Dövlətin vətəndaşlara pulsuz, şəffaf və rahat tibbi xidmət vəd etdiyi İcbari Tibbi Sığorta sisteminin arxasında qanunsuz bir "bazar" fəaliyyət göstərir. Dövlət xəstəxanalarının birində çəkilən və redaksiyamıza daxil olan şok görüntülər bunu sübut edir. Çöldə yüzlərlə xəstə insanın saatlarla növbə gözlədiyi bir vaxtda, qapıdakı nəzarətçilər və qeydiyyat şöbəsi cəmi 2 manat qarşılığında növbəsiz keçid təşkil edirlər. Əlinə pul alan şəxslər, can çəkən xəstələrin haqqını tapdalayaraq birbaşa həkim otağına daxil olurlar. Vətəndaşların üsyan etdiyi real görüntüləri təqdim edir və aidiyyəti qurumlara — TƏBİB və İcbari Tibbi Sığorta üzrə Dövlət Agentliyinə sual ünvanlayırıq: Bu rüsvayçılığa kim dur deyəcək?

1xeber.media

“Azza” şirniyyat evinin filiallarından birində vaxtı keçməmiş, lakin xarab olduğu iddia edilən məhsulun satıldığı bildirilir.

Bu barədə Feysbukdakı şikayət səhifələrinin birində paylaşım edən xanım istehlakçı “Azza”nın Azadlıq prospektində yerləşən filialından aldıqları yoqurtun qıcqırmış vəziyyətdə olduğunu iddia edib.

Onun sözlərinə görə, məhsulun üzərində son istifadə tarixinin 22 iyul göstərilib:

“Biz yoqurtu 19 iyul tarixində almışıq. Yoqurtu açandan sonra kəskin qoxu gəldi və başa düşdük ki, qıcqırıb. Məhsulu mağazaya geri qaytardım. Üzr istəmək əvəzinə dedilər ki, araşdırmadan sonra məlumat veriləcək. Nəyi araşdırırsınız? Satdığınız məhsul xarabdır. Bunu mənim uşağım bilmədən içsəydi, məsuliyyəti kim daşıyacaqdı?”.

Məsələ ilə bağlı “Azza” şirniyyat evinə sorğu ünvanlamışıq. Qarşı tərəfin mövqeyi daxil olduqdan sonra materiala əlavə ediləcək.(Tribuna.az )

VİDEO LİNDƏ: https://tribuna.az/azza-dan-alinan-mehsul-xarab-cixdi-video/

"İlin əvvəlində Sabunçu-Zabrat magistralı boyunca uzanan köhnə daş hasar suvanaraq açıq rəngə boyandı. Nəticədə kifayət qədər səliqəli və bir görünüş alındı.." "Dİia-az" xəbər verir ki, bunu özünün sosial şəbəkə hesabında tanınmış memar Elçin T.Əliyev qeyd edib.
O daha sonra fikrini belə davam etdirir: "Lakin çox keçmədən yenidən işlərə başlandı. İndi həmin hasarı eybəcər daş üzlük plitələri ilə örtürlər.
Diqqət yetirin: təbii kərpic hörgüsünü əvvəlcə suvayırlar, sonra rəngləyirlər, ardınca isə yenidən… kərpici təqlid edən üzlük ilə örtürlər! Bundan daha məntiqsiz qərar təsəvvür etmək çətindir. Tam absurddur!
Nə üçün? Hansı məqsədlə? Əvvəlki variant kimə və nəyi ilə xoş gəlmədi ki, onu yenidən dəyişdirirlər? Bu dekorativ üzlüyün dövlət büdcəsinə neçəyə başa gələcəyi barədə məlumat varmı?
Düşünürəm ki, bu işə ən azı bir neçə yüz min manat xərclənəcək. Axı hasarın uzunluğu demək olar ki, bir kilometrdir!
Təəssüf ki, bu cür mübahisəli qərarlar artıq uzun illərdir heç bir izahat verilmədən qəbul olunur. Böyük məbləğdə vəsait xərclənir, cəmiyyət isə sadəcə fakt qarşısında qoyulur. Hər şey səssiz, şəffaflıq olmadan və heç bir məsuliyyət daşımadan həyata keçirilir.
Üstəlik, bu, həm estetik baxımdan uğurlu deyil, həm də tamamilə lazımsızdır. Belə üzlüklər bizim iqlim şəraitində çox vaxt cəmi bir neçə ildən sonra dağılmağa başlayır: ayrı-ayrı daşlar qopub düşür, sonra isə yenidən təmir işləri aparılır və büdcədən əlavə vəsait xərclənir.
Əslində bu, hasarın hamar səthini vaxtaşırı sadəcə yenidən rəngləməkdən dövlət büdcəsi üçün qat-qat baha və zərərlidir. Görünür, hesab da məhz buna qurulub..."(Dİia-az)

Azərbaycanda dövlət satınalmalarının 51 faizindən çoxunda ehtimal olunan məbləğlə qalib şirkətin təklif etdiyi qiymət arasındakı fərq 20 faizi ötüb. Dövlət satınalmalarında hazırda əsas diqqət yetirilməli olan məsələlərdən biri məhz qiymət fərqləridir.

“Apardığımız araşdırmalar göstərdi ki, ehtimal olunan məbləğdən 20 faizdən çox fərqlənən satınalmaların sayı 51 faizdən yuxarıdır. MDB ölkələrində bu göstərici üzrə qırmızı xətt 15-25 faiz hesab olunur”, – deyə o bildirib.

V.Gülməmmədov qeyd edib ki, həddindən artıq aşağı qiymət təklifləri də risk yaradır.

“Ən ucuz qiymət meyarı hazırda əksər ölkələrdə problemlərdən biridir. Çünki həddindən artıq aşağı qiymət sonradan layihələrin ya başa çatdırılmamasına, ya da keyfiyyətli icra olunmamasına səbəb ola bilər. Buna görə də yalnız yuxarı deyil, aşağı qiymət həddinin də müəyyənləşdirilməsi vacibdir”.

Bunları Azərbaycan Hesablama Palatasının sədri Vüqar Gülməmmədov Trend Beynəlxalq İnformasiya Agentliyinə və İctimai Televiziyaya birgə müsahibəsində deyib.

Qeyd edək ki, Hesablama Palatasının sədri Vüqar Gülməmmədov hələ aprel ayında Milli Məclisin İqtisadi siyasət, sənaye və sahibkarlıq komitəsinin iclasında Hesablama Palatasının 2025-ci ildə fəaliyyəti haqqında hesabatının müzakirəsi zamanı da açıqlamışdı ki, “Nəzarət tədbirlərinin nəticələri göstərir ki, keçirilmiş rəqabətli satınalmaların yarısında müqavilə məbləğləri ehtimal olunan qiymətdən 20 faiz və daha çox fərqlənib. Eyni zamanda bir mənbədən satınalma metodu ilə əksər hallarda ehtimal olunan qiymət hesablanmır.”

Göründüyü kimi Hesablama Palatasının sədri dövlət satınalmalarında ehtimal olunan məbləğdən 20 faizdən çox fərqlənən satınalmaların sayının artması barədə həyəcan təbili çalır. Amma bəzi dövlət qurumları tərəfindən keçirilən satınalmalarda ehtimal qiymətləri demək olar, nəzərə alınmır. Ya ehtimal olunan qiymətlər düzgün hesablanmır, ya da formal bir xarakter daşıyır. Bunun bariz nümunəsini “İnnovasiya və Təchizat Mərkəzi” publik hüquqi şəxsi tərəfindən keçirilən dövlət satınalmalarında da görmək mümkündür.

Qeyd edək ki, sözügedən qurumun bağladığı müqavilələrdə ehtimal olunan qiymətdən nəinki 20 faiz, 70-80 faiz aşağı olur. Onlardan son aylarda bağlanmış bir neçəsini diqqətinizə çatdırırırıq.

“Ana və uşaqların sağlamlığının yaxşılaşdırılmasına və uşaqların icbari dispanserizasiyadan keçirilməsinə dair Dövlət Proqramının icrası məqsədilə tibb vasitələri”nin satın alınması üzrə “ZEYTUN PHARMACEUTİCALS” MMC ilə 447.749,35 manat dəyərində satınalma müqaviləsinin bağlanılması planlaşdırılır. Açıq tenderin ehtimal olunan qiyməti 2.558.259,59 manat müəyyən edilib.

“Tibb müəssisələrinin ehtiyatlarının təminatı məqsədilə dərman vasitələri”nin satın alınması üzrə “ZEYTUN PHARMACEUTİCALS” MMC ilə 12.360.201,81 manat dəyərində satınalma müqaviləsi bağlanılıb. Açıq tenderin ehtimal olunan qiyməti 39.602.007,46 manat müəyyən edilib.

“Dezinfeksiyaedici vasitələr”in (2026-cı il üzrə) satın alınması üzrə “Sinamedica” MMC ilə 263.470,4 manat dəyərində satınalma müqaviləsi bağlanılıb. Açıq tenderin ehtimal olunan qiyməti 747.046,20 manat müəyyən edilib.

“Dezinfeksiyaedici vasitələr”in (2026-cı il üzrə) satın alınması üzrə “Medsol” MMC ilə 17.700 manat dəyərində satınalma müqaviləsi bağlanılıb. Açıq tenderin ehtimal olunan qiyməti 747.046,20 manat müəyyən edilib.

“Dezinfeksiyaedici vasitələr”in (2026-cı il üzrə) satın alınması üzrə “FACET” MMC ilə 628.733,5 manat dəyərində satınalma müqaviləsi bağlanılıb. Açıq tenderin ehtimal olunan qiyməti 747.046,20 manat müəyyən edilib.

“Şəkərli diabet xəstəliyi üzrə tədbirlər ilə bağlı xərclər çərçivəsində tibbi cihaz və tibb vasitələri”nin satın alınması üzrə “DİAMED CO” MMC ilə 462.796 manat dəyərində satınalma müqaviləsi bağlanılıb. Açıq tenderin ehtimal olunan qiyməti 7.757.877,08 manat müəyyən edilib.

“Tibb müəssisələrində istifadə üçün nəzərdə tutulmuş spesifik ləvazimat və sərfiyyat malları”nın (LOT 1) satın alınması üzrə “ALBATROS HELTKEYR” MMC ilə 605.794,3 manat dəyərində satınalma müqaviləsi bağlanılıb. Açıq tenderin ehtimal olunan qiyməti 4.747.793,40 manat müəyyən edilib.

“Tibb müəssisələrində istifadə üçün nəzərdə tutulmuş tibbi sərf (Lot 2) malları”nın satın alınması üzrə “MEDEKS” MMC ilə 865.346,51 manat dəyərində satınalma müqaviləsi bağlanılıb. Açıq tenderin ehtimal olunan qiyməti 2.389.184,11 manat müəyyən edilib.

“Tibb müəssisələrində istifadə üçün nəzərdə tutulmuş spesifik ləvazimat və sərfiyyat malları(LOT 3)”nın satın alınması üzrə “ZEYTUN PHARMACEUTİCALS” MMC ilə 254.788,02 manat dəyərində satınalma müqaviləsi bağlanılıb. Açıq tenderin ehtimal olunan qiyməti 3.066.734,62 manat müəyyən edilib.

“Tibb müəssisələrində istifadə üçün nəzərdə tutulmuş spesifik sərfiyyat malları (LOT 4)”nın satın alınması üzrə “ZEYTUN PHARMACEUTİCALS” MMC ilə 947.928,69 manat dəyərində satınalma müqaviləsi bağlanılıb. Açıq tenderin ehtimal olunan qiyməti 2.152.111,52 manat müəyyən edilib.

“Tibb müəssisələrində istifadə üçün nəzərdə tutulmuş tibbi sərf (Lot 5) malları”nın satın alınması üzrə “VİTTA ELMİ-TEXNİKİ” MMC ilə 372.901,24 manat dəyərində satınalma müqaviləsi bağlanılıb. Açıq tenderin ehtimal olunan qiyməti 2.081.017,62 manat müəyyən edilib.

“Tibb müəssisələrində istifadə üçün nəzərdə tutulmuş spesifik ləvazimat və sərfiyyat (LOT 6) malları”nın satın alınması üzrə “BESAN” MMC ilə 440.966 manat dəyərində satınalma müqaviləsi bağlanılıb. Açıq tenderin ehtimal olunan qiyməti 1.632.775,24 manat müəyyən edilib.

“Tibb müəssisələrində istifadə üçün nəzərdə tutulmuş spesifik ləvazimat və sərfiyyat malları”nın (LOT 7) satın alınması üzrə “ZEYTUN PHARMACEUTİCALS” MMC ilə 585.095,97 manat dəyərində satınalma müqaviləsi bağlanılıb. Açıq tenderin ehtimal olunan qiyməti 3.088.962,77 manat müəyyən edilib.

“Tibb müəssisələrində istifadə üçün nəzərdə tutulmuş spesifik ləvazimat (Lot 8) malları”nın satın alınması üzrə “SOLAMEDICAL” MMC ilə 845.925,95 manat dəyərində satınalma müqaviləsi bağlanılıb. Açıq tenderin ehtimal olunan qiyməti 1.266.580,93 manat müəyyən edilib.

Dövlət satınalmalarının vahid internet portalına yerləşdirilmiş bu məlumatdan da görsəndiyi kimi satınalan təşkilat olaraq “İnnovasiya və Təchizat Mərkəzi” publik hüquqi şəxsi tərəfindən müəyyən olunan ehtimal qiyməti ilə təchizatçı MMC-lərin təklif etdiyi qiymətlər arasında kəskin fərq var.

Qeyd edək ki, “Dövlət Satınalmaları haqqında” Azərbaycan Respublikasının Qanununda təchizatçıların satınalmadan kənarlaşdırılması müəyyən edilib. Sözügedən Qanunun 35.1.8. maddəsinə görə təchizatçının təqdim etdiyi təklifin qiyməti ehtimal olunan qiymətlə müqayisədə 20 faizdən aşağı olarsa, satınalma komissiyasının sorğusu əsasında təchizatçının təqdim etdiyi izahat və məlumatlar təhlil edildikdən sonra satınalma müqaviləsinin icrasına əsaslı şübhələr qaldıqda təchizatçı müsabiqədən kənarlaşdırılmaldır.

Qeyd edək ki, ehtimal olunan qiymət satınalma prosedurunda mal, iş və xidmətlərin vergi və rüsumlar daxil olmaqla bazar şərtlərinə əsasən müəyyən edilən maksimum dəyəridir. Bu qiymət satınalan təşkilat tərəfindən təkliflərin qiymətləndirilməsi üçün istifadə edilir və bazarın təhlili, müqayisəli üsullar və ya statistik məlumatlar əsasında hesablanır və dövlət vəsaitlərindən səmərəli istifadə məqsədilə 10 faizdən çox güzəştə yol vermək olmaz.

Amma göründüyü kimi “İnnovasiya və Təchizat Mərkəzi” publik hüquqi şəxsi bir çox açıq tender müsabiqəsində ehtimal olunan qiymətlə müqayisədə 20 faizdən dəfələrlə aşağı, hətta 60-70 faizdən də aşağı qiymət təqdim etmiş MMC-lərlə satınalma müqaviləsi bağlamışdır ki, bu da “Dövlət Satınalmaları haqqında” Qanunun tələblərinin pozulması deməkdir.

Bundan əlavə Hesablama Palatasının sədri Vüqar Gülməmmədovun açıqladığı kimi həddindən artıq aşağı qiymət sonradan layihələrin ya başa çatdırılmamasına, ya da keyfiyyətli icra olunmamasına səbəb ola bilər.

Qeyd edək ki, “İnnovasiya və Təchizat Mərkəzi” publik hüquqi şəxsin direktoru Nurlan Quliyevdir. Nurlan Quliyev 2023-cü ilin iyun ayından “İnnovasiya və Təchizat Mərkəzi”nin direktorudur. Medianın yaydığı məlumatlara görə Nurlan Quliyev İcbari Tibbi Sığorta üzrə Dövlət Agentliyinin İdarə Heyyətinin sədri olmuş Zaur Əliyevin kadrıdır. Vəzifə pilləsində yüksəlişi də birbaşa onunla bağlıdır. Vaxtı ilə İcbari Tibbi Sığorta üzrə Dövlət Agentliyinin Satınalma və Təchizat Departamentinin müdiri vəzifəsində çalışıb.
Göründüyü kimi Hesablama Palatasının sədri Vüqar Gülməmmədov dövlət satınalmalarında ehtimal olunan məbləğdən 20 faizdən çox fərqlənən satınalmaların sayının artığını vurğulayır, “İnnovasiya və Təchizat Mərkəzi”nin direktoru Nurlan Quliyev isə ehtimal qiymətlərinə baxmadan istədiyi kimi müqavilələr bağlayır.(aktualinfo.net)

Səhiyyə Nazirliyinin Analitik Ekspertiza Mərkəzinin (AEM) fəaliyyətində yaranan ciddi nöqsanlar, idarəetmədəki boşluqlar və kəskin kommunikasiya əngəlləri sahibkarların, eləcə də vətəndaşların haqlı narazılığına səbəb olur.

NOCOMMENT.az xəbər verir ki, qurumun məsuliyyət daşıdığı sahələrdə hökm sürən yarıtmaz vəziyyət təkcə xidmət sektorunu deyil, birbaşa ictimai sağlamlığı da təhlükə altına alır.

Zirzəmilərdə fəaliyyət göstərən "saxta həkimlər" və nəzarətsizlik

Son dövrlərdə internet resurslarında və sosial şəbəkələrdə yayılan videogörüntülər səhiyyə nəzarətinin necə bərbad durumda olduğunu açıq şəkildə nümayiş etdirir. Belə ki, antisanitar şəraitdə — zirzəmilərdə anesteziyasız tibbi müdaxilələr həyata keçirən, heç bir tibbi təhsili olmadan özünü dırnaqarası "həkim" adlandıran şəxslərin qanunsuz əməlləri cəmiyyətdə ciddi narahatlıq doğurur.

Bu tip qanunsuz halların qarşısını almaq, vətəndaşların sağlamlığı və həyatı ilə oynayan saxtakarlarla mübarizə aparmaq birbaşa Analitik Ekspertiza Mərkəzinin birbaşa vəzifəsidir. Lakin təəssüf ki, qurumun bu istiqamətdəki nəzarət mexanizmləri demək olar ki, işləmir.

İdxal və qeydiyyat şöbəsində kütləvi süründürməçilik

Mərkəzin tibbi vasitələrin qeydiyyatı və idxalı şöbəsində də vəziyyət ürəkaçan deyil. Qurum daxilindəki bürokratik əngəllər səbəbindən bütün şirkətlər arasında ciddi narazılıq hökm sürür. Sahə üzrə məsul şəxslərin, o cümlədən sədr müavini Rafiq Xudaverdiyevin nəzarət etdiyi bu istiqamətdə işlərin gedişatı tamamilə dondurulub.

Sahibkarlar qanuni sənədlərini almaq üçün aylarla qapı-qapı düşməli, dəfələrlə zəng etməli olurlar. İdarənin daxili nömrələrinə heç bir cavab verilməməsi isə vəziyyəti daha da dözülməz edir. Zənglərə cavabdeh şəxslərin "işçi yoxdur" bəhanəsi ilə prosesi həftələrlə, aylarla uzatması sahibkarları çıxılmaz vəziyyətə salır.

"İstisna" şəxslər, qapalı qapılar və "qara siyahı" təhdidi

Mövcud idarəetmə sistemində yalnız müəyyən tanışları və ya şəxsi əlaqələri olan şəxslər öz işlərini sürətli şəkildə həll edə bilirlər. Digər sahibkarlar ise günlərlə zəng vurub cavab tapa bilmir, quruma gedərək səy göstərsələr də, nəticə əldə edə bilmirlər. Hətta haqsızlıqla üzləşən və hüquqlarını tələb edən şəxslərin bəzi hallarda "qara siyahı"ya salınmaqla hədələndiyi bildirilir.

Digər dövlət qurumlarında vətəndaşların müraciətləri üçün müəyyən imkanlar açıldığı halda, bu idarə konkret olaraq zənglərə cavab vermir, heç bir müraciəti cavabsız qoyur. Nəticədə sahibkarlar hüquqi müstəvidə mübarizə aparmaq məcburiyyətində qalır və ya bürokratik divarlarla qarşılaşaraq ortada qalırlar.

Ümumi fəaliyyətsizlik: Kosmetologiya və digər sahələr nəzarətdən kənardır

Ümumilikdə, Analitik Ekspertiza Mərkəzinin müvafiq şöbəsi kateqorik olaraq işləmir. Tibbi vasitələrin idxalı, kosmetoloqlara və həkimlərə nəzarət mexanizmləri tamamilə sıradan çıxıb. Kosmetoloqların fəaliyyətinə nəzarət edilmir, səhiyyə şöbələri isə funksiyalarını yerinə yetirmir.

Sahibkarlar və vətəndaşlar bu dərin bürokratik səddin aradan qaldırılması, idarədəki süründürməçilik hallarının araşdırılması və məsələyə ciddi dövlət nəzarətinin tətbiq olunması üçün təcili addımların atılmasını gözləyirlər.

NOCOMMENT.az

Azərbaycanın vaxtilə ən böyük tikinti şirkətlərindən olan “Akkord Sənaye Tikinti İnvestisi̇ya Korporasiyasi” ASC-nin 2025-ci il üzrə maliyyə vəziyyətini açıqlayıb.

Ötən il şirkət zərərlə işləyib, satışlar olmayıb, əməliyyat mənfəəti qeydə alınmayıb.
Hesabata əsasən, 2025-ci ildə «Akkord» şirkəti öz məhsulları deyil, yalnız öz əsas vəsaitlərini satıb. Ötən il əsas vəsaitlərin satışından 474,7 min manat gəlir əldə edib ki, bu da, şirkətin xərclərini qarşılamağa kifayət etməyib. Belə ki, ötən il şirkətin kommersiya xərcləri 2 milyon 570,6 min manat, inzibati xərcləri 17,7 min manat olub.
Xərclərin çoxluğu səbəbindən şirkət 2025-ci ili də böyük zərərlə başa vurub. 2025-ci ildə şirkətin zərəri 2 milyon 113,6 min manat təşkil edib. Zərər 2024-cü ilə nəzərən 1 milyon 240 min manat və ya 2,4 dəfə artıb. Qeyd edək ki, 2024-cü ildə vəziyyət nisbətən yaxşı idi – “Akkord”şirkət 2024-cü ili 874 min manat zərərlə tamamlamışdı.
2025-ci ilin sonuna “Akkord”un cəmi aktivləri 474,5 milyon manat olub. Bu, 2024-cü ilə nəzərən 13 milyon manat və ya 2,6% azalıb. Aktivlərin azalmasına səbəb şirkətin öz balansında olan torpaq,əmlak və avadanlıqları satması olub.
Qeyd edək ki, Müşahidə Şurasının sədri Malik Məmmədovdur.

“Akkord” şirkətinin faktiki sahibi kimi 2000-2020-ci illərdə Azərbaycanın baş prokuroru olan Zakir Qaralovun adı çəkilir. Mediada da bu barədə kifayət qədər məlumat var.
Onu da deyək ki “Akkord”a qarşı 43 iddia qaldırılıb. Onların arasında hətta şirkətin işçiləri də olub.

Fed.az

Avroliqada uğurlu iştirakına görə, “Qarabağ” FK UEFA-dan bu il 65 milyon avro mükafat aldı. Bu məbləğ bizim 50 universitetin 35 ildə elm və innovasiyadan qazandığı məbləğdən 65 dəfə çoxdur. Hər bir işin nəticəsi onun menecerinin peşəkarlığından asılıdır.

Bu sözləri dosent, Ali təhsil üzrə ekspert İlham Əhmədov bildirib. O qeyd edib ki, peşəkar menecer futbola elm kimi baxır, səriştəsiz menecer isə elmə futbol kimi:

“Qurban Qurbanov deyir ki, elm kimi futbol da inkişaf edir.
Sitat – “Avropada futbola böyük yatırımlar edirlər. Futbol o deyil ki, 11 nəfər meydana çıxdı, oynadı. Vacib o qədər detallar var ki. İnfrastruktur, bərpa, sağlamlıq və s. Çox geridəyik. Azərbaycan reallığında belə uğur qazandıq, böyük təcrübə topladıq”.

“Qarabağ” FK qazandığı 65 milyon avro sadəcə maliyyə göstəricisi deyil. Bu, sistemli idarəetmənin, planlı inkişafın və nəticəyə yönəli menecmentin göstəricisidir.

Elm-təhsil sisteminin gəliri isə onların elmi potensialından çox, idarəetmə modelinin güzgüsüdür.

E. Əmrullavev isə deyir ki, mən ölkədə alim tanımıram.

Yaxşı nəticə heç vaxt təsadüfi olmur. Nəticə, ya sistemin məhsuludur, ya da sistemsizliyin, ya peşəkarlığın məhsuludur, ya da səriştəsizliyin.

Peşəkar menecer futbola elm kimi baxır. Səriştəsiz menecer elmə futbol kimi baxır.
Fərq bu qədər sadə”.

Tribuna.az

Elm və Təhsil Nazirliyi şagird sayının azlığını bəhanə edərək daha bir kənd məktəbini qapatmağa hazırlaşır.

Bu dəfə hədəfdə Şəkinin Daşbulaq kənd orta məktəbidir. Büdcədən düz 400 min manat vəsait xərclənərək tikilən yeni modul məktəbin qapısına qıfıl vurmaq planı kənd sakinləri və ictimaiyyət tərəfindən kəskin etirazla qarşılanıb.

Bərbad yollar şəraitində uşaqların qonşu kəndlərə göndərilməsi və məktəb işçilərinin işsiz qalması kəndin tamamilə boşalmasına zəmin yaradır.

1xeber.media-nın tribuna.az-a istinadla hazırladığı Daşbulaq kəndində baş verən rüsvayçılığın gizli məqamları süjetimizdə!

"Azəriqaz" istehsalat birliyində ixtisarlar gözlənilir. Müvafiq bildirişlər artıq agentliyin bir çox departament və şöbələrinin, xüsusən də regionların işçilərinə göndərilib. haqqin.az saytı vəziyyətlə bağlı redaksiyamıza daxil olan çoxsaylı sosial media paylaşımlarından və sorğulardan məlumat əldə edib.

Məlum oldu ki, əvvəlki illərdə bu cür ixtisarlar tez-tez qanun pozuntuları ilə müşayiət olunurdu. Lakin işdən çıxarılan bəzi işçilər sonradan məhkəmə qərarları ilə işə bərpa edildi.

Qarabağ müharibəsi əlili Əhməd Rəhmanov uzun illər "Azəriqaz"da işlədiyini bildirib. 2025-ci ilin mart ayında işdən çıxarılıb. O, işə bərpa və məcburi işə gəlmədiyi üçün əmək haqqının ödənilməsi tələbi ilə iddia qaldırıb. İş Ali Məhkəməyə çatıb. Ali Məhkəmə iddianı təmin etdikdən sonra Rəhmanov yenidən işə bərpa edilib, lakin oktyabr ayında yenidən işdən çıxarılıb. O, yeni bir iddia qaldırıb və işə bərpa, məcburi işə gəlmədiyi üçün əmək haqqının ödənilməsi və digər müavinətlər barədə qərar qəbul edib. İndi onun edə biləcəyi tək şey gözləməkdir.

Əhməd Rəhmanov

Rəhmanovun sözlərinə görə, ştatların ixtisarına görə işdən çıxarılarkən qanun pozuntularına yol verilib və bu da Dövlət Əmək Müfəttişliyinin "Azəriqaz" İB-nin baş direktoru Azər Məmmədovu təxminən 5500 manat cərimələməsinə səbəb olub. Bundan əlavə, Azər Məmmədov ştatların ixtisarına görə başqa bir Qarabağ müharibəsi veteranının işdən çıxarılmasına görə 2000 manat cərimələnib. İddialarını dəstəkləmək üçün Rəhmanov redaksiyaya müvafiq hesabatlar təqdim edib.

İşçilər deyirlər ki, istehsal müəssisəsində ixtisarlar mexaniklərin və müfəttişlərin işdən çıxarılması ilə başlayıb. Bu işçilər qaz xətlərini yerində yoxlamaqdan məsul idilər. İşçilər üçün keçirilən imtahanlar da ciddi narazılığa səbəb olur. Məsələn, Salyan Regional İstehsalat İdarəsinin keçmiş işçisi, 62 yaşlı Pərvanə İsmayılova deyir ki, onun şöbəsində dörd nəfərin işdən çıxarılması planlaşdırılırdı. Uzun illər qaz sənayesində iqtisadçı kimi çalışsa da, təqaüdə çıxmasından üç il əvvəl işdən çıxarılıb.

"İmtahandan iki gün əvvəl bizə suallar verildi, ona görə də hazırlaşmağa vaxt yox idi. Mən iqtisadçıyam və mənə mühasibat uçotu sualları verdilər", - deyə İsmayılova bildirib. O, əlavə edib ki, ona fərqli, daha aşağı vəzifə təklif olunub. O, maaş fərqinə görə vəzifədə yüksəliş tələb edib. Daha sonra məlum olub ki, o, "işləməkdən imtina etmək" bəhanəsi ilə işdən çıxarılıb. İsmayılova iddia qaldıraraq iddia edib ki, heç vaxt işləməkdən imtina edən heç bir sənəd imzalamayıb. O, həmçinin qeyd edib ki, onun yaşında yeni iş tapmaq mümkün deyildi və yeganə gəlir mənbəyini itirib.

Assosiasiyanın əməkdaşı Əsədullah Feyzullazadə bildirib ki, 30 il qaz sistemində işləyib və təqaüdə çıxmazdan iki ay əvvəl imtahana çağırılıb. O, təqaüd yaşına yaxınlaşdığını əsas gətirərək imtahandan imtina edib. Lakin tezliklə ona bildirilib ki, guya imtahanda iştirak edib və cəmi 50 bal toplayıb. Feyzullazadə apelyasiya şikayəti verib, lakin işə baxılana qədər artıq təqaüdə çıxmışdı.

Əsədullah Feyzullazadə

"Orada işlədiyim müddətdə mənə "Əməkdar neftçi" adı verildi. Niyə təqaüdə çıxmazdan iki ay əvvəl məni imtahana çağırıb guya aşağı bal topladığımı iddia edən sənəd hazırladılar?", - keçmiş qaz işçisi şikayətlənir.

Səkkiz ay əvvəl yüksək bal toplayan işçilər yenidən qiymətləndirmə üçün geri çağırılır, baxmayaraq ki, imtahanların hər beş ildən bir keçirilməsi nəzərdə tutulur. Bir işçi yazır ki, hər bölgədə təxminən 15 mexanik və dörd-beş mühəndis işdən çıxarılacaq.

Digər məlumatlara görə, assosiasiya qazpaylama stansiyalarında (QDS) operator xidmətlərinin mərhələli şəkildə ləğvinə başlayır. Birinci mərhələdə, iyul ayında 12 QDS-də operator xidmətlərinin ləğvi planlaşdırılır. İlin sonuna qədər 75 QDS-də operatorların ləğvi planlaşdırılır. Regionlarda mühasibat şöbəsi işçilərinin ixtisarları da planlaşdırılır.

"Azəriqaz" istehsalat birliyi ixtisarlarla bağlı sorğumuza cavab vermədi. Digər hansı şöbələrin ləğv ediləcəyi, neçə işçinin ixtisar ediləcəyi və ya imtahanlarla bağlı hər hansı bir problemin olub-olmadığı hələlik məlum deyil.(Haqqin.az)

Binəqədi rayonu, Xutor qəsəbəsində bir müddət əvvəl dayandırıldığı bildirilən tikinti işləri yenidən bərpa olunub və hazırda demək olar ki, yekunlaşmaq üzrədir. Maraqlıdır ki, bir vaxtlar qanunsuz hesab edilərək dayandırılan tikintinin hansı əsaslarla yenidən davam etdirilməsinə icazə verildiyi hələ də açıqlanmır.

Bizimesr.com-a daxil olan məlumata görə, sözügedən obyektin tikintisinə təxminən bir il əvvəl başlanılıb. Tikinti işləri zamanı piyadaların hərəkəti məhdudlaşdırıldığı üçün ərazi sakinləri tərəfindən aidiyyəti qurumlara çoxsaylı şikayətlər ünvanlanıb. Araşdırmalar zamanı məlum olub ki, iri ticarət mərkəzi kimi nəzərdə tutulan obyektin tikintisi üçün müvafiq icazə sənədləri ümumiyyətlə yoxdur. Bundan sonra tikinti işlərinin Binəqədi Rayon İcra Hakimiyyətinin göstərişi ilə dayandırıldığı bildirilib.

Lakin təxminən üç ay sonra tikinti yenidən bərpa edilib. Hazırda obyektin tikintisi sürətlə davam etdirilir və artıq başa çatmaq üzrədir. Maraqlıdır ki, bu dəfə sakinlərin etiraz və şikayətləri də nəticəsiz qalıb.
Bizimesr.com-un əldə etdiyi məlumata görə, obyekt hələ də lazımi icazə sənədləri olmadan inşa edilir və hüquqi statusunda hər hansı dəyişiklik baş verməyib. Maraqlıdır, əvvəllər qanunsuz sayılan tikinti indi hansı hüquqi əsaslarla davam etdirilir?

Bu suallara kim cavab verə bilər?

Tikinti üçün Dövlət Şəhərsalma və Arxitektura Komitəsinin rəsmi icazəsi varmı?
Əgər icazə verilibsə, bu sənəd nə vaxt və hansı əsaslarla təqdim olunub?
Əgər icazə yoxdursa, tikinti işlərinin davam etdirilməsinə kim göz yumur?
Məsələ ilə bağlı Binəqədi Rayon İcra Hakimiyyətinin başçısı Elxan Allahverdiyev və zərbaycan Respublikasının Dövlət Şəhərsalma və Arxitektura Komitəsinin sədri Anar Quliyev qarşısında da ciddi suallar yaranır.
Bir vaxtlar dayandırılan tikintinin yenidən başlamasına hansı əsaslarla, hansı dövlət qurumu razılıq verib?
Bununla bağlı rəsmi qərar və ya icazə sənədi mövcuddurmu?
Bizimesr.com-un araşdırmasına görə, obyektin sahibi Elman adlı sahibkardır. Tikinti işlərini isə Rövşən adlı şəxs təşkil edir və bütün rəsmi danışıqları da məhz onun apardığı bildirilir.

Məlumata əsasən, dəmir konstruksiyalar üzərində inşa edilən obyekt gələcəkdə ticarət mərkəzi kimi fəaliyyət göstərəcək.
Bizimesr.com məsələ ilə bağlı Binəqədi Rayon İcra Hakimiyyətinin, Dövlət Şəhərsalma və Arxitektura Komitəsinin və digər aidiyyəti qurumların rəsmi mövqeyini dərc etməyə hazırdır.
**
Binəqədi rayon İcra Hakimiyyətindən sözügedən tikinti ilə bağlı göndərilən sorğuya cavab verilib. Cavabı olduğu kimi təqdim edirik!

"Sorğunuzla bağlı bildiririk ki, sözügedən ünvanda vətəndaş uzun illərdir mülkiyyətində olan qeyri-yaşayış sahəsində zərurət yarandığından yenidənqurma işləri həyata keçirmişdir. Həmçinin, qeyd olunan ünvanda tikinti və yenidənqurma işlərinin həyata keçirilməsi ilə bağlı aidiyyəti dövlət qurumları tərəfindən qanunvericiliyin tələblərinə uyğun olaraq müvafiq razılıq və icazələr verilmişdir".
Diqqət çəkən məqam ondan ibarətdir ki, Binəqədi rayon İcra Hakimiyyətindən verilən cavabda tikinti və yenidənqurma işlərinə icazə verildiyi bildirilsə də, həmin icazənin nömrəsi, verilmə tarixi, hansı dövlət qurumu tərəfindən verildiyi, qərarın rekvizitləri və ya dövlət reyestrindəki qeydiyyat məlumatı göstərilmir. Həmçinin, bu məlumatları təsdiq edən hər hansı rəsmi sənəd də cavaba əlavə edilmir.
Dövlət qurumunun "icazə verilib" ifadəsi onun rəsmi mövqeyi hesab oluna bilər. Lakin bu, özlüyündə icazənin mövcudluğunu təsdiq edən hüquqi sənəd deyil. Xüsusilə informasiya sorğularına cavab verilərkən qərarın rekvizitləri və ya qanunvericiliklə məhdudlaşdırılmadığı halda təsdiqedici sənədlərin təqdim olunması şəffaflığın əsas elementlərindən biri hesab edilir.
Bu baxımdan sual yaranı - əgər tikinti və ya yenidənqurma işlərinə həqiqətən müvafiq icazə verilibsə, həmin icazənin nömrəsini, tarixini və onu təsdiq edən sənədi açıqlamağa nə mane olur?
Şəffaflığın təmin edilməsi və ictimai etimadın artırılması baxımından dövlət qurumlarının informasiya sorğularına mümkün qədər konkret, əsaslandırılmış və sənədlərlə təsdiqlənən cavablar verməsi mühüm əhəmiyyət daşıyır.(Bizimesr.com)
Araşdırmalarımız davam edir...

VİDEO LİNKDƏ: https://www.bizimesr.com/az/post/bineqedi-rih-qanunsuz-tikildiyi-deyilen-obyekte-icaze-vermisik-deyir---senedler-ise-ortada-yoxdur-22678