar, nə də təsdiq etdi; sadəcə görüşüb məsələni səssiz-sədasız həll etmək üçün bizə xahişini çatdırdı.
​İlkin təəssüratlara görə, hadisələrin kimlərinsə iradəsindən kənar idarə olunduğu sezilsə də, prosesdə başqa şəxslərin də iştirak etdiyi şübhə doğurmur. Hər halda, bundan sonrası müvafiq dövlət strukturlarının və dövlət büdcəsi qarşısında şəffaflıq öhdəlikləri daşıyan Elm və Təhsil Nazirliyinin səlahiyyətinə qalır. Xaçmazda keçirilən müəllimlərin sertifikatlaşdırılması prosesinin bütün günlərinin videoşəkilləri və qeydləri diqqətlə izlənilməli, ən azı şübhə doğuran hallar üzrə imtahanda iştirak edənlərin yekun nəticələri bir daha nəzərdən keçirilməlidir.
7TİMES.az

Səyyaf Tağıyev 2 iyul 1956-cı ildə Gədəbəy rayonunun Kəlaman kəndində anadan olub. 1979-cu ildə Azərbaycan Dövlət Tibb İnstitutunun müalicə-profilaktika fakültəsinə daxil olub, 1985-ci ildə həmin ali təhsil müəssisəsini bitirib. 1985–1986-cı illərdə Akademik M. Mirqasımov adına Respublika Klinik Xəstəxanasında cərrahiyyə–LOR ixtisası üzrə internatura keçib.
1986-cı ildən Xaçmaz Rayon Mərkəzi Xəstəxanasında həkim-otorinolarinqoloq kimi əmək fəaliyyətinə başlayıb. 20 fevral 2002-ci il tarixindən otorinolarinqologiya şöbəsinin müdiri, 30 dekabr 2012-ci ildən isə Xaçmaz Rayon Mərkəzi Xəstəxanasının baş həkimi vəzifəsində çalışıb. Hazırda Xaçmaz Rayon Mərkəzi Xəstəxanası PHŞ-nin direktoru vəzifəsini icra edir.
14 sentyabr 2015-ci ildə Azərbaycan Respublikası Prezidentinin sərəncamı ilə "Əməkdar həkim" fəxri adına layiq görülüb. 12 iyun 2018-ci ildə Azərbaycan Respublikası Səhiyyə Nazirliyinin "Səhiyyə əlaçısı" döş nişanı ilə təltif edilib. 14 avqust 2019-cu ildə isə Azərbaycan Respublikası Dövlət Sərhəd Xidməti tərəfindən "Azərbaycan Sərhəd Mühafizəsinin 100 illiyi (1919–2019)" yubiley medalı ilə təltif olunub.
Dövlətçiliyin və səhiyyənin inkişafında göstərdiyi xidmətlərə, yüksək təşkilatçılıq bacarığına və rayonun ictimai-siyasi həyatındakı səmərəli fəaliyyətinə görə Rayon İcra Hakimiyyəti və digər dövlət qurumları tərəfindən dəfələrlə fəxri fərmanlarla mükafatlandırılıb.
Məlum olduğu kimi, TƏBİB-ə yeni icraçı direktor təyin olunduqdan sonra qurumda bir sıra islahatlara start verilib. Bu proses fonunda son günlər bəzi media resurslarında Səyyaf Tağıyev barədə həqiqəti əks etdirmədiyi iddia olunan materiallar yayımlanmaqdadır.
İddialara görə, iyulun 2-də 70 yaşı tamam olan Əməkdar həkimin əmək müqaviləsinin uzadılmasına mane olmaq məqsədilə onun barəsində məqsədli qarayaxma kampaniyası aparılır.
Rayonda səslənən iddialara əsasən, vaxtilə Səyyaf Tağıyevin müavini olmuş Murad Həbibov yenidən həmin vəzifəyə qayıtmaq niyyətindədir. Həmçinin bəzi dairələrdə ləğv olunmuş Xaçmaz Maliyyə İdarəsinin keçmiş rəisi Nizami Həsənovun xəstəxanaya direktor təyin oluna biləcəyi barədə müxtəlif söz-söhbətlər dolaşır. Lakin bu məlumatların rəsmi təsdiqi yoxdur və hazırda iddia xarakteri daşıyır.
Redaksiyamıza daxil olan məlumatlara görə, Murad Həbibovla Nizami Həsənov yaxın münasibətdə olan şəxslərdir. Həmçinin bəzi mənbələr iddia edirlər ki, Səyyaf Tağıyev əleyhinə aparıldığı bildirilən qarayaxma kampaniyasının arxasında Murad Həbibov dayanır. Bu iddialarla bağlı hər hansı rəsmi təsdiq və ya məhkəmə qərarı mövcud deyil və adı çəkilən şəxslərin mövqeyi redaksiyamıza təqdim edilməyib.
Uzun illər səhiyyə sahəsində çalışmış, dövlət tərəfindən yüksək qiymətləndirilmiş və müxtəlif mükafatlara layiq görülmüş bir həkim haqqında sübuta yetirilməmiş məlumatların yayılması, onun nüfuzuna xələl gətirilməsi cəmiyyətdə narahatlıq doğurur.
Hər bir şəxs barəsində irəli sürülən iddialar yalnız hüquqi və faktiki əsaslarla qiymətləndirilməli, şəxsi maraqlardan irəli gələn qarayaxma kampaniyalarına yol verilməməlidir. Eyni zamanda, bu məsələdə adı hallanan bütün şəxslərin cavab vermək və öz mövqelərini ifadə etmək hüququna hörmətlə yanaşılmalıdır.
dia.az

Göygöl Rayon İcra Hakimiyyətinin başçısı Vüqar Novruzovun çayxanada sakinlərlə görüşündən yayılan görüntülər müzakirəyə səbəb olub.

Bizimesr.com xəbər verir ki, icra başçısının görüşünə gələn vətəndaşların hər biri çayxanaya kostyumda gəliblər.

Görüntülər sosial şəbəkələrdə tənqidlə qarşılanıb. Bildirilib ki, görüş əvvəlcədən planlaşdırılıb və səmimiyyətdən uzaqdır.

"Hörmətli Azərbaycan Respublikasının Baş Prokurorluğu... “AYNA” -təzə tender keçirib. Birbaşa bir mənbədən satınalma metodu ilə. Şirkətlər arasında rəqabət yaratmayıb. Bundan əvvəl Azərbaycan Yerüstü Nəqliyyat Agentliyinin (AYNA) avtobus dayanacaqlarının təmiri ilə bağlı imzaladığı satınalma müqaviləsindən yazmışdıq..." "DİA-AZ" xəbər verir ki, bunu özünün sosial şəbəkə hesabında tanınmış jurnalist Arifə Əliyeva yazıb.
O daha sonra fikrini belə davam etdirir: "Həmin araşdırmada qeyd etmişdik ki, AYNA 419 min 531,18 manat dəyərində müqaviləni "Madina Group" MMC ilə bağlayıb. Araşdırmalar zamanı məlum olmuşdu ki, açıq mənbələrdə şirkət haqqında demək olar ki, heç bir məlumat yoxdur. Hətta internet resurslarında şirkətin əlaqə vasitələrini belə tapmaq mümkün deyildi.
Buna baxmayaraq, şirkətin müxtəlif dövlət qurumlarından fərqli satınalma predmetləri üzrə sifarişlər aldığı, təmir işlərindən tutmuş ofis mebelləri, fərdi mühafizə vasitələri, yumşaq inventarlara kimi müqavilələr bağlayib.
İndi isə AYNA avtobus dayanacaqları ilə bağlı daha bir iri məbləğli satınalma müqaviləsi bağlayıb. Agentlik Bakı şəhəri və regionlardakı küçə və prospektlərdə sərnişinlərin avtobus gözləmələri üçün yeni dayanacaq pavilyonlarının quraşdırılması işlərini "Construction Engineering" MMC-yə həvalə edib. Müqavilənin dəyəri 1 milyon 993 min 848,4 manatdır.
Satınalma bir mənbədən satınalma metodu ilə həyata keçirilib. Bu isə o deməkdir ki, açıq tender keçirilməyib, müxtəlif şirkətlər arasında rəqabət yaradılmayıb və sifariş birbaşa seçilmiş şirkətə verilib.
Dövlət Vergi Xidmətinin hüquqi şəxslərin dövlət reyestrində yer alan məlumatlara görə, "Construction Engineering" MMC 15 mart 2019-cu ildə dövlət qeydiyyatına alınıb. Şirkətin hüquqi ünvanı Bakı şəhəri, Nərimanov rayonu, Nazim Hacıyev küçəsi, ev 7, mənzil 29-dur. Nizamnamə kapitalı 152 min manat təşkil edir. Qanuni təmsilçisi Ağayev Ceyhun Firdovsi oğludur.
Açıq mənbələrdə şirkətin qanuni təmsilçisi Ceyhun Ağayev haqqında da əlavə məlumatlara rast gəlinmir. Onun bu sahədə fəaliyyəti, həyata keçirdiyi layihələr və peşəkar təcrübəsi barədə ictimaiyyət üçün əlçatan informasiya demək olar ki, yoxdur.
Şirkətin öz internet səhifəsində yerləşdirilən məlumata əsasən, əsas fəaliyyət istiqaməti yüksək keyfiyyətli müasir telekommunikasiya şəbəkələrinin infrastrukturunun tikintisi və bu sahə üzrə müxtəlif xidmətlərin göstərilməsidir.
Bu məqam isə müəyyən suallar yaradır. Telekommunikasiya infrastrukturunun qurulmasını əsas fəaliyyət istiqaməti kimi təqdim edən şirkətin təxminən 2 milyon manat dəyərində avtobus dayanacağı pavilyonlarının quraşdırılması işlərini hansı təcrübə və potensialla həyata keçirəcəyi aydın deyil.
Üstəlik, satınalmanın açıq tender deyil, bir mənbədən satınalma metodu ilə həyata keçirilməsi də suallar doğurur. Rəqabətli mühit formalaşdırılmadan belə iri məbləğli dövlət sifarişinin məhz bu şirkətə verilməsi onun seçilmə meyarları, bu sahədəki təcrübəsi və texniki imkanları ilə bağlı məsələləri gündəmə gətirir.
AYNA-nın bundan əvvəl avtobus dayanacaqlarının təmiri ilə bağlı bağladığı müqavilə də oxşar müzakirələrə səbəb olmuşdu. İndi isə yeni dayanacaq pavilyonlarının quraşdırılması üçün seçilən şirkətin fəaliyyət profili ilə sifariş predmeti arasında görünən uyğunsuzluq və satınalmanın bir mənbədən həyata keçirilməsi bu müqavilə ətrafında da yeni suallar yaradır..."

DİA-AZ

İş adamı Xəlil Göyüşova məxsus olduğu bildirilən "Körpü-Bina-Tikinti” şirkəti Xankəndi şəhərində və Kərkiçahan qəsəbəsində söküntü işləri həyata keçirəcək.

Layihə işğal dövründə qanunsuz inşa olunmuş bir sıra tikinti obyektlərini əhatə edəcək.

Sifarişçi Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin Tikilməkdə olan Obyektlərin Birləşmiş Müdriyyətidir.
Qurumla şirkət arasında bununla əlaqədar satınalma müqaviləsi imzalanıb.

Müqavilənin maliyyə dəyəri 1 171 605,17 manat təşkil edir. Satınalma proseduru birmənbə metodu ilə həyata keçirilib ki, bu fakt şəffaflığa dair müəyyən suallar yaradır.

Qanunvericiliyə əsasən dövlət satınalmalarında birmənbə metodunun tətbiqi aşağıdakı hallarda keçərlidir:

* 49.1.1. satınalma predmeti yalnız hər hansı konkret təchizatçıda olduqda və ya hər hansı konkret təchizatçı həmin satınalma predmeti üzərində xüsusi hüquqlara malik olduqda və satınalma predmetinin əvəzedicisi və alternativi olmadıqda;
* 49.1.2. satınalma predmetinə təcili tələbat yarandıqda:
* 49.1.2.1. tələbatın təcili olmasına gətirib çıxarmış halları qabaqcadan görmək qeyri-mümkün olarsa və ya bu hallar satınalan təşkilatın bilərəkdən gözləməsinin nəticəsi olmadıqda;
* 49.1.2.2. təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə;
* 49.1.3. satınalan təşkilat hər hansı təchizatçıdan satınalma predmetini satın aldıqdan sonra standartlaşdırma mülahizələrinə əsasən və ya mövcud satınalma predmetinə uyğunluğu təmin etmək zərurəti baxımından satınalma predmetini həmin təchizatçıdan satın alınması qənaətinə gəldikdə, habelə keçirilməsi planlaşdırılan satınalma texnoloji və ya müəlliflik hüququ baxımından əvvəlki satınalma predmetinin davamı olduqda;
* 49.1.4. satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.

Xankəndi şəhərində və Kərkicahan qəsəbəsində həyata keçiriləcək söküntü işləri üçün bu hallardan hansı birinin uyğun olduğu aydın deyil. "Körpü-Bina-Tikinti” MMC inşaat sektorunda fəaliyyət göstərir və bu sferada alternativsiz deyil.

Bölgədə hər hansı fövdəqladə hal baş verməyib, mövcud layihənin hər hansı bir satınalmanın davamı olduğuna dair fakta rast gəlinmir və nəhayət satınalma predmeti əks-kəşfiyyat fəaliyyətini təmin edən tələbata aid deyil.

"Körpü-Bina-Tikinti” MMC 17 sentyabr 2001-ci ildə dövlət qeydiyyatına alınıb. Şirkət 40 manatlıq nizamnamə kapitalı ilə yaradılıb. 2016-cı ildə isə nizamnamə kapitalı 300 000 manata çatdırlıb. "Körpü-Bina-Tikinti” MMC-nin hüquqi ünvanı Nərimanov rayonu, Əhməd Rəcəbli 2, ev 1-də yerləşir. Şirkətin qanuni təmsilçisi Göyüşov Xaliq Avdil oğludur.

Xaliq Göyüşov Xəlil Göyüşovun qardaşıdır. Şirkətin Xəlil Göyüşova məxsus olduğu iddiaların kökündə də bu fakt dayanır.

"Körpü-Bina-Tikinti” MMC bir neçə il əvvəl Sabunçu rayonunda yerləşən tuneldə baş verən faciə ilə gündəmə gəlib. Həmin vaxt yayılan məlumatlarda bildirilirdi ki, Sabunçu rayonu Asəf Əsədullayev küçəsində yerləşən və su basdığı üçün 2 nəfərin öldüyü tuneli 2019-cu ildə "Azərbaycan Dəmir Yolları” Qapalı Səhmdar Cəmiyyətinin (QSC) sifarişi ilə "Körpü Bina Tikinti” MMC tikib.(Qaynarinfo)

"«Nefqazintikinti» trestinin müdiri Qağaməli Seyfullayev nəinki trestdə «ailə podratı» yaradıb, eləcə də yeznələrini, kürəkənlərini, bu da bəs etməyib, kürəkəninin qohumlarını da burada işlə təmin edib, qısa vaxtda yerlərini rahat sahələrə dəyişdirib, dərəcələrini artırıb… Lakin uzun illərdir burada çalışan və dərəcəsini, iş yerini, ixtisasını dəyişdirmək istəyənlər qapı arxasında saxlanılır!" Bu barədə "DİA-AZ"a göndərilən məqalədə deyilir.
Məqalədə daha sonra bildirilir: "Budur, Qağaməli Seyfullayevin bacısın həyat yoldaşı Nazim Sadatovu «Qaz İxrac İdarəsi»ndən gətirərək qısa zaman içində trestin İnsan Resursları şöbəsinin rəisi Aqşin Hüseynzadənin saxta sənədləşməsi və gözə kül üfürmə taktikası ilə tez bir zamanda vəzifəyə yüksəldib. SOCAR rəhbərliyi Aqşin Hüseyzadənin müavini Şahin Qürbətovun da fəaliyyətini araşdırsın. SOCAR-da və kənar qurumlarda da Şahin Qürbətovu iş düzəldən, işə götürən… bir sözlə, «bal tutub barmaq yalayan» kimi tanıyırlar, bununla bağlı nə qədər desəniz faktlar var…
***
Beləliklə, “Neftqaztikinti” Trestinin rəisi Qağaməli Seyfullayevin dəstəklədiyi fəaliyyətə diqqət edək: məsələn, bir müddət əvvəl yerli KİV-də ictimailəşdirilmiş 20.02.2025-ci ilə aid olan bir sənəd «Namizədlərin sahə üzrə qiymətləndirilməsi» adlanır. Bu xüsusi blankdır və siyahı üzrə təqdim olunmuş şəxslərin sənədləri imtahan komissiyasına verilir, sonra hər bir işə girmək istəyən şəxs suallara cavab verməlidir. Şəxsən çoxsaylı işçilər var ki, illərdir həyatını həsr etdiyimiz sahə üzrə bütün biliklərə və təcrübəyə malik olsa da, sualların qoyuluşunda çaşdırıcılığı bir kənara atsalar belə, cavablardakı adi bir hal hər şeyi alt-üst edir. Sitat: «Axı, bizim sahə həm də praktika ilə bağlıdır, bu da bizdə var. Bununla belə, daim bu imtahanlara ciddi də hazırlaşmışıq. Amma, atalar demiş, sən saydığını say, gör, trestin İnsan Resursları şöbəsinin rəisi olan Aqşin Hüseynzadə nə sayır. Belə ki, imtahan sənədi rəhbərliyin göstərişi ilə əvvəlcədən işə götürülməli şəxsə verilir, o da bir neçə həmin suala evində hazırlaşır və imtahanda bülbül kimi ötür, komissiya üzvləri isə vərəqə yazır ki, «Suala dolğun cavab verdi» və s. Blankın yuxarı hissəsinə baxsanız, orada vakansiya belədir: «Mühəndis (Komplektləşdirmə üzrə)». Namizədin adının qarşısı isə boşdur. Axı belə olmalı deyil, imtahan götürən komissiya bunu necə qəbul edir? Məqsəd budur ki, burada suallara cavab qələmlə işarələnməlidir (test qaydasında), cavablar təhvil veriləndə isə Aqşin Hüseynzadə Qağaməli Seyfullayevin göstərişi ilə işə kimi götürəcəksə, onun ad və soyadını yazıb «Urraaa» deyir. Belələrinin siyahısını sizə təqdim edirik: Məsələn, Bəkizadə Murad Nəriman oğlu «Veysəloğlu» Şirkətlər Qrupunda ticari işlərlə məşğul olub. Trestinin müdiri Qağaməli Seyfullayevin növbəti əmrində yazılır: «Bəkizadə Murad Nəriman oğlu 18 aprel 2022-ci ildən 13-cü dərəcə ilə Trestin İnsan Resursları şöbəsinə kadrlar üzrə mütəxəssis götürülsün». Müdirin 02 avqust 2023-cü il tarixli əmri ilə isə o, həmin şöbənin rəis müavini vəzifəsinə təyin edilir. Göründüyü kimi, az müddət sonra Bəkizadə ən yüksək ixtisas dərəcəsi və maaşla yeni yüksək vəzifəyə təyin edilir. Bəs görəsən, trestdə uzun illərdir çalışan digər işçilər niyə yada düşmür ki, «Veysəloğlu» kimi ticarət şəbəkəsində işləmiş bir şəxs neft qurğularının təmiri ilə məşğul olan bir trestdə tezliklə irəli çəkilir? Məlumat üçün bildirək ki, Qağaməli Seyfullfayevin müvafiq əmrləri ilə eyni qayda və üsulla yenə də «Veysəloğlu» Şirkətində çalışmış Aygün Qəniyeva, Məhəmməd Babayev də trestdə yüksək vəzifələrə işə götürülüblər, hazırda isə SOCAR-da İnsan Resursları Departamentində yüksək vəzifə tuturlar… Samir Aslan oğlu Qürbətov ilə 15 iyul 2024-cü il tarixdə 6361 saylı müqavilə ilə trestin 6 saylı Tikinti-Quraşdırma Bölməsinin 2 saylı Tikinti-Quraşdırma Sahəsinə 5 dərəcə ilə müvəqqəti statusla rəngsaz vəzifəsinə işə götürülür… Diqqət edin, 9 dekabr 2024-cü ildə isə, yəni cəmi 5 aydan sonra onu trestin İxtisaslaşdırılmış Təmir-Tikinti bölümünün 3 saylı Tikinti-Quraşdırma sahəsinə izoləedici-plyonkaçı vəzifəsinə daimi işə götürürlər. Bəs Samir Qürbətov kimdir ki, uzun illərdir müvəqqəti işləyənlər dura-dura, onu 5 ayın içində daimi işə qəbul edirlər? Məlum olur ki, o, Trestin İnsan Resursları Şöbəsinin rəis müavini Şahin Qürbətovun qardaşıdır. Maraqldır ki, Samir Qürbətov əmrə görə 1 il müddətinə müvəqqəti işə götürülür, bir il tamam olan kimi isə daimi işə qəbul olunub… Halbuki 2019-cu ildən trestdə işə götürülüb çalışan təcrübəli işçilər var ki, onlar hələ də müvəqqəti işə götürülüblər, gözləri yol çəkir. Onlarla hər il yenidən müqavilə bağlanır…".
DAVAMI VAR...


DİA-AZ

Dərəbəylik və hüquq. Bu iki bir-birinə zidd anlayışları bir yerdə görəndə, yəqin ki, təəccübləndiniz. Amma dərd burasındadır ki, Naxçıvan Muxtar Dərəbəyliyində Vasif xan dövründə bərqərar olunmuş dərəbəylik qaydaları və onun nəticələri bu günə qədər dəyişilmədən qalır. Ən pisi isə odur ki, klassik dərəbəylik sistemlərindən fərqli olaraq, müasir Naxçıvan MR-də bütün bu özbaşınalıqlar adına hüquq-məhkəmə orqanları deyilən qurumlar tərəfindən qorunur, mühafizə olunur. Bunun ən bariz nümunəsi Vasif Talıbovun dövründə mülkiyyəti əlindən alınan Razi Orucovun yaşadıqlarıdır.
İş adamının bildirdiyinə görə, 2018-ci ildə Vasif Talıbovun oğlu Seymurun sürücüsü Həsən Əhmədov onunla görüşüb və ağasının adından Türkiyəli iş adamı Emin Uçara məxsus “Sizin Market” mağazasını işlətməyi ondan tələb edib. Deyib ki, marketin kirayə haqqı olaraq ayda 10 min manat bankdakı bir hesaba pul ödəyərsən. Yəni market ona 10 manata kirayə verilib. Bir neçə ay Seymur Talıbovun tələblərinə uyğun qaydada “Sizin Market”i işlədən Razi Orucov az keçməmiş yenə öz qarşısında Həsən Əhmədovu görüb. Seymurun sürücüsü ona deyib ki, bundan sonra ayda 10 min yox, 20 min manat “kirayə haqqı” ödəməlisən. Özü də banka deyil, birbaşa mənə.
“Sizin Market”in aylıq mənfəətinin heç 20 min manat olmadığını deyən iş adamına sürücü Həsən bildirib ki, onda get, “müəllim”lə (Seymur Talıbov nəzərdə tutulurdu) görüş, onunla sövdələş. Çar-naçar Seymurla görüşən Razi o dövrün Naxçıvan “xan”ının vəliəhdinin sərt xəbərdarlığı ilə qarşılaşır: “Bütün mülkiyyətini mənim atamın hesabına qazanıbsan, onların hamısını mənə qaytarılmalısan”.
Beləcə, Razi Orucovun bütün əmlakının müsadirə olunması prosesi başlayır. Dərəbəylik rejimi onun yalnız “Sizin Market”in vitrininə yığdığı malları deyil, həmçinin əlindəki digər obyektləri və mülkiyyətləri də alıb. Üstəlik, bütün bu müsadirə olunmalar “hüquqi” yolla ələ keçirilir. Razini maşına oturdaraq Naxçıvan şəhərindəki 1 saylı notariusa aparıb 4 evini, 3 maşınını (1 Niva, 1 Ford Transit, 1 Toyota Prado) Sizin marketinin bütün əmlakını, Naxçıvan şəhərinin yaxınlığındakı (Əliabad qəsəbəsi) fermasını, Alman apteki adlanan obyektini Nəqşicahan MED MMC-yə “bağışladırlar”. Beləcə, iş adamının ümumilikdə 1.6 milyon manatlıq əmlakı zorla ələ keçirilir.
İş adamının 2 il ərzində Naxçıvanın hüquq-mühafizə orqanlarında döymədiyi qapı, şikayət etmədiyi ünvan qalmır. Nəhayət, onun məhkəmələrə, prokurorluğa, polis orqanlarına göndərdiyi şikayət məktublarına “cavab” birbaşa ən yüksək instansiyadan - “xanzadə” həzrətləri Seymur Talıbovdan gəlir. Razini yanına çağıran Seymur Talıbov ona atasının daşınmaz əmlakı sayılan Naxçıvanı tərk etməsi üçün 24 saat vaxt verir. Məcburən “xanzadə”nin tapşırığını yerinə yetirən iş adamı Bakıya getməli olur.
Paytaxtda da öz hüquq mübarizəsini davam etdirən Razi ən müxtəlif instansiyalara şikayət məktubları göndərir, amma heç birindən nə müsbət, nə də mənfi cavab ala bilir. Bir ilə yaxın davam edən bu cəhdlər heç bir nəticə verməyincə, hər yerdən əli üzülən Razi sonunda Prezidentə və Birinci Vitse-Prezidentə pənah aparır.
Ölkə rəhbərlərinə yazdığı məktublar Prezident Administrasiyası tərəfindən baxılması üçün yenidən Naxçıvanın müvafiq hüquq-mühafizə orqanlarına göndərilir. Razinin əsl fəlakəti də bundan sonra başlayır. Naxçıvan dərəbəyliyinin hüquq-mühafizə orqanlarından ona zəng edib, təcili görüşə çağırırlar. İş adamı da sonunda “haqq öz yerini tapacaq” düşüncəsiylə sevinə-sevinə Naxçıvana qayıdır. İçərisində olduğu təyyarə Naxçıvan aeroportuna çatar-çatmaz onu 1 nömrəli terrorçu kimi əl-qolunu bağlayıb Böyükdüz kəndində yerləşən dərəbəylik həbsxanasına aparırlar.
Sənədlərdən belə məlum olur ki, Böyükdüz həbsxanasında məhkəmə keçirib Razi Orucovu “xanzadə”yə guya böhtan atdığına görə, Cinayət Məcəlləsinin 147.1 maddəsi ilə azadlıqdan məhrum ediblər. Bu maddədə bildirilir: “Böhtan, yəni yalan olduğunu bilə-bilə hər hansı şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda, kütləvi nümayiş etdirilən əsərdə və ya kütləvi informasiya vasitəsində yayma—
yüz manatdan beş yüz manatadək miqdarda cərimə ilə və ya iki yüz qırx saatadək müddətə ictimai işlər və ya bir ilədək müddətə islah işləri və ya altı ayadək müddətə azadlıqdan məhrum etmə ilə cəzalandırılır”.
Göründüyü kimi, maddədə söhbət kütləvi informasiya vasitələrində bilə-bilə kiminsə haqqında yalan məlumat yaymağın cəzalandırılması nəzərdə tutulur. Razi isə heç bir media qurumunda çıxış etməyib, sadəcə Prezidentə və Xanımına məktub yazıb. Bunu belə Raziyə çox görən dərəbəylik məhkəməsi onun barəsində ən ağır cəzanı – altı ay müddətində azadlıqdan məhrumetmə hökmünü çıxarır.
Amma cəza bununla da yekunlaşmayıb. Böyükdüzdə saxlanıldığı 22 gün ərzində həbsxana rəisi, hazırda bənzər əməllərinə görə cinayət məsuliyyətinə cəlb olunan ədliyyə general-mayoru Tofiq Etibar oğlu Həsənov və “dərəbəyzadə” Seymurun sürücüsü Həsən Əhmədovun rəhbərliyi altında hər gün bir neçə dəfə döyülüb ağır işgəncələrə məruz qalan Razinin bəxti onda gətirir ki, Prezident İlham Əliyev 2021-ci ilin noyabr ayında Zəfər bayramı münasibəti ilə amnistiya aktı imzalayır. Razinin ittiham olunduğu maddə də bu amnistiya aktının əhatə dairəsinə düşür.
Razini hənsxanadakı kamerasından çıxarıb tez-tələsik Naxçıvanın ovaxtki Ədliyyə nazirinin hüzuruna gətirirlər. Nazir ona Seymur Talıbov tərəfindən bağışlandığını və azadlığa buraxıldığı müjdəsini verir. Ardınca da bundan sonra özünü ağıllı aparmağı məsləhət görür. Qısası, Prezidentin hümanist addımı belə Naxçıvanda “xan” və “xanzadə” həzrətlərinin adına yazılır.
Razi Orucov azadlığa buraxıldıqdan sonra da öz qanuni əmlakları uğrunda mübarizəsini dayandırmır. Hər gün müxtəlif dairələrə etdiyi müraciətlər, yazdığı məktublara isə qaneedici cavablar ala bilmir. Ona 2018-ci ildə “xan” rejiminin zorla imzalatdığı notarius sənədi göstərilir və şikayətinin hüquqi əsası olmadığı bildirilir. Halbuki Azərbaycan Respublikası Mülki Məcəlləsinin 339-cu maddəsinin 4-cü bəndinə əsasən, bağışlama əqdini bağlayan şəxs zorakılığa məruz qalıbsa, onun imzaladığı sənəd etibarlı sayıla bilməz:
“339.4. Əqdi bağlayan şəxsi əqdi bağlamağa məcburetmə (zorakılıq və ya hədələmə) ona hüquq verir ki, zorakılığın üçüncü şəxs tərəfindən törədildiyi halda da əqdi mübahisələndirsin. Xaraktercə şəxsə təsir göstərə bilən və ona şəxsən özünü və ya əmlakını real təhlükə gözlədiyini təlqin edə bilən məcburetmə əqdin etibarsızlığına səbəb olur”...
Razi Orucovun bizə təqdim etdiyi sənədlərdən aydın olur ki, o 2018-ci ildə bağışlama əqdi “bağladıqdan” dərhal sonra ən müxtəlif hüquq-mühafizə orqanlarına və Prezidentə dəfələrlə müraciət edərək fiziki zorakılıq altında bu sənədə imza atdığını bildirib. Sonuncu belə məktubu bir neçə gün əvvəl son ümid yeri kimi pənah apardığı Prezident İlham Əliyevə göndərib. Bütün bu faktlar onun imzaladığı bağışlama əqdinin etibarlı sayılmaması üçün yetərli dəlil sayıla bilər. Naxçıvan dərəbəyliyinin hüquq-mühafizə orqanları isə nədənsə bu faktları görməzdən gəlir.
Hazırda Razi Orucov insan oğlunun fundamental hüquqlarından sayılan mülkiyyəti uğrunda mübarizəsini davam etdirdiyi halda, onun əmlakını zorla ələ keçirən Seymur Talıbov isə Naxçıvanda əməlli-başlı at oynadır. Görünür, Naxçıvanın yazılmamış Konstitusiyasında referenduma çıxarılması belə qadağan olunan bir maddə var: “Dərəbəy dərəbəyin ayağını tapdalamaz”.
Heydər Oğuz
[s][/s]

Quba şəhəri, Lütfizadə küçəsində yerləşən “Şahdağ” hotelində qanunsuz tikinti-quraşdırma işləri aşkarlanıb. Faktla əlaqədar olaraq FHN-in Tikintidə Təhlükəsizliyə Nəzarət Dövlət Agentliyinin 28 aprel 2026-cı il tarixində tikinti işlərinin dayandırılması ilə bağlı 0354 saylı qərarı olmasına baxmayaraq, sifarişçi şirkət dövlətin bu qərarına məhəl qoymadan tikinti işlərini davam etdirir.

Görüntülər 28 iyun tarixində lentə alınıb. Qanunsuz tikinti aşkarlanıb dayandırılması barədə qərar elan edilməsinə baxmayaraq, işlərin sürətlə aparıldığı açıq-aydın görünür.

Qeyd edək ki, tikinti aparılan həmin obyekt millət vəkili Əlibala Məhərrəmzadənin mənəvi mülkiyyətində, amma rəsmi sənədlərlə qardaşının adındadır. Qanunsuz tikintinin aşkarlandığı gün o, mətbuat vasitəsilə hotelin öncə ona aid olmadığını, daha sonra isə orada heç bir qanunsuz tikintinin aparılmadığı açıqlamasını vermişdi. Elə həmin gün FHN tikinti işlərinin qanunsuz həyata keçirildiyi üçün dayandırma barədə qərar verib. Yalanın ömrü qısa olsa da, itaətsizliyin dövrü uzun oldu. Dövlətin rəsmi qərarı ola-ola, onu saymazdan və görməzdən gələrək tikinti işləri bir gün də olsa dayandırılmadı.

Bir çoxunun qarşısında dəmir qalxan kimi dikilən bu iradə və qətiyyət deputat və onun ailə üzvlərinin Qubada özbaşına tikdirdiyi qanunsuz obyektlər qarşısında əsnək, kövrək, həm də əhəmiyyətsiz bir duruma düşür. FHN bu tikintilər qarşısında biçarə qalıb.
FHN Quba şəhəri, Nəriman Nərimanov küçəsi 75 ünvanında yerləşən “Aqua Park” və onun ətrafında, həmin mərkəzin olduğu inzibati binanın yaxınlığında tikilən, gördüyünüz bu qanunsuz obyektin az qala bəndinə qoyulan daş qədər dayandırma, saxlama qərarı çıxarıb. Sifarişçi “A Ənd J Holding” MMC-yə rəsmi xəbərdarlıqlar edilib.

Təkcə bu obyektin qanunsuz olduğu və tikinti işlərinin dayandırılması ilə bağlı qurumun 27 oktyabr 2023-cü il tarixli, 30 yanvar 2025-ci il tarixli və 19 noyabr 2025-ci il tarixli qərarları var. Tikintidə Təhlükəsizliyə Nəzarət Dövlət Agentliyi artıq bu barədə FHN-in Əməliyyat-istintaq idarəsinə müraciət edib. Bundan əlavə, tikinti işləri qanunsuz aparıldığı üçün obyektin bütün kommunikasiya təchizatının dayandırılması məqsədilə “Azəriqaz”a, “Azərişığ”a və “Azərisu”ya rəsmi müraciət edilib. Amma bütün bu qərarlara olduğu kimi, bütün müraciətlərə də heç bir məhəl qoyulmayıb.

Vüqar Paşayev adlı şəxsin direktoru olduğu “Şaving İnşaat” MMC tərəfindən Quba şəhərinin 30–32-ci məhəlləsində heç bir sənəd və razılıq olmadan tikilən bu restoranın da deputat Əlibala Məhərrəmzadəyə məxsus olduğu iddia edilir.

FHN-in bir dayandırma qərarı da həmin obyektlə bağlıdır. İşlər rəsmən dayandırılmış zənn edilir, amma bu, heç də belə deyil. Obyektin tikinti işlərinin dayandırılması ilə bağlı qərarın elan edildiyi andakı fotoları ilə indiki halı araşdırılıb müqayisə edilsə, əhəmiyyət verilməyən növbəti bir dövlət qərarının sədası bəlli olar.(7times.az)

Azərbaycanda illərdir həllini tapmayan çoxmərtəbəli binalardakı "kupça" (çıxarış) problemi indi də tikinti şirkətlərinin əlində vətəndaşları açıq şəkildə istismar etmək üçün alətə çevrilib.

Ölkənin ən böyük tikinti şirkətlərindən olan "Kristal" ətrafında növbəti sənəd qalmaqalı yaşanır.

Şirkətin tikdiyi binalarda mənzil sahibi olan sakinlər çıxarış almaq üçün rəsmi rüsumdan dəfələrlə çox pul tələb olunmasından şikayətçidirlər.

Sakinlərin redaksiyamıza verdiyi məlumata görə, şirkət mənzillərin tam ödənişini etmiş və binanın dövlət qeydiyyatı tamamlanmış sakinlərə mülkiyyət hüququnu təsdiq edən çıxarışın (kupçanın) verilməsi üçün 500 manat nağd pul tələb edir. Tikinti şirkəti bu məbləğin sənədləşmə xərcləri üçün nəzərdə tutulduğunu iddia etsə də, rəsmi rəqəmlər tamamilə fərqli mənzərəni ortaya qoyur.

Tarif Şurasının və daşınmaz əmlakın qeydiyyatı haqqında qanunvericiliyin tələblərinə əsasən, yeni tikililərdə mənzilə ilkin kupçanın verilməsi üçün dövlət rüsumu sabit olaraq 50 manatdır. Mənzilin sahəsinə (kvadratmetrinə) və texniki pasportun hazırlanmasına görə tutulan xidmət haqqı da daxil olmaqla, 60–100 kv.m-lik orta statistik bir mənzilin rəsmi sənədləşmə xərci standart müddətdə (15 iş günü) maksimum 100–150 manat arasında dəyişir. Hətta sənədin 3 gün ərzində, sürətli qaydada çıxarılması üçün ödənilən təcili xidmət haqqı belə bu məbləği 200–250 manatdan yuxarı qaldırmır. Bu isə o deməkdir ki, "Kristal" tikinti şirkəti hər sakindən rəsmi dövlət rüsumundan ən azı 2 dəfə artıq pul tələb edir.

Hüquqi baxımdan, tikinti şirkəti sakinə mənzilin tam ödənişinin edildiyinə dair maliyyə arayışı və müqaviləni təqdim etdikdən sonra onun öhdəliyi başa çatmış hesab olunur (əgər daxili müqavilədə əlavə xidmət bəndi yoxdursa). Vətəndaş həmin sənədlərlə birbaşa ASAN Xidmət mərkəzlərinə müraciət edərək dövlət rüsumunu şəxsən ödəməli və kupçasını almalıdır.

Şirkətin prosesi öz üzərinə götürərək sakinlərdən 500 manat kimi astronomik məbləğ tələb etməsi qanunvericiliyin kobud şəkildə pozulması və vətəndaşın seçmək hüququnun əlindən alınmasıdır. Ödənişlərin hansı əsasla və hansı hüquqi sənədlə (kassa mədaxil orderi yoxsa sadə qəbz ilə) yığılması isə ciddi maliyyə sualları doğurur.

Binalarda yüzlərlə, bəzən minlərlə mənzilin olduğunu nəzərə alsaq, hər mənzildən qanunsuz olaraq artıq alınan 350-400 manat yekunda milyonlarla manatlıq böyük bir qara dövriyyənin yaranmasına səbəb olur. Sakinlər bildirirlər ki, şirkət rəhbərliyi bu məbləği ödəməyənlərə sənədləşmə prosesində süni maneələr yaradır, maliyyə arayışlarının verilməsini gecikdirir.

Yazıda adıçəkilən "Kristal" tikinti şirkətinə ünvanlanan suallar cavabsız qalıb.

AFN.az